Taksat ne Shqiperi

[ganoid]

Jeton Demi - 20/10/2004

Bizneset e vogla do të paguajnë rreth 20 mijë lekë më pak

Tatimifitimi për vitin e ardhshëm do të paguhet në masën 23, nga 25 për qind që është aktualisht, dhe tatimi mbi xhiron nga 4 në 3 për qind


Organet tatimore kanë njohur uljen e tatimit mbi fitimin për bizneset e vogla që kanë xhiro vjetore mbi 2 milionë nga 4 në 3 për qind. Ulje do të ketë edhe për tatimin mbi të ardhurat nga 25 në 23 për qind. Kërkesa e bizneseve ka qenë që ky tatim të ulej në masën 20 për qind. Ulja parashikohet të fillojë zbatimin në paketën fiskale të vitit 2005. Në fakt administrata tatimore nuk ka pranuar shumicën e kërkesave për uljen e taksave dhe tatimeve, në paketën fiskale për vitin 2005. Përfaqësues të komuniteti të biznesit kanë akuzuar administratën tatimore për mungesë vullneti dhe pune për ndryshime në paketën fiskale. “Ndërkohë që kërkesat tona pranohen nga niveli i lartë i administratës së Ministrisë së Financave kërkesat tona hasin në kundërshtim pikërisht në nivelin e ulët, në atë të administratës tatimore”, është shprehur Sotiraq Dhamo, specialist i Dhomës së Tregtisë. Këto janë bërë të ditur gjatë seminarit të zhvilluar dje në mjediset e “Hotel International” në Tiranë. Takimi është organizuar nga Bashkimi i Ndërmarrjeve të Vogla dhe të Mesme, Partia Demokrate e Re si dhe organizata të tjera të komunitetit të biznesit. Partia Demokrate e Re ka premtuar se do të lobojë në parlament për plotësimin e pjesës së kërkesave që nuk janë marrë parasysh deri më tani në paketën fiskale 2005.
Qëllimi i takimit ishte argumentimi për nevojën e uljës së barrës fiskale ndaj biznesit duke e argumentuar këtë si të vetmen mënyrë për uljen e shmangies fiskale dhe të zgjerimit të bazës së tatimpaguesve. Gjithashtu ulja e barrës fiskale mendohet se do t’i jap nxitje biznesit në vend për rritje të produktivitetit, duke ndikuar kështu edhë në zhillimin e përgjithshëm të ekonomisë dhe rritjen e numrit të të punësuarve. Një ulje e barrës fiskale mendohet se mund të jetë edhe një sinjal pozitiv për nxitjen e inestimeve të huaja direkte në vend, që sipas raporteve të ndryshme, del se janë në rënie në vendin tonë. “Qëllimet kryesore për ndryshime në paketën fiskale 2005 janë ulja e tatimfitimit, ulja e tatimit mbi të ardhurat, ulja e TVSH-së dhe ulja e tatimit mbi ndërmarrjet e vogla dhë të mesme,” ka theksuar Dhamo.


Debati
Biznesi, thjesht grup interesi - jo faktor social
Takimi i djeshëm është shoqëruar me një debat argumentesh nga komunitetit i biznesit lidhur me nevojën për të bërë ndryshimet në paketën fiskale 2005 për t’i shërbyer kështu edhe përafrimit të legjislacionit shqiptar me atë europian. Specialistë të fushës së financave nga komuniteti i biznesit dhe organizata të tjera jofitimprurëse kanë argumentuar arsyet e uljes së Tatimit mbi Vlerën e Shtuar, heqjen e tatimeve dhe taksave për bizneset e reja, uljen e tatimit të fitimit, ndryshimet në procedurat administrative për të shmangur korrupsionin dhe evazionin dhe kërkesa të tjera të shumta që synojnë përmirësimin e gjendjes së biznesit në Shqipëri. Nga ana tjetër, Artur Babajanit, përfaqësues i Drejtorisë së Përgjithshme të Tatimeve, “ulja e taksave të ndryshme nuk ka provuar zgjerimin e bazës tatimor dhe rritje të të ardhurave në buxhetin e shtetit”. “Efekti i uljes së taksave do të ndjehet menjëherë në buxhetin e shtetit ndërkohë që efektet e rritjes së të ardhurave nga ulja e tyre mund të vijnë vetëm mbas disa vitesh dhe Shqipëria nuk ka mundësi për momentin të marrë një hap të tillë”, është shprehur Babajani.
Për Sotiraq Dhamon, specialist i Dhomës së Tregtisë dhe Industrisë: “Të gjitha kërkesat e komuniteti të biznesit synonin rregullime në dy fusha kryesore. Në Fushën e politikave fiskale tatimore dhe, së dyti, më fushën e administrimit tatimor”. Specialistët mendojnë se përmes këtyre ndërhyrjeve do të evitohet ngarkesa e lartë fiskale që sjell evazion fiskal dhe korrupsion. “Mbi të gjitha në synojmë që përmes këtyre propozimee të ndikojmë në përafrimin e legjislacionit shqiptar me legjsilacionin e Bashkimit Europian”. Dhamo ka kërkuar nga administrata tatimore që të argumentojnë mospranimin e kërkesave të komunitetit të biznesit në mënyrë që kërkesat mos të përsëriten vit pas viti. “Ne jemi të bindur se të gjitha kërkesat tona janë të realizueshme dhe për këtë ne kemi dhënë të gjitha argumentet teorike si dhe shembujt konkretë edhe të legjislacionit në rajon dhe BE. Vetëm një numër i vogël i këtyre kërkesave mund të shtyhet për plotësim në vitet më pas,” ka theksuar më tej Dhamo. Ndërsa Elida Reçi, drejtore ekzekutive Institutit të Financave Publike ka kërkuar nga administrata tatimore dhe doganore të rrisë shkallën e transperencës, të përgjegjësisë dhe të pjesëmarrjes.

