Masakrohet Profesori.

[Brari]

Para disa ditesh u rrah shtazerisht e u vodh doktor Robert Andoni, profesor i njohur i fakultetit mjekesor.


---

reagimi i pedagogëve

intervista


Profesor Betim Byku shpjegoi se përse i kanë mbetur 85-së studentët e kursit të tretë të Mjekësisë

“Unë i përjashtoj studentët nga ngjarja”

Shefi i Departamentit të Mikrobiologjisë: E dënoj aktin


Laureta Rryçi & Dorina Topollaj

“Këtë veprim nuk mund ta kenë bërë studentët” thotë me bindje Betim Byku, shef i shërbimit të mikrobiologjisë në Fakultetin e Mjekësisë.

Ai ka punuar prej 10 vjetësh me pedagogun Robert Andoni, i cili disa ditë më parë u sulmua nga tre të panjohur në laboratorin e tij. Në një intervistë për gazetën “Panorama”, pedagogu komenton ngjarjen e ndodhur kolegut të tij. Përse mendon se nuk janë studentët autorët e krimit, si është historia e 85-së të mbeturve për vjeshtë dhe cilat kanë qenë marrëdhëniet e Robert Andonit me studentët.

Çfarë pozicioni ka kolegu juaj në Fakultetin e Mjekësisë?
Roberti është anëtar i stafit të shërbimit të mikrobiologjisë. Që në vitin 1993, ai është pedagog i brendshëm i këtij fakulteti, ndërkohë që vitet e mëparshme ka qenë pedagog i jashtëm.

Çfarë reputacioni ka ai në Fakultetin e Mjekësisë si koleg dhe si pedagog?
Ai njihet si një pedagog korrekt, që di të sillet me studentët. Po ashtu, gëzon respekt edhe si koleg. Ne punojmë në të njëjtin staf.

A është e vështirë lënda juaj?
Realisht është e vështirë si lëndë. Por jo e gjitha, për disa pjesë studentët përgjigjen mjaft mirë. Teksti është i shkëlqyer, por, sigurisht që do angazhim dhe ndjekje sistematike. Kuptohet, nëse studentët e lënë atë për dy ditët e fundit para provimit, nuk mund të japin rezultate.

Sa studentë ka ngelur profesor Andoni në kursin e vitit të tretë në korrik?
Nga 200 e ca studentë, kanë mbetur në provim 85.

Si është kjo shifër në krahasim me vitet e tjera?
Mund të them se sivjet ne përdorëm një metodë tjetër në provime. Nëse herët e tjera provimet ishin vetëm me shkrim, kësaj rradhe ai ishte me gojë. Unë mendoj se kjo ishte një mënyrë më e mirë e kontrollimit të njohurive të studentëve, pasi vetëm studentët që fitonin me shkrim kishin të drejtë të hynin edhe me gojë. Shumë prej studentëve nuk e dinin këtë gjë dhe mund të jenë krijuar pakënaqësira.

Një nga pistat që kanë ngritur organet hetimore, në lidhje me ngjarjen që i ka ndodhur kolegut tuaj, është hakmarrja e studentëve për shkak të mbetjes në lëndën e Mikrobiologjisë. Çfarë mendoni ju rreth kësaj piste?
Unë e përjashtoj kategorikisht këtë pistë. Kam bindjen se ngjarja e shëmtuar që ndodhi nuk ka lidhje me studentët. Sigurisht, është policia apo Prokuroria ajo që do të zbulojë atë çfarë ka ndodhur dhe autorët. Por, sipas mendimit tim, ajo nuk është bërë nga studentë.

Ku e bazoni bindjen tuaj?
Bindjen time e bazoj tek marrëdhëniet e mira që kemi me studentët. Pastaj, nuk mendoj se mund të kryhet një akt aq i shëmtuar për një provim. Në më të shumtën e rasteve, vetë studentët kanë qenë të ndërgjegjshëm për përgatitjen e tyre dhe e kanë dorëzuar fletën e provimit. Nuk mund të jetë veprim i studentëve.

