Lycos sulmon reklamuesit

[edspace]

Lycos Europe, një nga kompanitë më të mëdha të internetit, ka filluar një fushatë për ndalimin e reklamave në email. Fushata titullohet "Make Love Not Spam" (http://makelovenotspam.com/intl) dhe ka filluar vetëm pak ditë më parë. Vizitorët e kësaj faqeje mund të shkarkojnë një screensaver që gjatë kohës që kompjuteri nuk është i zënë, sulmon faqet reklamuese me qëllim që ato të shpenzojnë bandwidth dhe të humbasin para. Ky screensaver është shkarkuar në 90,000 kompjutera deri tani dhe bombardimet jo vetëm që kanë ngadalësuar faqet reklamuese, por disa prej tyre i ka shkëputur fare nga interneti.

Sipas firmës netcraft, që monitoron trafikun e internetit, dy prej faqeve që sulmohen nga kjo fushatë nuk përgjigjen fare, ndërsa një faqe tjetër përgjigjet me shkëputje të mëdha. Lycos ka thënë se synimi i fushatës ka qënë vetëm për të rritur shpenzimet e faqeve reklamuese dhe jo për ti sulmuar ato kaq rëndshëm.

Metoda që ndjek screensaver përdoret shpesh në internet dhe quhet DDoS (Distributed Denial of Service) ose Refuzim i Shpërndarë i Shërbimeve. Faqet bombardohen me kërkesa sikur të kishte me mijra vizitorë në të njëjtën kohë, deri sa nuk mund të përballojnë trafikun dhe shkëputen. Kjo metodë përdoret shpesh nga grupet pirate të kompjuterave si dhe shumë viruse që sulmojnë faqet më të mëdha të internetit, zakonisht Microsoft, Yahoo, Google, Ebay, etj. Evropa ende nuk ka ligje kundër sulmeve të tilla në internet por rruga e ndjekur nga Lycos ka dëmtuar biznesin e faqeve reklamuese dhe ato sigurisht që do hakmerren.

Faqja e fushatës së lycos (http://makelovenotspam.com/intl) nuk punon më dhe mendohet të jetë sulmuar nga faqet reklamuese ose mund të jetë hequr nga vetë Lycos me qëllim që të ndalojë shkarkimet e screensaver dhe sulmet e faqeve reklamuese.

Këto ditë mund të gjeni më pak reklama në kutitë e emailit, deri sa të marrin veten firmat dhe të vazhdojnë avazin.

[edspace]

Me sa duket, Lycos e ka hequr programin nga faqja dhe tani ka mesazhin "Stay Tuned". Shumica e kompanive të internetit e kanë bllokuar faqen e Lycos sepse programi krijon trafik të madh dhe ngadalëson rrjetin.

Disa nga faqet që sulmoheshin, gjetën mënyra për të ridrejtuar trafikun tek faqja e lycos dhe kështu mbaroi beteja në barazim.

Ndërkohë Microsoft ka hedhur në gjyq disa kompani e individë që dërgojnë emaile me reklama. Po të dënohen, jo vetëm që duhet të paguajnë shuma të mëdha por mund të bëjnë edhe disa vjet burg.