Dosja e korrupsionit shteteror

[Anton]

Interesant prape me keshilla,

nejse.


Sa per kapitalizmin besoj se ta ka shpjegu nano kaq mire( mua me pat dhene kapitalizem me 1989) apo e ke gjet vete se "Ne kapitalizem shefi eshte hajdut"


Secili politikan qe vjedh taksapaguesit shqiptare, sepse ato financime qofte dhe te huajve jane per projekte per shqiptaret e jo per projekte pasurimin privat te politikaneve, eshte nje hajdut dhe si i tille duhet denuar.

Ti me duket akoma nuk e ke kuptuar dallimin midis ekonomise dhe politikes dhe te ekonomise shteterore e asaj private.

Te ekonomise mafioze dhe ekonomise kapitaliste.

Por nuk dua te hyj ne diskutime teorike.

Ketu behet behet fjale per abuzime kryetaresh bashkie e ministrash e kjo nuk ka te beje me "djathtas" apo "majtas" ketu behet fjale veprimtari e jashteligjshme apo jo?

Kaq

Anton

ps ne disa diskutime je munduar te me keshillosh te falenderoj

[Anton]

"Xhoi Travel" fiton tenderin Tiranë-Athinë

Agjencia e udhëtimeve të bashkëshortes së Fatos Nanos ka fituar me abuzime një tender për linjën Tiranë – Athinë, duke dorëzuar në komisionin e vlerësimit të ofertave një çek prej 350 mijë dollarësh, ndërkohë që Kryeministri Fatos Nano ka deklaruar se gjithë pasuria e tij është 1 milion lek



Kryeministri i qeverisë së re, Fatos Nano do të jetë njëkohësisht pronari i njërës prej linjave të autobusëve Tiranë-Athinë, pasi firma e regjistruar me emrin e bashkëshortes së tij, Xhoana Nano, ka fituar në mënyrë krejtësisht të paligjshme tenderin e ministrisë së Transporteve. Komisioni i tenderit ka qenë i detyruar të shpallë fituese firmën Xhoi Travel, ndonëse kjo e fundit nuk plotësonte asnjë nga kriteret e shpallura të tenderit.

Kryetari i PS-së, sot kryeministër i Shqipërisë, i cili ka deklaruar se pasuria e tij është vetëm 1 milionë lekë ka paraqitur si garanci për marrjen e liçensës një çek 350 mijë dollarësh. Për të fituar tenderin nuk i kanë mjaftuar presionet e zakonshme të autoritetit të kryetarit të PS-së, por edhe mashtrimet e rangut të ulët. Ndërsa nuk plotësoheshin kushtet e tenderit, ai ka marrë borxh nga një linjë greke transportesh dy autobusë, të cilët i ka paraqitur si pjesë të kompanisë.

Para dy muajve, Komisioni i Vlerësimit të Ofertave në Ministrinë e Transporteve zhvilloi tenderin për dhënien e liçensës për linjën ndërkombëtare Tiranë- Athinë. Ky komision nuk e ka vlerësuar ofertën e kompanisë "Xhoi Travel" si më të mirën, madje për shkak të mungesave në dokumentacion, kompania ka shkuar drejt skualifikimit, por presionet e Nanos e kanë detyruar të gjithë anëtarët e komisionit të mos kthejnë mbrapsht agjencinë e udhëtimeve "Xhoi Travel".

Agjencia "Xhoi Travel" edhe pse në fasadë mban emrin e bashkëshortes së re të kryeministrit Nano, ka fituar tenderin e linjës Tiranë – Athinë në sajë të presioneve të kryetarit Nano, parave të tij dhe miqësive të tij në Greqi.

Pas përfundimit të tenderit ministri Lakrori ka qenë i detyruar t’i shpallë të dy agjencitë dhe atë që është renditur e para dhe agjencinë "Xhoi Travel", si fituese të liçensës.

Ndërkohë Ministri i Transporteve, Maqo Lakrori ka deklaruar dje në konferencën e lamtumirës, se firma e bashkëshortes së Fatos Nanos është paraqitur në një tender si çdo subjekt i zakonshëm juridik dhe pas vlerësimit të dokumentacionit ka fituar të drejtën për të fituar liçensën e operatorit që të kryejë rrugën Tiranë – Athinë.

"Komisioni ka vlerësuar dokumentacionin e dorëzuar dhe pasi ka bërë vlerësimet e nevojshme, ka kaluar për firmë tek ministri, i cili me autoritetin që i jep ligji vendos që t’ia japë të drejtën kësaj apo asaj firme" – është shprehur në lidhje me këtë çështje Maqo Lakrori.

Historia e tenderit të udhëtimeve ka filluar disa javë më parë kur Ministria e Transporteve organizoi tenderin për linjën ndërurbane Tiranë – Athinë. Subjektet e paraqitura duhet të kishin në dispozicion të paktën tetë autobusë, dy prej të cilëve private dhe gjashtë të marrë me qera. Komisioni do të bënte vlerësimin teknik të tyre për të parë nëse autobuzët e vënë në dispozicion i plotësonin të gjitha kriteret e udhëtimeve të gjata. Por ka ndodhur që firma Xhoi Travel ka paraqitur në komision vetëm një çek prej 350 mijë dollarësh, me të cilin do të blinte gjashtë autobusa, ndërkohë që dy autobuzë të falur qëndronin në një park autobusash në Tiranë.

Ndërkaq, mësohet se në një nga vizitat e shpeshta në Janinë, disa javë më parë, Nano ka thirrur në takim Tasos Petropulos. Ky i fundit, me nënshtetësi greke, njihet si një pronar i linjave urbane dhe ka në dispozicionin e tij një numër të madh autobusësh.

Nano i ka kërkuar Petropulosit që t’i jepte Xhoit dy autobusë. Autobusët duhet të ishin prodhim i pas vitit 1990, vlera e të cilëve në tregun grek kushton minimumi 200 milion lekë. Nano i ka kërkuar gjithashtu Petropulosit që t’i jepte me qera bashkëshortes së tij edhe gjashtë autobusë të tjerë të të njëjtit prodhim. Autobusët janë kërkuar nga Fatos Nano për bashkëshorten e tij, me qëllim që t’i kishte në dispozicion për t’u futur në tenderin e organizuar nga Ministria e Transporteve në Shqipëri. E gjitha kjo është bërë për të plotësuar kushtet e tenderimit. E megjithatë Xhoi Travel nuk ka fituar pikët e duhura dhe ka dalë e dyta në renditje, por dhe kjo nuk e ka ndaluar Fatos Nanon të bëjë të mundur shpalljen fituese të agjencisë në fjalë.

