KE i dikton afatet e zgjedhjeve qeverisë shqiptare

[Albo]

Ambasadori i OSBE-së në Tiranë ka mbajtur në Vjenë raportin e tij të fundit për Shqipërinë

OSBE: Shqipëria, udhëkryq kritik

“Aspiratat e shqiptarëve do të goditen nëse zgjedhjet do të dështojnë”

A.Rama, N.Përndoj

TIRANE - Ambasadori i OSBE-së në Tiranë Osmo Liponen lëshoi kambanat e alarmit dje që nga Këshilli i Përhershëm i OSBE-së në Vjenë, se me afrimin e zgjedhjeve parlamentare të vitit 2005, Shqipëria e gjen veten në udhëkryq kritik. Në përfundim të misionit të tij në krye të OSBE-së në Tiranë, Liponen paraqiti raportin e fundit, duke ritheksuar rëndësinë që kanë zgjedhjet, si një provë e fortë për të parë thellësinë e institucioneve dhe pjekurinë e klasës politike. Por ai vërejti se që të realizohet kjo, politikanët shqiptarë duhet të demonstrojnë vullnet të qëndrueshëm.“Këto zgjedhje do të përbëjnë një provë për thellësinë e institucioneve dhe pjekurinë e klasës së saj politike. Që të ndodhë kjo, udhëheqësit politikë të vendit duhet të demonstrojnë një vullnet të qëndrueshëm politik për të mbështetur procesin në vazhdim të reformës zgjedhore dhe të garantojnë se, më në fund, do të arrihen standardet ndërkombëtare për zgjedhjet”, -tha Lipponen. Por sipas tij funksionimi normal i sistemit parlamentar me anë të dialogut konstruktiv pozitë-opozitë, do të shërbejë që problemet e rëndësishme sociale dhe ekonomike të Shqipërisë të marrin rrugë. “Që Shqipëria të jetë në gjendje të zgjidhë problemet e saj të rëndësishme sociale dhe ekonomike dhe të shtetit të së drejtës për të plotësuar nevojat e qytetarëve dhe për t’iu garantuar atyre një të ardhme të sigurt, duhet të ecë drejt një sistemi parlamentar që funksionon normalisht ndërtuar mbi një debat dhe dialog konstruktiv qeveri-opozitë duhet t’i japë përparësi çështjeve të qeverisjes dhe jo të vazhdojë të fokusohet tek divergjencat”,- vijoi Liponen. Nga ana tjetër ai ritheksoi se zgjedhjet parlamentare janë një provë e rëndësishme për vendin. “Është shumë e qartë se aspiratat e Shqipërisë për një integrim më të afërt në strukturat euro-atlantike do të pësojnë një goditje madhore, nëse vullneti i nevojshëm politik do të mungojë përsëri”, -është shprehur Liponen. Sipas tij, nëse vullneti i duhur politik do të mungojë përsëri për zgjedhjet e ardhshme, Shqipëria do të vuajë një hap të madh prapa në zhvillimin e saj demokratik, dhe, për pasojë, në aspiratat e saj për një integrim më të afërt në strukturat euro-atlantike. Ambasadori Liponen foli edhe për ecurinë e refuzimit nga ana e socialistëve të dy varianteve të përgatitura nga grupi i ekspertëve teknik me qëllim balancimin e Komisionit Qendror të Zgjedhjeve. Ambasadori Liponen nënkuptoi se për ndryshimet në Kodin Zgjedhor kërkohet konsensus përderisa miratimi i tyre kërkon një shumicë të cilësuar prej 84 deputetësh.

