Taksat ne Shqiperi

[gene]

personalisht me duket pa kuptim ky nivel taxash per importimin e makinave

efekti i pare do te jete nje perdorim i tejzgjatur i makinave egzistuese me deme per ambimentin (por edhe per imazhin e ekonomine)

mbase do kish qene me e pershtatshme rritja e taxave mbi karburantet apo/edhe e taxave mbi pronesine e automjeteve (taxe qe duhet te vazhdoje te paguhet perderisa makina nuk eshte cuar ne "varreza" te autorizuara).

nje gje eshte e sigurt - nuk mund te vazhdohej si ishte
- po edhe keshtu si e bene nuk ka shume kuptim

te pakten do te jene te lumtur mekaniket e pronaret e autoserviseve qe do te kene me shume pune ne te ardhmen (makinat ne qarkullim do te jene te vjetra e do te kerkojne riparime qe te kalojne provat e sigirumit teknik)

[ganoid]

Sistemi Fiskal

Adriatik Kotorri - 25/01/2005

Ligji i ri, edhe qeratë e shtëpive me TVSH




Kush do të ngarkohet me TVSH
-Shitja për herë të parë e ndërtesave të reja për qëllime banimi.
-Shitjen e parë dhe çdo shitje pas saj të ndërtesave për qëllime tregtare.
-Qiradhënien e ndërtesave për qëllime tregtare.
-Qiradhënien e ndërtesave për banim, kur mbi to nuk është zbatuar TVSH në shitje.
Janë furnizime të përjashtuara nga TVSH
- Shitjet pas shitjes së parë të ndertesave te reja për banim.
- Shitjet e të gjitha ndërtesave ekzistuese për banim.
- Qiradhënia e ndërtesave për banim mbi të cilat është zbatuar TVSH në shitje.
Sipas ndryshimeve të reja në legjislacionin shqiptar, është parashikuar që edhe qiramarrësit e shtëpive për banim do të paguajnë TVSH në momentin e pagesës


Çdo kontratë qiraje që do të nënshkruhet pas 1 janarit të viti 2006 do të pëfshijë, përveç çmimit, edhe vlerën e TVSH-së. Ky rregull vlen jo vetëm për subjektet e regjistruara, por edhe për individët të cilët do të marrin me qira qoftë edhe një apartament për banim. Këtij rregulli do t’i shpëtojnë ato banesa për të cilat në momentin e blerjes është paguar TVSH. Por aktualisht deri në fund të viti 2005 për të gjitha banesat që janë shitur dhe që priten që të shiten nuk aplikkohet TVSH në shitje, çka do të thotë që këto apartamente do të jenë objekt i TVSH-së në momentin e dhënies me qira. Ndërkohë që, sipas ligjit, nuk do të paguajnë TVSH në momentin e qiradhënies apartamentet për të cilat është aplikuar TVSH në momentin e blerjes. Ky rregull do të vlejë për ato apartamente të cilat do të shiten pas 1 janarit të vitit 2006, moment kur është parashikuar që të aplikohet TVSH-ja në shitje edhe për apartamentet.
Po në të njëjtën mënyrë do të jenë të përjashtuar nga TVSH-ja edhe objektet me pronësi publike. Kështu, sipas ligjit nuk vlen e njëjta gjë në rastin kur objekt i qiradhënies është një pronë publike. Dhënia me qira e ndërtesave pronë publike nga organet e pushtetit qendror apo vendor është furnizim i përjashtuar nga TVSH-ja.