[ganoid]

Eltion Hoxha - 29/10/2004

Qeveria rrit taksat mbi pagën

Këshilli konsultativ i Biznesit ka diksutuar dje paketën fiskale për vitin e ardhshëm, ku ndër pikat e debatuara kanë qenë llogaritja e tatimit mbi të ardhurat mbi kontributet e sigurimeve shoqërore dhe shëndetësore


Këshilli konsultativ i Biznesit është mbledhur dje për të diskutuar nen për nen projektligjin “Për paketën fiskale 2005”. Presidenti i Dhomave të Tregtisë të Shqipërisë Luan Bregasi ka kundërshtuar llogaritjen e tatimit mbi të ardhurat mbi kontributet e sigurimeve shoqërore dhe shëndetësore, pasi kjo do të rrisë tatimin mbi pagat. Gjithashtu ai ka kundërshtuar tarifën prej 30 për qind për pagat mbi 400 mijë lekë. Vitin e ardhshëm do të tatohen edhe pagat nën 14 mijë lekë me një tatim prej 1 për qind. Bregasi ka kërkuar heqjen e taksave doganore për lëndët e para që shërbejnë për prodhimin e mallrave në vend. “Të gjitha shqetësimet, propozimet dhe vërejtjet e biznesit për përmirësimin e politikës fiskale janë diskutuar gjerësisht në një hark kohor prej më shumë se 5 muajsh, në konsultime dhe debate të vazhdueshme”,- është shprehur në fjalën e hapjes ministri i Ekonomisë Anastas Angjeli. Ndër amendimet kryesore që janë bërë publike deri tani janë ulja e tatimfitimit nga 25 në 23 për qind si dhe ulja e tatimit të thjeshtuar të fitimit nga 4 në 2 për qind. Presidenti i Dhomave të Tregtisë së Shqipërisë Luan Bregasi ka shprehur mirënjohjen e biznesit për iniciativat e marra për uljen e disa tatimeve në paketën e vitit të ardhshëm. “Kemi kërkesa për ndryshime, por dua të vë në dukje se për herë të parë është vënë re një gjë pozitive, pasi është parë një vullnet i mirë dhe nga ana e hartuesve, ashtu dhe nga përfaqësuesit e biznesit për hartimin dhe ndryshimin e politikave fiskale”,- tha dje Luan Bregasi. Sipas tij, ulja e tatimi të thjeshtuar të fitimit dhe shkallëzimi i taksave të shërbimit duhet parë si një vullnet i mirë. “Në tërësi, ndryshimet e propozuara në këtë paketë fiskale nuk synojnë që të krijojnë detyrime tatimore shtesë, por të lehtësojnë procedurat administrative si për tatimpaguesit, ashtu edhe për administratën tatimore”,- tha ministri Angjeli. Sipas Angjelit, ulja e këtyre taksave do të shoqërohet me ulje të të ardhurave në buxhetin e shtetit, por shpresohet që kjo të kompensohet me rritjen e bazës tatimore. Ministri i Ekonomisë dhe zëvëndësministrja e Financave kanë bërë të ditur se propozime dhe ndryshime në paketën fiskale të 2005 priten deri sa ajo të dërgohet për dikutim në komisionet parlamentare dhe parlament.