A keni dijeni nëse kolegu juaj është kërcënuar më parë?
Jo. Nuk di të ketë pasur ndonjë incident të tillë.

Po kohët e fundit, kur keni biseduar me të, a ju ka shfaqur ndonjë shqetësim?
Jo, gjatë bisedave që kemi bërë nuk kam mësuar ndonjë problem, apo shqetësim të tijin. Roberti, përveç punës në shkollë, kishte edhe aktivitetin privat dhe mesa di unë, çdo gjë shkonte mirë.

Po ju si pedagog keni frikë pas kësaj që ndodhi?
Do të ishte joreale që unë të ndahesha nga grupi, të thoja se nuk kam frikë. Ngjarja që ndodhi është e tmerrshme dhe pa precedentë. Unë kam frikë nga njerëzit që nuk kanë logjikë.



Pistat e Hetimit

Fakti që 85-së studentë kanë mbetur përnjëherësh në lëndën e Mikrobiologjisë në korrik, nga pedagogu i masakruar, ka bërë që përfaqësuesit e akuzës të ndërtojnë si një nga pistat më të mundshme të hetimit, hakmarrjen e studentëve.

Gjatë kryerjes së verifikimeve, pasi u gjend pedagogu i masakruar, rezultoi që personat që e kishin rrahur i kishin marrë edhe disa sende. Një unazë e çmuar, aparati telefonik dhe 5 mijë lekë kanë qenë të mjaftueshme për të ngritur pistën e grabitjes.

Pedagogu, përveç punës në shtet, kishte prej tre vitesh edhe një laborator privat, në të cilin kryente analiza. Oficerët gjyqësorë që po merren me zbardhjen e çështjes kanë shpjeguar se nuk përjashtojnë si pistë hetimi konfliktin personal.


Pedagogu Robert Andoni vazhdon të jetë në gjendje të rëndë
Spitalet e huaja akoma nuk kthejnë përgjigje

Ende nuk ka mbërritur asnjë përgjigje nga klinikat e vendit fqinjë për dërgimin e pedagogut të Mjekësisë, Robert Andoni, për kurim. Burime nga Spitali Ushtarak bënë të ditur se mjeku do të kurohet në një klinikë të specializuar në Itali ose në Greqi, por për të shkuar atje duhet të kryhen një sërë procedurash. Spitali duhet të marrë një përgjigje nga spitalet e vendit fqinjë, se cili do të marrë për mjekim pedagogun e Mjekësisë. Sipas bluzave të bardha të këtij institucioni, pedagogu ndodhet në sallën e reanimacionit dhe gjendja shëndetësore e tij është normalizuar dhe po shkon drejt përmirësimit. 62-vjeçari është nën vëzhgimin e rreptë të mjekëve dhe po mjekohet me të gjitha medikamentet e nevojshme. Ndërkohë, pritet vetëm largimi i tij për në klinikat më të specializura. Por, një faktor tjetër që pengon nisjen e tij për në spitalet e vendeve fqinjë është edhe moti. Sipas burimeve me përmirësimin e motit dërgimi i tij mund të jetë më i shpejtë, sepse helikopteri që do të çojë në spitalin e vendit fqinjë mjekun, duhet të ketë një kohë të qëndrueshme.



