Tritol policit për hakmarrje

[Genti^Itali]

Shpërthimi i tritolit plagos inspektorin e policisë rrugore. Atentatit i shpëtojnë bashkëshortja dhe djali i tij

Tritol policit për hakmarrje

Hakmarrja për shkak të detyrës mbetet pista kryesore e policisë, për atentatin ndaj Bardhi Zeqos

Artur Qoraj

TIRANË- Shpërthimi i një sasie tritoli në garazhin e makinës masakron një ekspert të policisë rrugore. Bardhi Zeqo, i transferuar vetëm një javë më parë në policinë e Kukësit, është dëmtuar rëndë, ndërkohë që makina e tij është shkatërruar plotësisht. Ngjarja e rëndë ka ndodhur në afërsi të Kryegjyshatës Bektashiane në Tiranë, rreth orës 07.30 minuta të mëngjesit të djeshëm. Burime nga policia e Tiranës, pohojnë se mbetet mister motivi i këtij atentati me lëndë eksplozive, ndërkohë që dyshohet për hakmarrje për shkak të detyrës. Deri në orët e vona të mbrëmjes së djeshme, ekspertët e kriminalistikës kanë arritur në përfundimin se qëllimi i autorëve, ende të paidentifikuar ka qenë eliminimi fizik i efektivit, që vetëm një javë më parë ishte transferuar në qytetin verior nga Policia Rrugore e Tiranës.
Ngjarja
Shpërthimi i tritolit ka tmerruar gjithë banorët e Shkozës, por më shumë bashkëshorten dhe djalin e ekspertit të policisë, të cilët po prisnin që Bardhi Zeqo të nxirrte makinën nga garazhi. Bashkëshortja e tij ka kërkuar ndihmë, ndërkohë që eksperti i policisë rrugore është dërguar me shpejtësi në mjediset e spitalit ushtarak të Tiranës. Sipas mjekëve të Spitalit Ushtarak të Tiranës, 45- vjeçari Zeqo rrezikon të humbë shikimin në të dy sytë, ndërsa ka fraktura të rënda në njërën këmbë, të djathtën, dhe në pjesë të tjera të trupit. Pritet që sot në mëngjes të niset për në Itali me ndërmjetësimin e Ministrisë së Rendit Publik. Mëngjesin e djeshëm, Zeqo po bëhej gati të nisej për në punë, së bashku me të shoqen, Ritën, dhe djalin, që i kanë shpëtuar për mrekulli atentatit. Sipas ekspertëve, mekanizmi i autorëve të paidentifikuar ka funksionuar. Ata kanë vendosur të paktën dy kallëpe tritoli brenda në autoveturën “Benz 190” dhe siguresën e ndezësit e kanë lidhur me derën e makinës. Zeqo ka hapur qepenin e garazhit, duke provokuar ndezësin dhe më pas shpërthimin, viktimë e të cilit ka mbetur vetë.
Hetimet
Pista e vetme që po heton policia e Tiranës dhe specialistët e Ministrisë së Rendit është ajo e një hakmarrjeje të mundshme për shkak të detyrës që Zeqo kryente. Vetëm prej një jave, eksperti i policisë rrugore ishte transferuar nga Tirana në Kukës dhe në këtë itinerar po shikohen konfliktet e tij dhe kërcënimet që ka patur direkt apo indirekt. Familjarët nuk kanë pranuar të flasin rreth ngjarjes duke ndenjur të ftohtë ndaj mediave. Burime të policisë saktësuan se motivi është i qartë: vrasje e mbetur në tentativë për shkak të detyrës. Por mbetet mister shkaku konkret i vendosjes së tritolit. Specialistët kanë analizuar edhe marrëdhëniet e 45- vjeçarit Zeqo me komshijtë dhe të afërmit. Ekspertët kanë gjetur gjurmë të tritolit në vendngjarje, edhe pse të pakëta. Autorët që dyshohet të kenë qenë dy persona, kanë arritur të kapërcejnë murin rreth dy metra të lartë të familjes Zeqo. Njëri prej tyre ka ruajtur lëvizjet e banorëve të lagjes, ndërsa tjetri ka hyrë brenda oborrit. Burime të policisë thanë për “Shekulli” se Zeqo e mbante gjithnjë garazhin të hapur, duke mos e mbyllur tërësisht. Kjo ka favorizuar autorët që të vendosnin sasinë e eksplozivit. Specialistët mendojnë se autorët kanë vepruar të paktën pas orës 02.00 të mëngjesit, kur është edhe kulmi i gjumit. Asnjë nga të zotët e shtëpisë nuk ka ndier zhurmë. Atentati është finalizuar pikërisht rreth orës 07.30 të mëngjesit, kur Bardhi Zeqo doli nga porta e vilës së tij dykatëshe në Shkozë dhe iu drejtua garazhit, ku kishte autoveturën private me targa Tirane.

