Nano shet edhe Drilonin

[ALBA]

Shiten me vendim qeverie 1750 metra katrorë të Drilonit, ku përfshihet “Vila e Artë” dhe sipërfaqe funksionale


Tre shoqata kërkojnë nga Ruka dhe Fino ndalimin e procedurave të shitjes së monumentit natyror

Aleksandra Bogdani

TIRANË- “Drilon nr.1 Pogradec ju fton të bëheni pronar”. Kjo është një pjesë e reklamës së botuar në disa të përditshme nga Agjencia Kombëtare e Privatizimit, reklamë që duhej të kishte joshur jo pak njerëz. Vetëm me një “grusht” para mund të bëheshe pronar i një pike turistike me bukuri të rrallë dhe vlera të pallogaritshme natyrore, që tashmë rrezikojnë të zhduken. Kjo pasuri e “të gjithëve” është shitur në qershor të këtij viti. Burimet e mrekullueshme të Drilonit, ashtu si i gjithë liqeni i Ohrit janë shpallur monument natyror, me vendim të Këshillit të Ministrave( nr.676, datë 20.12.2002). Me një status të tillë, vlerat e Drilonit duhej të ruheshin dhe mbroheshin nga shteti, pasi na përkasin të gjithëve. Por një tjetër vendim qeverie, i firmosur vetëm pak muaj më parë ka nxjerrë në ankand dhe ka shitur një pjesë të mirë të Drilonit, me një çmim fare qesharak. Lajmi për shitjen e Drilonit 1, me një vlerë prej 2.6 milionë lekësh të reja do të kishte kaluar pa u ndier, nëse një grup profesorësh dhe studiuesish nuk do të shqetësoheshin për vlerat unike në botë, që rrezikojnë të shkatërrohen dhe zhduken. Të gjendur përballë çudisë së radhës që ndodh në vendin tonë, ata i kanë kërkuar ministrit të Mjedisit dhe atij të Rregullimit të Territorit të Turizmit, ndalimin e menjëhershëm të procedurave, për shitjen e monumentit të natyrës së Burimeve të Drilonit.
Shitja e Drilon 1
Në zemër të Drilonit janë shitur 1750 metra katrorë, ku përfshihen “Vila e Artë”, pasarelat dhe sipërfaqe funksionale. U shit sikur të ishte një godinë fare e zakonshme, në një vend çfarëdo. Çmimi i tokës së shitur në Drilon është vlerësuar nga përgjegjësi i seksionit në komunën e Buçimasit, ku një metër katror kushton vetëm 1600 lekë. Vlera fillestare e ankandit për shitjen e kësaj pasurie kombëtare ka qënë 2 622 538 lekë të reja, e gjithkush e di se me kaq para nuk mund të blesh as edhe një apartament. Burime nga Agjencia Kombëtare e Privatizimit pohojnë se “objekti” i mësipërm u është shitur personave që administronin prej shtatë vjetësh “Vilën e Artë” dhe truallin përreth saj. Prej tre muajsh, kjo pjesë e Drilonit nuk është më pasuri kombëtare, pra nuk na përket më të gjithëve. Ndërsa pjesën që mbetet nga kjo pikë e rëndësishme turistike në vend, e pret i njëjti fat me të ashtuquajturin Drilon 1, duke rrezikuar shkatërrimin e vlerave natyrore, që shteti ynë ia kishte ngarkuar me ligj, detyrë vetes t’i mbronte.
Peticioni
Anëtarët e shoqatës Didaktike Shkencore Speleologjike Shqiptare, shoqatës së Mbrojtjes së Peizazheve Natyrore në Shqipëri dhe shoqatës së Gjeografëve të Shqipërisë u kanë kërkuar ministrave Ethem Ruka dhe Bashkim Fino të ndalojnë menjëherë shitjen e monumentit të natyrës. “Si thesare të vërteta të natyrës sonë, monumentet e natyrës kanë vlera të mëdha dhe të papërsëritshme shkencore, ekologjike, kulturore, estetike dhe turistike. Këto vlera janë nxjerrë në shitje”,-thuhet në kërkesën e firmosur nga Prof.Dr. Perikli Qiriazi, Prof.Dr. Mevlan Kabo dhe Prof.Dr. Skënder Sala. Në kërkesën e mësipërme thuhet se është bërë një studim i tërë për evidentimin e këtyre vlerave, e më pas Këshilli i Ministrave vendosi që Burimet e Drilonit të marrin statusin monument natyre. “Për fat të keq, duke i shitur, mbi to do të ndërtohen godina shumëkatëshe e njerëz të shumtë do të punojnë në to, do të shkatërrojnë ekosistemin interesant të krijuar nga natyra, do të humbasin të gjitha vlerat dhe do të tjetërsohen me shpejtësi”. Kryetarët e shoqatave të mësipërme i kërkojnë ministrit të Mjedisit dhe atij të Rregullimit të Territorit dhe Turizmit që të ndiqet përvoja maqedonase për burimet e Shën Naumit, ku ruhen me fanatizëm vlerat e tyre dhe shfrytëzohen për qëllime studimore, ekologjike dhe turistike.
Driloni, i mbrojtur nga UNESKO
Si pjesë e liqenit të Ohrit, Burimet e Drilonit janë radhitur në listën ndërkombëtare të trashëgimisë botërore natyrore, të mbrojtur nga UNESKO. "Pse injorohen vlera të tilla të papërsëritshme? Ku e gjeni guximin ju zotërinj të Ministrisë së Rregullimit të Territorit dhe Turizmit, të shkelni ligjin nr.8906, “për zonat e mbrojtura”, ku thuhet se monumentet e natyrës janë të pacënueshëm?”,-thuhet në kërkesën dërguar dy ministrave. Tre shoqatat e mësipërme kërkojnë që Ministria e Mjedisit të ngrejë zërin për veprime të tilla që cënojnë monumentet e natyrës. “Shitja e Burimeve të Drilonit mund të sjellë vetëm përfitime të çastit, por do të zhdukë njëherë e përgjithmonë të gjitha vlerat e tyre. Kjo do të jetë një akuzë e rëndë për të gjithë ju, qeveritarët, por edhe për të gjithë ne, nëse nuk luftojmë për të shpëtuar këto thesare të natyrës sonë”,-thuhet në kërkesën e firmosur nga kryetarët e tre shoqatave, dërguar ministrit Ruka dhe Fino.