Por ndërkaq Nano ka përgatitur kabinetin e ri dhe ka shpallur tashmë emrat e fituesve, emri i ish-ministrit Lakrori nuk gjendet gjëkundi. Duket se Nano ka "harruar" nderin e vjetër të ish-ministrit që është detyruar të shpallë fitues dy linja nga një e parashikuar vetëm e vetëm për të mos i prishur qejfin gruas së kryetarit.

B. K.


Sa thjeshte e qarte jane faktet dhe mbi te gjitha sa kollaj per tu verifikuar.

[Anton]

Korrupsioni i Ermelinda Meksit, ditën e fundit me 1 gusht, 20 milionë lekë

Qëndrim krejt i papërgjegjshëm i ish-ministres së Ekonomisë, e cila boshatis fondin e dikasterit, për t'u dhënë nga dy rroga shpërblim besnikërie, disa prej të afërmve të vet

Largimi i Ermelinda Meksit nga drejtimi i dikasterit të Ekonomisë, pasi ka mbretëruar aty për më shumë se 3 vjet është shenjuar nga një fakt sa kurioz, aq edhe skandaloz i ministrit të Ekonomisë. Akti i fundit që ka nënshkruar Ermelinda Meksi, një partiake e lartë e një drejtuese e vjetër administrate, është tërheqja e një fondi prej 20 milionë lekësh nga buxheti i emergjencës i dikasterit, për t'ua ndarë besnikëve të vet në prag të largimit. Edhe pse ka firmosur vetë disa nga marrëveshjet me Bankën Botërore për zbatimin e projekteve për reduktimin e varfërisë, atë e ka zenë një mall për pëmbushjen e këtij qëllimi, të paktën njëherë të vetme e me subjekte, vetë anëtarët e ngushtë të administratës së dikasterit të saj. Një burim i kësaj administrate i deklaroi dje, gazetës "55" se, pa një kriter të qartë, Meksi e ka shpërndarë të gjithë shpërblimin për anëtarët e stafit të ngushtë. Ndër të përfituarit e mëdhenj, i njëjti burim, radhiti shefin e personelit, specialistë të kabinetit të saj, sekretarët, shoferin, si dhe të tjerë punonjës të "entourage"-it të ministres. Shpërblimet duket sheshit se jepen jo vetëm për t'u mbyllur gojën bashkëpunëtorëve për aferat e ndryshme, por edhe për t'i përdorur në të ardhmen për të njëjtën gjë. Zëdhënësi i ministrisë Pajtim Melani, nuk pranoi të konfirmonte dhënien e shpërblimit e as përfituesit e tij, por deklaroi se, sipas ligjeve në fuqi, ministri ka të drejtë të japë deri në dy rroga vjetore shpërblim, kur ai e gjykon të arsyeshme e pa iu nënshtruar ndonjë kriteri a normative. Shpërndarja e shpërblimeve është denoncuar dje, krejt rastësisht nga punonjës të administratës së ministrisë së Ekonomisë, por përtej abuzimeve në dukje sentimentale të Meksit me paratë e shtetit, pasardhësit Malaj, ndoshta do t'i duhet të bëjë një transparencë për rrethin e të shpërblyerve, për motivet e shpërlimit, si dhe për arsyet pse disa të tjerë u lanë jashtë "falenderimeve" të Ermelinda Meksit. Re.po

[Anton]

Babëzitje e shfrenuar e kryetarit të Bashkisë së Lushnjës

Edhe pse vetë Ministria e Pushtetit Lokal ka konstatuar, se kryetari i Bashkisë në Lushnjë, Ylli Myftari, ka bërë shkelje flagrante në qindra raste të ligjit të urbanistikës, për dhënien e lejeve të ndërtimit, duke prekur edhe trotuaret e qytetit, organi i akuzës në Lushnjë dhe Këshilli i Qarkut në Fier, vetëm heshtin. Deri kur kështu?

Misto Xhemali

Fakte të reja dëshmojnë, se kryetari i Bashkisë të Lushnjës, Ylli Myftari, ka qenë njeriu më i babëzitur për të zhvatur sa më shumë, nga qytetarët e tij. Duke shfrytëzuar postin e kryetarit të Bashkisë, i cili njëherësh është edhe kryetar i Këshillit të Rregullimit të Territorit për qytetin e Lushnjës, ai duket "i ka rënë me top" në babëzitjen e tij, për të zhvatur sa më shumë nga qytetarët lushnjarë. Ndërkohë për ata qytetarë, të cilët nuk kanë pranuar t'i japin atij rryshfete, Ylli Myftari është treguar i pamëshirëshëm, duke mos miratuar asnjë kërkesë të tyre për leje ndërtimi.

Të irrituar për këtë qëndrim të Myftarit, 45 qytetarë të Lushnjës, i kanë drejtuar një ankesë kolektive Ministrisë të Pushtetit Lokal, duke kërkuar që të hetohet veprimtaria korruptive e kryetarit të Bashkisë të Lushnjës për dhënien e lejeve të ndërtimit. Në këtë kuadër, një ekip pune i Ministrisë të Pushtetit Lokal, ka organizuar një kontroll të gjerë për të parë proçedurat e ndjekura nga KRT e Bashkisë, në dhënien e lejeve të ndërtimit. Koha e kontrollit u shtri për një periudhë 1-vjeçare, nga 1 tetori i vitit 2000 deri në dhjetorin e vitit 2001.

