Ja pagat e VIP-ve të shtetit.

[ganoid]

Klodian Branko - 09/12/2004


Ja pagat e VIP-ve të shtetit

Qeveria do të ketë tani mundësi të rrisë në mënyrë të tërthortë pagat e administratës së lartë. Një projektligj i lidh pagat me atë të presidentit të Republikës. Kjo e fundit caktohet në buxhet me propozim të qeverisë


Një sistem i ri për pagat e VIP-ave të administratës pritet të zvogëlojë pagat e disa zyrtarëve. Shqetësimi i ngritur para disa muajsh për faktin se institucionet e pavarura vendosnin vetë për superpagat, duke ia kaluar edhe kryeministrit, pritet të zgjidhet duke vendosur ligjërisht pagën e presidentit si më të lartën në të gjithë hierarkinë. Por sakaq pagat e tjera kanë hapur debat. Deputeti Erjon Braçe ankohet se Avokati i Popullit do ta ketë pagën më të lartë se deputeti, gjë që e konsideron si “absurde”.
Paga e kryeministrit do të jetë e dyta në radhët e funksionarëve shtetërorë pas asaj të presidentit të Republikës. Kjo përcaktohet në një projektligj të paraqitur në Komisionin e Ekonomisë nga Ministria e Financave. Deri më sot kanë qenë disa funksionarë shtetërorë të cilët e kishin rrogën më të lartë se kryeministri, si për shembull, kryetari i Gjykatës Kushtetuese, drejtori i INSIG etj. Sipas kryetarit të këtij komisioni, Ylli Bufi, ky projektligj ka synim vendosjen e një piramide për pagat e funksionarëve të lartë shtetëror. “Mungesa e një ligji për piramidën e pagave të funksionarëve shtetërorë ka krijuar raste shpërpjestrimesh të pagave të titullarëve të institucioneve kushtetuese dhe të institucioneve të tjera”. “ Ky projektligj përcakton si majën e piramidës apo pagën më të lartë atë të presidentit të Republikës dhe më pas vijnë pagat e drejtuesve të tjerë në raport me këtë pagë”, u shpreh Bufi. Sipas këtij projektligji, paga e presidentit të Republikës përcaktohet çdo vit në ligjin vjetor të buxhetit të shtetit sipas propozimit të Këshillit të Ministrave. Ndërkohë që pagat e funksionarëve të tjerë vijnë sipas një shkallëzimi të pregatitur nga Ministria e Financave. Paga aktuale e presidentit është 290000 në muaj. Kështu që sa herë që pushtetarët duan të rrisin rrogat e tyre mjafton që të rrisin rrogën e presidentit të Republikës dhe rrogat e tyre rriten automatikisht sipas raportit të përcaktuar në këtë projektligj.
Projektligji i ka ndarë pagat e funksionarëve të shtetit në pesë kategori. Kategoria e parë ose A , e cila është e para pas presidentit. Në këtë kategori do të përfshihen kryetari i Kuvendit, kryeministri, kryetari i Gjykatës Kushtetuese. Këta të fundit do të marrin një pagë mujore prej 258100 lekë. Në kategorinë B do të përfshihen nënkryetari i Kuvendit, z/kryeministri, Avokati i Popullit, kryetari i KLSH-së, kryetari dhe z/kryetari i KQZ, gjyqtari i Gjykatës Kushtetuese. Këta funksionarë do të marrin një pagë mujore prej 211700 lekësh. Në kategorinë C përfshihen ministrat, inspektori i përgjithshëm i Inspektoriatit të Lartë të Deklarimit dhe kontrollit të Pasurive, z/ kryetari i KLD-së, kryetari i Akademisë së Shkencave. Paga mujore e tyre do të jetë 197200 lekësh. Në këtë kategori bëjnë pjesë edhe deputetët por me një rrogë më të ulët. Rroga mujore e tyre do të jetë 176900 lekësh. Këtë fakt e kanë kundërshtuar disa deputetë në Komisionin e Ekonomisë. “ Është absurde që Avokati i Popullit apo zv/krytari i Këshillit të Lartë të Drejtësisë ta ketë rrogën më të madhe se deputeti i popullit”, ka thënë deputeti socialist Erion Braçe.


Shpërblimet
Projektligji përcakton se funksionarët e lartë shtetërorë, të institucioneve kushtetuese dhe të institucioneve të pavarura mund të përfitojnë një shpërblim vjetor deri në 2 paga të plota mujore. Vendimi për shpërblim dhe për masën e tij merret nga Kuvendi për presidentin, kryetarin dhe zv/krytarin e Kuvendit, kryeministrin dhe krytarët e institucioneve të pavarura. Në këtë mënyrë shpërblimi për kryeministrin do të bëhet nga Kuvendi dhe jo nga vetë ai ashtu siç ndodhi disa muaj më parë kur kryeministri shpërbleu veten me 5 paga. Për zv/kryeministrin dhe ministrat vendimet për shpërblim do të merren nga kryeministri. Ndërsa për organet e tjera kolegjale këto vendime shpërblimi do të merren nga vetë kryetari i organit.


Përjashtimi
Nga dispozitat e këtij projektligji përjashtohet paga dhe shpërblimet për guvernatorin, inspektorin e përgjithshëm, anëtarët e Këshillit Mbikëqyrës si dhe punojësit e tjerë të Bankës së Shqipërisë. Paga dhe shpërblimet e funksionarëve të mësipërm përcaktohen nga ligji “Për Bankën e Shqipërisë”.

[[xeni]]

Erion Braçe: Është absurde që Avokati i Popullit apo zv/krytari i Këshillit të Lartë të Drejtësisë ta ketë rrogën më të madhe se deputeti i popullit”, ka thënë deputeti socialist Erion Braçe.

"deputeti i popullit".... hajde hajde...