Mikrofoni i Artë

[dodoni]

Sot, në pallatin e Kongreseve do të zhvillohet nata finale e festivalit “Mikrofoni i artë”. Në skenë do të ngjiten 20 këngët më të mira dhe emrat më të njohur të muzikës shqiptare. Të ftuar specialë Erica, Magic Box e DJ Ross

“Mikrofoni i artë”, sot nata e madhe e çmimeve


Shekulli

Pas një prezantimi maratonë, për 8 javë rresht në “Radio Show”, këngët pjesëmarrëse në festivalin “Mikrofoni i artë”, tashmë kanë mbërritur në finish. Sot në mbrëmje, në Pallatin e Kongreseve do të zhvillohet nata finale e këtij festivali, i cili tashmë ka hyrë në rrugën e traditës. Jo vetëm këngë, jo vetëm çmime, por edhe spektakël. Krahas prezantimit të 20 këngëve më të mira, të cilat kanë dalë prej një seleksionimi të gjatë, do të ketë edhe shumë të ftuar. “Kjo natë finale është si funksion i një pune shumë të madhe që ka bërë stafi i “Radio +2”, i cili ka organizuar për 8 javë me radhë “Radio Shoën”, gjatë të cilit janë prezantuar edhe këngët. Fillimisht në këtë festival janë paraqitur 131 këngë, të të gjitha rrymave muzikore, nga pop, rrock, alternative, ritme latine, Hip-Hop, R&B, etj, ndërkohë që në natën finale do të vijnë 20 prurjet më të mira”, - thotë regjisori i festivalit, Bujar Kokonozi. Sipas tij, në këtë edicion paraqiten emra mjaft të njohur të këngës shqiptare, si Eranda Libohova, Mariza Ikonomi, Eneida Tarifa, Altin Goci, Merland Kadëmi, Jonida Maliqi, Juliana Pasha, por edhe këngëtarë më të rinj, por premtues. Ashtu siç është bërë edhe traditë, gara e këngës, do të gërshetohet edhe me elementët e spektaklit. Të ftuarit specialë të këtij edicioni do të jenë Magic Box, Erica, Dj Ross, të cilët do t’i shtojnë ritmin kësaj nate me këngët e tyre danc, ndërkohë që një element i rëdësishëm i spektaklit do të jetë edhe baleti, i cili do të vijë përmes interpretimit të duetit të balerinëve tashmë të njohur të Teatrit të Operës dhe Baletit, Esdalin Gorani dhe Manjola Hasani. Prezantimi i festivalit i është besuar prezantuesve simpatikë Jorida Malltezi dhe Olti Curri. “Së bashku me skenaristen e këtij festivali, e cila këtë herë do të jetë gazetarja Elsa Demo, jemi munduar ta sjellim skenarin në mënyrë sa më komode dhe reale tek prezantuesit, duke dalë jashtë skicave të zakonshme të festivaleve dhe duke shmangur shprehje dhe fraza parazitare, që i ndeshin shpesh”, - vazhdon regjisori Kokonozi. Këtë herë skenografia e festivalit i është besuar skenografit të njohur Bashkim Zahaj, me ndriçimin dhe foninë mjeshtri Lulëzim Tufa, ndërkohë që transmetimi televiziv do të realizohet në bashkëpunim me stafin e Televizionit Kombëtar “Klan”. “Përsa i përket skenografisë, pa dashur të zbuloj gjithë të fshehtat e kësaj mbrëmjeje, mund të them që do të jetë e lehtë, e këndshme dhe në harmoni të plotë me ritmet moderne që këngët do të sjellin në skenën e Pallatit të Kongreseve”, - thotë Kokonozi. Por momenti më i rëndësishëm i mbrëmjes do të jetë ndarja e çmimeve, e cila do të bëhet prej një jurie të specializuar, në përbërje të të cilës janë maestro Robert Radoja, në pozicionin e kryetarit të jurisë, kompozitori i ri nga Prishtina Fatos Lumani, kitaristi Edison Miso, sopranoja Eriona Gjyzeli dhe gazetarja Elsa Demo. Mësohet se të gjitha këngët do të vlerësohen me pikë nga ana e jurisë dhe përfundimet e votimit do të bëhen publike, madje, pas festivalit, ato mund të gjenden edhe në faqen e “Shekullit” në internet (www.shekulli.com.al)
Natë çmimesh
Nata finale e festivalit të këngës “Mikrofoni i artë”, mund të quhet ndryshe edhe nata çmimeve, jo thjesht për faktin që këtë natë do të shpallen fituesit, por edhe për numrin e çmimeve që do të ndahen. Krahas 5 çmimeve që do të ndajë juria e festivalit, do të ndahen edhe dy çmime të tjera speciale. Kështu mbrëmjen e sotme do të shpërndahen trofetë “Mikrofoni i artë”, i cili përbën dhe çmimin e madh të festivalit, “Tendencë 2004”, “Teksti më i mirë”, “Interpretuesi i ri më i mirë”, si dhe “Spektër Vip”, një çmim që jepet prej revistës “Spektër”. Gjithashtu do të jepet edhe trofeu i përvitshëm “Radio Hit +2”, të cilin e jep Radio +2, në bazë të votimit të dëgjuesve të “Radio Show”. Një tjetër trofe është ai i orkestracionit më të mirë, që do të votohet prej jurisë, e cila ka seleksionuar 20 këngët më të mira për në natën finale. Të gjitha këto çmime që do të ndahen do të jenë të shoqëruara dhe me nga një vleftë financiare.