Trafiqet

Ashtu si edhe në raportet e tjera, ambasadori Liponen, i kushtoi një vend të rëndësishëm problemeve që lidhen me trafiqet dhe korrupsionin, duke i konsideruar ato të mprehta dhe të shqetësuese, jo vetëm për Shqipërinë por edhe për vende të tjera. “Shqipëria ende mbetet një vend origjinë për gratë dhe fëmijët e trafikuar për qëllime të shfrytëzimit seksual dhe punës së detyruar dhe nuk përmbush plotësisht standardet minimale për zhdukjen e dukurisë së trafikimit. Tragjedia që ndodhi janarin e kaluar, ku 21 emigrantë të paligjshëm shqiptarë humbën jetën në detin Adriatik, si dhe disa raste të tjera gjatë stinës së verës tregojnë se rrjetet e trafikimit ende ekzistojnë, ose, të paktën mund të aktivizohen relativisht shpejt. Raste të tilla tregojnë, gjithashtu, se ende ka njerëz që duan të largohen nga vendi”. Sipas tij, trafiku i drogës nga Shqipëria drejt vendeve të tjera, ka pësuar rritje. Shqipëria është bërë vendi i origjinës i cituar më shpesh për kanabisin në Evropë dhe po bëhet gjithnjë e më shumë një pikë e rëndësishme tranziti për heroinën që vjen nga Afganistani. Rritja e dukshme e trafikimit të heroinës në Shqipëri përbën një kërcënim serioz për sigurinë e përgjithshme, siç është vërejtur në disa vende të tjera. Trafikimi i drogës dhe pastrimi i parave që e shoqëron atë përbën gjithashtu, rrezik për sistemin financiar, i cili vazhdon të bazohet në cash në pjesën më të madhe të tij, duke rritur ekonominë informale”, -vijoi Liponen.

[Albo]

OSBE: Qeveria, abuzime me tokat në bregdet

Shekulli

Prezenca e OSBE-së në Tiranë ka vlerësuar që procesi i kthimit dhe kompensimit të pronave duhet të jetë plotësisht transparent për të shmangur abuzimet e mëtejshme. Liponen theksoi se kohët e fundit, gjatë një misioni të kryer nga Prezenca për gjetjen e fakteve në zonën kryesore bregdetare në jug, u konstatuan shumë privatizime të diskutueshme të pronave bregdetare dhe abuzime nga qeveria. Liponen ritheksoi zhgënjimin e OSBE-së për prishjen e konsensusit mes PD-së dhe PS-së për miratimin e ligjit të pronave. “Prezenca ka shprehur zhgënjimin e saj për faktin se konsensusi nuk mundi të ruhej, si dhe shqetësimin për ndryshimet e ligjit në minutën e fundit. Parimisht ka pasur dy çështje të diskutueshme: procesi i emërimit të kryetarit të Komitetit Shtetëror dhe kufizimi në 60 hektarë, vendosur për kërkesat për kthim dhe kompensim toke bujqësore”, -është shprehur ai. Për arsye të prishjes të këtij konsensusi, zbatimi i legjislacionit, sipas tij, mund të bëhet më i vështirë. Liponen shtoi se kërkesa për një zgjidhje të shpejtë për procesin e kthimit dhe kompensimit të pronave, erdhi si rezultat i mosmarrëveshjeve në Shqipëri për titujt e pronësisë mbi tokën. “Këto mosmarrëveshje kanë penguar zhvillimin ekonomik dhe tregun e tokës, investimet e huaja aq të nevojshme, kanë dëmtuar besimin e qytetarëve, kanë mbingarkuar gjykatat dhe, madje, janë bërë shkak për përdorim dhune”,- tha ai.


Zgjedhjet e ardhshme parlamentare përfundimtare janë një provë e rëndësishme për vendin.

Nëse vullneti i duhur politik do të mungojë përsëri për zgjedhjet e ardhshme, (dhe deri tani duket se vullneti politik është relativisht i brishtë), Shqipëria do të vuajë një hap të madh prapa në zhvillimin e saj demokratik

Në zonën kryesore bregdetare në jug, u konstatuan shumë privatizime të diskutueshme të pronave bregdetare dhe abuzime nga qeveria

Zbatimi i legjislacionit për kthimin dhe kompensimin e pronave mund të bëhet më i vështirë si rezultat i mungesës së marrëveshjes PS-PD për këtë çështje

[Albo]