Kur aplikohet TVSH në ndërtim
TVSH-ja në ndërtim aplikohet :
1. Kur shoqëritë e ndërtimit ndërtojnë për të shitur apo për të dhënë me qira,TVSH-ja llogaritet dhe paguhet çdo muaj mbi vlerën e situacionit mujor të punimeve. Bashkëngjitur me çdo situacion mujor do të jetë detyrimisht fatura tatimore me numër serial. Vlera e situacionit mujor do të jetë vlera e tatueshme mbi të cilën do të llogaritet TVSH-ja në masën 20%.
2. Kur shoqëritë e ndërtimit të licensuara profesionalisht, do të ndërtojnë objekte për qëllim përdorimi në funksion të aktivitetit të tyre të tatueshëm, kemi të bëjmë me vetëfurnizim të ndërtesave. Për çdo muaj, shoqëria ndërtuese përpilon situacionin e punimeve të kryera në fakt. Bashkëngjitur me çdo situacion mujor do të jetë detyrimisht fatura tatimore. Personi i tatueshëm është i detyruar të llogarisë TVSH-në çdo muaj kalendarik.
Fatura tatimore e përpiluar si më sipër regjistrohet njëkohësisht në librin e blerjeve dhe të shitjeve të shoqërisë. Njëkohësisht lejohet kreditimi i TVSH-së së paguar në blerjet e bëra për këtë qëllim. Kreditimi lejohet i plotë për rastet kur personi i tatueshëm kryen aktivitet ekonomik plotësisht të tatueshëm si dhe i pjeshsëm kur kryen aktivitet pjesërisht të tatueshëm. Eshtë kusht që ndërtesat e kësaj natyre duhet të jenë të destinuara për kryerjen e aktiviteteve të tatueshme nga vetë pronari i tyre. Gjithashtu ndërtesat duhet të jenë të një tipi të tillë, ku natyra dhe qëllimi i përdorimit të tyre shpallen dhe aprovohen në lejen e ndërtimit
të Bashkisë.
3. Kur një shoqëri ndërtimi e licensuar si e tillë ndërton shtëpi banimi për vete, llogarit dhe paguan TVSH, sipas nenit 18.2. Nëse merret paradhënie për punimet që do të kryhen, atëherë personi i tatueshëm që merr paradhënien detyrohet të lëshojë faturë në momentin e marrjes së saj dhe këtë faturë ta regjistrojë në librin e shitjes së periudhës tatimore në të cilën është marrë paradhënia.

[ganoid]

Sistemi Fiskal

Eltion Hoxha - 27/01/2005

Hiqet monopoli i pullave të akcizës

Tani nuk je i detyruar të jesh tatimpagues i autorizuar i akcizës ose përfaqësues fiskal për të blerë pullat


Në Shqipëri, pjesa më e madhe e prodhimit të verës dhe rakisë realizohet në mënyrë artizanale dhe në sasi të vogla. Gjatë viteve të fundit, fabrikat e prodhimit të pijeve alkoolike janë ankuar shpesh për faktin se këto prodhues të vegjël realizojnë një konkurencë të fortë për shkak se nuk paguajnë taksat e larta të pijeve alkoolike, që arrijnë në mbi 70 % të kostos. Rrjedhimisht, vera e shitur me fuçi del në restorante deri në qendër të Tiranës me çmim që arrinin në vetëm 400 lekë për litër, çmim i konsideruar si shumë i ulët nga prodhuesit.
Por lufta kundër këtyre evazorëve nuk ishte e mundur deri tani për shkak se për të shitur verë apo pije të tjera alkoolike të forta, duhet të jesh tatimpagues i akcizës i autorizuar. Pra pullat fiskale që demonstrojnë nëse për një shishe verë është paguar apo jo taksa, nuk u jepen në përdorim të gjithë shitësve.


