Qeveria heq dore nga TVSH per biznesin e vogel

[ganoid]

Sistemi Fiskal

Artiola Alimadhi - 01/12/2004

Qeveria heq dorë nga TVSH për biznesin e vogël

Ministri Malaj ka pohuar se bizneset e fomës “person juridik” nuk do të paguajnë TVSH nëse nuk kalojnë pragun e 8 milionë lekëve xhiro vjetore


Jo të gjitha bizneset vogla të formës “person juridik” do të futen në skemat e pagesës së TVSH-së. Këtë e ka pohuar vetë ministri i Financave Arben Malaj dje gjatë një konfrence për shtyp. “Ne i përmbahemi parimit që përcaktimit i detyrimit për TVSH është i përcaktuar nga pragu prej 8 milionë lekësh në vit dhe jo nga forma juridike. Sipas ministrit Organizata Europiane për Zhvillim dhe Bashkëpunim (OECD) e ka vlerësuar pragun prej 8 milionë lekësh si të lartë, ndërkohë që analizat e bëra nga institucione të ndryshme e kanë vlerësuar si normal këtë nivel për Shqipërinë.


“ Në debatin që nëse duhet të paguajnë të gjithë bizneset TVSH, përfshirë dhe bizneset e vogla, Ministria e Financave ngelet në vlerësimin që në skemën e TVSH nuk mund të përfshihen të gjithë bizneset. Kjo është një përvojë që realizohet edhe në vëndet e tjera. Do të gjejmë një zgjidhje e cila është më e pranueshme dhe që nuk përbën shqetësim për biznesin” –është shprehur ai. Sipas tij, TVSH-ja ka të bëjë me pragun apo me nivelin e aktivitetit dhe jo me formën juridike të biznesit. Kështu nuk ka rëndësi fakti së çfarë forme juridike ka biznesi apo në cilën kategori përfshihet ai, i rëndësishëm është fakti nëse nivelit i aktivitetit të biznesit e kalon apo jo pragun minimal të përfshirjen në TVSH që aktualisht është 8 milion lekë. “Nëse një biznes është person fizik, juridik, sh.p.k. apo sh.a., në momentin që kalon nivelin 8 milion lekë, automatikisht bëhet pjesë e detyrimit për të paguar TVSH”- është shprehur Malaj. Në të vërtetë, në skemën e TVSH-së nuk përfshihen të gjithë bizneset (sepse përjashtohen ato me xhiro nën 8 milionë lekë në vit) por këtu, kategorizimi lidhet me pragun e jo me formën juridike. Ky, sipas ministrit Malaj, është një nivel i përshtatshëm duke e krahasuar edhe me praktikat që kanë ndjekur vendet e tjera që janë edhe anëtare të BE. “Ulja e këtij niveli mund të rishikohet në një këndvështrim afatmesëm por nuk mund të jetë pjesë e debatit për Projektbuxhetin e vitit 2005”- tha Malaj.


TVSH-ja, 20 për qind dhe e unifikuar
Shpresat e komunitetit të biznesit për pagesen e Tatimit mbi Vlerën e Shtuar (TVSH) më pak se 20 për qind kanë marrë fund. Gjithashtu edhe përshkallëzimi i kërkuar nga ky komunitet nuk është pranuar. Ministri i Financave Arben Malaj dje gjatë një konference për shtyp ka rikonfirmuar edhe njëherë se niveli i TVSH-së për vitin e ardhshëm do të jetë në masën 20 për qind dhe se shkalla e saj do të jetë e unifikuar. “Ne aplikojmë TVSH-në në masën 20 për qind. Sigurisht ka vende që aplikojnë një nivel më të ulët, por përgjithsisht tendenca për vendet në tranzicion si Shqipëria është vendosur që niveli optimal i TVSH të jetë 20 %. Këtë nivel do të mbajë Kroacia. Bullgaria me gjithë kërkesën për uljen e saj, qeveria e djathtë deklaroi se tarifa 20 % do të ishte më e pranueshme. Kështu veprohet edhe në vende të tjera në tranzicion”- është shprehur ai. Edhe për kategorizimin e saj Malaj ëstë shprehur se aplikimi i saj është gjykuar si i papërshtatshëm. Diferencimin e shkallëve të TVSH-së e ka kërkuar kryesisht Këshilli i Agrobiznesit Shqiptar. Përfaqësues të tij kanë kërkuar që për fermerët shqiptarë të ketë një shkallëzim të këtij tatimi. Edhe vitin e shkuar është bërë kjo kërkesë nga ky komunitet dhe një nga kundërshtuesit e këtij përshkallëzimi ka qenë edhe vetë përfaqësuesi i përhershëm i FMN-së në Shqipëri Jan Peter-Olters.
A.Alimadhi