Sherim njerezeve me \MAGJI\!!

[Shpirt Njeriu]

Me anën e syve dhe të fjalëve mund të shërojë edhe sëmundje të vështira. Përveç mjeteve klinike, sekreti i tij është hipnoza. Aktualisht, arrin të mjekojë dhëmbët, duke hequr dhimbjet me anën e saj, pa anestezi, sidomos tek ata që kanë frikë nga dentisti.

Dr. Rasim Vrioni është diplomuar në universitetin e Ankarasë, në Fakultetin e Stomatologjisë Estetike. Në një intervistë për gazetën “Panorama” ai tregon eksperiencën e tij, si dhe të gjitha të fshehtat e hipnozës.

Kur jeni njohur për herë të parë me hipnozën?
Para tre-katër vjetësh rashë në kontakt me një mjek, i cili aplikonte hipnozën mjekësore në Turqi, dr. Ali Eshref Myezinoglu, i cili është, aktualisht, kryetari i Shoqatës së Hipnozës Mjekësore në Turqi. Duke parë atë, më lindi edhe mua dëshira që ta mësoja, ta përvetësoja dhe ta aplikoja, duke qenë se në Shqipëri hipnoza mjekësore nuk është shumë e njohur.

Duhen prirje të veçanta për ta praktikuar hipnozën?
Hipnoza nuk kërkon prirje të veçanta, as trashëgimi. Thjesht, kërkon të jesh i formuar nga ana teorike e të punosh me njerëz që e zbatojnë këtë metodë në praktikë. Nuk është se ka nevojë për fuqi të mbinatyrshme, për faktin se është një fenomen i natyrshëm që nuk ka lidhje me magjinë dhe me gjëra të jashtëzakonshme.

Cila ka qenë eksperienca juaj e parë me hipnozën?
Një shoku im i klasës, në vitin e tretë të fakultetit, i cili kishte alergji ndaj dorezave plastike që i përdorin dentistët, dorezat e lateksit. Atij, në mometin kur vinte dorezat e zakonshme, i fillonin kruarjet, skuqjet dhe entje të përgjithshme. Edhe nëse kishte kontakte me sytë dhe hundën, përsëri i nisnin shqetësimet në këto organe. Vendosëm t’i bënin seancat dhe pas pesë takimeve arritëm e ia hoqëm alergjinë nga lateksi, i dorezave plastike. Meqenëse ishte hera e parë, unë kisha nevojë që të bëja shumë praktikë dhe në atë ambient shokësh i kam përdorur shpesh si ‘kavje’, kuptohet, me dëshirën e tyre, duke u përmirësuar gjithnjë e më shumë. Dhe pastaj, nisi puna me pacientët, por kryesisht, në fushën e stomatologjisë.

Si e përdorni ju si stomatolog hipnozën?
Konkretisht, e përdorim për heqjen e frikës së përgjithshme nga dentisti, heqjen e dhimbjeve të ndryshme, përshtatjen me protezat. Më vonë, kam pasur një rast me alergji, me dëshirën për të lënë duhanin, për të rënë nga pesha e të tjera raste të lehta të këtij tipi. Ndërsa aktualisht, jam duke punuar me një vajzë me atak paniku, më konkretisht, ajo nuk mund të qëndrojë e vetme. Në momente të caktuara ka frikë, rrahje të shpeshta zemre, nuk mund të kalojë rrugën e vetme, duhet të ketë patjetër dikë me vete. Mbas dy seancash, patëm përmirësim te kjo paciente dhe pas katër seancash, është përmirësuar dukshëm. Një tjetër pacient është një i ri që ka dyshime për ambientin që e rrethon, ka ndjenjën e mosbesimit. Ka qenë edhe një vajzë 13-vjeçare me probleme të urinimit natën, një tjetër djalë 17-vjeçar që i mbahej goja për shkaqe psikologjike.