[Genti^Itali]

“Bardhi nuk kishte probleme”


A.Qoraj

E vetmja që ndodhej në vilën dykatëshe të Bardhi Zeqos në Shkozë ishte vjehrra e tij, e cila ishte lajmëruar për atentatin. Duke u dridhur e tëra, ajo tregon se çfarë katrahure ishte bërë dhe aktin makabër të kriminelëve. “Bardhi nuk kishte probleme me askënd. Unë nuk di të jetë kërcënuar nga njeri dhe as t’i kenë bërë presion”,-tregon gruaja me lotë në sy, e cila ka mbërritur aty pas atentatit. Ajo shton se nuk di asgjë më tepër, pasi ka shkuar aty kur ka ndodhur gjithçka. “Bardhi, vajza ime dhe nipi ishin duke dalë. Burrë e grua për punë dhe djali në shkollë”,- përfundon ajo, duke mbyllur portën gri, në betonin e së cilës dallohen ende njolla gjaku të mpiksura.

[Genti^Itali]

“Nuk pashë njerëz të dyshimtë”


A.Qoraj

Me familjen Zeqo i ndajnë vetëm tre metra rrugë dhe janë pothuajse përballë njëri- tjetrit. E trembur tej mase, fqinja e Bardhi Zeqos tregon për incidentin, pa dashur të identifikohet. “Kam dalë nga porta e jashtme rreth orës 07.00, kur kryej edhe punët e mëngjesit. Nuk pashë lëvizje të dyshimta apo persona të panjohur. Madje s’kishte fare njeri”,- tregon ajo. Më pas është kthyer sërish brenda dhe do kalonin disa minuta për të dëgjuar shpërthimin e frikshëm. “Nuk dëgjova të hapej qepeni i garazhit të Bardhit, sepse bën shumë zhurmë në këto raste. Dëgjova vetëm një shpërthim të fuqishëm dhe më pas thirrjet për ndihmë të së shoqes. Pas kësaj kuptuam se çfarë kishte ndodhur”, -shpjegon fqinja për “Shekullin”.

[Genti^Itali]

Zeqo, prej 20 vjetësh në polici


Shekulli

Bardhi Zeqo ka një karrierë prej më tepër se 20- vjeçare në policinë e qarkullimit rrugor. Është babai i një djali dhe banon në Shkozë të Tiranës, në një vilë 2-katëshe. Fillimisht ka punuar në komisariatin e Burrelit e më pas i transferuar në Gjirokastër, si shef qarkullimi. Një pjesë të kohës do të punonte në Shkodër dhe së fundi i vendosur në Tiranë, si ekspert për aksidentet e lehta. Nuk ka patur asnjëherë probleme serioze, kërcënime apo presione në punë. Vetëm një javë më parë kishte marrë urdhër për transferim në komisariatin e Kukësit si inspektor i qarkullimit rrugor, një ulje në detyrë. Ishte kthyer për fundjavë në shtëpi dhe dje do të nisej me autoveturën “benz 1900” në drejtim të veriut, ku dhe punonte.

[bebushe]

I shkreti polic ku e paskan transefuar andej nga verioret hakmarres

[ElMajico]

gjenaf policet ne shqiperi as nuk ia mbron njeri te drejtat as lesh ncnncnncnc me vjen shum keq....