Ndryshimet
Siç edhe është deklaruar prej vitit 2006 tatimi mbi fitimin do të aplikohet në masën 20 për qind. Në paketën e vitit të ardhshëm organet kompetente do t’u njohin bizneseve si shpenzime të zbritshme për qëllime biznesi dëmtimet, firot, skarcot dhe humbjet e mallrave. Ndërkohë që interesat bankare nuk do të njihen si shpenzime të zbritshme.Ndryshim tjetër për vitin e ardhshëm është se çdo person që ka statusin e personit juridik, detyrohet të kërkojë të regjistrohet në skemat e pagimit të TVSH-së, pavarësisht nga qarkullimi vjetor. Deri tani qarkullimi ishte në masën e 8 milionë lekë në vit. Interesat për mosrimbursim të TVSH-së brenda 30 ditësh do të jenë nga data e bërjes së kërkesës dhe janë 2 për qind muajin e parë dhe nga 1 për qind muajt e tjerë.

[ganoid]

Eltion Hoxha - 29/10/2004

Angjeli: “Akcizë fikse për naftën”

Ministri i Ekonomisë Angjeli ka deklaruar se për vitin e ardhshëm po rishikohet mundësia e aplikimit të akcizës fikse mbi naftën


Vitin e ardhshëm në Shqipëri mund të aplikohet akcizë fikse mbi naftën. Kjo për të minimizuar efeket e rritjes së çmimit të naftës në tregjet ndërkombëtare në tregun shqiptar. Këtë ka rikonfirmuar dje gjatë diskutimeve për paketën fiskale për vitin e ardhshëm në mbledhjen e Këshillit konsultativ të Biznesit, ministri i Ekonomisë Anastas Angjeli. “Mund të pranojmë aplikimin e politikave dhe propozimeve lidhur me akcizën e karburanteve”, tha dje ministri i Ekonomisë. Sipas Angjelit, ndryshimi i akcizës mund të jetë i përkohshëm derisa të stabilizohet tregu. “Do të pranojmë një ngrirje apo aplikim të akcizës fikse për karburantet, kjo deri sa të krijohet një situatë normale, për këtë kemi dhe shembujt e vendeve të tjera që kanë ndryshuar formën e vjeljes së akcizës”, deklaroi Angjeli. Një sinjal të ngjashëm e ka dhënë para një jave edhe ministri i Financave Arben Malaj, i cili është shprehur se rritje çmimit të naftës mund të ndikojë në frenimin e rritjes ekonomike në vend.
“Ky ndryshim në paketën fiskale të vitit 2005 mendohet të bëhet pasi rritja e çmimit të naftës ka ndikime negative në disa faktorë që ndikojnë në mënyrë të drejtëpërdrejtë në ecurinë ekonomike të vendit”, është shprehur ministri Malaj.
Aplikimin e akcizës fikse e kanë kërkuar prej kohësh importuesit dhe tregtuesit më të mëdhenj në vend. Sipas tyre, aplikimi i një akcize fikse do të mbronte tregun vendës nga luhatjet e çmimit të naftës në tregjet ndërkombëtare. “Sa më shumë rritet çmimi i naftës, aq më shumë rritet vlera e akcizës që duhet të paguhet dhe kjo përkthehet me një rritje të çmimit të naftës”, shprehet një importues.
Aktualisht akciza e naftës është 65 për qind e vlerës së çmimit, ndërkohë që nënproduktet e tjera si benzina, benzoli, vajguri dhe lëndët e tjera djegëse kanë një akcizë fikse.

[ganoid]

Kete vit ministria e finances ka bere nje risi. Ka vene ne dispozicion jo vetem te politikanve por te te gjithe opinionit bublik 4 muaj para hedhjes per miratim ne parlament.

Per te pare paketen fiskale 2005 shkoni tek kjo faqe
http://www.minfin.gov.al/downloads/P...ale%202005.pdf

[StormAngel]

Familjarët do paguajnë 4.5 % më shumë gjatë vitit 2005. Nën 210 kWh familjartë paguajnë vetëm 45 lekë