25/09/2004
Ngjitet për herë të parë në një skenë festivalesh në Shqipëri dhe do të këndojë një këngë ritmike

Leonora: Do të sjell ritëm në festival


Shekulli

Eshtë hera e parë që ngjitet në skenën e një festivali shqiptar dhe do të këndojë e para. Duke qeshur ajo thotë se tashmë është e vjetër në Kosovë e Maqedoni, por fare e re në Shqipëri. Ka fituar 3 çmime të para në festivalin “Nota fest” në Shkup dhe dy në “Shoë fest” në Prishtinë. Leonora Poloska, këngëtarja me origjinë nga Korça e me banim në Maqedoni, e njohur për publikun shqiptar për këngën e saj “Të dua, s’të dua”, ka mbërritur dje në Tiranë, për të marrë pjesë në Festivalin “Mikrofoni i artë”. Ajo do të këndojë një këngë ritmike, të titulluar “Jo, jo, jo”, e cila shpreson të bëhet një “hit” në Shqipëri. Edhe pse është e bindur në aftësitë e saj, ajo shprehet se i trembet publikut shqiptar dhe pritjes së tij. “Publiku juaj është i çuditshëm, megjithatë shpresoj të pritem mirë”.

Çfarë ju shtyu të mernit pjesë në festivalin “Mikrofoni i artë”?
Në Shqipëri jam prezantuar vetëm përmes videoklipit “Të dua, s’të dua”. Në Kosovë e Maqedoni tashmë njihem, mirëpo në Shqipëri, nuk kisha pasur deri tani një arsye për tu njohur më tepër. Festivali “Mikrofoni i Artë” ishte një shkak për të ardhur. Më pëlqeu pjesëmarrja e shumë këngëtarëve të njohur, pra cilësia e këngëve dhe pranova që të marr pjesë. Gjithashtu më tërhoqi mënyra e organizimit të festivalit, fakti që gjatë 3 muajve kënga bëhej e njohur për publikun.
Mund të na tregoni diçka për këngën tuaj?
Kënga me të cilin do të paraqitem, nuk është e natyrës sime, pasi unë këndoj balada, por e tipit “Të dua s’të dua”, pasi kjo ishte kënga që kërkohej. Ajo duhet të ishte hit dhe duhet të dëgjohej gjatë verës. Pra është një këngë më ritmike, por jo aq orientale. Titulli i këngës është “Jo, jo, jo”, tekstin e kam shkruar unë, ndërsa muzika dhe orkestracioni është i Artan Kastratit, një kompozitor i ri nga Maqedonia, i cili premton shumë.
Keni pasur oferta të tjera për të marrë pjesë në aktivitete të këtij lloji?
Gjithmonë kam pasur dëshirë të marr pjesë në festivalin mbarëkombëtar dhe ndoshta këtë vit do të marr pjesë. Para 5 vjetësh kam kënduar në koncertin e të ndjerit Agron Berisha, në Pallatin e Kongreseve, bashkë me Bojken Lakon, Eneida Tarifën e këngëtarë të tjerë. Tani mendoj se tani është momenti, që të bëhem pak më e njohur në Shqipëri.
Kjo nuk është hera e parë që ju vini në Shqipëri…
Kam qenë edhe herë të tjera në Shqipëri, pasi rrënjët e mia janë shqiptare. Im atë është nga Korça dhe gjithë njerëzit e mi janë këtu. Kam qenë këtu në vitin 1991, kur Tirana nuk ishte edhe aq e bukur, ndërsa tani ka pësuar një ndryshim rrënjësor. Unë jam befasuar.
Cilat janë projektet tuaja më të afërta?
Momentalisht po përfundoj Fakultetin e Muzikës dhe pres të diplomohem. Pas një muaji del albumi im i dytë, pas tri vitesh. Do të jetë i shoqëruar edhe me videoklipe. Në një prej këngëve do të shfaqem në një duet me një djalë nga Kosova, është një këngë e dhimbshme dhe videoklipi i saj do të jetë në formën e një filmi. Ndoshta pak si “Zhade”. Gjithashtu do të kem edhe një videoklip solo. Ndërkohë marr pjesë në koncerte dhe mbrëmje që zhvillohen çdo fundjavë në Kosovë e Maqedoni.
Pretendoni për çmim?
Kjo është edhe pyetja e parë që më bënë sapo mbërrita. I rëndësishëm për mua është reagimi i publikut. Tashmë ia njoh pulsin publikut kosovar e atij maqedonas, por ende nuk e njoh atë shqiptar. Të them të drejtën nuk e di sesi do të pritem, megjithatë shpresoj për mirë.



25/09/2004

[dodoni]

Eshtë zhvilluar mbrëmë në Pallatin e Kongreseve, nata finale e edicionit të tretë të festivalit “Mikrofoni i artë”. Kanë konkurruar 20 këngë dhe janë ndarë 8 çmime

Merland Kadëmi rrëmben trofeun e “Mikrofonit të artë”