Gjatë kontrollit, inspektorët e Ministrisë të Pushtetit Lokal, kanë konstatuar shkelje të shumta flagrante në zbatimin e ligjshmërisë, për dhënien e lejeve të ndërtimit në qytetin e Lushnjës. Kështu, vetëm gjatë një viti, 86 personave u janë dhënë lejet e ndërtimit, edhe pse në dosjet e tyre mungonte dokumentacioni i pronësisë mbi truallin. Ndërkohë, në 15 dosje të tjera, vertetimet e pronësisë mbi truallin kanë qenë fotokopje të panoterizuara, 17 persona nuk kishin plotësuar formularin numër një, 41 persona nuk ishin plotësuar formularin numër dy, ndërsa 97 persona të tjerë, nuk kishin plotësuar formularin numër tre, kërkesa këto të parashikuara në ligjin "Mbi urbanistikën".

Por më flagrante, ka qenë "kokëfortësia" e KRT Lushnjë, e cila ka dhënë leje ndërtimi edhe për dy persona, edhe pse Prefektura e Fierit, në bazë të kompetencave, nuk i ka miratuar këto kërkesa, me argumentin se ato përbënin shkelje ligjore.

Po kështu, shkelje ligjore janë konstatuar edhe në vjeljen e detyrimit financiar të 2 përqindëshit mbi koston e ndërtimeve, të vjeljes të taksës të ndërtimeve të filluara pa leje, e të tjera.

Për të gjitha këto shkelje ligjore, grupi i kontrollorëve të Ministrisë të Pushtetit Lokal, ka vënë para përgjegjësisë, kryetarin e Bashkisë në qytetin e Lushnjës, Ylli Myftari, si dhe 23 anëtarë të Këshillit Teknik dhe të KRT të kësaj Bashkie, të cilët kanë shkelur në mënyrë flagrante ligjin e urbanistikës, duke arritur deri atje, sa të japin leje për ndërtime edhe duke prekur tortuaret e pallateve të ndërtuara në këtë qytet.

Por, edhe pse këto shkelje ligjore janë konstatuar që në 5 shkurt të këtij viti, organi i akuzës në Lushnjë nuk ka bërë asnjë përçapje për të hetuar rreth këtyre shkeljeve, të cilat kanë çuar në irritimin e banorëve lushnjarë.

[Anton]

Blendi Klosi, aksion kundër korrupsionit pa asnjë dosje

Mbledhje demagogjike e Nismës Qeveritare Antikorrupsion e cila rrëzon paditë paraardhëse të ministrisë dhe nuk jep asnjë strategji për hetimet e reja kundër korrupsionit në administratë

Me një protagonizëm të theksuar, ministri i Shtetit për Antikorrupsionin, Blendi Klosi, i cili ishte pagëzuar në ditët e para të formimit të kabinetit "Nano 5", edhe si ministri i reformës, ka mbledhur dje për herë të parë Grupin e Monitorimit Antikorrupsion, në një përpjekje për të vlerësuar, se deri ku ka arritur përgatitja e matricës së antikorrupsionit. Klosi i vlerësoi përgatitjet e ekspertëve, si përpjekje që "synojnë një analizë teknike dhe të specializuar për të evidentuar shkaqet e korrupsionit. Lufta kundër korrupsionit është një nga përpjekjet kryesore të qeverisë", u shpreh ministri Klosi, duke shtuar, se "në këtë aspekt, secili dikaster ka marrë angazhimet përkatëse për të zhvilluar një luftë të përbashkët kundër këtij fenomeni". Lufta kundër korrupsionit, u rendit ndër prioritetet e kabinetit qeveritar, por gjatë këtyre kohëve, më shumë ka pasur pushim të padive të ngritura ndaj zyrtarëve të lartë shtetërore, qoftë nga dosjet që përgatiste paraardhësi i B.Klosit, Ndre Legisi, qoftë nga paditë e pakta që hartonte Kontrolli i Lartë i Shtetit. Mjaft prej dosjeve që publikoi ish-ministri Legisi, u sabotuan nga prokuroria e Rakipit, duke regjistruar kështu, një bllokim të plotë të përpjekjeve kundër korrupsionit. Shqipëria është renditur vazhdimisht në vendin e parë të listës së vendeve me korrupsionin më të lartë dhe nëse kjo renditje do ta shoqërojë Shqipërinë edhe pas vitit 2003, atëherë dështimi i kabinetit të Nanos, do të ishte një fakt që s'do të kishte nevojë për koment. Këtë kushtëzim e di edhe Blendi Klosi, i cili deklaroi dje, se në programin e saj, qeveria ka përgatitur matrica me afate të përcaktuara për strategjitë kombëtare që përcaktojnë masat e luftës kundër korrupsionit. Mbi 100 dosje të paraardhësit të Klosit, janë refuzuar nga institucioni i akuzës, ndërkohë që për to, ministri aktual i Antikorrupsionit, nuk ka bërë komente, duke u mjaftuar vetëm me retorikën mbi matricat në letër, kundër korrupsionit të zyrtarëve shtetërore.

E.P.

55

A e kupton kush kete lajm?

Ne paskemi ministri te vecante kunder korrupsionit e asnje nuk denohet per korrupsion!

[Albo]

Sipas anëtarëve të komisionit nga Ministria e Rendit janë blerë këpucë nga Kina vetëm për 4 dollarë dhe janë shitur për 20 dollarë

Ministri i Rendit në Komision parlamentar: Shpërdorime dhe me këpucët

Rama: Ja vjedhjet në Rend
Vetëm nga pasaportat humbën 3 milionë USD


--------------------------------------------------------------------------------

Ministri Rama u detyrua dje të pranojë përpara Komisionit për Rendin dhe SHISH-in, se shpërdorimet dhe abuzimet në tendera nga paraardhësi i tij arrijnë në miliona dollarë, ku vetëm për pasaportat arrin në 3 milionë.

Ministri i Rendit Publik, Luan Rama, raportoi përpara Komisonit të Rendit dhe SHISH-it mbi punën e deritanishme në drejtim të pajisjes së qytetarëve me pasaporta dhe abuzimet e bëra në këtë drejtim.