03/09/2004
Kronikë nga Tirana
shekulli

[ALBA]

Pak fjalë për liqenin e Ohrit


Shekulli

TIRANË- Liqeni i Ohrit është formuar rreth 2-3 milionë vjet më parë. Në një liqen kaq të vjetër sa ky, u zhvillua një koleksion krej i veçantë bimësh dhe kafshësh. Disa prej këtyre specieve kanë qënë të zakonshme mijëra vjet më parë, por praktikisht janë zhdukur në vendet e tjera të botës. Speciet që rriten në liqenin e Ohrit quhen prej shkencëtarëve të huaj fosile të gjalla, pasi në vende të tjera gjenden vetëm në formën e fosileve. Në liqenin e Ohrit gjallojnë specie që nuk gjendet në asnjë cep tjetër të globit. Ndër këto specie përmendim koranin, belushkën, kërminj, krimba dhe bimë uji. Rreth 70% e specieve që rriten në këtë liqen janë unike në botë. Pikërisht për këto vlera, liqeni i Ohrit ku bëjnë pjesë dhe Burimet e Drilonit, është përfshirë në listën ndërkombëtare të trashëgimisë natyrore dhe mbrohet nga UNESKO. Liqeni i Ohrit është shpallur monument kulture nga shteti shqiptar, dhe si i tillë duhet të jetë i pacënueshëm për vetë vlerat që ka.

[ALBA]

Koordinatori i Projektit të Ruajtjes së Liqenit të Ohrit, Lirim Selfo, flet për shitjen e Drilonit