Shekulli

Kënga “Një tjetër botë”, kënduar nga Merland Kadëmi, me muzikë dhe orkestrim të Dorian Gjonit, është shpallur fituesja e Festivalit “Mikrofoni i artë”. Për të tretën herë radhazi, është zhvilluar mbrëmë në skenën e madhe të Pallatit të Kongreseve, festivali i alternativave dhe tendencave të reja, “Mikrofoni i artë”. Pas tetë javësh prezantimi, përmes valëve të Radio “+2” dhe një seleksionimi tepër të ashpër, në natën finale kanë mbërritur vetëm 20 këngë, nga 130 që ishin paraqitur në fazën e parë. Ndryshe nga dy edicionet e para, këtë herë festivali ka treguar se është futur në rrugën e traditës, duke tërhequr gjithmonë e më tepër vëmendjen, jo vetëm të këngëtarëve të rinj, që kanë nevojë për një skenë ku të afirmohen, por edhe për ata që tashmë kanë eksperiencë mbi supe. Kështu mes konkurrentëve të mbrëmshëm mund të përmendim këngëtarë të tillë, si Eranda Libohova, e cila i rikthehet festivaleve pas dy vitesh mungese, Mariza Ikonomi, Jonida Maliqi, Juliana Pasha, “Aurora”, Merland Kadëmi, Altin Goci, e shumë të tjerë. Duke qenë një festival “pa korniza” siç e kanë quajtur vetë këngëtarët, përveç vokalit të tyre, disa syresh kanë sjellë edhe performanca baleti në skenë. Kështu disa këngë, ai ajo e Libohovës, apo Maliqit, kanë qenë të shoqëruara me numra koreografikë. Megjithatë, pavarësisht prurjeve dhe tendencave, jo të gjithë do të fitonin çmime. Përveç trofeut “Mikrofoni i artë”, i cili i është dorëzuar fituesit prej kryebashkiakut të Tiranës, Edi Rama, juria e festivalit, e përbërë nga mjeshtri Robert Radoja, kitaristi Edison Miso, sopranoja Eriona Gjyzeli, kompozitori Fatos Lumani dhe redaktorja e kulturës, pranë gazetës “Shekulli”, Elsa Demo, ka ndarë edhe tre çmime të tjera. Çmimi për tekstin më të mirë iu dha Redi Gjuzit, për këngën “Katastrofë”, kënduar nga Altin Goci, çmimi “Tendencë 2004” iu dha vajzave nga Prishtina “Boom girls” me këngën e tyre hip-hop “Tironsit”, ndërsa çmimi e interpretuesit të ri më të mirë e ka fituar këngëtarja e re Hata Koca. Dje në mesditë, anëtarët e jurisë, kanë dalë në një konferencë për shtyp, ku kanë bërë të njohur dhe mënyrën e votimit të këngëtarëve. Sipas tyre, të gjithë këngëtarët do të vlerësoheshin me pikë nga 1-20. Të gjithë vlerësimet e jurisë mund të gjenden në faqen e “Shekullit” në internet (www.shekulli.com.al). Mësohet se kënga fituese “Një botë tjetër” është votuar në mënyrë unanime nga juria e festivalit. Por çmimet nuk përfundojnë këtu. Juria e “Radio shoë-t”, e cila punoi me javë të tëra për të sjellë këngët deri në natën