Ulërima E Poetit Të Ikur......

[Agim Doçi]

ULËRIMA e poetit të ikur…

Mesnata zbret në kontinentin e lodhur
Ndërsa metropolet dihasin me ngulçimë
Si sonte asnjëherë në jetë s‘më ka ndodhur
Të kem aq shumë dhimbje dhe aspak…ulërimë!

Të ulërij për nënën që sytë i mban nga dera
Dhe pret t‘i vijë çdo ditë, djali i saj i vetëm?
Të ulërij për bijën, që mëndjen ia merr era…
Të ulërij për gruan, që ka filluar vjeshtën…

Të ulërij për shokët, që malli i ka djegur?
dhe pijnë kafenë e trishtë diku në pikëllim
të ulërij për nipin e mbetur pa buzqeshur!?
Të ulërij për këngën, që mbet pa tekstin tim!?…

Të ulërij për shokun, që tretet për nën dhè (*)
U ndamë né për sëgjalli, o Zot i madh sa vuaj!
Të ulërij drejt qielli – po nuk e di ku Je!
Po pse Ti ulërimën m‘a morre, a s‘më thuaj?

Më lini pra o njerëz njëherë të ulëras!
Nga buza e plasur ika m‘a di veç kush ka ikur…
S‘kam forcë të ulërij, i vetëm po pëlcas
Kam shok veç psherëtimat dhe një cigar të fikur.

(*) - bëhet fjalë për HEROIN AZEM HAJDARI.

Agim Doçi

[dikeafajtore]

........

Të ulërij për nënën që sytë i mban nga dera
Dhe pret t‘i vijë çdo ditë, djali i saj i vetëm?
Të ulërij për bijën, që mëndjen ia merr era…
Të ulërij për gruan, që ka filluar vjeshtën…


E mrekullueshme, s'gjej fjale tjeter....

Pershendetje nga Dikea

[Brari]

Agim, rrofsh !

poezi e bukur dhe tronditse..

Behu i forte !

[Agim Doçi]

Brari dhe Dikea!
Të dyve ju dua shumë, shumë, deri në mallëngjim! Këto vargje më trondisin. Nuk e di, isha 48 orë në Tiranë me datën 3 deri 5 gusht!
Rà shi, vetëm shi...U mbytën rrugët me lotët e qiellit të Tiranës!....Askush nuk mbante gëzim në portret:

"sy të trishtuar, pa horizont
vajza që hypnin në Benz vagabont!..."
janë vargjet e mija që ia kam vënë në buzë tek një këngë që e këndon Bleona Qerreti!

Flm të dyve që më trokisini herë pas here!
Brari dhe DIKEA ju puth fort, fort dhe me mallë!
Agimi

[The Dardha]

Spikasin tonalitete te forta qe me pelqejne si stil shkrimi: ''ULËRIMA e poetit të ikur…''

[Taulant-Dardani]

As, sa me pelqej kjo poem. A jeni ju Agimi Doci poeti? Nese po, atehere ju pershendes me gjithe zemer.

Une..trimi

[Taulant-Dardani]

Ah, e jo As..gabim shtypi


Une..trimi

[shigjeta]

Nje ulurim e pashprehur qe ashtu ne heshtje I bashkengjiten shume ulurima te tjera malli e dhimbjeje. Nje poezi e fuqishme qe te ngacmon

Urimet me te mira poet Agimi

[Eagle]

Të kem aq shumë dhimbje dhe aspak…ulërimë!

Zoti Agim kjo poezi me pelqeu shume . Nuk doja te beja asnje koment tjeter por me duket se vargu juaj i mesiperm duhet ndryshuar sepse ju shpreheni " ... aspak ulurime ! " dhe pastaj te gjitha strofat e tjera ne cdo kater vargje tre filllojne me " Te ulurij ..."
Me duket se ka nje nonsens . Ndoshta jam gabim .

Me respekt Eagle .

[edspace]

Të kem aq shumë dhimbje dhe aspak…ulërimë!

Eagle me duket se e ke keqkuptuar. Ato tre pikat qe vijojne pas fjales "aspak" jane plotesuar me nje fjale qe poeti nuk mund ta shkruaj dot, sepse i shkakton shume dhimbje, inat, dhe vetem ulërin.

Keshtu e kuptoj une. Poeti besoj do na jape interpretimin e sakte.