Flamurtari #1

[KoTeLja_VL]

oh... dobet fare

[zeus]

--------------------------------------------------------------

Humbja e fundit në Kavajë e ka çuar në gjashtë numrin e rezultateve negative që Flamurtari ka arritur në 11 javët e fazës së parë të kampionatit. Pra, në një kampionat me 12 skuadra, vlonjatët kanë humbur më shumë se 50% të takimeve dhe janë detyruar të qëndrojnë në zonën e ftohtë të klasifikimit, në vendin e 10-të. Ky është zhgënjimi më i madh për sportdashësit vlonjatë, duke pasur parasysh këtu dhe atë të rënies një kategori më poshtë në sezonin e kaluar. Objektivi i stafit drejtues të Flamurtarit për rikthimin në superligë duket si një ëndërr, pasi ekipi tashmë kërcënohet edhe prej rënies nga liga e parë. Në këto rrethana, të gjithë dashamirësit e Flamurtarit pyesin me të drejtë se përse skuadra vlonjate po prezantohet kaq keq në ligën e parë, kur për asnjë moment nuk i kanë munguar financat. Përgjigjen e parë e japin drejtuesit dhe disa futbollistë të skuadrës, duke thënë se Flamurtarit i ka munguar fati, ose është ndëshkuar nga gjykimet. Por dielli nuk mund të mbulohet me shoshë, sepse realiteti është krejt ndryshe. Fati i mirë ose i keq nuk vjen vetvetiu, por varet nga puna që bëhet. Te Flamurtari nuk është punuar si duhet, sepse qysh para fillimit të kampionatit drejtuesit e skuadrës nuk ndërtuan strategjinë e duhur që do të garantonte suksesin. U organizua në mënyrë shembullore asambleja e tretë e futbollit vlonjat, por kryesia e saj, e përbërë nga 4 specialistë futbolli, 2 juristë dhe 8 biznesmenë, nuk po funksionon si duhet që prej datës 15 gusht. Askush nuk e mori iniciativën për të organizuar mbledhjen e kryesisë për zgjedhjen e presidentit të Flamurtarit, gjë e cila më vonë do t'i hapte rrugën krijimit të shoqërisë aksionere. Kështu, kryebashkiakut të Vlorës, Shpëtim Gjika, iu desh të merrej nga afër edhe me ekipin e futbollit të qytetit të tij. Pavarësisht nga vështirësitë e fillimit, skuadra vlonjate, me në krye trajnerin Petraq Bifsha, kreu një minifazë përgatitore në Pogradec, por pa trajtim ushqimor dhe pa paga. Disa prej lojtarëve që vazhdonin stërvitjen me Flamurtarin vendosën të qëndrojnë në ekip. Gjithashtu, në ekip u afruan edhe disa lojtarë që trajneri Bifsha dhe mjeku Peto nuk i kishin kaluar në provat fizike dhe mjekësore. Shpeshherë, trajneri Bifsha shprehej i pakënaqur me kontigjentin e lojtarëve që kishte në dispozicion, sepse, sipas tij, Flamurtarit i duheshin lojtarë cilësorë për të garantuar rikthimin në superligë. Pas javës së tetë, trajnerit Bifsha i kërkohet dorëheqja, pasi skuadra ishte paraqitur keq, duke grumbulluar vetëm 11 pikë. Por gjërat shkuan më keq pas largimit të Bifshës. Drejtuesit e skuadrës ankoheshin për lojërat e dobëta, veçanërisht për finalizimin e dobët të aksioneve. Kjo është e vërtetë, por, sipas specialistëve më të njohur të futbollit vlonjat, Flamurtari çalonte në të gjitha repartet. Sipas tyre, është një rast unikal për një skuadër si Flamurtari që vetëm 4 lojtarë, si Driza, Kuqi, Bega dhe Shtrepi, t'i përballojnë të gjitha ndeshjet, ndërkohë që pjesë tjetër e lojtarëve kanë pasur dëmtime të lehta. Burime të sigurta informacioni për gazetën bëjnë të ditur se së shpejti në stafin drejtues të Flamurtarit do të bëhen ndryshime rrënjësore, në mënyrë që skuadra bregdetare të prezantohet ndryshe në fazën e dytë.