finale, ndau çmimin për orkestracionin më të mirë, të cilin e fitoi kompozitori Dorian Gjoni. “Radio Hit” ka qenë një tjetër çmim i dhënë nga Kompania “2K Group”, si dhe “Spektër Vip”. Ndërkohë që Juliana Pasha, ka fituar çmimin special “Miku i Mikrofonit të artë”, si pjesëmarrësja më e “rregullt”e këtij festivali. Pasha ka marrë pjesë në të tri edicionet e “Mikrofonit”. Të gjitha çmimet e ndara kanë edhe nga një vlerë financiare.
Dorë e “padukshme”
Megjithatë, suksesi i natës së mbrëmshme nuk mund të kuptohej pa punën e “të padukshmëve”, organizatorëve që qëndronin prapa kuintave. Përmes një regjie të thjeshtë në dukje, regjisori Bujar Kokonozi, ka ofruar një mbrëmje të këndshme, me ritëm gare dhe pa “zbukurime” të tepërta. Nata mbrëmshme ishte konceptuar një garë e pastër, megjithatë nuk munguan edhe elementët e spektaklit, përmes interpretimeve të këngëtarëve italianë Erica, Magic Box dhe numrave koreografikë të balerinëve Esdalin Gorani e Manjola Hasani. Gjithashtu, skenari, i përgatitur nga gazetarja Elsa Demo, ka ardhur mjaft natyrshëm, jashtë klisheve të zakonshme, përmes dy prezantuesve të festivalit, Jorida Malltezi dhe Olti Curri. Por nuk mund të mos përmendet skenografia e mjeshtrit Bashkim Zahaj, e cila ka shoqëruar të gjithë këngëtarët. Një skenografi e thjeshtë, e cila nën efektin e dritave ngjante herë me gjuhë flakësh e herë me stalaktite me ngjyra të akullta. Ky festival është realizuar me mbështetjen e Bashkisë së Tiranës, “2K Group”, “Tirana Internacional Hotel”. Banka Popullore, Revista “Spektër”, si dhe TV “Klan”, në ekranin e të cilit do të shfaqet pak ditë më vonë kjo natë finale.
Festivali, “dyndje” kosovarësh
Më tepër atmosferë dhe ritëm kanë sjellë në skenën e “Mikrofonit të artë”, këngëtarët e ardhur nga viset shqiptare, Kosova, Maqedonia, por edhe më tej. Mes 20 konkurrentëve të natës së mbrëmshme, 7 syresh kanë ardhur nga larg. Për shumicën prej tyre skena e “Mikrofonit” ka qenë prezantimi i parë me publikun dhe kolegët shqiptarë. Të gjithë janë ndier mirë dhe shumë prej tyre janë shprehur se çmimi nuk ka shumë rëndësi, “mjafton pjesëmarrja”. Kështu, mes emrave të të “ardhurve” mund të përmendim këngëtaren nga Maqedonia, Leonora Poloska, e njohur për publikun shqiptar me këngën “Të dua, s’të dua”, djemtë simpatikë nga Prishtina të grupit “Aurora”, Blero, i ardhur nga Suedia për të marrë pjesë tek “Mikrofoni i artë”, vajzat energjike “Boom girls”, fituese të “Tendencë 2004”, e shumë të tjerë, të cilët kanë sjellë në skenën e festivalit këngë ritmike e ritme hip-hop e R&B.