Energjia, në 2005 1.6 përqind më shumë


Besim Djaloshi

TIRANË-Enti Rregullator i Energjisë Elektrike, ka bërë publike dje çmimet e reja të energjisë që do të aplikohen gjatë vitit të ardhshëm te abonentët e KESH-ti. Këto çmime janë bërë publike nga Drejtori i përgjithshëm i ERE-së, Pjetër Dema gjatë një konference për shtyp një ditë pas miratimit të tyre nga ana e bordit të komisionerëve të ERE-së. Sipas tij çmimi i energjisë elektrike për vitin e ardhshëm do të rritet me 1.59 për qind nga 5.5 që ishte propozuar nga drejtuesit e KESH-it, pra rreth 4 herë më pak. Në këtë mënyrë çmimi mesatar i një kilovat orë energjie për vitin 2005 do të jetë 7.01 nga 6.9 që është aktualisht. Sipas Demës, për kategorinë e konsumatorëve familjarë të cilët konsumojnë 68 për qind të të gjithë sasisë së energjisë që KESH i shet konsumatorit shqiptarë, do të vazhdojë faturimi sipas sistemit dy tariforë. Ndërsa çmimi i energjisë elektrike për vitin e ardhshëm do të rritet me 4.5 për qind, rritje kjo që vjen për shkak të uljes së tavanit të konsumit nga 220 që ishte për këtë vit në 210 për vitin e ardhshëm. Kjo do të bëjë që për kosumatorët që e kalojnë këtë normë energjia tu kushtojë atyre 45 lekë më shumë në muaj, krahasuar me këtë vit. Përveç mospërputhjes me propozimet për çmimet, dje nga ERE ka pasur dhe ndryshim të tavanittë konsumit që ishte propzuar. Kështu KESH kishte propozuar uljen e tavanit të konsumit për familjarët në 200 kilovat orë, nga 220, gjë kjo që do të shkaktonte një rritje me 9 për qind të çmimit të energjisë ose me 90 lekë në muaj për konsumatorin familjar. Ndërsa përsa i përket kategorisë së konsumatorëve privatë të favorizuar ku bëjnë pjesë furrat e bukës, fabrikat e miellit dhe stacionet e pompimit për vaditje, është miratuar një rritje e lehtë e çmimit të energjisë për vitin e ardhshëm. Kjo për të dy nivelet e tensionit ku furnizohen, qoftë tensioni i ulët qoftë ai i mesëm, krahasuar më këtë vit. Çmimi i miratuar nga ERE për konsumatorët që i përkasin kësaj kategorie është 7.5 lekë për kilovat ose përkatësisht 36 dhe 27 për qind më i ulët se ai i kërkuar. Ndërsa për konsumatorët e zakonshëm, kategori kjo që përfaqëson biznesin e vogël, çmimet nuk kanë ndryshuar nga ato që aplikohen këtë vit.
KESH 29 milion USD më shumë në 2005
Pjetër Dema gjithashtu bëri të ditur se me çmimin e miratuar për këtë vit, KESH-it i garantohen rreth 29 milion dollarë të ardhura më shumë. Këto të ardhura janë 1 milion dollarë më të ulëta se të ardhurat që mund të vinin nëse miratoiheshin çmimet e kërkuara nga KESH dhe 4.5 milion dollarë më të mëdha se çmimi i miratuar nga ana e ERE-së për vitin 2004. Në shtesën e të ardhurave, 93 për qind ndikon shtesa kundrejt një viti më parë e sasisë së energjisë elektrike që do t’u shitet konsumatorëve, ndërsa pjesa tjetër është influenca e rritjes së çmimit të shitjes së energjisë elektrike.


Familjarët energjia në 2005-ën 4.5 për qind më e lartë
Çmimi i energjisë elektrike për kategorinë e konsumatorëve familjarë për vitin e ardhshëm do të rritet me 4.5 për qind, ose 45 lekë më shumë në një muaj krahasuar me një vit më parë. Kjo rritje sipas numrit një të Entit Rregullator të Energjisë, Pjetër Dema, vjen për shkak të uljes së tavanit të konsumit nga 220 që ishte për vitin 2004 në 210 për vitin e ardhshëm. Kështu një konsumator që konsumon 220 kilovat orë në muaj, vitin e ardhshëm do të paguajë 1035 lekë nga 990 që paguan aktualish. Ndërsa nuk do të ketë ndryshim të drejtpërdrejtë të çmimit të energjisë elektrike për të 2 llojet e tarifave qofshin ato për nivelin e parë apo të dytë.

Konsumatorët privat të favorizuar
Konsumatorët privatë të favoriziar ku bëjnë pjesë furrat e bukës, fabrikat e miellit dhe stacionet e pompimit për vaditje do të paguajnë 22.8 për qind dhe 25 për qind më shtrenjtë energjinë elektrike gjatë vitit 2005. Përkatësisht 13 për qind për konsumatorët që furnizohen në rrjetin e tensionit të mesëm dhe 15 për qind për ata të tensionit të ulët. Ndërsa çmimi me të cilin KESH do tua shesë energjinë elektrike këtyre konsumatorëve vitin e ardhshëm është 7 lekë për kWh nga 5.7 që është aktualisht për konsumatorët e tensionit të mesëm dhe 7.5 nga 6 lekë për këh që ishte për këtë vit për konsumatorët e tensionit të ulët.

Ujësjellësat
Enti Rregullator i Energjisë, miratoi që çmimi me të cilin KESH do t’ua shesë energjinë elektrike ujësjellësave për vitin e ardhshëm të jetë përkatësisht 7 lekë për kilovat për ujësjellësat që furnizohen në tensionin e mesëm nga 5.6 që është aktualisht dhe 7.5 për ata të tensionit të ulët nga 6.5 që ishte për këtë vit. Pra ERE ka miratuar një rritje prej 25 për qind dhe 15 për qind për konsumatorët e rrjetit të mesëm dhe atij të ulët.