A ka mundësi që pas një farë kohe të rikthehen përsëri shqetësimet që kurohen me anën e hipnozës?
Kjo është në varësi të shqetësimit; nëse hipnoza bëhet për fitimin e besimit në vetvete, atëherë është e mjaftueshme një ose dy seanca që të duket përmirësimi. Nëse bëhet për trauma nga e kaluara, duhet patjetër edhe ndihma e psikologut, sepse nuk është e mjaftueshme vetëm puna e hipnoterapistit, atëherë duhet një trajtim një deri në tre muaj dhe pas një viti mund të ketë nevojë për seanca rifreskimi. Për heqjen e zakoneve të duhanit, alkoolit ose drogës, mbas gjashtë muajsh ndjehet nevoja e një seance rifreskimi, që nuk zgjat më shumë se 15 minuta, në mënyrë që të forcohet ai zakon i ri që është vendosur te pacienti.

Ju vetë, keni praktikuar ndërhyrje mjekësore te pacientët?
Po, vetëm në fushën e stomatologjisë. Ka shumë njerëz, në fakt, që kanë frikë nga dentisti në vendin tonë ose ka shumë që nuk e tregojnë. Unë kam pasur një paciente 12-vjeçare, tek e cila kam bërë katër mbushje dhëmbësh pa anestezi. Një rast tjetër ka qenë një vajzë 21-vjeçare që ka bërë një mbushje të gradës së tretë, mbushje dhëmbi me heqje nervi, dhe ajo ka ndjerë shumë pak dhimbje.

Çfarë gjendje ju krijohet pacientëve në gjendjen e hipnozës?
Në seancën e parë, një pjesë e mirë e pacientëve nuk mund ta përkufizojnë se çfarë ndjejnë, thjesht është një ndjesi mes gjumit e të qenurit zgjuar. Ndërsa, mbas seancës së dytë ose të tretë, pacientët e pranojnë që kanë qenë në gjendje hipnoze. Pacientët janë të ndërgjegjshëm në ato momente dhe thonë që nuk kanë ndjerë asgjë. Ajo çfarë përjetojnë është një gjendje qetësie e përgjithshme, mendore dhe fizike. Përqendrimi në ato momente është në maksimum, pacienti nuk dëgjon më zhurmat nga ambienti, nuk dëgjon më zërat e thjeshtë dhe nuk kthen përgjigje, edhe sikur t’i flasësh; ai përqëndrohet vetëm te zëri i mjekut. Mund të arrish të krijosh edhe efekte të ngrohjes e të ftohjes, pacienti krijon ndjesinë e relaksimit të të gjithë muskujve të trupit dhe këto mund të vazhdojnë për një farë kohe. Këto quhet efekte posthipnotike dhe pacienti vazhdon ta ndjejë veten ashtu si ia rekomandon mjeku. Mund t’i krijosh imazhe, nga më të ndryshmet, ato që ai ka më me qejf dhe ai i kalon para syve, sikur është duke i jetuar realisht. Mund ta bësh të ndjejë aromën e një luleje, por kushti është që pacienti duhet patjetër t’i ketë përjetuar më parë ato imazhe dhe aroma.

Të gjithë njerëzit mund ta përjetojnë hipnozën?
Nëse flasim me përqindje, rreth 15 për qind nuk e përjetojnë fare hipnozën, 65 për qind përjetojnë një shkallë të mirë të hipnozës, 20 për qind hyjnë shumë thellë në hipnozë dhe me këta mund të arrihet të bëhen edhe operacione pa anestezi, mund të përfitosh edhe ato efekte që një farë kohe janë përdorur nga agjentura ruse. Moshat më të përshtatshme janë fëmijët mbi moshën gjashtëvjeçare, sepse një person që të hyjë në hipnozë, duhet të jetë i pjekur nga ana mendore, që të arrijë të përqendrohet. Mosha ideale është 10- 15 vjeç deri në 45 vjeç dhe pas kësaj moshe, është pak më e vështirë për të hyrë në hipnozë, pasi fillon harresa, mospërqendrimi etj. Ka shumë rëndësi edhe besimi te mjeku, niveli i inteligjencës duhet të jetë mesatar, personat e pashkolluar ose ata që kanë probleme mendore e që kanë zhvillim të vonuar mendor, nuk mund të hyjnë në hipnozë.

