Deri tani, Kosova është kryesisht problem i Shqiptarëve dhe sërbëve por bashkimi i saj me Shqipërinë është problem i gjithë fqinjëve tanë ballkanik dhe aleatëve të tyre perëndimor. Evropës dhe Amerikës nuk i intereson bashkimi i Shqiptarëve, por kërkojnë qetësi të mjaftueshme për të shfrytëzuar pozicionin gjeografik dhe qeveritë kaotike Shqiptare për realizimin e planeve ekonomike, që nga transporti i naftës së Lindjes së Mesme e deri tek pasuritë natyrore të pashfrytëzuara të trojeve Shqiptare.
Lufta për çlirimin e Kosovës mund të jetë bërë për të ndaluar genocidin por nuk duhet të na gënjejë mendja se pavarësia njihet për lirinë e Shqiptarëve. Ndalimi i genocidit dhe pavarësia janë natyrale për Shqiptarët e vuajtur ndërsa për fuqitë Perëndimore janë si nata me ditën. Çështja Kosovare është çështje lirie vetëm për Shqiptarët dhe serbët. Për të gjithë të tjerët, miq e armiq, Kosova dhe bashkimi i saj me Shqipërinë është çështje tërësisht ekonomike e aspak humanitare.
Perëndimi e ka më të lehtë të komandojë e shfrytëzojë një Kosovë e Shqipëri të varfër sesa të bëjë kontrata me Serbinë e Rusinë. Rusia kërkon të rikthehet në një superfuqi duke formuar një doganë midis Lindjes dhe Perëndimit, prandaj kërkon me kaq këmbëngulje bashkimin ekonomik të vendeve ish Sovietike. Amerika e shmangu Rusinë duke zotëruar puset e naftës, ndërsa Evropa kërkon të jetë e pavaruar nga Rusi dhe të transportojë naftën nga Shqipëria e Kosova me një çmim shumë herë më të arsyeshëm, për të mos thënë falas. Që të realizohen këto plane, duhen zgjidhur ose mundësisht të anashkalohen (Po! anashkalohen) luftrat etnike.
Planet e Evropës janë që të gënjejë urinë Shqiptare për pavarësi me një kothere bukë të helmuar dhe ndërkaq të mbaj Shqipërinë të prangosur me ëndrrat se një ditë do pranohet në familjen e madhe Evropiane. Ky plan i jep Evropës zgjidhjen më të mirë për të qetësuar gjakrat në Ballkan dhe për të vazhduar projektet për një Evropë të bashkuar, të pavaruar nga Amerika e Rusia. Amerika ka më pak interes në Kosovë, prandaj e ka lënë çështjen të zvarritet, duke e ruajtur atë si rezervë për të mbështetur ose kundërshtuar planet Evropiane.
Në këtë luftë të ashpër politike, Shqiptarëve të Kosovës u ngelet të pranojnë pavarësinë e kushtëzuar Perëndimore me shpresën se do bashkohen një ditë në një Evropë pa kufij ose të kërkojnë bashkimin e trojeve Shqiptare që nuk mund të fitohet pa derdhur gjak. Republika e Shqipërisë nuk është në gjëndje të kërkojë bashkimin me Kosovën sepse është e varur ekonomikisht nga Evropa, sidomos Greqia e Italia.
Zgjidhja më e mirë do ishte pranimi i përkohshëm i Kosovës së pavarur dhe bashkëpunimi vëllazëror midis qeverisë Shqiptare e asaj Kosovare për t'i treguar botës se jemi një komb dhe meritojmë një shtet. Lidhja vëllazërore do e bënte kufirin të padukshëm dhe do përmirësonte ekonominë e Kosovës, Shqipërisë, si dhe atë të Shqiptarëve në Maqedoni e Mal të Zi. Detyra më e rëndësishme e popullit Shqiptar është të pastrojë qeveritë nga hajdutët e të korruptuarit e të zgjedhë intelektualë të besës që të dinë t'i bëjnë ball presioneve serbe, greke, maqedonase e Evropiane.
Përgjigju Duke Cituar
Postuar më parë nga ЯinoR
Krijoni Kontakt