Pasaportat
Rama pranoi abuzimet që janë bërë në tenderin e pasaportave e në një vlerë prej 3 milionë dollarësh. Ai tha se pas marrëveshjes së firmës gjermane dhe palës shqiptare për prodhimin e pasaportave të reja, është kërkuar më pas nga kjo e fundit një shtesë prej 2.5 milionë dollarësh për TVSH-në. Kësaj shume i janë shtuar edhe 0.5 milionë dollarë për menaxhim apo trajnim të përsonelit të policisë, duke kapur vlerën prej 3 milionë dollarësh, që nuk ishin të përcaktuar në kontratën e bërë nga pala shqiptare dhe ajo gjermane. Anëtarët e komisionit kanë kërkuar ndjekje penale për të gjithë ata përsona të implikuar në këtë aferë të paligjshme. Madje nga komisioni u theksua se krahas ndjekjes nga Prokuroria Shqiptare, të kërkohet nga një gjykatë ndërkombëtare ndjekje penale edhe për firmën gjermane. Po ashtu nga ministri Rama u pranua edhe fakti që deri tani në Shqipëri kanë hyrë vetëm 160 mijë pasaporta, shifër kjo 2-3 herë më e ulët nga çfarë ishte deklaruar më parë. Ndërsa vetëm përpara një muaji nga drejtues të Ministrisë së Rendit u raportua se me ardhjen e kontigjentit të fundit prej 70 mijësh plotësohej numri i përgjithshëm prej 600 mijë pasaportash, shifrat e djeshme treguan një realitet krejt të kundërt. Po ashtu, nga anëtarët e Komisionit për Rendin dhe SHISH-in u theksua se shkelje janë bërë që në procedurat për tenderin e pasaportave, që çoi në përjashtimin e shumë firmave serioze.

Karburantet dhe veshmbathjet
Ministri Rama pranoi se nga ana e personave të caktuar ne Ministrinë e Rendit për tenderin e karburanteve janë vënë re aabuzime të mëdha. Kështu, sipas shifrave të paraqitura, nga kjo ministri janë blerë 0.5 milionë litra karburant, ku nga çmimet e blerjes mendohet që përfitimet nga drejtues të këtij dikasteri të jenë 70 milionë lekë të reja. Por, krahas abuzimeve nga tenderat e mësipërm, shuma tepër të mëdha janë përfituar edhe nga tenderat për blerjen e veshmbathjeve. Sipas anëta-rëve të komisionit nga Ministria e Rendit janë blerë këpucë nga Kina vetëm për 4 dollarë dhe janë shitur për 20 dollarë, ndërkohë që janë blerë veshmbathje për 3 dollarë, të cilat janë shitur më pas për 14 dollarë. Mendohet që edhe këtu të jetë abuzuar me miliona lekë, ndonëse nuk janë dhënë shifra mbi sasinë e veshmbathjeve e këpucëve.


ABUZIMET E MINISTRISE SE RENDIT

¨ 3 milionë dollarë janë përfituar nga tenderi i pasaportave, shumë e cila është shtuar nga pala shqiptare, ndonëse nuk ishte e përfshirë në kontratën me firmën gjermane
¨ 70 milionë lekë të reja mendohet abuizmi nga tenderat e karburanteve, duke krahasuar çmimin e blerjes që figuron në dokumentet e këtij dikasteri, me çmimin real të tregut-Nga Ministria e Rendit janë blerë këpucë nga Kina me një vlerë prej 4 dollarësh, të cilat janë shitur më pas me 20 dollarë
¨ Janë blerë veshmbathje, po nga Kina, me një vlerë prej 3 dollarësh, të cilat janë shitur më pas me 13 dollarë. Edhe abuzimet në tenderin e këpucëve dhe veshmbathjeve llogariten në miliona lekë
¨ Eshtë propaganduar se vetëm një numër i vogël pasaportash priten për të plotësuar numrin e përgjithshëm prej 600 mijë pasaportash, ndërkohë që aktualisht kanë hyrë në Shqipëri vetëm 160 mijë

[Brari]

KOZETA FINO tepkë si KOZETA e HUGOIT...lol


-------------
TIRANË (14 Shtator) - Kozeta Fino, ish-kryetarja e Agjencisë Kombëtare të Privatizimit u shkarkuar në bazë të një raporti të KLSH, ku janë evidentuar shumë shkelje. Kontrolli i Lartë i Shtetit i ka paraqitur Prokurorisë së Përgjithshme një dosje të kontrollit që ka bërë në këtë agjenci javët e fundit. Në këtë raport Kozeta Fino bëhet përgjegjëse direkte për një shkelje të ligjit, i cili ka çuar në favorizim të disa pronarëve që kanë blerë hotele, kryesisht në bregdet. Shkeljet që përmenden në raport janë të shumta. Mes tyre bien në sy edhe privatizime që kohë më parë kanë bërë bujë. Kozeta Fino u shkarkua nga detyra nga ana e kryeministrit Nano me argumentimin "për të parandaluar abuzimet e mëtejshme". Me kaq është shoqëruar vendimi i kryeministrit, por në të vërtetë një dosje është paraqitur në prokurori në lidhje me këtë agjenci. Kozeta Fino duket se do të japë llogari në lidhje me një udhëzim të nxjerrë prej saj në 30 gusht të vitit 2001. KLSH-ja ka bërë një kontroll dhe e ka quajtur veprimtarinë e AKP-së jo të rregullt sipas këtij udhëzimi. "Përqendrimi i privatizimit të trojeve në AKP qendër bie ndesh me vendimin e Këshillit të Ministrave nr.562, datë 09.10.1995, ku në pikën e parë të tij ngarkohen degët në rrethe për privatizimin e tyre. Ndërhyrjet në kompetencat e strukturave të AKP-së duhet të bëhet me vendim të qeverisë, si rrjedhojë, ndërhyrja në këto kompetenca me atë në udhëzimit përbën shkelje të vendimit të mësipërm", kështu thuhet në raportin e KLSH-së, e përkthyer ndryshe, do të thotë shkelje e ligjit. Më pas, KLSH-ja ka zbërdhyer të gjithë udhëzimin dhe nxjerr përfundimin se AKP-ja ia ka dhënë të drejtën vetes të shesë pa kufizim truall të lirë, të pazënë me objekt, "mjafton ta kërkosh e të mos jetë i parashikuar në planet rregulluese", thuhet në raport. "Për plotësimin e vërtetimeve të këtij udhëzimi, organeve përkatëse nuk u është marrë detyrim apo angazhim zyrtar. Si rrjedhojë, konkretisht janë lëshuar si dhe janë pranuar dokumente të papërgjegjshme, të parregullta, të paprotokolluara", thuhet në raport. Ky institucion i quan flagrante rastet e lidhjes së kontratave të qirasë së trojeve shtesë mbi atë të përcaktuar në kontratën e shitjes së objektit. Arsyetimi i KLSh-së për këtë udhëzim, në bazë të të cilit janë bërë shumë shkelje të ligjit nga ana e AKP-së, shprehimisht thotë: "Për sa trajtuam më sipër, mbajnë përgjegjësi për nxjerrjen e udhëzimit numër 20, datë 30 gusht 2001, në kundërshtim me VKM-562, drejtorja e AKP-së, Kozeta Fino, ish-përgjegjësi i sektorit juridik, Bledar Doracaj, dhe jurisi, Durim Grabova". Me këtë mbyllje të raportit, KLSH-ja i është drejtuar, përveç Këshillit të Ministrave, institucioneve të ndryshme edhe Prokurorisë për të proceduar. DISA NGA SHKELJET E GJETURA NGA KLSH ¨Vila 32/1 e shitur vetëm me një konkurrent, me 11.7 milionë lekë më pak se vlera reale ¨Udhëzim i jashtëligjshëm nxjerrë nga drejtoresha Kozeta Fino ¨Në shumë raste janë bërë shtesa të truallit të shitur nga AKP-ja, në bazë të udhëzimit 20 të nxjerrë nga ky institucion, gjithsej 18416.5 metra katrorë ¨Shitje të objekteve me një konkurrent të vetëm ¨Llogaritje e gabuar e vlerës së objekteve, duke mos respektuar vendimet e Këshillit të Ministrave ¨Shitja pa ankand e objekteve me vlerë të ulët