A është i rrezikshëm përdorimi i hipnozës nga njerëz të papërgjegjshëm?
Po, sepse ai mund të cënojë interesat materiale ose fizike të personave. Mund të krijohet një gjendje paralize te një person dhe ky pacient duhet të paguajë që të shërohet. Është njësoj sikur të marrësh një orëndreqës të të rregullojë kompjuterin.

Vendi ynë a e ka një ligj për të lejuar ose ndaluar këtë lloj metode?
Jo, nuk ka ligj. Vendet e tjera si SHBA-ja dhe Anglia e kanë pranuar, që në vitet 50, me ligj hipnozën si mënyrë kurative mjekësore, që mund të aplikohet vetëm nga mjekët e përgjithshëm, stomatologët dhe psikologët klinikë. Te ne nuk ka asnjë mjek që e përdor, aktualisht. Te ne ka qenë që në vitet 50 prof. Ylvi Vehbiu, që e ka praktikuar, por më pas u la në harresë. Tani profesori është në Amerikë. Më shumë se një ligj është e nevojshme që kjo terapi të njihet në vendin tonë e të zhvillohet.

A është e shëndetshme hipnoza?
Natyrisht, pasi nuk përdoret asnjë ilaç dhe nuk ka asnjë efekt anësor.



Çfarë është hipnoza?

Dr. Vrioni shpjegon se fjala hipnozë vjen nga greqishtja e vjetër ‘hypnos’, emër me të cilin identifikohej Perëndia e Gjumit në Greqinë e Lashtë. “Hipnoza është një gjendje e veçantë, në të cilën vëmendja dhe shkalla e përqëndrimit, si dhe e sugjestionimit, është shumë e lartë. Personi i hipnotizuar duket sikur flë, ndërkohë që ai është plotësisht i ndërgjegjshëm dhe truri punon normalisht. Gjatë seancës së hipnozës, pacienti kupton, dëgjon e i analizon ato çka i thotë mjeku dhe përpunon nga fjalët që i thotë mjeku, vetëm ato që janë në përputhje me mendimet, bindjet dhe formimin e tij moral. Personi i hipnotizuar është më i sugjestionueshëm dhe përjeton një gjendje ndryshe nga normalja”, shpjegon dr. Vrioni.



Ja cilat janë fushat e përdorimit të hipnozës

Hipnoza përdoret në fushën e stomatologjisë, në fushën e psikogjisë, për heqjen e fobive të ndryshme si vetmia, lartësia, kafshët, errësira, trajtimi i panikut, heqja e stresit, e kujtimeve të padëshiruara etj. Një tjetër fushë e përdorimit është lënia e duhanit, rënia nga pesha, heqja e dhembjeve të migrenës, sinozitit, dhembjet e mesit, të shpinës, dhembjet muskulore, nevralgjitë etj. Në lidhje me çlodhjen trupore e mendore, mjeku mund t’i mësojë pacientit autohipnozën dhe ai në këtë rast hyn në hipnozë sa herë ka nevojë. Hipnoza përdoret edhe për motivimin personal, shtim të vullnetit për të mësuar, për të mbajtur mend gjërat, për të pasur siguri në vetvete, por edhe për sëmundjet e lëkurës, alergjitë, lythat etj. Sëmundjet seksuale dhe çrregullimet e tjera seksuale, me karakter psikologjik, impotenca etj., arrijnë të shërohen me anën e hipnozës. Fusha të tjera janë heqja e dhimbjeve të shtatzanisë, lehtësimi i krizave të astmës, mbajtja e gojës, probleme me dhëmbët, si dhe urinimi në shtat te fëmijët, gjë që është plotësisht e kurueshme.