Për herë të parë tek “Mikrofoni”…
Eranda: Një festival pa korniza
Ajo thotë se ka këmbën e mbarë dhe se në të gjitha aktivitetet fati e ka ndjekur pas. Eranda Libohova ka marrë pjesë për herë të parë në Festivalin “Mikrofoni i artë”, me një krijim të Genti Lakos, me të cilin bashkëpunon prej 4 vjetësh. “Mungesa e kornizave, që vihen re në festivalin e fundvitit, më ka tërhequr së tepërmi, andaj edhe vendosa që të marr pjesë në këtë festival. Këtu ka shumë rryma bashkëkohore dhe është e lehtë të gjesh vetveten”, - thotë Libohova, duke shtuar se pas “Mikrofonit” nuk do të marrë pjesë në ndonjë festival tjetër. “Momentalisht jam duke u përgatitur për albumin tim, i cili pritet të dalë në treg në muajin dhjetor. Albumi do të ketë 10 këngë, mes të cilave do të ketë të reja, por edhe popullore të përpunuara”, - thotë ajo, duke shtuar që edhe këtë herë, do të vazhdojë bashkëpunimin me Genti Lakon.

Mariza: Këtë herë nuk ka rëndësi çmimi
Pas një çmimi të dytë në Festivalin e Këngës në RTSH, i cili u diskutua gjatë, Mariza Ikonomi, ka vendosur të prezantohet në një tjetër skenë. “E vërteta është se kam marrë pjesë në të gjitha aktivitetet e mëdha muzikore, por jo tek “Mikrofoni i artë”, prandaj më grishi të marr pjesë. Ndërkohë kisha një krijim timin, i cili mu duk i përshtatshëm për këtë festival”, - thotë Mariza, e cila ndonëse ishte “betuar” të mos merrte pjesë më në festivale, rikthehet me baladën “Me ty”. “Artisti nuk mund të rrijë dot pa sadisfaksionin që të fal publiku, kështu që megjithëse u mundova që të mos merrja pjesë, nuk i shpëtova dot kësaj tërheqjeje. Dhe të them të drejtën jam shumë e kënaqur që marr pjesë në këtë aktivitet. Nuk ka shumë rëndësi çmimi, mjafton të kënaqësh publikun dhe veten tënde”, -thotë këngëtarja.