Ndryshimi ligjor
Prej këtij viti blera e pullave të akcizës nuk është më monopol i vetëm disa bizneseve. Një udhëzim i ministrit të Financave ia heq të drejtën ekskluzive tatimpaguesve të autorizuar të akcizës dhe përfaqësuesve fiskalë që të jenë blerës të pullave fiskale. Tani e tutje këtë të drejtë do ta kenë të gjithë personat, por vetëm dy herë në vit, me nga 1 mijë copë. Deri tani të hyje në tregun e tregtimit të duhanit duhej të kishe një shumë të madhe të hollash ose të bëje kontrabandë. Prodhuesit e mëdhenj të rakisë, konjakut dhe pijeve të ndryshme alkoolike kanë akuzuar gjithmonë prodhuesit e vegjël, kryesisht punishtet për konkurrencë të pandershme, duke iu shmangur detyrimeve fiskale. Të hyje në tregun e prodhimit të pijeve të forta alkoolike dhe në atë të prodhimit dhe tregtimit të duhanit, duhet të merrje statusin e tatimpaguesit të autorizuar të akcizës ose përfaqësues fiskal. Ky mund të konsiderohet si hapi i parë i liberalizimit të tregut të akcizës, megjithëse ke të drejtë të blesh pulla fiskale vetëm dy herë në vit nga 1 mijë copë. Liberalizimi i tregut të pullave mund të stimulojë prodhuesit e vegjël të pijeve alkoolike që t’i stabilizojnë bizneset e tyre. Ky është viti i parë që qeveria e ka aplikuar këtë sistem; në rast se ky sistem do të konsiderohet i suksesshëm, atëherë vitin e ardhshëm tavani i pullave të shitura nga organet tatimore mund të rritet ose të hiqet fare.


Procesi
Çdo person tani mund të bëjë kërkesë në Drejtorinë e Përgjithshme të Tatimeve për të blerë një sasi që nuk i kalon 1 mijë pullat fiskale. Inspektori tatimor i pullave të akcizës i paraqet aplikuesit një formular porosie të pullave. Aplikanti duhet të plotësojë formularin me të dhënat e kërkuara dhe duhet të paguajë shumën e tatimit në numrin e llogarisë bankare, të cilën ia jep inspektori i kontrollit të pullave të akcizës. Udhëzimi shton se asnjë person nuk mund të blejë pulla akcize, sipas mënyrës së
mësipërme, më shumë se dy herë në vit.

[ganoid]

Kërkesat e biznesit. Ulja e presionit fiskal dhe rregullime në procedurat tatimore e doganore


Paketa, në bashkëpunim me akademikët

Biznesi përgatit paraprakisht projektin fiskal për vitin 2006


Mirvjena Dizdari
Komuniteti i biznesit ka hartuar paraprakisht kërkesat për paketën fiskale 2006.

Paketa fiskale do të synojë uljen e presionit fiskal, uljen e tarifave doganore për lëndët e para, përgatitjen e një projekti për tatimin mbi vlerën e shtuar në ndërtim, si dhe rregullime në procedurat doganore dhe tatimore. Këtë vit paketa fiskale do të hartohet në bashkëpunim me akademikët. Gjatë vitit 2004 është shënuar konsolidimi i marrëdhënieve të biznesit me shtetin. Tashmë, është konsoliduar Këshilli Konsultativ i Biznesit që ka më shumë rezultate dhe efektivitet. Përmirësimi i marrëdhënieve shtet-biznes, duket se nuk është më thjesht një formalitet. “Tashmë, ka kaluar koha e një formalizmi për zgjidhjen e problemeve. Biznesi ka marrë rolin ku duhet të jetë, jo vetëm në zbatuesin, por edhe në hartuesin e politikave”, tha kreu i biznesmenëve, Bregasi. Vitin e kaluar, biznesi e hartoi paketën fiskale disa muaj para qeverisë, që në korrik, kjo pasi, ai po ecën më para se vetë institucionet shtetëore.

Kërkesat
Për vitin e ardhshëm komuniteti i biznesit ka këruar uljen e TVSH-së nga 20 për qind në 15 për qind. Përfaqësuesit e biznesit janë shprehur se niveli i TVSH-së që aplikohet në Shqipëri, është në nivelin më të lartë në rajon. “Kërkesën tonë po e paraqesim që në fillim të vitit, me qëllim që gjatë 2005-ës, të hartohet një studim mbi efektet që mund të ketë ulja e kësaj takse”, theksoi Bregasi. Për paketën fiskale 2006, biznesi do kërkojë edhe uljen e tatim fitimit nga 23 për qind në 20 për qind. Kjo kërkesë është paraqitur nga biznesi që në vitin 2004, por qeveria vendosi që për vitin 2005, tatimi mbi fitimin nga 25 për qind që ishte në vitin 2004, të ulej në masën 20 për qind. Po kështu, biznesi ka kërkuar hartimin e një projekti për zbatimin e ligjit për TVSH-në në ndërtim, i cili do të hyjë në fuqi në janar të vitit 2006. Në të njëjtën kohë, komuniteti i biznesit ka kërkuar rregulimet e kodit të procedurës së tatimeve e doganave nga pikëpamja e administrimit për të ngushtuar hapësirat për keqinterpretim ligjor, si dhe përmirësimin e raporteve në komisionin e Apelimit të Tatimeve.


