Një bandë e armatosur ka pushtuar një shkollë në Beslan në Osetinë veriore, pranë Çeçenisë. Lirohen 15 fëmijë
Çeçenët marrin peng 400 nxënës
Rrëmbyesit kërcënojnë se do të vrasin 50 fëmijë për çdo luftëtar të vrarë të grupit të tyre
Shekulli
Një bandë e armatosur rëndë ka marrë peng rreth 400 vetë në një shkollë ruse afër Çeçenisë. Rrëmbyesit kanë kërcënuar se do të vrasin 50 fëmijë për secilin anëtar të grupit të tyre që është vrarë. Kështu ka deklaruar një zyrtar lokal i cituar nga agjencia “Rojter” e lajmeve. Mendohet se sulmi është një operacion tipik i guerilëve çeçenë. Banda përbëhet nga 17 burra dhe gra, të cilët hynë me forcë në ndërtesën e shkollës në Beslan në Osetinë veriore, ku po bëhej një ceremoni për të festuar ditën e parë të vitit shkollor. “Ata kanë thënë se për çdo luftëtar që është vrarë do të vrasin 50 fëmijë dhe për çdo luftëtar të plagosur do të vrasin 20 pengje të tjerë”, -bëri të ditur ministri i Brendshëm rajonal Kazbek Dzantiyev, i cili foli për gazetarët në Beslan. Anëtarët e bandës, një pjesë e të cilëve janë të veshur me eksploziv, kanë thënë se kanë minuar themelet e shkollës. Pak më vonë pas marrjes peng të ndërtesës, ata liruan 15 nga fëmijët që ishin brenda. Të paktën tetë civilë u vranë gjatë këtij sulmi, shtatë prej tyre vdiqën në spital, sipas të dhënave nga agjencitë e lajmeve ruse. Afërsisht 50 fëmijë arritën të arratiseshin. Dëshmitarët në vendngjarje thanë se të shtëna sporadike janë dëgjuar gjatë gjithë ditës dhe të paktën një shpërthim është dëgjuar nga brenda shkollës. “Çdo e shtënë që kam dëgjuar ishte si një goditje në zemrën time, thotë një grua me emrin Vera, e cila vajton pa pushim për fëmijën e saj që ndodhet mes pengjeve. Qindra policë, ekipe shpëtimi, dhe trupa nga Ministria e Brendshme me armë AK –47 rrethuan shkollën. Mjete të blinduara ishin parkuar gjithandej. Ende nuk dihet saktësisht numri i pengjeve, por të dhënat fillestare flasin për 400. Agjencia e lajmeve “Tass” thotë se rreth 132 fëmijë janë marrë peng. Në përgjithësi dita e parë e shkollës festohet shumë në Rusi. Të pranishëm gjithnjë janë edhe prindërit e fëmijëve.
Presidenti rus Vladimir Putin, i cili ndërpreu pushimet e tij për t’u kthyer në Moskë, për t’u marrë me dhunën e fundit në vend tha se sulmi në fjalë kishte lidhje me rebelët separatistë çeçenë. Gjithashtu Moska ka kërkuar një takim të Këshillit të Sigurimit të OKB-së në lidhje me aktet terroriste në vend. Rrëmbyesit e nxënësve hodhën poshtë një përpjekje të një lideri mysliman lokal për të biseduar me ta dhe kërkoi një takim me zyrtarët kryesorë rajonalë që të diskutojnë kërkesat e tyre për lirimin e luftëtarëve të kapur në Ingushetinë fqinje në qershor gjatë një përleshjeje të ndodhur atje. Ata gjithashtu donin të bisedonin me Leonid Roshal, një person që u bë i njohur për përpjekjet e tij për të negociuar fundin e krizës së pengjeve në teatrin e Moskës dy vite më parë. Krizat e mëparshme të pengjeve ku përfshihen rebelët çeçenë kanë përfunduar me humbje të mëdha jetësh. Kur rebelët rrëmbyen 700 pengje në teatrin e Moskës në vititn 2002, rreth 129 pengje dhe 41 guerilë përfunduan të vrarë. Katastrofa ndodhi kur trupat ruse hynë me forcë në ndërtesë duke përdorur gaz helmues. Në vitin 1995, separatistët çeçenë morën qindra pengje në një spital në qytetin jugor rus të Budennovsk. Më shumë se 100 të tjerë kanë vdekur gjatë ndërhyrjes së komandove ruse. Duke patur këtë përvojë të hidhur, Moska kësaj here ka vendosur trupa shtesë në të gjitha ndërtesat strategjike. “Pas sulmeve të fundit terroriste, shërbimet sekrete kanë vendosur të dërgojnë më shumë trupa në të gjitha zonat bëthamore në gjithë vendin”, -ka thënë zëdhënësi i Agjencisë së Energjisë Atomike ruse. Ky sulm ndodhi pikërisht kur autoritetet ruse kanë rritur masat e sigurisë në të gjithë vendin pas shpërthimit në Moskë të martën, ku gjetën vdekjen të paktën dhjetë vetë. Agjencia ruse e lajmeve “Itar-Tass” njofton se stacioni kryesor hekurudhor i Moskës, “Kurski”, u evakuua pas një telefonate anonime e cila pretendonte për vënien e një bombe. Policia dhe shërbimi i sigurisë së brendshme të Rusisë thonë se shpërthimi të martën në sheshin para stacionit të metrosë “Rizhskaya”, në një nga rrugët kryesore të Moskës, mund të jetë shkaktuar nga një grua vetëvrasëse. Kryetari i Bashkisë së Moskës tha se një grua vetëvrasëse kishte shpërthyer në qendër të turmës një paketë të mbushur me lëndë shpërthyese dhe copa metalesh. Një grup që e quan veten Brigadat Islambouli tha se kishte kryer sulmin. Në një deklaratë në internet grupi thoshte se synimi i tij ishte të turpëronte shtetin rus. Çeçenët luftojnë për një shtet të pavarur nga Rusia. Kjo është lufta e dytë e Moskës kundër Çeçenisë, e cila nisi në vitin 1999 nga presidenti Putin. Që atëherë mijëra ushtarë rusë dhe rebelë çeçenë janë vrarë. Disa ditë më parë në Çeçeni u zgjodh president Alu Alkanov, kandidati i mbështetur nga Moska. Ky është edhe një motiv më shumë për zemërimin e rebelëve çeçenë që duan të vetëqeverisen.
Rastet e fundit të sulmeve çeçene
Më 31 gusht 2004- një bombë kamikaze vret 10 vetë në një stacion treni në veri të Moskës
Më 24 gusht 2004- Dy avionë rrëzohen pasi nisen nga i njëjti aeroport i Moskës, duke vrarë 89 vetë.
Maj 2004- Presidenti çeçen u vra në një shpërthim në stadium në Grozni
Shkurt 2004- Një sulm me bombë ka vrarë të paktën 39 vetë në një metro të Moskës
Dhjetor 2003- Një grua kamikaze vret pesë vetë pranë “Sheshit të Kuq” në Moskë
Ps
thjeshte nuk dua qe t`i komentoj.
Krijoni Kontakt