Blero, nga Sedia në skenën e “Mikrofonit”
Kur i propozuan të ngjiste skenën e “Mikrofonit të artë”, ai nuk pati asnjë kundërshtim. Blero, vjen nga Suedia për t’u prezantuar për herë të parë në një skenë shqiptare. “Eshtë kënaqësi shumë e madhe për mua të jem këtu. Kam gjetur një pritje shumë të ngrohtë dhe pak rëndësi ka nëse do të fitoj ndonjë çmim ose jo. Mjafton që jam këtu. Kjo është hera e parë që marr pjesë në një festival dhe nëse do të marr të tjera ftesa do të kthehem sërish këtu”, - thotë shqiptari nga Suedia, i cili ka vendosur të përballet me publikun, jo vetëm si këngëtar, në interpretimin e këngës ritmike “Eja ti”, por edhe si një kërcimtar i zoti. Blero ia ka dedikuar gjithë kohën e tij muzikës dhe tashmë është duke punuar me disa nga producentët në të mirë në Suedi, për të përgatitur albumin e tij të dytë, që do të dalë së shpejti.

“Aurora”: Çmimi më i mirë është publiku
Mendojnë se suksesi nuk ka kufi, andaj dhe kanë ardhur të marrin pjesë tek “Mikrofoni i artë”. “Ne kemi disa “kritere” për publikun që ndonjëherë duken paradoksale. Nuk është e rëndësishme të krijojmë një emër, e më tej të “dehur” nga suksesi të tërhiqemi. Nuk më dukej e drejtë që të tërhiqeshim nga festivalet, megjithë suksesin që kemi pasur në Kosovë e Tiranë, me këngën “Larg je ti”. Nuk kemi ardhur këtu për të marrë një çmim nga juria, pasi për ne çmimi më i mirë është publiku”, - thotë njëri prej anëtarëve të grupit “Aurora”. Pas “Mikrofonit të artë” ata premtojnë se do të jenë të pranishëm edhe në skena të tjera festivalesh. “Por kjo nuk do të thotë që do të jemi monotonë para publikut. Kemi ardhur këtu të konkurrojmë me këngëtarët e tjerë, por mbi të gjitha të konkurrojmë me veten”.

Merland Kadëmi, rikthim triumfues
Ka bërë lëvizjen e duhur. Rikthehet pas kaq vitesh dhe fiton trofeun e festivalit. Mjaftoi vetëm një shkendijë, që ta rikthente sërish në skenën e festivaleve, pas një periudhe të gjatë mungese. Merland Kadëmi, i cili për shumicën e njerëzve është djali me syze, që këndonte tek “Top shoë”, ka vendosur t’i rikthehet sërish skenës, por jo me ngut, siç thotë ai. Për të, Festivali “Mikrofoni i artë” ishte mundësia më e mirë, që nuk duhej humbur, që ofron alternativa dhe pranon tendenca. Pa dashur të tregojë të gjitha “sekretet” ai rrëfen se së shpejti do të shfaqet në një tjetër skenë festivalesh dhe se po përgatitet për albumin e tij të parë.
Keni vite që nuk merrni pjesë në festivale. Pse ky rikthim dhe pse tek “Mikrofoni i artë”?
U desh një nxitje që të rikthehesha, një bashkëpunim me kolegun dhe mikun tim Dorian Gjoni. Ai krijoi një muzikë e orkestroi dhe ma dhuroi mua. Ai më kërkoi që vokali im të ishte prezent në këtë këngë. E dëgjova, u binda dhe na u duk e përshtatshme që ta paraqisnim tek “Mikrofoni i artë”, pasi ka tendenca, alternativa, rryma të ndryshme dhe unë nuk doja ta përjashtoja veten nga ky aktivitet. Eshtë një festival interesant, i cili u jep mundësi të afirmohen jo vetëm këngëtarëve që kanë tashmë eksperiencë në skenë, por edhe grupmoshave të reja. Më pëlqen fakti që nuk ka vetëm një rrymë, por ka shumë larmi.
Fundviti ka rezervuar edhe dy festivale të tjera, mendoni të merrni pjesë?
Nuk jam shumë i qartë se çfarë do të bëj, por mendoj se do të marr pjesë tek “Kënga Magjike”, pasi dua të rikthehem gradualisht dhe jo me një vrull të papërmbajtshëm, ndërsa në festivalin e fundvitit do të doja që të paraqitesha me diçka me të vërtetë të menduar e të përgatitur mirë.
Dikur më keni thënë se do të nxirni një album…
Po, është e vërtetë, jam duke punuar për albumin tim. Momentalisht jam duke përzgjedhur këngët më të mira, më të përshtatshme për t’i nxjerrë në treg. Për të realizuar një album nuk është e lehtë, do shumë punë, shumë energji dhe kjo më ka mbajtur disi të tërhequr nga skena. Megjithatë ende nuk mund të them saktësisht se kur do të dalë ai në skenë.