Reagojnë pedagogët e Mjekësisë: Na mbroni

Kolektivi i Departamentit të Mikrobiologjisë dhe gjithë pedagogët e Fakultetit të Mjekësisë të Universitetit të Tiranës, nëpërmjet një deklarate për shtyp kanë protestuar dje kundër dhunës masakruese të ushtruar ndaj kolegut të tyre prof.dr. Robert Andonit. ”Kërkojmë nga ana e shtetit dhe e drejtësisë shqiptare që akteve të tilla makabre t’u jepet fund sa më parë, duke gjetur fajtorët dhe duke i ndëshkuar rreptë ata”. Kështu shkruhej në deklaratën, e cila është formuluar pas ngjarjes së katër ditëve më parë në laboratorin e pedagogut Andoni. Më tej, ata shpjegojnë se ky akt vandal i detyron ata të pyesin veten se si mund të transmetojnë dijenitë e tyre shkencore te brezat e studentëve në një pasiguri të tillë. Në fund, ata theksojnë se shteti duhet të gjejë mënyrën për të mbrojtur intelektualët kundër masakrimit, pasi ata janë truri dhe zemra e kombit.





-------




Njerëz të errësirës, larg duart nga bluzat e bardha!


Prof. dr. Isuf Kalo*

I nderuar kolegu im Robert

Nuk duhet të isha unë ai që duhet reagoja me këtë letër të hapur. As kolegët dhe miqtë e t’u të shumtë e të ngushtë, si studentët, apo edhe institucionet ku ke punuar...

...me përkushtim shembullor. Mund të ishte “Urdhëri i Mjekut”, ose shoqata e “Mjekëve Shqiptarë”, por edhe ato ndofta nuk do të ishin dot aq sinjifikative nëse do të keqinterpretoheshin ligësisht: “Mjekët po mbrojnë mjekun”. E drejta është që prisja të ishin qytetarët tanë të dashur që të reagonin. Madje me një reagim të fortë, të ashpër dhe të menjëhershëm, sepse, në fakt, ajo që ka ndodhur është një “thagmë” është sulmim egërsisht në mes të ditës, në punë e sipër me dorëshkrimin e një libri të ri në dorë brenda studios së tij, një shpëtimtar profesionist i jetës; ose më e pakta duhet të kishin klithur të sëmurët e panumërt të t’u anembanë Shqipërisë që ju, prof. Robert Andoni, i keni shërbyer me ndershmëri, me kompetencë të lartë profesionale dhe sidomos me devocion jo të zakontë për gati 40 vjet rresht. Por mund të kishin reaguar edhe gazetarët tanë të nderuar, njerëzit e mediave dhe të shoqatave të shumta në Shqipëri, siç dinë të bëjnë ata, aq zellshëm e me talent, për subjekte të tjera “pikante”. Ata të gjithë operojnë në emër të demokracisë dhe integrimit evropian për mbrojtjen e individit, për lirinë dhe sigurinë e veprimtarisë së ndershme profesionale. Këta të fundit u mjaftuan në këtë rast vetëm me një njoftim disi të thatë, apo me kronikën e ngjarjes. Ky qëndrim i përgjithshëm, pasiv, për të mos thënë indifferent, përbën thelbin e shqetësimit tim dhe të kësaj letre, sepse besoj është edhe dhembja më e madhe sot për ty. E them këtë, sepse jo thjesht ngjarja makabër, por fenomeni që ajo mbart meritonin të bëheshin objekt i një analize dhe debate publike, urgjente dhe me një trajtim të thellë e të gjerë, prej së cilës të katalizohej apo gjenerohej jo vetëm denoncimi, por dhe reagimi i përgjithshëm korrektues shoqëror. Fenomenin nuk e shoh tek rrahja, dhuna fizike e një individi, por e shoh tek “suicidi in koshient”, që po i bëjmë si shoqëri vlerave e traditave tona fondamentale etiko-morale. Ai po kryhet me anë të agresioneve spontane, por të përsëritura fizike, verbale ose mediatike të pakontrollueshme ndaj individëve, shoqërisht të vlefshëm prej personave të papërgjegjshëm të errësirës, inatçinj, sadist, manjak gjithfarësh, “ish” të përmbysur, ose “të rinj” mentalisht të mykur; të gjithë njësoj, të pazot në procesin e konkurrencës dhe adaptimit me normat dhe rregullat e ambientit tonë të ri shoqëror. Goditjet zakonisht janë të verbëra të paprincip dhe mjerisht ndodhin nën memecërinë dhe indiferencën e akullt sociale. Të vlefshmëve dhe të suksesshmëve u goditën vlerat, produktiviteti, arritjet si në profesion dhe në jetë, liria dhe tendencat progresiste të tyre intelektuale e shoqërore, kualitetet individuale dhe në tërësi veprimtaria e tyre aq vitale për Shqipërinë e sotme dhe të nesërme, madje edhe me gjerë. Rasti tënd, i nderuar koleg prof. Robert Andoni, është tipik. Në këtë kontekst fenomeni ndofta mund të quhet edhe bashkëfajësi e pavullnetshme shoqërore. Sidoqoftë, për shumicën e njerëzve të prekur thellë e të shokuar nga kjo ngjarje, besoj nuk kanë, paskësaj, rëndësi detajet se si ndodhi, cilët qenë agresorët, apo motivet e rrethanat që i shtyu në aktin monstrous, gjithsesi të papërligjshëm, krejtësisht të pajustifikueshme ndaj njeriut e shqiptarit të mirë, intelektualit me emër, mjekut humanist, pedagogut dhe shkencëtarit të shquar, prof. dr. Robert Andonit. Rëndësi, peshë “mund të ketë vetëm turpi”, nëse atë e ndjemë apo jo, secili prej nesh përderi sa lejojmë të ndodhi ajo që ndodhi, si edhe ngjarjet e tjera thuajse identike po aq të shëmtuara përpara saj. Rëndësi edhe me të madhe ka edhe nëse fal turpit, do të mundemi apo jo të gjenerojmë rreze pozitive drite për të na ndihmuar të dalim prej këtij tuneli ku agresioni prej “lakuriqëve të natës” të fshehur e shumuar nëpër skuta, po bëhet jo vetëm më i shpeshtë, por edhe një fenomen i ri, sa primitiv aq edhe i rrezikshëm shoqëror.

