10 gjera qe te nxjerrin nga islami!

[altin55]

Dhjetë gjërat të cilat e anulojnë Islamin e individit




Meqë jemi duke jetuar në një ambient ku besimi i vërtetë dhe praktikimi korrekt i tij paraqet një sfidë në veti, dhe ku Muslimani përballet me besime dhe qëndrime të cilat, nëse përvetësohen, mund ta zhvendosin atë nga feja dhe ta zhvlerësojnë imanin e tij, e shohim si të domosdoshme që t’i bëjmë të njohura disa nga këto gjëra për të cilat muslimani duhet të jetë i vetëdijshëm në çdo kohë dhe në çdo vend. Më poshtë janë cekur dhjetë çështje të cilat e anulojnë Islamin tuaj. Ju lutemi të jeni të kujdesshëm për to.




1. Të shoqëruarit ortak Allahut (Shirk). Allahu i Lartësuar thotë (kuptimi):



“Vërtet, kushdo që i përshkruan Allahut ortak, Allahu e ka ndaluar Kopshtin për të, dhe Zjarri do të jetë vendbanim i tij. Për keqbërësit nuk ka ndihmës.” (Sureja El-Ma’ide 5:72)



Të bërit lutje të vdekurve, kërkimi i ndihmës prej tyre, apo ofrimi i dhuratave apo kurbanëve atyre, të gjitha janë forma të shirkut.



2. Marrja e ndërmjetësuesve në mes Allahut dhe vetes, duke u bërë lutje atyre, duke kërkuar ndërmjetësimin e tyre tek Allahu, dhe të besuarit atyre është mosbesim (kufër).



3. Kushdo që nuk i konsideron idhujtarët (mushrikin) pabesimtarë, apo dyshon në mosbesimin e tyre, apo e konsideron rrugën e tyre si të drejtë, edhe vetë është pabesimtar (kafir).



4. Kushdo që beson se çfarëdo udhëzimi tjetër është më i përsosur, apo ndonjë vendim tjetër përveç atij të Pejgamberit është më i mirë, është pabesimtar. Kjo është e aplikueshme ndaj atyre të cilët e preferojnë sundimin e së Keqës (Tagut) ndaj sundimit të Pejgamberit. Disa shembuj të kësaj janë:



(a) Të besohet se sistemet dhe ligjet e bëra nga njerëzit janë më të mira se Sheriati i Islamit; për shembull,



Se sistemi Islamik nuk është i përshtatshëm për shekullin e njëzet.



Se Islami është shkak i prapambeturisë së Muslimanëve.



Apo se Islami është marrëdhënie në mes të Allahut dhe Muslimanit dhe se ai nuk duhet të ndërhyjë në aspektet e tjera të jetës.



(b) Të thuhet se zbatimi i dënimit të urdhëruar nga Allahu, siç është prerja e dorës së hajnit apo gurëzimi i kurorëshkelësit, s’është i përshtatshëm për epokën dhe ditët e sotme.



(c) Të besohet se është e lejuar të nxirret një ligj nga ajo për të cilën Allahu nuk ka shpallur në transaksionet Islamike apo çështje të ligjit, dënimeve ose çështjeve tjera. Ndonëse individi mund të mos besojë se një gjë e tillë është superiore ndaj Sheriatit, ai në të vërtetë e konfirmon një qëndrim të tillë duke e deklaruar një gjë të cilën Allahu plotësisht e ka ndaluar, siç është tradhtia bashkëshortore, konsumimi i alkoolit apo kamata, të lejuar. Sipas koncenzusit të Muslimanëve, ai që e shpall një gjë të tillë të lejuar është pabesimtar (kafir).



5. Kushdo që urren ndonjë pjesë të asaj që Pejgamberi i Allahut (sallallahu alejhi ue selam) e ka shpallur të lejuar, e ka anuluar Islamin e tij, edhepse vepron në pajtim me të. Allahu i Lartësuar thotë:



“Kjo është për shkak se ata e urrejnë atë që Allahu ka zbritur, ashtu që Ai ua ka bërë veprat e tyre të pafrytshme” (Sureja Muhamed 47:9)



6. Kushdo që përqeshë ndonjë aspekt të fesë së Pejgamberit të Allahut (sallallahu alejhi ue selam), apo çfarëdo prej shpërblimeve ose dënimeve të tij, bëhet pabesimtar. Allahu i Lartësuar thotë:



“Thuaj: A me Allahun, shenjat e Tij dhe të Dërguarin e Tij po talleni? Mos u arsyetoni; ju keni mohuar pasi që keni besuar.” (Sureja Et-Teube 9:65-66)



7. Praktikimi i magjisë. Këtu përfshihen, për shembull, të bërit e përqarjes në mes burrit dhe gruas duke e kthyer dashurinë e tij ndaj saj në urrejtje, apo të joshet një person që të bëjë gjëra që i urren duke përdorur magjinë e zezë. Ai i cili merret me gjëra të këtilla apo është i kënaqur me to del jashtë Islamit. Allahu i Lartësuar thotë:



“Por asnjëri prej këtyre dyve (engjujve, Haruti dhe Maruti) nuk ia mësuan dikujt (magjinë) derisa t’u kenë thënë: vërtet, ne jemi një sprovë; pra, mos mohoni. (Sureja El-Bekare 2:102)



8. Përkrahja dhe të ndihmuarit idhujtarët kundër Muslimanëve. Allahu i Lartësuar thotë:



“Kushdo nga ju i cili i merr ata si përkrahës, ai sigurisht është prej tyre. Vërtet, Allahu nuk i udhëzon keqbërësit.” (Sureja El-Maide 5:51)



9. Kushdo që beson se disa njerëzve u lejohet të devijojnë nga Sheriati i Muhamedit (sallallahu alejhi ue selam) është pabesimtar me fjalën e Allahut të Lartësuar:



“Dhe kushdo që kërkon tjetër fe përveç Islamit, ajo nuk do të pranohet prej tij, dhe në Jetën e Përtejme ai do të jetë prej të humburve.” (Sureja Al-Imran 3:85)



10. Të kthehet plotësisht prej fesë së Allahut duke mos i mësuar rregullat e fesë dhe duke mos vepruar sipas tyre. Allahu i Lartësuar thotë:



“Dhe kush bën të keqe më të madhe se ai të cilit i përkujtohet shpallja e Zotit të tij dhe ai ia kthen shpinën. Vërtët, Ne do të hakmirremi ndaj keqbërësve.” (Sureja Es-Sexhde 32:22)



dhe Ai (swt) po ashtu thotë:



“Por ata që mohojnë, shmangen prej asaj për të cilën paralajmërohen”



Nuk është me rëndësi se a bëhen këto shkelje në tallje, me seriozitet apo nga frika, përveç kur bëhen nga dhuna (d.m.th. nga kërcënimi i humbjes së jetës). Kërkojmë strehim tek Allahu nga veprat e këtilla të cilat tërheqin hidhërimin dhe dënimin e Tij.