ed/mr (GazetaShqiptare/BalkanWeb)



Pasaportat: 15 zyrtarë nën akuzë për abuzime
Lajmi i ores 8:05 AM




TIRANË (14 Shtator) - Pasaportat vënë nën hetim 15 persona. Dje burime shumë të besueshme nga Prokuroria e rrethit të Tiranës pohuan se më të mundshmit për t'u vënë nën akuzë (pse jo dhe nën pranga), për skandalin më të përfolur në Ministrinë e Rendit Publik, janë anëtarët e komisionit të vlerësimit të ofertave dhe anëtarët e komisionit të hartimit të dokumentacionit të tenderimit. Megjithatë jashtë kësaj vorbulle nuk mbetet dhe ish-ministri i Rendit, Ilir Gjoni, dhe drejtori i Policisë së Rendit në dikasterin e bluve, kolonel Veli Myftari, i cili dy ditë më parë u thirr për të dhënë shpjegime në organin hetimor të kryeqytetit. Ndërkohë që po hidhen përfundimisht në "sitë" kompetencat e përgje-gjësitë e personazheve që një vit më parë lidhën kontratën e "famshme" me firmën gjermane "Bundes Druckerei", përflitet nën zë nga përfaqësues të akuzës, se i pandehuri tashmë i deklaruar, Edmond Aliaj, është një ndër "mëkatarët" e skandalit. Hetimi Dosja e "Pasaportave" profesionalisht në "ring"?! Vështirë që dikush të përgjigjet saktë, pasi kësaj here grepi i përfaqësuesve të ligjit duhet të zhytet thellë, pikërisht te "krapi" i madh që mban mbi vete miliardat e humbura. Pas një kohe të gjatë hetimi, dje për herë të parë burime nga akuza konfirmuan numrin e saktë të personave nën hetim. Bëhet fjalë për 15 zyrtarë të lartë të Ministrisë së Rendit Publik. Një shifër kjo e pashoqëruar me emra konkretë. Por më të mundshmit, të përfshirë në top-listën sekrete të prokurorisë, mbeten anëtarët e komisionit të vlerësimit të ofertave dhe anëtarët e komisionit të hartimit të dokumentacionit të tenderit të pasaportave. Kush do ta hajë...?! Nuk dihet. Momentalisht është marrë i pandehur vetëm shefi i prokurimit në Ministrinë e Rendit Publik, Edmond Alia. Por faktet e mbledhura deri tani për çështjen e "Pasaportave" e kapërcejnë këtë të fundit duke mbërthyer në "lak" shefa apo ish-shefa të tij, si ish-ministrin e Rendit, Ilir Gjoni, zëvendësministrin aktual, Bujar Himçi, dhe vajzën e presidentit të Republikës, Ana Moisiu. "Që ta zbardhësh saktë të vërtetën e tenderit të pasaportave duhet shkuar shumë larg...", citojnë ekspertë të akuzës. Hetuesit kanë kryer një mori veprimesh hetimore, kanë marrë në pyetje shumë nga personat e përfshirë në çështje, tashmë mbetet vetëm finishi, prangat. Kriza Kontrata e firmosur një vit më parë me firmën gjermane "Bundes Druckerei" për realizimin e tenderit të pasaportave pasoi me një fillim të keq e fund shumë të idhët. Një shtet me xhepa të zbrazur dhe mijëra qytetarë të terrorizuar nga sorollatja e pafund në dyert e komisariateve të policisë. Kërkesat e shtetasve për sigurimin e dokumentit të identifikimit janë të shumta, ndërsa furnizimi nga firma fituese e tenderit, e pakët. Në këto rrethana hetimi i nisur nga prokuroria për vënien para ligjit të të gjithë atyre që abuzuan me tenderin e pasaportave, duket si një kompresë e ftohtë e destinuar për të ulur "temperaturën" që prodhon kriza dhe ambienti përreth.

ed/mr (GazetaShqiptare/BalkanWeb)


------------

eeehhh mor aman.. te shullec mullaqet ne ishujt ekzotike duhen parate e dynjase..
E nga ti marrën proletaret tane Socialiste ato thase me para..keshtuqe..c'te bejne fukarenjte....fusin "lugen" nga pak ne arke te ketij Shteti tmerresisht te pasur..

ehh more Nano si do ja bec hallit ti me keta hajdute nga te kater anet...lol.
Dhendri Poetit proletar..vetem me dy fakse firmes gjermane te PASOSHAVE i rruajti 850 000 dollare..
E po Elona nuku mund te shtrije shalet ne reren e golemit plot me plehra..keshtu qe per te ngrohur ajo lulken ne COTE D'azurr duhen miliona..
Keshtu e kane keto pune..

he me te lumte moj Parti MIK te madh na pate ti..