Liponen për Cekën: Ai nuk ka ide, por leh

Shekulli

TIRANË – Ambasadori i Prezencës së OSBE-së në Tiranë, Osmo Liponen, i cili tashmë ka lënë zyrtarisht misionin e tij në Shqipëri i quajti dje, monologje akuzat e Neritan Cekës ndaj tij, në një intervistë me gazetaren Rudina Xhunga në emisionin “Shqip” në “Top Channel”. “I kam ndjekur me mrekullim monologjet e z. Ceka. Ai është profesor, ka një sfond akademik, por tingëllon sikur ka edhe një sfond stalinist. Ai përdor vazhdimisht një gjuhë tejet populiste, një gjuhë që përdoret nga disa parti ekstreme të së djathtës, bën komente raciste. Ndoshta ai beson se është nacionalist i madh, por s’mund të jesh nacionalist duke treguar se sa të ulëta janë kombet e tjera. Zgjedhja e vetme e mençur ka qenë ta lija të vazhdojë me monologjet e tij, por do të isha i interesuar të shoh se sa vota do të marrë. Një person i cili nuk ka guximin qytetar dhe politik të trokasë në zyrën e Prezencës dhe të hapë diskutimin, nuk e meriton vëmendjen time. Nëse atij i pëlqejnë komentet historike, unë po them “qentë le të lehin, karvani të shkojë përpara”, -është shprehur Liponen. “Përsa u përket monologjeve dhe dialogjeve, mendoj se në politikë duhet të paraqesësh linjën tënde, idetë e tua dhe jo vetëm të vazhdosh të lehësh për diçka. Unë do të doja që disa politikanë t’i përdornin energjitë, arsimin, përvojën e tyre të gjerë dhe njohjen e vendit të tyre në paraqitjen e alternativave dhe programeve. Fatkeqësisht, stafi im e ka të vështirë t’i gjejë këto alternativa në fjalimet e disa politikanëve”, - përfundoi Liponen.

[Albo]

Liponen për Dulen: Jam finlandez, jo norvegjez

Shekulli

Ambasadori Liponen tha dje, gjatë intervistës në emisionin “Shqip”, pas një prononcimi të kryetarit të PBDNJ-së Vangjel Dule se, “jam vërtet i habitur me nivelin e diskutimeve dhe të ekspertizës së z. Dule. Ai as nuk e di se nga ç’vend i Evropës vij. E admiroj shumë Norvegjinë, por unë jam finlandez, që ai ta mësojë më në fund këtë. Ai duhet të mësojë, gjithashtu, më në fund, meqë ai ose partia e tij janë anëtarë të qeverisë, se nuk është në fuqi asnjë model i OSBE-së për ndonjë kod”. Liponen tha se, “ka vetëm modele dhe kode, të cilat janë influencuar dhe negociuar shumë nga qeveria e tij. OSBE-ja e jep ekspertizën e saj teknike në kornizën parlamentare të modeleve dhe zgjedhjeve politike që bëjnë partitë kryesore”. “Pra, akuzat e z. Dule janë të adresuara gabim. Brenda partnerëve të koalicionit duhet të ketë diskutime të mirëfillta. Prezenca e OSBE-së nuk është aktore politike në këtë proces. Ne jemi lehtësues. Ne kemi krijuar parakushtet e punës, e cila drejtohet politikisht nga partitë kryesore. Janë ato që marrin vendime dhe jo Prezenca e OSBE-së ose unë personalisht. Dhe, nëse i shihni më nga afër sistemet zgjedhore në Evropë, në çdo vend janë Parlamenti dhe forcat politike që vendosin se kush e administron procesin zgjedhor”, -shpjegoi Liponen. “Është tjetër gjë nëse kulturat politike janë aq të pjekura saqë të ketë besim se njerëzit mund të sillen në mënyrë neutrale, duke kërkuar të mirën e përgjithshme dhe respektimin e ligjeve, qofshin ata anëtarë të partive politike ose jo. Por përderisa Partia e të Drejtave të Njeriut dhe parti të tjera në Shqipëri të arrijnë nivele të tilla kulture politike në politikën e ditës, saqë të mos detyrohesh të pyesësh se kush janë këta njerëz dhe a mund të besohen, është e kotë të bëhen referenca të tilla”, -tha ai.