I dashur Robert, të përshëndes miqësisht nga larg dhe të uroj si ç’është zakoni tek ne: të shkuara. Nuk them dot edhe të harruara sepse, e para, memorja e shëndoshë është obligim i profesionit tone, e dyta, sepse pas shërimit të plagëve të trupit, ato të shpirtit me sa di unë mbeten të gjalla, apo cikatrica të dhimbshme për një kohë të gjatë, në mos përgjithnjë. Që këtej së largu, nga qendra e OBSH-së për Evropën, në Kopenhagen të siguroj sesi të gjithë kolegët aty, jo vetëm unë, por edhe ata të huaj kudo në Evropë dhe në Botë që të kanë njohur dhe çmuar, janë sot përveçse të tronditur, solidarë dhe vuajnë bashkë me ty.

Njëkohësisht ndajnë të njëjtat shpresa dhe aspirata që shoqëria jonë do t’i arrijë me siguri standartet universale etike, humane dhe civile të botës moderne dhe se pavarësisht nga rrethanat e përkohshme, figura dhe integriteti i mjekëve shqiptarë do të ridimensionohen në zemrat e qytetarëve dhe të pacientëve në përmasat e admirueshme që përherë kanë merituar.

* Dega Rajonale për Evropën e OBSH-së,
Kopenhagen


gazeta panorama

[miki_al2001]

profesor bert andonin ashtu sic e thirrnim ne studentet e kam pasur profesot per mikrobiologji dhe kam marre leksionet prej ti ndersa me betim bykun kam bere laboratoret.Per Prof bertin kam shume respekt,njeri punetore dhe kerkues pasi edhe ai te jepte shume.Nuk e besoj se shaku eshte ngelja e studenteve se po te ishte ai ata jam i sigurt do rrifnin Betim Bykun per te cilin edhe pse kam 7 vjet qe kam mbaruar mjekesine plus kam bere dhe specializimin me pas nuk kam gjetur njeri me te poshter.Njeri hakmarres,antikombetar dhe inatci.Po qellimi i ti eshte vetem ngelja e studenteve,vuajtja e tyre.Kete nuk e them per mua se une kur jam pyet ai ishte jasht shtetit per 1 jave dhe kisha fat qe se kisha aty dhe ne provim kisha ziain dhe bertin.pra edhe njehere i uroj sherim sa me te shpejt Profesor Robert Andonit. Nga nje ish student.