Bashkëpunimi
Viti 2005 do të shënojë ngritjen “akademike” të biznesit. Gjatë analizës vjetore të Dhomës së Tregtisë dhe Industrisë së Tiranës, zhvilluar pak ditë më parë, kreu i saj, Luan Bregasi, deklaroi se ky vit do të shënojë institucionalizimin e komisioneve të Asamblesë Përfaqësuese të Dhomës së Tregtisë dhe Industrisë së Tiranës. “Gjatë 2005-ës do të shënohet institucionalizimi i marrëdhënieve midis biznesit dhe akademikëve, specialistëve të kualifikuar, të cilët kanë pjesë e grupeve të biznesit për hartimin e paketës fiskale. Do të ngrihet niveli i përfaqësimit në të gjitha komisionet e biznesit, drejt krijimit të një Këshilli të Politikave të Biznesit pranë Dhomës së Tregtisë dhe Industrisë së Tiranës”, tha Bregasi.



Kërkesat

Ulja e tatim fitimit nga 23 për qind në 20 për qind
Ulja e TVSH-së nga 20 për qind në 15 për qind
Ulja e tarifave doganore për lëndët e para
Përjashtimi i tatimit për fitimet e riinvestuara
Përgatitja e një projekti për tatimin mbi vlerën e shtuar në ndërtim
Rregullime në procedurat doganore dhe tatimore
Përmirësimi i raporteve në Komisionin e Apelimit të Tatimeve
Pjesëmarrja në Komisionin e Apelimit të Doganave


Takohet dhe me kryeministrin Nano
Bregasi fton personalitetin e biznesit amerikan James C.Orr

Personaliteti i shquar amerikan ndërombëtar në fushën e biznesit dhe Financave, James C.Orr, ka ardhur në Shqipëri me ftesë të kryetarit të Dhomës së Tregtisë së Tiranës, Luan Bregasi. Sot, James C.Orr do të zhvillojë një takim me kryetarin Bregasi, për t’u njohur nga afër me zhvillimin e sipërmarrjes private dhe të ekonomisë së Shqipëri, me problemet, me të cilat ndeshet ekonomia dhe biznesi shqiptar, si dhe me perspektivën e intensifikimit të bashkëpunimit me biznesin amerikan. Në aeroportin e Rinasit “Nënë Tereza”, James C.Orr është pritur nga presidenti i Dhomave të Tregtisë dhe Industrisë, dhe kryetari i Dhomës së Tiranës, Luan Bregasi. Gjatë vizitës së tij në Shqipëri, James C.Orr do të takohet me kryeministrin Fatos Nano, me anëtarë të qeverisë, si dhe me personalitete të fushës së ekonomisë dhe të biznesit.

James C.Orr ka punuar në sektorin qeveritar dhe privat në financa, tregti ndërkombëtare, zhvillim dhe investime për më shumë se 30 vjet. Ai është bashkëthemelues dhe drejtor ekzekutiv i Komitetit Bretton Woods, një grup me ish-anëtarë të kabinetit dhe qytetarë të tjerë të njohur amerikanë, të cilët janë bashkuar së bashku për të ndihmuar në rritjen e efektivitetit të Bankës Botërore dhe Fondit Monetar Ndërkombëtar. Gjithashtu, James C.Orr është drejtor menaxhimi i zyrës “James Orr Associates” në Washington D.C. Kjo është një firmë konsultimi poltikash me bazë qeveritare, klientët e së cilës janë kompanitë financiare ndërkombëtare, bankat qendrore dhe ministri qeveritare. Përpara krijimit të firmës së tij dhe komitetit, ai ka shërbyer si në legjislaturën republikane, ashtu dhe në atë demokrate si këshilltar legjislativ për nënkomitetin e tregtisë ndërkombëtare dhe të zhvillimit në Dhomën Amerikane të Përfaqëuesve. Ai gjithashtu ka mundësuar këshilla të specializuara për institucionet më të mëdha financiare private, si Bankës Botërore, FMN-së, IDB-së dhe një tërësi ministrish në SHBA dhe jashtë saj.