[StormAngel]

Mars 2005, patentat shqiptare do të njihen në BE


Florian Papadhimitri

TIRANË - Në mars të vitit të ardhshëm, Drejtoria e Përgjithshme e Shërbimit të Transportit Rrugor, do të nxjerrë patentat e para shqiptare që do të njihen në të gjitha vendet e BE-së. Drejtori i Drejtorisë së Përgjithshme të Shërbimit të Transportit Rrugor, Shpëtim Cani ka bërë të ditur dje se patenta e re, e cila do të dalë në mars të vitit të ardhshëm, është hapi i parë drejt integrimit evropian. “Patenta e re do të ketë 20 elementë sigurie, ku do të jenë të shënuara, ngjyra e syve, shenjat e gishtërinjve, grupi i gjakut si dhe shumë elementë të tjerë, të cilët janë të njëjta me standardet e kërkuara nga Komuniteti Evropian”, -tha dje Cani. Ai ka bërë të ditur se është kompania hungareze “Bull Hungary LTD” që ka fituar tenderin për prodhimin e patentave shqiptare që do të njihen në të gjitha vendet e BE-së. Patenta ekzistuese do të vazhdojë të jetë në qarkullim, por ajo nuk mund të njihet në vendet e BE-së. “Të gjithë qytetarët që kanë patentën ekzistuese, por që do të dëshirojnë të kenë lejen e re të drejtimit të automjetit, mund të pajisen me të, duke u paraqitur pranë drejtorive rajonale, ku do të bëhet ndërrimi i patentave”, -përfundoi Cani.

[ganoid]

Adriatik Kotorri - 10/01/2005

Sigurimet shoqërore, 41.9 për qind të pagës




Kategoritë e të siguruarve
Në udhëzimin e tyre organet tatimore kanë përcaktuar kategoritë e ndryshme të kontribuesve për sa i përket pozicionit që ato kanë në një biznes. Diferencimi në kategori të ndryshme natyrisht që sjell tarifa të ndryshme kontributi. Kategoritë janë:
a) Punëdhënës
b) I vetëpunësuar
c) I vetëpunësuar me punëmarrës
d) I vetëpunësuar pa punëmarrës
e) I vetëpunësuar pa punëmarrës me persona të punësuar të familjes
f) I vetëpunësuar me punëmarrës dhe me persona të papaguar të familjes


Jo pak, por 41,9 për qind të pagës së çdo punonjësi i kalojnë shtetit si kontribute për sigurimet shoqërore dhe shëndetësore. Kjo shumë është e aplikueshme për intervalin e pagave nga 11 376 lekë, sa është paga minimale ligjore, deri në 51 715 lekë. Nga ky kontribut 11,2 për qind i mbahen nga paga punëmarrësit (punonjësit) nga ana e bizneseve, të cilat më tej këtë shumë e derdhin për llogari të sigurimeve së bashku me pjesën e tyre prej 30,7 për qindësh. Nga pjesa e tyre, punonjësit paguajnë 9,5 për qind të pagës si kontribute për sigurime shoqërore dhe 1,7 për qind si kontribute për sigurimet shëndetësore.
Kjo shumë nuk është e njëjtë për administratorin e papaguar të shoqërisë apo për personat e papaguar të familjes, të cilët ushtrojnë funksione të caktuara në biznes. Kështu, për këtë kategori shuma totale e kontributeve është 39,2 për qind e pagës minimale ligjore. Nga këto, 32,2 për qind janë kontribute për sigurimet shoqërore dhe 7 për qind kontribute për sigurimet shëndetësore.
Çfarë ndodh nëse nuk paguhen sigurimet në kohën e duhur?
Sipas ligjit për sigurimet, për çdo të punësuar duhet që brenda datës 25 të muajit pasardhës të deklarohen dhe të paguhen sigurimet shoqërore dhe shëndetësore. Pagesa në kohën e duhur e sigurimeve nuk është përgjegjësi e punonjësve, por e punëdhënësve (bizneseve). Ne raste kur deklarimi dhe pagesa e kontributeve nuk bëhet brenda afatit të përcaktuar, nga ana e organeve tatimore lëshohet një vlerësim për shumën e shtesës që subjekti duhet që të paguajë. Përveç kësaj, aplikohen edhe kamatvonesa si dhe gjoba që shkojnë deri në 30 mijë lekë për çdo deklarim të vonuar.