--------------------------------------------------------------

[zeus]

------------------------------------------------

Ka përfunduar faza e parë e punimeve për rikonstruksionin e fushës së stadiumit "Flamurtari" nga firma SHPK "Duka", afati kohor i së cilës ishte 20 dhjetori. Deri tani janë kryer disa procese pune, duke filluar me gërmimin dhe nivelimin e fushës sipas kuotave të caktuara nga projekti, hapja e kanaleve dhe vendosja e tubacioneve në të gjithë territorin e fushës e deri te shtrimi i çakëllit. Ditët e fundit është bërë rulimi i fushë dhe është përgatitur terreni për montimin e sistemit vaditës. Ja çfarë thotë për ecurinë e punimeve presidenti i firmës që po bën rikonstruksionin e stadiumit, Adhurim Duka: "E gjithë puna që është bërë gjatë fazës së parë, është marrë përsipër nga Bashkia e Vlorës, e cila ka akorduar një fond prej 9.5 milionë lekësh të reja. E rëndësishme është që në proceset e tjera të punimeve të mos na krijohen vonesa, pasi duhet bërë sa më parë montimi i impiantit vaditës, i cili duhet të përfundojë brenda 4-5 ditësh. Më pas ne jemi gati të hedhim në fushë dheun. Menjëherë pas këtyre dy proceseve, një firmë greke duhet të shtrojë tapetin e gjelbër. Sipas informacionit që morëm, nëse dy firmat e huaja do t'u përgjigjen punimeve në afatin e caktuar, fusha do të jetë e përfunduar në muajin shkurt të vitit 2005. Ndërkohë po përfundon puna për ndërtimin e rezervuarit të madh, i cili do t'i shërbejë impiantit vaditës." Përfundimi i punimeve të fushës së stadiumit është një nga objektivat e Bashkisë së Vlorës. Kryebashkiaku Gjika, në analizën e fazës së parë, është shprehur se Flamurtari në fazën e dytë do t'i zhvillojë ndeshjet në fushën e re, të ndërtuar sipas kërkesave të kohës.

------------------------------------------------

[KoTeLja_VL]

Mire fare se ishte katandis peribret fusha.
Me ne fund ... beri dhe bashkia e Vlores dicka te sakte.

[zeus]

-------------------------------------

Me fillimin e fazës përgatitore të dimrit, në skuadrën e Flamurtarit atmosfera ka ndryshuar pozitivisht. Stafi teknik është i gjithi i angazhuar me punë dhe në kampin kuqezi ekziston tashmë një frymë optimiste. Sekretari i klubit, Sokol Kushta, është shprehur tepër i ashpër në lidhje me zbatimin me përpikëri të disiplinës në skuadër, veçanërisht për ata lojtarë që nuk janë paraqitur në stërvitje. "Ata lojtarë që nuk u paraqitën në stërvitje ditën e parë të fazës përgatitore të mos pranohen më, sepse nuk na duhen." Këto kanë qenë fjalët e sekretarit të klubit vlonjat në adresë të zëvendëstrajnerit Nini. Para se të largohej nga ambientet e klubit, sekretari Kushta i ka dhënë disa detyra zëvendëstrajnerit Adrian Nini, i cili do ta drejtojë stërvitjen derisa të emërohet trajneri i ri. Sipas informacioneve më të fundit të marra nga drejtuesit e skuadrës, mësojmë se pritet një takim përfundimtar midis Kushtës dhe Mirel Josës për emërimin e këtij të fundit në krye të Flamurtarit. Por ardhja e kryeqytetasit në krye të kuqezinjve duket se është vetëm çështje kohe. Ndërkohë, gjendja e lojtarë në këtë fillim të fazës përgatitore duket e mirë. Këtë e konfirmon edhe mjeku i skuadrës, Adrian Lluka, i cili shprehet: "Gjendja fizike e futbollistëve aktualisht është mjaft e mirë. Edhe 2-3 lojtarë që kishin probleme, tashmë janë riaftësuar plotësisht dhe janë bashkuar me grupin. Ne jemi gati për të bërë edhe testet fiziko-mjekësore." Në drejtimin e zëvendëstrajnerit Nini, skuadra po vazhdon e qetë stërvitjen. Ardhja e Josës, një trajner mjaft serioz dhe profesionist, pritet të shoqërohet edhe me merkaton dimërore. Trajneri Josa do të jetë ai që do të përcaktojë lojtarët që i duhen Flamurtarit, si dhe cilët do të jenë ndihmësit e tij.