[Albo]

Skandali i pasaportave: Dy firmat e skualifikuara "Euro Get" dhe "Polaroid" kishin bërë padi civile

Gjykata e Tiranës fshehu dosjen e tenderit

Në paditë e tyre drejtuesit e firmave pretendonin skualifikimin e padrejtë nga tenderi, duke përmendur cilësinë e pasaportave të reja 10-vjeçare, të cilat ishin me cilësi më të lartë dhe më të lira krahasuar me firmën fituese "Bundes Druckerei"



TIRANË - Gjykata e Shkallës së Parë e Tiranës, injoroi paditë civile të dy firmave pjesëmarrëse në tendrin e pasaportave. Pas denoncimeve të mbërritura, Gjykata e Shkallës së Parë e Tiranës, u mjaftua vetëm me protokollimin e dy padive civile nga dy firma të skualifikuara padrejtësisht nga tenderi i pasaportave. Burime të Gjykatës së Shkallës së Parë të Tiranës, bëjnë të ditur se, muaj më parë se sa denoncimi publik i tenderit të pasaportave të merrte përmasa të tilla, dy firmat e skualifikuara nga tenderi "Euro Get" dhe "Polaroid", ju drejtuan nëpërmjet padive civile, Gjykatës së Shkallës së Parë të Tiranës. Në paditë e tyre, ato pretendonin skualifikimin padrejtësisht nga tenderi. Për këtë, ata përmendnin edhe cilësinë e pasaportave të reja 10-vjeçare, sipas të cilave krahas edhe çmimit, u jepnin shumë avantazh atyre, krahasuar me firmën fituese "Bundes Druckerei".

Prej muajsh të shumtë që prej depozitimit të padive, ende edhe sot, Gjykata e Shkallës së Parë e Tiranës, nuk ka ndërmarrë asnjë veprim për zbardhjen e mundshme të tenderit të pasaportave. Sjellja e Gjykatës së Shkallës së Parë të Tiranës, nuk ngelet më pas nga ajo e Prokurorisë së Përgjithshme. Organi qëndror i akuzuës, i vënë në dijeni për skandalin e pasaportave shumë më herët, u shndërrua në një protektor të hajdutëve. Megjithë denoncimet e shumta në rrugë zyrtare, asnjëherë Arben Rakipi, nuk ndërmorri asnjë veprim për hetimin e tenderit të pasaportave. Denoncimet publike të bëra edhe në media, para largimit të Rakipit nga Prokuroria e Përgjithshme, e detyruan atë që të lëshojë një urdhër formal për çelje hetimesh nga ana e Prokurorisë së rrethit të Tiranës. Burime të Prokurorisë së rrethit të Tiranës, bëjnë të ditur se pas këtij urdhëri ata patën kohë vetëm sa për të sekuestruar dosjet e Ministrisë së Rendit Publik dhe të kontrolleve zyrtare, për tenderin e pasaportave. Pas kapërcimit të kësaj "faze", Prokuroria e rrethit të Tiranës, përballet me një tjetër urdhër, sipas të cilit dosja duhet të transferohej në Prokuroinë e Përgjithshme. Prej asaj kohe, dosja e pasaportave u la në harresë nga Arben Rakipi, bëjnë të ditur të njëjtat burime.

Përfshirjen e Rakipit në mbylljen e skandalit të pasaportave, pak ditë më parë e denoncuan edhe deputetët, anëtarë të Komisionit Parlamentar të Rendit e SHISH-it. Në mbledhjen e fundit të tij, Komisioni Parlamentar i Rendit e SHISH-it, denoncoi përfshirjen e Ilir Gjonit ish-ministrit të Rendit Publik e të Arben Rakipit ish-Prokurorit të Përgjithshëm, në zvarritjen dhe më pas mbylljen e hetimeve për tenderin e pasaportave. Në këtë përfundim ky komision arriti pas një kontrolli, që dy deputetë ushtruan në Prokurorinë e Përgjithshme. Në përfundim të kontrollit të tyre, për dokumentat e skandalit me tenderin e pasaportave, dy deputetët kanë njoftuar edhe Komisionin Parlamentar të Rendit e SHISH-it. Sipas tyre, Prokuroria e Përgjithshme, Ilir Gjoni dhe Arben Rakipi, kanë zvarritur hetimet dhe më pas kanë mbyllur skandalin e pasaportave.

Denoncimi i Komisionit Parlamentar të Rendit e SHISH-it, pason pohimin e pak ditëve më parë, që Ilir Gjoni nga SHBA-të bënte për mënryën e ndjekur mes tij dhe Rakipit për mbylljen e skandalit. Sipas Gjonit, në 30 gusht të vitit të kaluar, ai i kishte kërkuar Arben Rakipit e Prokurorisë së Përgjithshme të kryente hetime për tenderin e pasaportave. "Pas investigimeve të nevojshme, kjo e fundit është shprehur publikisht se në zhvillimin e tenderit të pasaportave nuk ka shkelje", pohoi Gjoni.

Artur BEGA

[Albo]

"Dosja Mazi". Si ka abuzuar ish-drejtori i RTSH me tenderat, dokumentarët, emisionet, reklamat, etj

Tenderat e Edi Mazit, 1.2 miliard

Për një dokumentar të shfaqur në TV publik, Mazi merrte paradhënie, ose i ndante paratë me regjizorin e dokumentarit. Nëse një regjizor do të shfaqte një dokumentar, apo film televiziv, binte dakord me drejtorin e Përgjithshëm të RTSH që t’i ndanin bashkë paratë


TIRANË - "Dosja Mazi" e skandalit RTSH-së i ka kushtuar shtetit mbi 600 milion lekë humbje. Edi Mazi u vu nën hetim para dy muajsh dhe Prokuroria i kërkoi Gjykatës shkarkimin e tij nga detyra, por kjo kërkesë u rrëzua nga Gjykata e Tiranës. Megjithatë, pas shume presionesh, Mazi u detyrua të japë dorëheqjen nga kreu i RTSH. Prokuroria ka grumbulluar të gjithë dokumentacionin, ndonëse një pjesë e tij është zhdukur nga Mazi, dhe po heton të gjitha shkeljet me tenderat, emisionet televizive, dokumentarët, reklamat, etj,.