[[xeni]]

Sjellje te tilla primitive te demoralizojne, po ça ti bosh.
T'kalume ktij profesorit.

[Genti^Itali]

Pas premtimeve boshe, familjarët e pedagogut të masakruar vendosën ta kurojnë privatisht

Familjarët dërgojnë pedagogun Andoni në Selanik


A. Qoraj

TIRANË - Ministria e Shëndetësisë dështon në tentativën për ta nisur pedagogun Robert Andoni drejt Greqisë. Fjalët e mira të ministrit Solis kanë “fluturuar” në erë dhe vetë familjarët, të lodhur nga pritja pesëditore kanë vendosur që sot në orën 06.30 të mëngjesit, ta nisin 62-vjeçarin e masakruar në mënyrë private, drejt spitalit të Selanikut. Lajmin e konfirmuan për “Shekullin” dje, familjarët e profesor doktor Robert Andonit. Nga Ministria e Shëndetësisë së Greqisë nuk kishte ardhur asnjë përgjigje zyrtare për ta pranuar pedagogun në spitalin e Janinës, megjithëse u nis një faks për ndihmë që parashikonte heqjen e shpenzimeve nga ana e shtetit. “Në fund vendosëm që ta dërgonim në Selanik pasi nuk mund të prisnim më gjatë dhe të rrezikonim jetën e Robertit”,- thanë familjarët për vendimin që kanë marrë. Një helikopter është parashikuar të zbresë sot në orën 06.30 të mëngjesit dhe të merrte profesorin bashkë me bashkëshorten, që do ta shoqërojë në Selanik ku do t’i nënshtrohet një operacioni tjetër. Sipas mjekëve, rrezik për gjendjen e tij shëndetësore mbetej infeksioni i nofullës dhe mushkëritë, ku kishte pësuar një hemorragji mbrëmjen e së shtunës. Grupi hetimor ende nuk ka arritur të identifikojë autorët e kësaj masakre. Është përjashtuar përfundimisht pista e keqtrajtimit nga ana e studentëve, apo të tjera motive që kanë të bëjnë me konflikte. Gjithashtu hetuesit kanë verifikuar versionin se dy autorët kanë qenë nën efektin e alkoolit dhe këtë e kanë deklaruar dëshmitarët që i kanë parë në rrugë dhe të tjerë elementë. Gjurmët e gishtave ende nuk kanë arritur të identifikojnë ndonjë person që mund të ketë qënë kontigjent i mëparshëm i policisë.

[Genti^Itali]

Ardian Kokiçi dhe i arrestuari i dytë i policisë, Dëfrim Xhaferri pranojnë krimin, por nuk japin shpjegime

Pedagogu, rrëfejnë të arrestuarit

I akuzuari për masakrën, Kokiçi, ish-punonjës i Forcave Speciale. Motivi i masakrës, grabitja