Si deklarohen kontributet?
Do të jetë data 1 prill e këtij viti momenti kur do të përfundojë faza e transferimit të deklarimit të kontributeve të sigurimeve nga Instituti i Sigurimeve Shoqërore tek organet tatimore. Ky proces ka filluar më 1 nëntor të viti 2003, kur kanë qenë të parët tatimpaguesit e mëdhenj të cilët e kanë nisur procesin e transferimit. Më tej në datat 1 maj dhe 1 gusht të viti 2004 kanë qenë tetimpaguesit e regjistruar të TVSH-së si dhe institucionet buxhetore të cilat tani borderotë e punonjësve i dorëzojnë tek organet tatimore. Dhe do të jenë tatimpaguesit e regjistruar si biznes i vogël të cilët më 1 prill 2005 do të mbyllin procesin. Mbas kësaj date çdo deklarim kontributesh nga të gjitha subjektet e regjistruara do të bëhet në degën e tatim-taksave të rrethit ku ushtrohet aktiviteti.

[ganoid]

Klodian Branko - 14/01/2005

Shumëfishohen taksat e makinave

Ligji i ri për taksën e importit përfshin një sistem kompleks koeficientësh, i cili do të sjellë një rritje disa herë për makinat e para vitit 1995. Tarifat për makinat me fuqi motorike të ulët do të ulen


Që prej ditës së djeshme duhet të mendohesh mirë nëse kërkon të blesh një makinë me naftë, pasi ajo mund të kushtojë dy deri tre herë më shtrenjtë se më parë. Kjo, pasi dje ka hyrë në fuqi ligji i ri për zhdoganimin e makinave, i cili sjell një dyfishim të vlerës së zhdoganimit të makinave të përdorura në krahasim me ligjin e parë. Madje gjatë vitit 2005 pagesa doganore për një automjet do të përfshijë tre elemente. Në këtë mënyrë, vlera totale që një qytetar do të paguajë për zhdoganimin e automjetit do të përmbledhë taksën e importit, taksën doganore si dhe 20 % të TVSH-së (Tatimi mbi Vlerën e Shtuar) mbi shumën e këtyre dy taksave.
Taksa e importit deri tani ka qenë 60 mijë lekë për makinat me naftë dhe 40 mijë për ato me benzinë. Ndërkohë që tani ka ndërruar sistemi i llogaritjes së kësaj takse. Ligji i ri parashikon që taksa e importit të llogaritet me një sistem kompleks koeficientësh, një tarife fikse prej 25 mijë lekësh për makinat me naftë dhe 20 mijë lekësh për ato me benzinë si dhe me numrin e kubikëve të motorit.
Kjo rritje do të jetë kryesisht për makinat me naftë dhe që janë prodhuar para vitit 1995.


Si llogaritet taksa e importit për automjetet
Taksa doganore e importit do të jetë më e ulët për makinat me benzinë, makinat që janë prodhuar vitet e fundit dhe për ato makina që kanë fuqi motorike të vogël. Taksa doganore për importimin e autoveturave llogaritet duke shumëzuar taksën fikse, e cila për makinat me benzinë është 20 mijë lekë dhe për ato me naftë 25 mijë, me vëllimin apo cilindratën e motorit si dhe me koeficientin e përcaktuar shprehimisht në ligj. Sipas ligjit për zhdoganimin e makinave, koeficientet ndahen në pesë kategori duke u përcaktuar nga viti i prodhimit të makinës. Kështu, në kategorinë e parë hyjnë makinat e prodhuara në vitet 2003-2005, për të cilat ky koeficient është 0.001. Në kategorinë e dytë makinat e prodhuara në vitet 2001-’02 koeficienti i të cilave është 0.0015. Kategoria e tretë përbëhet nga makinat e viteve 98-00, koeficienti është 0.0018. Në kategorinë e katërt makinat e prodhimit të viteve 95-97 me një koeficient 0.002. Kategoria e fundit është ajo e makinave prodhim i viteve para vitit 1995 dhe kanë një koeficient 0.003. Kështu, për një makinë tip benz 250D, me 2 497 cc, prodhimi i vitit ’93 dhe me naftë, taksa e importit do të jetë 187 250 lekë (0.003 x 2 497 x 25 000 = 187 250).


Taksa doganore
Taksa doganore është e ndryshme për automjetet e reja (kilometrazh zero) nga ato të përdorura. Në përgjithësi taksa doganore për automjetet e përdorura është 15% e vlerës së makinës, ndërsa për makinat e reja kjo taksë është më e ulët, 2 %. Por për automjetet e përdorura aplikohet edhe një mënyrë tjetër për të përcaktuar taksën doganore. Në rast se një automjet nuk paraqet vlerën e tij reale, doganierët përdorin sistemin e referencave. Por edhe në rast se mungojnë referencat për këtë tip makine, përdoret një sistem i tretë. Sipas këtij sistemi, automjetet me vëllim motorik më të vogël se 1900 cc (kubik) do të kenë një vlerë prej 200 mijë lekësh. Ndërsa për automjetet me vëllim motorik më të madh se 1900 cc (kubik) vlera është 300 mijë lekë. Taksa doganore për këto makina do të llogaritet duke shumëzuar vlerat e tyre prej 200 apo 300 mijë lekësh me 15 %. Pra, për një makinë që kushton 200 mijë lekë, taksa doganore do të jetë 30 mijë lekë.
TVSH-ja e makinës
Tatimi mbi Vlerën e Shtuar për zhdoganimin e një makine përcaktohet pasi çmimit të makinës i shtohen edhe taksa e importit me taksën doganore. Nga shuma e këtyre dy taksave do të aplikohet 20 % i TVSH-së.