Organi i akuzës po heton dokumentacionin e RTSH, por në fakt, Mazi ka abuzuar edhe nëpërmjet korrupsionit të padukshëm. Burime nga RTSH bëjnë të ditur se vetëm një regjizor i njohur ka marrë 700 milion lekë nga RTSH për dy-tre dokumentarë. Të njëjtat burime saktësojnë se, për një dokumentar të shfaqur në TV publik, Mazi merrte paradhënie ose i ndante paratë me regjizorin e dokumentarit. Nëse një regjozor do të shfaqte një dokumentar, apo film televiziv, binte dakord me drejtorin e Përgjithshëm të RTSH që t’i ndanin paratë bashkë.

Gjithësesi, ndonëse Mazi dhe njerëzit që e rrethojnë atë ka zhdukur një pjesë të dokumentave që e implikojnë atë direkt në zhdukjen e milionave, burime të Prokurorisë bëjnë të ditur se, deri tani është grumbulluar i gjithë dokumentacioni kompromentues që e thellon së tepërmi ish-Drejtorin e Përgjithshëm të RTSH, Edi Mazi në këtë skandal. Burimet e Prokurorisë konfirmuan gjithashtu se, nuk ka përfunduar ende hetimi për dëmin total të shkaktuar në TV publik nëpërmjet abuzimeve të ndryshme në sektorin financiar.

Ish-drejtori i dorëhequr i RTSH, Edi Mazi, është nën hetim nën akuzën e abuzimit në 7 tendera me një shumë të përgjithshme rreth 200 mijë USD. Të gjitha shkeljet kanë të bëjnë me tenderat e lidhur nga RTSH gjatë kohës që ai ka qenë drejtor. RTSH, nëpërmjet kryetarit të komisionit të tenderave, Edi Mazi, ka shkelur barazinë e subjekteve pjesëmarrëse në to, duke favorizuar në kundërshtim me ligjin disa subjekte në kurriz të subjekteve të tjera pjesëmarrëse, duke i sjellë shtetit një dëm prej miliona lekësh.

Mbi Mazin tashmë rëndon edhe zhdukja e dokumentacionit dhe falsifikimi i firmave të tenderit të kompjuterave. Dy prej anëtarëve të thjeshtë të komisionit të tenderit pohuan para prokurorëve se, nuk ishin firmat e tyre, por firmat e hedhura përkrah emrit të tyre ishin false.

Në bazë të dokumentacionit që ndodhet në duart e hetuesve, rreth 85 përqind e fondit të investimeve të RTSH kanë kaluar me një vendim të drejtorit të përgjithshëm, Edi Mazi për t’u prokuruar në një prej drejtorive lokale në përbërje të këtij institucioni. 1 miliard e 200 milion lekë investime publike në fushën e transmetimit të pjesëve të këmbimit dhe të ruajtjes së objekteve i kanë kaluar drejtorisë lokale të stacionit të Tiranës. Kjo, në një kohë që shuma në fjalë përbën gati 85 përqind të gjithë investimeve publike të RTSH, të cilat janë në nivelin e 1.7 miliard lekëve. Mazi nuk është ndalur këtu, por pasi ka dhënë për të tenderuar ka dërguar edhe pjesën tjetër që plotëson shumën prej 1.2 miliard lekësh për të tenderuar në këtë drejtori.

Rexhep POLISI



Ja si ka abuzuar Mazi me kontratat



***

Nënshkrimi i një marrëveshje të Mazit me shoqërinë "Magic Bingo Albania" për transmetimin e Telebingos, duke ulur kohën e faturimit nga 40 në 8 minuta, ka pakësuar të ardhurat në rreth 400 milionë lekë.

Arkëtimi i shumës prej 37 035 000 lekë nga "Magic Bingo Albania", për moszbatim të tarifës së përcaktuar në kontratë dhe penaliteve përkatëse. Zbatimi i vendimit të Këshillit Drejtues, ku përcaktohen rritja e nivelit të tarifës nga 30 mijë lekë për minutë në 35 mijë lekë për minutë që duhet të paguajë "Magic Bingo Albania".

Rishikimi i nenit tetë të kontratës së lidhur me "Magic Bingo Albania", që ka të bëjë me ekskluzivitetin e transmetimit të Telebingos në TVSH, me qëllim heqjen e këtij neni, me mirëkuptimin e palëve, etj...

Kontratat për spote dhe reklamë, shpërblim në natyrë për RTSH.

***

Kontrata e lidhur mes Edi Mazit dhe agjensisë "PUBLIMEDIA" që mban datën 29 Dhjetor ’99 i ka kushtuar buxhetit të RTSH-së rreth 32 milion lekë.

***

"Fest 2000" i ka kushtuar Edi Mazit 250 milion lekë. Shpenzimet për shtatë filma dhe dokumentarë llogariten në 93 milion lekë, ndërsa shuma është e barazvlefshme me buxhetin vjetor të RTSH.

***

Aktmarrëveshja e lidhur ndërmjet Radio-Tiranës, përfaqësuar nga drejtori Martin Leka dhe kompanisë "Ada Air" përfaqësuar nga Bajram Muça me objekt; Radio-Tirana merr përsipër që për periudhën 25.05.2001, t’i transmetojë kompanisë "Ada Air" 540 spote me vlerë 291 600 lekë kundrejt shërbimit në natyrë me bileta avioni deri në shlyerjen e plotë të kësaj vlefte brenda afatit të kësaj aktmarrëveshjeje. Nga verifikimet e kryera në drejtorinë e Marketingut të Drejtorisë së Përgjithshme dhe në sektorin e Financës së Radio-Tiranës, rezulton se nga ana e Radio-Tiranës është kryer shërbimi nga "Ada Air", kurse për marrje bileta avioni nuk kishte asnjë dokument justifikues si dhe nuk kishte rakordim midis kontraktuesve. Diferenca e krijuar prej 291 600 lekë përbën dëm ekonomik për RTSH-në.