Ened Janina

TIRANË - Arrestohet i dyshuari i dytë si i implikuar në rrahjen dhe grabitjen e profesorit të mjekësisë, Robert Andoni. Dëfrim Xhaferri është prangosur në orët e parë të ditës së djeshme, nga policia e Tiranës me akuzën e rrahjes dhe grabitjes së profesorit 62- vjeçar. Sipas policisë, Xhaferri së bashku me Kokiçin kanë hyrë në laboratorin e Andonit dhe pasi e kanë rrahur barbarisht, i kanë grabitur atij paratë dhe disa sende me vlerë. Kokiçi deri katër vjet më parë ka qenë efektiv i forcave speciale të policisë. Ndërkohë që burime të prokurorisë kanë pohuar dje se Xhaferri nuk ka marrë pjesë aktive në rrahjen dhe grabitjen e profesor Robert Andonit, por ka qenë i pranishëm. Sipas tyre, Xhaferri ka lënë gjurmët e tij të gishtave në laborator, por mësohet se ndaj tij do të ngrihet akuza e moskallëzimit të krimit. Dje në polici dy të arrestuarit kanë pohuar se e kanë bërë krimin në gjendje të dehur. Ata nuk kanë dhënë shpjegime të tjera në lidhje me ngjarjen, pasi pretendojnë se nuk mbajnë mend shumë gjëra.

Arrestimi
Në orët e para të ditës së djeshme, policia e Tiranës ka arritur që t’i vërë prangat edhe të dyshuarit të dytë për rrahjen barbare dhe grabitjen e profesor Robert Andonit. Fillimisht në prangat e policisë ka rënë Ardian Kokiçi, mbrëmjen e së premtes. Ai është tradhtuar nga gjurmët e gishtave që kishte lënë në laboratorin e profesor Andonit. Pas tij, policia është vënë në kërkim të autorit të dytë të grabitjes dhe dhunimit, Dëfrim Xhaferrit. Sipas burimeve të policisë, edhe Xhaferri, ashtu si Kokiçi, është tradhtuar nga gjurmët e gishtërinjve që ka lënë në laborator. Për të dy të arrestuarit ka pasur edhe disa dëshmi nga banorët e lagjes, që i identifikonin si autorë të mundshëm të veprës penale. “Në lidhje me ngjarjen e vjedhjes me dhunë të Robert Andonit, komisariati i policisë nr.2 në bashkëpunim me Policinë Shkencore bëri të mundur identifikimin dhe ndalimin, bazuar në urdhrin e prokurorit të shtetasve Ardian Dilaver Kokiçi, 30 vjeç, nga Tirana dhe Dëfrim Mersin Xhaferri, 33 vjeç, nga Tirana. Këta persona, në bashkëpunim me njëri- tjetrin, kanë kryer vjedhjen me dhunë me pasojë plagosjen e rëndë të shtetasit Robert Andoni”, -thanë dje burimet zyrtare të policisë së kryeqytetit. Sipas tyre, të dy të arrestuarit janë beqarë dhe të pa dënuar më parë nga drejtësia shqiptare. Zyrtarë të policisë pohuan dje, se ka prova të forta shkencore që tregojnë fajësinë e dy të arrestuarve për këtë ngjarje. Policia, në bashkëpunim edhe me Prokurorinë e rrethit Tiranë, po punojnë për të dokumentuar plotësish ngjarjen në fjalë.

Motivi
Pasditen e djeshme, dy të arrestuarit janë marrë në pyetje nga oficerët e policisë si dhe prokurori i çështjes. Burime nga grupi hetimor kanë pohuar dje se të dy të arrestuarit kanë pranuar autorësinë e krimit. Ata kanë thënë se e kanë rrahur profesor Robert Andonin, por nuk kanë dhënë shumë sqarime në lidhje me ngjarjen. “Kemi qenë duke pirë në një lokal aty në lagje. Pasi kemi pirë për një kohë të gjatë kemi hyrë në studion e Robert Andonit. Ne kemi qenë të pirë, kur kemi hyrë në studio. E kemi rrahur atë, por nuk mbajmë mend asgjë se çfarë ka ndodhur më pas”,- mësohet të kenë thënë dy të arrestuarit dje në polici. Sipas burimeve të policisë dhe prokurorisë së kryeqytetit, motivi përse dy të arrestuarit kanë rrahur barbarisht profesorin e mjekësisë Robert Andoni është ai i grabitjes. Ata kanë hyrë në laboratorin e tij me të vetmin qëllim, atë të grabitjes. Kur kanë parë se Andoni ka rezistuar dhe nuk ka dashur që t’u japë paratë, ata e kanë goditur atë barbarisht duke i shkaktuar dëmtime me rrezik serioz për jetën. Momentalisht, Robert Andoni ndodhet për kurim në Greqi si pasojë e plagëve shumë të rënda që ka marrë. Burime të prokurorisë kanë pohuar dje se ende nuk është sqaruar krejtësisht pozicioni i Dëfrim Xhaferrit në këtë çështje. Sipas tyre, gjurmët e gishtërinjve të tij ndodhen në studion e profesorit, por ka dyshime se ai nuk e ka qëlluar atë. Sipas informacioneve të prokurorisë, Xhaferri ka marrë pjesë në krim, por jo në mënyrë aktive. Për këtë arsye pritet që ai mund të akuzohet vetëm për moskallëzim të krimit.