-------------------------------------

[zeus]

---------------------------------------------

Ka filluar faza e dytë e punimeve për rikonstruksionin e fushës së stadiumit "Flamurtari". Të martën paradite ka filluar montimi i impiantit vaditës të fushës nga firma italiane "Del Talia", me qendër në Firence të Italisë. Punimet po zhvillohen nën mbikëqyrjen e inxhinierit të FSHF-së, Niko Çomo, dhe presidentit të firmës "Duka", e cila kryen proceset e tjera të punës në fushën e stadiumit. Mësohet se montimi i impiantit vaditës përfundon pas 3-4 ditësh. Pas këtij procesi, firma greke duhet të shtrojë tapetin e gjelbër dhe, sipas llogarive të bëra, mendohet që inagurimi i fushës duhet të bëhet më datë 13 shkurt, pikërisht në javën e tretë të fazës së dytë të kampionatit.

---------------------------------------------

[zeus]

----------------------------------------------------

I detyruar nga mungesa e trajnerit, sekretari i klubit vlonjat, Sokol Kushta, ka lënë çdo punë dhe është marrë vetë me stërvitjen e futbollistëve. Zhvillohen nga dy seanca në ditë, ndërkohë që numri i lojtarëve po rritet çdo ditë. Tashmë në stërvitjen e Flamurtarit marrin pjesë rreth 30 veta. Pas ardhjes së portierit Dine, i cili e ka marrë lejen e kalimit nga Shkumbini, në pritje të federimit me skuadrën kuqezi është edhe vlonjati tjetër, Çerçizi. Të dy këta lojtarë kanë biseduar me kryebashkiakun Gjika dhe stafin teknik, i cili e ka dhënë miratimin. Ditët e fundit, në Vlorë kanë mbërritur edhe dy lojtarë me ngjyrë, senegalezi 26-vjeçar Sisoko dhe kamerunasi 20-vjeçar Zhavier. Ata janë vënë nën vëzhgimin e sekretarit Kushta dhe zëvendëstrajnerit Nini. Nuk është vendosur ende nëse dy afrikanët do ta veshin apo jo fanellën e Flamurtarit në fazën e dytë, por përshtypjet e para për ta janë pozitive. Zëvendëstrajneri Nini, në lidhje me këtë fakt, shprehet: "Sulmuesi senegalez Sisiko, i cili është aktivizuar 2-3 ndeshje me Dinamon, ka të dhëna të mira, pasi gjuan saktë drejt portës, ndërsa mesfushori kamerunas, Zhavier, e përdor mirë topin. Ende unë nuk mund të jap një mendim të prerë për të dy lojtarët e huaj, sepse duhet t'i shohim me mjaft kujdes." Në vëmendjen e drejtuesve vlonjatë është edhe sulmuesi 20-vjeçar Hysa, i cili ka disa ditë që stërvitet me kuqezinjtë. Më parë ai është aktivizuar në një prej skuadrave të kategorive inferiore në kampionatin helen. Gjithsesi, lëvizjet e bëra deri tani te Flamurtari mund të quhen një merkato e sajuar, pasi të pestë lojtarët e afruar deri tani kanë ardhur me dëshirën e tyre. Megjithatë, rëndësi ka që skuadra të ketë sa më parë një trajner në krye të saj dhe më pas të gjitha problemet e tjera do të zgjidhen.