C.Orr, kryetar i bordit të grupit Ndërkombëtar Mikro Financë

James C. Orr është zgjedhur kohët e fundit kryetar i bordit të grupit Ndërkombëtar MikroFinancë, një kompani financiare që mundëson akses kreditimi për institucionet e varfëra dhe institucionet ndërlidhëse financiare me tregun privat botëror të kapitaleve. Ai është gjithashtu, kryetar i grupit të Ndihmës për Zhvillimin e Sektorit privat në Washington dhe një anëtar i Exhequer Club.

[ganoid]

Ministri i Financave, Arben Malaj, është shprehur sërish kundër uljes së taksave. Në një leksion të mbajtur dje para studentëve të Fakultetit Ekonomik të Universitetit të Tiranës, Malaj ka sqaruar studentët se politikat e opozitës për ulje taksash nuk mund të sjellin rritje ekonomike. Sipas tij, debatet politike që bazohen në shkolla të ndryshme të mendimit ekonomik paraqiten edhe në platformat elektorale në prag të zgjedhjeve në Shqipëri. “Propozimet për ndryshim në paketën fiskale bëhen më shumë me qëllimin e sensibilizimit të opinionit dhe përfitimeve elektorale sesa për një kontribut cilësor që do të ndihmonte në përmirësimin e treguesve makroekonomikë apo në rritjen e mirëqenies së individëve”, -tha Malaj. Sipas ministrit të Financave, “një nga propozimet më të debatueshme, ose më mirë, më të reklamuara nga opozita në prag të këtyre zgjedhjeve është ulja e taksave dhe më konkretisht mostatimi i bizneseve të reja (bizneset e vogla) për një periudhë trevjeçare”, duke shtuar se “përkrahësit e këtij propozimi bazohen në gjykimin se kjo masë do të rrisë prodhimin”. Por, sipas Malajt, rregulla të tilla fiskale janë në kundërshtim me parimet e konkurrencës, pasi bizneset ekzistuese do të ishin në pozita inferiore karshi bizneseve të reja. “Një situatë e tillë do të prishte parimet e tregut duke krijuar çekuilibrim, tha Malaj, duke shtuar se mostatimi i bizneseve të reja (bizneset e vogla) do të bjerë ndesh me parimin e thjeshtësisë të sistemit tatimor dhe do ta vështirësojë menaxhimin e abuzimeve. Ministri u shpjegoi studentëve të Ekonomisë se sipërmarrësit duke u munduar të përfitojnë nga ky përjashtim, mund të mbyllin biznesin ekzistues duke e rihapur nën një emër të ri. “Një efekt tjetër i rëndësishëm në politikën fiskale si pasojë e kësaj mase do të jetë ulja e të ardhurave buxhetore, ose rritja e deficitit buxhetor”, -tha ministri. Ai sqaroi se vlerësimet empirike të vitit 2003 tregojnë që për çdo 1 për qind shkurtim të taksës mbi biznesin e vogël, efekti në të ardhurat buxhetore është 450 milionë lekë. “Kombinuar kjo me abuzimet që do të vijnë nga aplikimi i mostatimit për tre vitet e para, efekti në të ardhurat buxhetore parashikohet të arrijë në rreth 2 miliardë lekë”, -paralajmëroi kreu i Financave shqiptare. Sipas Malajt, sipas rekomandimeve të institucioneve eksperte ndërkombëtare, si FMN-ja, është kërkuar që kjo normë të rritet me 1 ose me 2 për qind.

marre nga shekulli