[Albo]

Liponen për Gjinushin: Ai le të merret me PS-në

Shekulli

Ambasadori Osmo Liponen nuk ka lënë pa shigjetuar para largimit nga Tirana edhe kryetarin e PSD-së Skënder Gjinushi. “Sikur unë dhe partia ime të ishim pjesë e qeverisë, unë do të sigurohesha që të jem në dijeni të lojës politike. Nëse ai s’është në gjendje ta bëjë këtë, ky është problemi i tij personal. Përsa u përket rekomandimeve dhe komenteve të mia personale, ai po përsërit diçka krejtësisht të pavend, sepse ne kemi një sërë komentesh e raportesh, si para, ashtu edhe pas zgjedhjeve lokale, ku thuhet se balancimi i KQZ-së është vendimtar në krijimin e besueshmërisë në sistemin zgjedhor. Balancimi përmendet në marrëveshjen politike, e cila çoi në Kodin e tanishëm Zgjedhor, që nuk është zbatuar”, -tha Liponen. Sipas tij, kjo është çështja që partia kryesore në qeveri pranoi të diskutojë me partinë më të madhe të opozitës. Ai tha më tej se “nuk kishte nevojë që unë të detyroja ndokënd për këtë çështje. Unë lehtësova negociatat, por është vendimi i tyre politik. Unë jam krenar që i ndihmova të arrijnë këtë marrëveshje, sepse përfundimisht u bë e mundur që të fillohej puna për rekomandimet. Çdo vit kur ka pasur diskutime për çështjet zgjedhore dhe sa herë që ka pasur rekomandime nga OSBE/ODIHR-i dhe nga Komisioni i Venecias, mesazhi ka qenë i qartë: Këto janë rekomandimet. Procesi politik dhe interpretimet politike u përkasin shqiptarëve. Ne ju ofrojmë ekspertizën më të mirë teknike, dhe nëse ju, si vend i pavarur, doni të diskutoni diçka tjetër jashtë rekomandimeve, jeni të lirë ta bëni”. Sipas tij, “përsa i përket çështjes nëse duhet të ndryshohet kushtetuta
mendimi i OSBE/ODIHR-it në parim ka qenë që kushtetuta të testohet për një farë kohe, por nëse ajo bëhet pengesë për funksionimin e demokracisë, atëherë duhet ndryshuar, por zgjedhja është, padyshim shqiptare”.

[Albo]

Organi ekzekutiv i BE-së u kërkon autoriteteve shqiptare të marrin masa për zgjedhjet e vitit 2005

Zgjedhjet, KE cakton afatet

Dështimi i zgjedhjeve do të ishte një hap mbrapa, serioz për integrimin në Bashkimin Evropian

Darina Tanushi

TIRANË – Komisioni Evropian, organi ekzekutiv i Bashkimit Evropian, u ka kërkuar autoriteteve të Shqipërisë marrjen e një serie masash për përgatitjen e zgjedhjeve të ardhshme parlamentare të vitit 2005.
Në rekomandimet e bëra në përfundim të dy takimeve politike të mbajtura në tetor dhe nëntor, Komisioni Evropian ka përcaktuar edhe afatet brenda të cilave duhet të zbatohen këto masa. Sipas radios “Zëri i Amerikës”, rekomandimet, të cilat pritet të marrin edhe pëlqimin e palës shqiptare, saktësojnë edhe një herë se dështimi në organizimin e zgjedhjeve sipas standardeve ndërkombëtare, do të ishte një hap serioz prapa për nënshkrimin e marrëveshjes së asociim-stabilizimit. Ndër këto rekomandime saktësohet se në muajin dhjetor 2004, politika shqiptare duhet të përfundojë ndryshimet në Kodin Zgjedhor dhe ndarjen e re të zonave zgjedhore. Ndërsa në janar të vitit që vjen, duhet të përcaktohen hapat për përgatitjen e zgjedhjeve, të miratohet rregullorja për procedurat që do të duhet të ndjekë KQZ-ja. Më pas ndër detyrat që duhet të plotësojë Shqipëria dhe veçanërisht politika shqiptare është përcaktimi i kufijve zgjedhorë e më pas në fund të muajit janar do të duhet të përfundojë edhe hartimi i procedurave të regjistrimit. Ndërkohë në muajin shkurt të vitit që vjen duhet të përfundojë regjistrimi i popullsisë e më pas të fillojë ngritja e komisioneve zonale zgjedhore. Ndërsa qeverisë i duhet të plotësojë detyrën e saj për të akorduar fondet e nevojshme për faturën financiare të zgjedhjeve të vitit që vjen. Ndër rekomandimet e Komisionit Evropian përcaktohet qartë se afati i publikimit të listave paraprake zgjedhore duhet të bëhet në mars të vitit 2005. Ndërkohë në prill duhet të ngrihen edhe komisionet e qendrave të votimit. Kjo është hera e parë që publikohen rekomandime me data konkrete për Shqipërinë nga Komisioni Evropian. Deri më sot institucionet ndërkombëtare janë mjaftuar vetëm me deklarata në parim dhe të përgjithshme, pa përcaktuar afate. Këto rekomandime kësaj here të përcaktuara qartë kanë ardhur pas dy takimeve radhazi që pala shqiptare ka zhvilluar me drejtuesit e BE-së në 22 tetor dhe 26 nëntor, seanca të cilat iu kushtuan çështjes së zgjedhjeve. Komisioni Evropian u ka bërë thirrje partive politike që të bëjnë përpjekje thelbësore që përfaqësuesit e tyre në komisionet zgjedhore të veprojnë si administratorë dhe jo si militantë politikë, që rregullat, drejtësia dhe mirëkuptimi të jetë para gjithçkaje. KE-ja thotë se që të arrihet sukses në këto zgjedhje duhet që partitë politike të dëshmojnë mbështetje të plotë në zbatimin e ligjit dhe në kryerjen e zgjedhjeve demokratike në përputhje me standardet ndërkombëtare. Në këto rekomandime përsëritet deklarata e bërë gjithnjë këto kohët e fundit nga organizmat ndërkombëtare se dështimi në zgjedhjet parlamentare do të paraqiste një kthim mbrapa serioz për të ardhmen e Shqipërinë në drejtim të integrimit në BE.