Pasaporta
Emri: Ardian
Mbiemri: Kokiçi
Atësia: Dilaver
Datëlindja: 1974
Vendlindja: Tiranë
Adresa: Lagjja Nr.43, Rruga “Kongresi i Përmetit”
Dëshmia e penalitetit: I padënuar


Pasaporta
Emri: Dëfrim
Mbiemri: Mersin
Atësia:Xhaferri
Datëlindja: 1971
Vendlindja: Tiranë
Adresa: Rruga e Durrësit
Dëshmia e penalitetit: I padënuar

[Brari]

gent te falenderoj per shkrimet interesante qe sjell.

djem si ty na duhen..

Ky krimineli nuk e ka per te paren here..
Eshte imesuar te rrahe e te vrase e te mos ihyj ferr ne kembe..
Pra doktor andonin e rrahu Shteti i qelbur shqiptar qe i le te livadhisin banditet.. dhe Ne me indiferentizmin tone..
Ja psh.. tere Shqiperia e degjoj se Brukseli na e beri SAHAROV altin Arapin e asnje nuk ndihet..
te gjithve u ka hyre kaka nmyth kur thon Tironcit..

[Genti^Itali]

Brari lexo sa interesante!


Dy të arrestuarit janë indentifikuar që në fillim si autorë të mundshëm por është pritur përgjigjja e ekspertizës

Pedagogu, dhunuesit me viza Shengen

Dëfrim Xhaferrit e Ardian Korkiçit u janë gjetur në shtëpi pasaporta me viza për jashtë Shqipërisë

