Gjergj Erebara - 15/11/2004
Ndonëse me dhjetë muaj vonesë, Albtelekom hapi tenderin për blerjen dhe instalimin e pajisjeve për rrjetin e tretë celular në Shqipëri
Ndonëse pritet të veprojë në një treg shumë të vështirë dhe sakaq të ngopur të telefonisë celulare, zyrtarët e Albtelekomit kanë deklaruar se planbiznesi i tyre për celularin e tretë përfshin marrjen e 100 mijë klientëve që në dy vitet e para të punës, gjë që do të mundësojë shtimin e investimit në këtë drejtim. Objektivi përfundimtar i shprehur në planbiznes është që kompania të rrëmbejë 30 % të tregut brenda disa viteve. Norma e penetrimit të celularëve në Shqipëri është aktualisht në masën 30 % të popullatës. Mundësia për rritjen e këtij tregu është shumë e kufizuar përballë faktit se forca e aftë për punë në Shqipëri, (popullsia aktive) është rreth 1.2 milionë veta, me një nivel ekonomik të ulët. Megjithatë, pozitiv është fakti se ndërtimi i rrjetit të “Eagle Mobile” do të jetë jo vetëm në valën GSM 900, por edhe në brezin 2.5, GSM 1800, gjë që do t’i japë mundësi kompanisë të ofrojë shërbime shtesë, si mesazhet multimediale, akses në rrjet etj.
Me një njoftim për shtyp, gjiganti i telefonisë fikse në Shqipëri njoftoi hapjen e një tenderi me vlerë 7.5 milionë euro për ndërtimin e fazës së parë të rrjetit të tretë të telefonisë celulare GSM 900/1800 MGHZ. Sipas njoftimit të publikuar në disa gazeta, afati i fundit për dorëzimin e ofertave do të jetë 30 dhjetori i këtij viti. Vlerësimi i ofertave mund të zgjasë disa ditë, ndërsa fillimi i puimeve pritet në janar ose shkur të vitit të ardhshëm. Sipas eksperiencës së deritanishme, ndërtimi i një rrjeti të telefonisë celulare në Shqipëri ka zgjatur tre deri në dhjetë muaj. Fillimisht do të ndërtohet centrali dhe rrjeti i mbulimit me sinjal të një zone të ngushtë që fillon në Tiranë dhe mbaron në Durrës, përfshirë edhe aeroportin ndërkombëtar të Rinasit. Data e fillimit të ofrimit të shërbimit telefonik celular nga rrjeti i tretë që do të quhet “Eagle Mobile” mund të përkojë me kohën kur Altelekomi nuk do të jetë më një kompani nën pronësi publike, pasi pritet që në mars të vitit të ardhshëm të përfundojë edhe tenderi për privatizimin e kësaj kompanie.
“Eagle Mobile” do të konkurrojë dy operatorët ekzistues, AMC dhe Vodafone Albania, të cilat patën seicilia të ardhura totale prej 15 miliardë lekësh të reja për vitin 2003 me një treg ku shpenzohen më shumë se 200 milionë dollarë me kursin e sotëm të këmbimit. Gjithashtu, telefonia celulare në Shqipëri rezulton një nga më fitimprurëset në rajonin e Ballkanit me me kthime neto mbi të ardhura prej rreth 30 %. P.sh, AMC pati të ardhura neto prej 32 milionë eurosh për vitin 2003 në të ardhura të përgjithshme prej 101,3 milionë euro. Norma e fitimit neto ishte 30.2 %, ndërkohë që kompania mëmë në Greqi Cosmote e pati këtë normë 18.4 %. Norma e fitimit para interesave, taksave, zhvlerësimit dhe amortizimit, (EBITDA) ishte në masën 57.3 %. Në Shqipëri aktualisht rreth 1 milionë veta kanë një telefon celular dhe secili prej tyre shpenzon mesatarisht 2 mijë lekë në muaj për këtë shërbim. Performanca e shkëlyer financiare i dedikohet kryesisht çmimit të lartë dhe disa marrëveshjeve të debatueshme të interkonjeksionit me Albtelekomin.
Kompania nën pronësi publike Altelekom numëron sot rreth 250 mijë klientë dhe të ardhura në masën 6.2 miliardë lekë për gjashtëmujorin e parë të këtij viti. Gjatë këtij viti, numri i klientëve u rrit me 35 mijë veta, kryesisht me vendosjen e linjave të telefonisë fikse në zonat suburbane dhe ato të urbanizuara gjatë viteve të fundit. Fitimi para taksave për këtë periudhë ishte rreth 1 miliard lekë. E gjitha kjo shumë pritet të shkojë pikërisht për investimin në rrjetin e tretë të telefonisë celulare.
Gjatë tre viteve të fundit, Albtelekom ka njohur problemin e rritjes eksesive të shpenzimeve të interkonjeksionit me dy kompanitë celulare. Pagesat e saj për këtë qëllim në vitin 2003 arritën në rreth 8.9 miliardë lekë, ndërkohë që në vitin 2002 ishin 6.9 miliardë. Treguesi i fitimit para taksave në raport me aktivet ra nga 23 % në vitin 1999 në vetëm 3.6 % në vitin 2002. Fitimi në raport me shitjet u ul nga 33 % në vitin 1999 në 8 % në vitin 2002, si pasojë e shitjes së kostove. Kjo gjendje shumë e keqe financiare u përmirësua vetëm në vitin 2003, kryesisht si pasojë e shkurtimit të shpenzimeve dhe arkëtimit për lidhje të reja telefonike. Vonesa në drejtim të fillimit të punës për celularin e tretë i dedikohet kryesisht situatës së vështirë financiare të kompanisë. Albtelekomi mori falas licensën celulare në mes të muajit mars të këtij viti me kushtin për ta vënë në punë brenda një viti. Sipas të gjitha gjasave, Albtelekomi do të marrë një shtyrje afati për licensën nga Enti Rregullator i Telekomunikacioneve.
Përgjigju Duke Cituar
Postuar më parë nga Pink^ Pearl
Krijoni Kontakt