Rekomandimet e Komisionit Evropian

Dhjetor 2004: Ndryshimet në Kodin Zgjedhor Ndarja zonale

Janar 2005: Hapat për përgatitjen e zgjedhjeve
Rregullorja për procedurat e KQZ
Përcaktimi i kufijve të njësive zgjedhore
Hartimi i procedurave të regjistrimit

Shkurt 2005: Përfundimi i regjistrimit
Ngritja e komisioneve zonale zgjedhore
Qeveria të japë fondet për zgjedhjet

Mars 2005: Të publikohet lista paraprake

Prill 2005: Të ngrihen komisionet e qendrave të votimit

[Albo]

Lufta PS- PD, rrezikon integrimin e Shqiperise ne BE

Lufta per pushtet ndermjet Partise Socialiste dhe Partise Demokratike duket se po ve ne rrezik, nder te tjera, edhe integrimin e Shqiperise ne Bashkimin Europian. Kjo gje u pohua edhe nje here tjeter nga Komisioneri i Bashkimit Evropian, Olli Rehn, i cili eshte pergjegjes per zgjerimin. "Une jam mjaft i shqetesuar rreth klimes politike ne Shqiperi, e cila aktualisht nuk ndihmon ne venien ne jete te reformave ne kete vend. Ajo mund te demtoje pergatitjet per zgjedhjet e ardhshme. Dhe pa nje proces te rregullt zgjedhor, as qe mund te flitet per nenshkrimin e marreveshjes te Asociim-Stabilitetit me kete vend", deklaroi para Komisionit te Puneve te Jashtme te Parlamentit Evropian, komisioneri Rehn. Zyrtari i larte i Bashkimit Europian eshte i fundit ne rradhe, nga perfaqesuesit e institucioneve evropiane, qe e ka kushtezuar nenshkrimin e marreveshjes se Asociim-Stabilitetit me mbajtjen si duhet te zgjedhjeve te ardhshme legjislative. Bashkimi Evropian druan se edhe zgjedhjet e pergjithshme qe do te zhvillohen gjate ketij viti do te karakterizohen nga problemet. Prandaj, Brukseli me te gjitha mjetet qe ka ne dore po perserit se organizimi dhe mbarevajtja e zgjedhjeve te ardhshme legjislative do te perbejne "gurin e proves" ne ecurine e afrimit te Shqiperise me Bashkimin Evropian. Gjithashtu, ky i fundit ka ritheksuar disa here se menyra e zhvillimit te zgjedhjeve si dhe pranimi apo jo i rezultatit te tyre nga humbesi, do te jete me rendesi thelbesore ne vleresimet e Bashkimit Europian per Shqiperine, pra edhe per fatin e marreveshjes se Asociim-Stabilitetit.