Formula e llogaritjes së taksës së importit
Koeficient X cilindratën e motorit X 25 000 mijë lekë- për makinat me naftë


Koeficient X cilindratën e motorit X 20 000 mijë lekë- për makinat me benzinë


Vlera e zhdoganimit= Taksën e importit + taksën doganore + TVSH 20%

[ganoid]

Klodian Branko - 17/01/2005

Doganat abuzojnë me taksat e makinave

Referencat që përdoren për të përcaktuar vlerën reale të makinës janë të vitit të shkuar dhe jo të 2005-s. Nëse kërkon të zhdoganosh një makinë, viti i prodhimit 2004, doganierët e vendosin vetë vlerën reale të makinës, pasi në librin e referencave nuk gjendet një e tillë. Për furgonët përdoren akoma referencat e vitit 2001


Tani shqiptarët, përveçse duhet të paguajnë një doganë më të latrë për makinat, duhet të përballen edhe me abuzimin që bëjnë autoritetet doganore. Referancat që merren për bazë nga doganierët gjatë zhdoganimit të makinave që hyjnë në Shqipëri nuk janë të rinovuara, duke bërë që për shumë automjete të rritet artificialisht vlera e zhdoganimit.


Referencat
Që të bëhet zhdoganimi i makinës duhet që më parë të përcaktohet vlera reale e saj. Për të përcaktuar taksën doganore të një makine, autoritetet doganore nuk marrin për bazë vlerën e makinës së paraqitur nga pronari i saj, por për përcaktimin e kësaj takse ata marrin për bazë vlerën reale të mjetit të përcaktuar në librin e referencave. Kjo sepse jo gjithmonë çmimi i deklaruar nga pronari i mjetit përcakton vlerën reale të tij. Në përgjithësi, taksa doganore për automjetet e përdorura është 15% e vlerës së makinës, ndërsa për makinat e reja (kilometrazh zero) kjo taksë është më e ulët, 2 %.
Në rast se një automjet nuk paraqet vlerën e tij reale, doganierët përdorin sistemin e referencave. Për këtë arsye, doganierët bazohen në katalogun Kuatro Ruote ( 4 rrotat, katalog italian që përcakton vlerën e makinës duke u bazuar te tipi i makinës dhe viti i prodhimit). Sipas kësaj mënyre, doganierët marrin si vlerë reale të makinës rreth 70 % të vlerës së përcaktuar në katalog. Sipas autoriteteve doganore, nga vlera reale që përcakton katalogu hiqet 18 % TVSH që ka aplikuar shteti italian si dhe 10 % fitimi i përcaktuar nga sallonet e makinave në Itali. Por autoritetet doganore shqiptare nuk bazohen në katalogun italian të vitit 2005, por marrin si referencë atë të vitit 2004. Në këtë mënyrë, një shtetas është i detyruar të paguaj një taksë doganore më të lartë se sa i takon. Kjo pasi vlera reale e makinës nuk përcaktohet nga katalogu i vitit të zhdoganimit, por i një viti më parë. Kështu, për një makinë tip benc E 250 turbo- dizel, në katalogun e vitit 2004 përcaktohet çmimi real prej 9 700 euro, ndërsa në katalogun e këtij viti po kjo makinë ka një vlerë reale prej 7 600 euro. Në këtë mënyrë, doganat i rrisin vlerën reale të mjetit me reth 2 000 euro dhe për zhdoganimin e tij doganat iu “vjedhin” shtetasve rreth 500 euro më shumë. Madje, abuzimi shtohet në rast se kërkohet të zhdoganohet një makinë e viteve të fundit, si, për shembull, një makinë fuoristradë BMW, e tipit X5 me vit prodhimi 2004. Në këtë rast apo raste anologë si ky, në librin e referencave (4 rrotat) nuk gjendet vlera e një makine të tillë apo makinave të prodhuara në vitin 2004. Për të zhdoganuar makinat e prodhuara në këtë vit (2004) autoritetet doganore e përcaktojnë vlerën e makinës vetë. Në këtë mënyrë, një doganier mund të vendosë për lloje të njëjta makinash, vlera të ndryshme sa herë që kryen veprimet e zhdoganimit.