Çmimet 2004
“Mikrofoni i artë” Merland Kadëmi, “Tjetër botë”, muzika, orkestrimi Dorian Gjoni
“Teksti më i mirë” “Katastrofë”, autor Redi Gjuzi, këndon Altin Goci
“Interpretuesi i ri më i mirë” Hata Koca me këngën “Ti dhe unë, të dy”
“Tendencë 2004” “Boom girls” me këngën “Tironsit”
“Orkestrimi më i mirë” Dorian Gjoni
“Spektër Vip”
“Radio Hit”
“Miku i Mikrofonit të artë” Juliana Pasha


“Katastrofë”

Në rrugën pa drita, pa fjalë si ti
Dua të hidhem sot

Me mure që zgjaten, që nuk flejnë dot
Unë prapë jam mbushur plot

Me këmbët që dridhen, që s’kanë më frikë
Unë sot nuk ndalem dot

Me fjalët e fundit, pa fund si ti
S’dua të kthehem sot
S’dua të kthehem sot

Dhe kur nata të fillojë të flasë
Të më marrë dhe me dhunë të më nxjerrë jashtë
Mes dhjetëra gotash nuk dua më të shoh
Nata prishet nesër është “Katastrofë”

Në rrugën e errët në gjumë si ti
Unë nuk do të shtrihem dot

Të gjitha i fsheha thërrita fort
Ti mos u kthe prapë sot

Redi Gjuzi




26/09/2004

[Genti^Itali]

“Mikrofoni i artë”, këngët më të mira në tregun muzikor


A. Mile

Këngët më të mira të edicionit të tretë të Festivalit të Këngës së Lehtë dhe Moderne “Mikrofoni i artë”, janë përmbledhur në një CD. Menjëherë pas natës finale të festivalit, e cila u zhvillua në datën 25 shtator, në Pallatin e Kongreseve, tregut muzikor iu shtua një tjetër përmbledhje këngësh, ajo e “Mikrofonit të artë”. Sipas organizatorëve të këtij aktiviteti, kjo përmbledhje është realizuar në bashkëpunim me shtëpinë diskografike “Eurostar”, e cila ka blerë të drejtën ekskluzive të shpërndarjes së kësaj CD-je, për një periudhë 6 – mujore. Edhe pse në ditët e para të hedhjes në qarkullim të CD-së dhe kasetës, në pikat e shpërndarjes “Eurostar”, kanë filluar të shfaqen të interesuarit e parë.
Në këtë përmbledhje, janë përfshirë 20 këngët më të mira të festivalit, të përzgjedhura, pas një gare 8 javore dhe seleksionimi të gjatë, mes 130 krijimeve të paraqitura pranë Radios “+2”. Ndër to mund të përmenden këngët, që u vlerësuan edhe me trofetë e festivalit, si kënga “Tjetër botë” e kënduar nga Merland Kadëmi, fitues i “Mikrofonit të artë”, interpretimi i Eranda Libohovës, Mariza Ikonomit, Hata Kocës, Jonida Maliqit, “Boom girls”, Altin Goci, “Aurora”, Leonora Poloska, e shumë të tjerë. CD kushton 700 lekë, por këngët e “Mikrofonit të artë” do të serviren edhe në kasetë.