***

Në Kontratën e Kampionatit Kombëtar të Futbollit janë zbuluar firmosje kontratash skandaloze ku vetëm një gol ka kushtuar 10 milion lekë. Në firmosjen e kësaj kontrate ndeshja e kampionatit të futbollit është blerë 10 herë më shumë se oferta që është paraqitur në një televizon tjetër.

Nga transmetimi i kampionatit kombëtar të futbollit, TVSH-së i duhet të paguajë një borxh prej 300 milion lekësh. Kjo, pasi transmetimi i ndeshjeve të futbollit kryhej në orare të stërzgjatura, ndërkohë që RTSH nuk ka respektuar kontratën me firmat që kanë sponsorizuar reklamat.

***

Kontrata e lidhur midis RTSH-së dhe firmës "Guden" me objekt për shumën prej 180 600 lekë të reklamave në radio e televizion, të shpërblejë në natyrë, duke përgatitur dhe montuar tre dyer për zyrat e Drejtorisë së Marketingut.

***

Kontrata e lidhur mes RTSH dhe firmës "Usluga" me objekt "RTSH transmeton spote në Radio-Televizion për firmën "Usluga" në vlerën 288 000 lekë, kundrejt shpërblimit në natyrë, në pajisje me ndriçues elektrikë të zyrave të Drejtorisë së Marketingut.

***

Kontratë mes RTSH dhe firmës "Pekomeri" me objekt: "RTSH merr përsipër reklama në Radio-Televizion në shumën 194 760 lekë kundrejt shpërblimit në mall dhe në natyrë".

***

Kontrata e lidhur mes RTSH-së dhe firmës "Enternal" me objekt: "Firma Enternal" për shumën prej 1 188 000 lekë të spoteve publicitare, të shpërblejë RTSH-në në natyrë për punime të ndryshme ndërtimi për rikonstruksionin e zyrës së Drejtorisë së Marketingut.

[Albo]

"Ne qeveri, ka ministra me OJQ"

"Te gjithe i njohim ministrat dhe zyrtaret e larte te shtetit, te cilet kane organizata jo qeveritare dhe bejne lidhje te shkurtra me donatoret dhe me ambasadat per te marre fonde. Dihet tashme se perfitimet e ketyre organizatave qe drejtohen nga politikanet jane me te medha, edhe per shkak te ndikimeve te tyre te drejtperdrejta, pa harruar ne kete pike edhe konfliktin e interesave qe kane keta njerez me te qenurit e tyre ne pozicione drejtuese te shtetit"

"Ministrat me organizata jo-qeveritare, po na konkurojne ne menyre te pandershme ne tregun e shoqatave jo-fitimprurese". Ky ishte nje nder konkluzionet e dala ne panelin e bashkepunimit te OJF-ve (organizata jo-qeveritare ose jo-fitimprurese) me shtetin, ne Konferencen Kombetare per "Ceshtje te zhvillimit te OJF-ve ne Shqiperi", organizuar nga Ambasada Amerikane ne Tirane. Nje konference e tille, e cila filloi gjate dites se djeshme dhe do te vazhdoje edhe ne diten e sotme, si organizim i ambasades amerikane, ka si qellim kryesor monitorimin e gjendjes se shoqatave jo-fitimprurese shqiptare, por njekohesisht edhe ceshtje te bashkepunimit mes tyre me shtetin.

Por akuzat qe u ngriten ne drejtim te politikaneve te vecante ne kete panel, nuk ishin te pakta. Dhe jo vetem ndaj tyre, por edhe ndaj disa organizatave nderkombetare jo-fitimprurese, te cilat operojne ne Shqiperi nen idene e nje konkurence te pandershme, duke marre fonde pafund dhe duke i shperdoruar ato ne menyre te pakontrolluar, ne sektore te cilet nuk kane nevoje per trainime. Sipas diskutanteve te OJQ-ve shqiptare, nje gje e tille behet per te zgjatur sa me shume tranzicionin ne vend, ne menyre qe edhe keto kompani, te kene mundesi te vazhdojne ne menyre te panderprere projektet e tyre ne Shqiperi, duke e konsideruar kete te fundit si nje vend ne tranzicion.

"Te gjithe i njohim ministrat dhe zyrtaret e larte te shtetit te cilet kane organizata jo-qeveritare, dhe bejne lidhje te shkurtra me donatoret dhe me ambasadat per te marre fonde. Dihet tashme se perfitimet e ketyre organizatave qe drejtohen nga politikanet jane me te medha, edhe per shkak te ndikimeve te tyre te drejtperdrejta, pa harruar ne ketepike edhe konfliktin e interesave.

Kjo gje e cila u deklarua ne konferencen kombetare e organizuar nga ambasada amerikane ne Tirane eshte nje akuze e rende per kabinetin Nano, ndaj duhet qe kryeministri, i cili deklaron perdite per ndeshkime te korrupsionit ne nivele te larta te politikes e te qeverisjes do te bente mire te evidentonte emrat e ministrave te tij qe jane te perfshire ne konflikte te tilla interesash. Dihet nga te gjithe se disa prej ministrave te kabinetit te tij, duke shfrytezuar postin zyrtar marrin shuma te medha ne llogarite e ketyre "organizatave jofitimprurese" dhe formalisht bejne nje "doreheqje" nga posti i presidentit te organizates, por ne te vertete jane ato qe diktojne fondet dhe gjithe veprimtarine e tyre. Ne momentin qe largohen nga posti i ministrit atehere menjehere na mbijne President te organizates x apo y. Ne thelb ky eshte shfrytezim i postit zyrtar. Ndaj, meqe fatmiresisht zoti Nano e ka CV e paster ne kete sens do te bente mire qe te ngrinte nje ekip kontrolli per kete akuze te konferences kombetare te organizatave jo qeveritare e organizuar nga ambasada amerikane dje ne Tirane. Por jashte ketij hetimi publik nuk eshte mire te lihen edhe deputetet dhe ish-ministrat.

Akuza ne media per kete fenomen jane hedhur deri dje per ministrat Kastriot Islami e Arben Malaj, por edhe per politikane si ish-ministrat Ylli Bufi e Anastas Angjeli, kryetarin e Kuvendit Servet Pellumbi e Presidentin e Republikes Moisiu, etj, por ,ndonese dihet publikisht, duhen verifikuar edhe zyrtarisht nga kabineti i Nanos.