Furgonët
Për zhdoganimin e furgonëve problemi paraqitet më shqetësues. Kjo sepse për të përcaktuar vlerën reale të tyre, autoritetet doganore përdorin të dhënat e katalogut të viti 2001, d.m.th të katër viteve më parë. Kjo bën që furgonëve t’u rritet artificialisht tarifa e zhdoganimit.


Makinat e vjetra
Ndërsa për makinat e vjetra të cilat nuk janë të pasqyruara në katalog, përdoret një sistem i tretë. Sipas këtij sistemi, automjetet me vëllim motorik më të vogël se 1900 cc (kubik) do të kenë një vlerë prej 200 mijë lekësh. Ndërsa për automjetet me vëllim motorik më të madh se 1900 cc (kubik) vlera është 300 mijë lekë. Taksa doganore për këto makina do të llogaritet duke shumëzuar vlerat e tyre prej 200 apo 300 mijë lekësh me 15 %. Pra, për një makinë që kushton 200 mijë lekë, taksa doganore do të jetë 30 mijë lekë.



Vlera e zhdoganimit= Taksë e importit + taksën doganore + TVSH 20%


Formula e llogaritjes së taksës së importit
Koeficient X cilindratën e motorit X 25 000 mijë lekë- për makinat me naftë
Koeficient X cilindratën e motorit X 20 000 mijë lekë- për makinat me benzinë


Taksa doganore = vlera e makinës X 15 %, ose vlera e makinës X 2% per makinat me zero kilometrazh


TVSH = (taksë e importit + taksë doganore) X 20 %

[ganoid]

Taksë e re për makinat me naftë

Të gjithë ata që kanë në përdorim një automjet me naftë do të duhet që të përballen edhe me një taksë të re. Të gjtha makinat që përdorin si lëndë djegëse naftën, pavarësisht nga viti i prodhimit, do të duhet të paguajnë gjatë koaludimit vjetor një taksë shtesë prej 3 mijë lekësh të reja


Makinat që përdorin si lëndë djegëse naftë do të paguajnë një taksë të re gjatë kolaudimit. Taksa do të jetë në vlerën prej 3 mijë lekësh dhe nuk do të marrë parasysh vitin e prodhimit të makinës. Në ndryshim nga vendet e tjera, të cilat vendosin taksa për mbrojtjen e ambientit, në bazë të gazrave që një makinë shkarkon, ky fakt në Shqipëri nuk ka shumë rëndësi. Pavarësisht se mund të kesh një makinë me kilometrazh zero dhe me elementet maksimale të mbrojtjes së ambientit, duhet që të paguash edhe taksën shtesë. Kjo taksë vjen në një kohë kur doganat e makinave kanë pësuar një rritje të konsiderueshme, duke bërë që çmimet e tyre në shumë raste të dyfishohen. Gjatë kolaudimit vjetor të automjetit tip veturë, shto këtu edhe siguracionin, shuma që duhet të paguhet shkon në rreth 30 mijë lekë të reja. Taksa e re ka filluar që në janar të këtij viti dhe është miratuar si sanksion për të nxitur përdorimin e makinave që punojnë me benzinë. Sëbashku me taksat për shërbimin për një autoveturë, çdo pronar duhet të paguajë rreth 14 mijë lekë ose gati 2 herë më shumë se një vit më parë. Taksa fikse e naftës do të rritet sipas tonazhit të makinës: sa më i lartë të jetë ai, aq më e madhe është edhe taksa. Për makinat me benzinë, sipas Ministrisë së Transportit, nuk ka asnjë taksë të re. Të gjitha këto detyrime paguhen në një vit, ku bëhen bashkë edhe kolaudimi vjetor edhe ai 6-mujor. Makinat me naftë janë bërë shumë më të shtrenjta se më parë, për shkak edhe të taksave më të larta që duhet të paguajnë gjatë zhdoganimit. Kjo, pasi që prej fillimit të këtij viti një makinë me naftë mund të kushtojë dy deri tri herë më shtrenjtë se më parë. Kjo, pasi dje ka hyrë në fuqi ligji i ri për zhdoganimin e makinave, i cili sjell një dyfishim të vlerës së zhdoganimit të makinave të përdorura, në krahasim me ligjin e parë. Ligji i ri parashikon që taksa e importit të llogaritet me një sistem kompleks koeficientësh, një tarifë fikse prej 25 mijë lekësh për makinat me naftë dhe 20 mijë lekësh për ato me benzinë, si dhe me numrin e kubikëve të motorit. Kjo rritje do të jetë kryesisht për makinat me naftë e që janë prodhuar para vitit 1995.