Artur Qorraj

TIRANË- Dy të akuzuarit për grabitje me pasojë plagosjen e pedagogut profesor doktor Robert Andonit kanë patur viza për t’u larguar jashtë vendit. Edhe pse kanë pasur mundësinë që të largohen as Dëfrim Xhaferri e as Ardian Korkiçi nuk kanë tentuar që të merrnin rrugën për në Perëndim në mënyrë që t’u shpëtonin prangave pas ngjarjes. Të dy të dyshuarit janë zbuluar që në fillim nga policia me hetime operative dhe më pas me anë të krahasimit të gjurmëve të gishtërinjve. Lajmin e bënë të ditur për “Shekullin” burime zyrtare nga drejtoria e policisë së Tiranës. Si Korkiçi, ashtu dhe Xhaferri sot pritet që të dalin për masë vlerësimi në Gjykatën e rrethit Tiranë. Akuza që rëndon mbi ta është grabitje me dhunë me pasojë plagosjen e rëndë në bashkëpunim. Xhaferri, sipas rrëfimit, dyshohet se nuk ka vënë dorë mbi doktor Andonin, ndërsa ish-efektivi i polisë, Korkiçi, ka mohuar akuzën, duke thënë se “s’mbante mend asgjë pasi të shtunën e 25 shtatorit ka qenë i dehur”.
Ashtu siç dhe ishte konstatuar nga hetimi i specialistëve të policisë së Tiranës se autorët ishin banorë të lagjes, ky konkluzion u vërtetua brenda 24 orëve nga versioni i bërë publik për mediat të enjten. Laboratori kriminalistik ka nxjerrë rezultatin e parë për gjurmët e Ardian Kokiçit, i cili kishte qenë një herë i shoqëruar në polici për “rrahje të një personi”. Ky fakt ka lehtësuar punën e policisë për të arritur edhe tek autori i dytë Dëfrim Xhaferri, i cili nuk ka qenë më parë kontigjent kriminal. Por nga kontrolli që është bërë në shtëpi, agjentët e policisë kriminale kanë gjetur dhe dokumentet e aplikimit për vizë dhe vizën për të shkuar në Gjermani. Të dy të ndaluarit mësohet se kanë patur vizë për udhëtim jashtë shtetit dhe këtë mund ta kishin bërë një ditë pas ngjarjes. Por urdhri i krerëve të bluve për kontroll të rreptë të pikave kufitare dhe mbajtja nën mbikëqyrje e lagjes së ish-bllokut të ambasadave në rrugën e “Kavajës” u ka vështirësuar mjaft punët dy të rinjve Burime zyrtare të policisë thanë se as 30 -vjeçari Korkiçi dhe as 33- vjeçari Xhaferri nuk e kanë marrë mundimin të arratiseshin për të humbur gjurmët. Burime të policisë thanë se kanë shoqëruar dhe krahasuar gjurmët e të paktën 30 djemve të lagjes duke i marrë në pyetje një e nga një. Burime të policisë thanë se të dy të arrestuarit ishin pajisur me viza për të ikur në Gjermani, por nuk u dhanë hollësi rreth kohës së nxjerrjes së tyre në ambasadë për shkak të hetimit.
Edhe dje, dy të ndaluarit nuk e kanë ndryshuar qëndrimin e tyre. Kokiçi ka qënë i prerë duke u rrëfyer se ai nuk mbante mend gjë çfarë kishte bërë mbrëmjen e të shtunës sepse kishte pirë në një lokal të lagjes me shokë të tjerë. Pothuajse një pjesë e mirë e banorëve e kanë parë ngjarjen të tmerruar dhe nuk kanë ndërhyrë. Të dy bashkautorët kanë hyrë të dehur në laborator dhe ndërsa e kanë grabitur në gjendje pavetëdije e kanë rrahur profesor Robert Andonin. Xhaferri është treguar më i ndërgjegjshëm me agjentët duke rrëfyer ato që dinte. Ai ka pohuar se kishin vizituar profesorin pa qëllim të keq dhe jo për ta rrahur. Madje ai ka thënë se nuk e ka qëlluar asnjëherë Andonin. Edhe Xhaferri ka pranuar se ka qenë i dehur dhe ngjarja sipas tij shpjegohet si efekt i alkoolit. Burime zyrtare të policisë dhe prokurorisë pohuan se si provë materiale kanë gjetur gjurmët e gishtrinjve në objektet e laboratorit dhe një shishe që dy të rinjtë e kanë harruar brenda klinikës.

[bebushe]

Nuk mendoj se arsyea qe e kan rrahuar ata ka qene per te vjedhur mbase per arsye personale se po te qe per para mund te kishin rrahur dike tjeter ...
Turp

[friendlyboy1]

Si ka mundsi qe dy te dehur kan mund te futen ne laborator? Nuk e kuptova ishte ne laburator apo klub? Per te rrembyer para nga nje njeri qe po punonte ne laboratorin e tij?! Jo se po ja fut kot po kush i ha kto budalliqe alibia esht shum qesharake, me siguri ka ndonje arsye tjeter.

[Genti^Itali]

Organet perkatese kshu e "shpjegojn" , por mos haroni se ne kete rast kemi te bejm me "Medjan" çdogje mund te thuhet per çeshtje personale ose politike.