----------------------------------------------------

[zeus]

-------------------------------------------------------------
Miqesore me kombetaren U-19

Vasil Ruci triumfon ndaj ish-trajnerit të tij, Edmond Liçaj. Kjo ka ndodhur në një ndeshje miqësore, që Flamurtari ka zhvilluar më kombëtaren U-19 të trajnerit Edmond Liçaj, në fushën e aneksit në Vlorë. Vendasit e kanë fituar takimin me rezultatin e thellë 3-0. Golat janë shënuar për vlonjatët nga Rezi Hysa, në 57' dhe 68', si dhe nga sulmuesi nga Senegali, Sisoko, në 75'. Ky ishte takimi i parë që Flamurtari organizoi nën drejtimin e trajnerit të sapoemëruar Vasil Ruci. Pra, në këtë mënyrë, trajneri Ruci e nis mbarë fillimin në detyrë, madje me fitore të thellë, të cilën skuadra bregdetare kishte shumëkohë që nuk e arrinte. Skuadra e Flamurtarit ka aktivizuar Dine, Driza, Gjoni, Diamanti, Begaj, Bakiu, Moqi, K.Liçaj, Çerçizii, Serjani dhe Sisoko. Ndërsa në 45 minutat e dyta, trajneri Ruci bëri zëvendësime, duke futur në lojë Ismailin, Idrizin, Hyson, Tahon, Malajn, Telushin. Ekipi kombëtar U 19 ka aktivizuar: Legata, Mehmeti, Hysi, Guga, Rustemi, Xhakalli, Sekseri, Arapi, Taullai, Metaj dhe Cani. Në fund të takimit trajneri Ruci dhe drejtori teknik, Kushta, në një takim të shkurtër i kanë përgëzuar lojtarët.

-------------------------------------------------------------

[zeus]

--------------------------------------------------

Pas serisë së humbjeve në javët e fundit të kampionatit, Flamurtari më në fund ka prishur syrin e keq, duke fituar ndaj Besëlidhjes me rezultatin e ngushtë 2-1 në stadiumin "Loni Papuçiu". Në këtë mënyrë, trajneri i ri i vlonjatëve, Vasil Ruci, ka debutuar me fitore. Tripikëshi i djeshëm e shkëput disi Flamurtarin nga zona e ftohtë, ndërkohë që në javët e mbetura do të synohet ngjitja e shkallëve të klasifikimit. Kuqezinjtë vlonjatë luajtën një pjesë të parë të pëlqyeshme, ku ra më tepër në sy mënyra efikase e lojës nga krahët, në të cilët vepronin Çerçizi, Guga, Begaj, Kuqi dhe Nenaj. Në këtë pjesë loje edhe mesfusha i kreu mirë detyrat mbrojtëse dhe ato sulmuese. Pas një presingu të vazhdueshëm, Flamurtari e mbylli pjesën e parë në avantazhin e dy golave që u shënuan nga afrikani Sisoko.
Krejt e kundërta ndodhi në pjesën e dytë, ku Flamurtari, duke u përpjekur të ruajë rezultatin, lëshoi shumë në mesfushë. Lezhjanët, me veprimet e tyre të shpejta, kërkonin përmbysjen e rezultatit të pjesës së parë, ndërkohë që vlonjatët e humbën paksa qetësinë nga presioni dhe loja e fortë e kundërshtarit. Në një moment loja u tensionua dhe gjyqtari Sopjani me të drejtë ndëshkoi me karton të kuq Bakiun e Flamurtarit dhe Mallotën e Besëlidhjes. Gjithsesi, skuadra e Lorencit e rriti presionin ndaj vlonjatëve nëpërmjet aksioneve të organizuara mirë, ku për t'u përmendur janë rastet e krijuara para portës së Dines nga Gega, Alb.Bruka, Smajli dhe Pjetrushi. Megjithatë, mbrojtja vlonjate u tregua e kujdesshme në thyerjen e aksioneve të lezhjanëve. Pak minuta para përfundimit të takimit miqtë arritën të shënonin të vetmin gol me anë të të riut Gjergji. Në 15 minutat e fundit të takimit, lojtarët e Flamurtarit, nëpërmjet kundërsulmit nuk arritën të thellonin rezultatin. Fitorja me Besëlidhjen e mban sërish Flamurtarin në vendin e 10-të, por ajo duket se do të shënojë kthesën e shumëpritur nga vlonjatët.

Vasil Ruci:
"Jam i kënaqur për tri pikët që fituam, por aspak nga loja e skuadrës në pjesën e dytë. Futbolli luhet deri në çastin e fundit, pavarësisht se në pjesën e parë isha i kënaqur nga disiplina taktike që lojtarët e mi shprehën në fushë. Së bashku me skuadrën kemi shumë punë për të bërë në të ardhmen për të arritur synimin tonë."

--------------------------------------------------

[zeus]

--------------------------------------------------------------

Ballshiotët detyrohen të dalin sërish kokulur nga fusha e blertë, pasi janë mundur në fushën e tyre nga ekipi vlonjat, i drejtuar nga trajneri Vasil Ruci. Bylisi zhvilloi një lojë krejt të dobët dje ndaj Flamurtarit. Rastet për shënim munguan tërësisht për të, ndërkohë që vlonjatët shënuan dy herë në portën e Nexhipit nga një herë në çdo pjesë. Flamurtari ishte më i motivuar dhe shfaqej më rrezikshëm ndaj portës së Bylisit, madje që në minutat e para të takimit vlonjatët mund të kalonin në epërsi me anë të Gunës. Më pas ishte senegalezi Sisoko që rrezikoi portën e Bylisit, por Nexhipi e zgjidhi situatën në të dy rastet. Miqtë arritën ta gjejnë rrugën e rrjetës në minutën e 25-të, kur Begaj nga e majta kroson në zonë dhe Sisoko nuk mund të falë, duke mposhtur portierin Nexhipi. Pas këtij momenti loja vazhdoi më e qetë dhe të dy ekipet e zhvendosën lojën në mesfushë, me ndonjë tentativë më shumë të vlonjatëve në drejtim të sulmit. Kundërpërgjigjja e Bylisit ishte e dobët, pasi lojtarët e tij nuk arritën t'i afrohen asnjëherë portës së Dines. Pjesa e parë u mbyll me një tentativë të Shabanit nga distanca, por topi kaloj ngjitur me shtyllën e djathtë pingule. Pjesa e dytë nisi me një rast të mirë për Flamurtarin dhe sërish protagoniste ishte dyshja Guna-Sisoko. I pari krosoi në zonë dhe Sisoko gjuajti me kokë, por Nexhipi u tregua i gatshëm. Bylisi e rriti nivelin e lojës, duke u bërë më kërkues. Në minutën e 55-të, ballshiotët fituan një 11-metërsh, pas prekjes me dorë të topit nga Bega. Gjuajti Nexhipi, por kolegu i tij priti bukur. Bylisi humbi rastin më të mirë për të barazuar, por nuk fal Flamurtari, i cili u hodh në sulm, duke dyfishuar rezultatin me anë të Nenajt në minutën e 65-të. Bylisi, pas minutës së 70-të, luajti me 10 futbollistë, pasi Mancaku u ndëshkua me karton të kuq. Flamurtari pati dhe mundësi të tjera për të shënuar me Sisokon, Nenajn dhe në fund Serjanin, por rezultati mbeti i pandryshuar deri në fund. Kështu, Flamurtari u largua nga Ballshi me një tripikësh të fituar pa shumë mundim. Thanë pas ndeshjes Vladimir Bushi, trajner i Bylisit: "Ekipi nuk është ende i çliruar nga ana psikologjike. E kemi pasur të vështirë ndërtimin e formacionit për shkak të mungesave nga dëmtimet apo kartonët. Humbëm një 11-metërsh, i cili, nëse do të ishte realizuar, mund ta motivonte ekipin për të dalë në lojën e tij. Flamurtari i shfrytëzoi mirë mangësitë tona dhe arriti ta fitonte takimin me meritë." Vasil Ruci, trajner i Flamurtarit: "Ekipi ynë ende nuk është në formën e tij më të mirë. Duhet të luanim më mirë, pasi lojtarët tanë kanë më shumë për të dhënë. Nuk e patëm të vështirë fitoren, por e vështirësuam vetë, sepse nuk kishim përqendrimin e duhur."

--------------------------------------------------------------