Selfo: Shitja e Drilonit rrezikon shkatërrimin


A.Bogdani

TIRANË- Për ruajtjen e liqenit të Ohrit dhe vlerave të tij të papërsëritshme ka financuar Banka Botërore dhe shteti shqiptar. Koordinatori i Projektit të Ruajtjes së Liqenit të Ohrit, Lirim Selfo, thotë për “Shekullin” se ky liqen është përfshirë në projektin e Bankës Botërore që prej vitit 1996. Projekti i ka fillimet e veta me nënshkrimin e Memorandumit të Bashkëpunimit mes qeverisë sonë dhe asaj të Maqedonisë, për të harmonizuar masat që do të merren për mbrojtjen e liqenit. Qeveria Shqiptare përfaqësohej në këtë projekt nga Ministria e Mjedisit. Projekti i mësipërm lindi si domosdoshmëri në kushtet e ndotjes së liqenit, nga veprimtaria ekonomiko-sociale e njerëzve. Përveç mbrojtjes së liqenit të rrallë, projekti, sipas koordinatorit Selfo, ka afruar dy shtetet për një bashkëpunim të ngrohtë dhe frutdhënës. “Ne jemi munduar të sensibilizojmë komunitetin shqiptar dhe maqedonas për vlerat e papërsëritshme të liqenit të Ohrit, por edhe ka afruar këto dy komunitete të bashkëpunojnë me njëri-tjetrin. Sensibilizimi për vlerat e liqenit ka qenë faza e parë e projektit të financuar nga Banka Botërore, ndërkohë që i është kushtuar një rëndësi e veçantë legjislacionit për mbrojtjen e tij”. Sipas kordinatorit të projektit, shitja e një pjese të Drilonit rrezikon vlerat e liqenit dhe pasuritë e tij. “Ne kishim planifikuar që në njerën prej vilave në Drilon të krijonim një ekspozitë, ku të paraqiteshin të gjitha vlerat e rralla të liqenit, vlera këto që në botë janë në zhdukje. Por shitja e një pjese të Drilonit, që me vendim të Këshillit të Ministrave është shpallur monument natyror, do të sjellë shkatërrimin e kësaj pasurie, që u takon të gjithë shqiptarëve”,-thotë Selfo për “Shekullin”.
Ligji nr.8906, datë 6.6.2002

Monument natyror

1- Formacioni natyror ( përfshirë edhe drurë të veçantë) me sipërfaqe deri 50 ha, formacioni i veçantë gjeologjik dhe gjeomorfologjik, një depozitë mineralesh apo një habitat i një lloji të rrallë e të kërcënuar, ose me rëndësi të veçantë shkencore e estetike, shpallet monument natyror.
2- Në një monument natyror zbatohet shkalla e parë e mbrojtjes
3- Në pajtim me shkallën e mbrojtjes së zonës, ministri i Mjedisit, në bashkëpunim me ministrin e Rregullimit të Territorit të Turizmit dhe atë të Pushtetit Vendor, miratojnë rregulla të veçanta për kalim vizitorësh, për afate të shkurtra kohore


Qëllimi i ligjit për zonat e mbrojtura

1-Qëllimi i këtij ligji është të sigurojë mbrojtje të veçantë të përbërësve të rëndësishëm të rezervave natyrore, të biodiversitetit dhe të natyrës në tërësi, nëpërmjet krijimit të zonave të mbrojtura.
2-Zonat e mbrojtura krijohen për të siguruar ruajtjen dhe ripërtëritjen e habitatëve natyrorë, të llojeve, të rezervave dhe të peizazheve natyrore
3-Ky ligj rregullon mbrojtjen e 6 kategorive të zonave të mbrojtura, që zbatohen në territorin e Republikës së Shqipërisë. Kategorizimi i zonave, statusi dhe niveli i mbrojtjes mbështetet në kriteret e Qendrës Botërore të Ruajtjes së Natyrës.



03/09/2004

[ALBA]

“Akti i turpshëm i shitjes së Drilonit, është shkelje e ligjit “për zonat e mbrojtura”, ku bëjnë pjesë monumentet e natyrës”

Ja pse nuk duhet të shitet Driloni


Prof.Dr.Perikli Qiriazi

U befasova kur mora vesh se është vënë në shitje monumenti i natyrës i Burimeve të Drilonit. I habitur, pyes si ka mundësi të vihet dorë mbi thesaret e natyrës, mbi tempujt e saj? Burimet e Drilonit janë ndër monumente e rrallë të natyrës me vlera të papërsëritshme shkencore, ekologjike, kulturore, estetike, didaktike dhe turistike.
Burimet e Drilonit, së bashku me burimet e tjera që dalin në Tushemisht, Shën Naum dhe në taban të liqenit të Ohrit, përbëjnë një dukuri interesante gjeografike dhe gjeologjike. Ujët e tyre ( mesatarisht 15 m3/sek) vjen nga liqeni i Prespës e Madhe dhe nga kreshta karstike e malit të Thatë. Ato përbëjnë furnizuesin kryesor me ujë sipërfaqësor të liqenit të Ohrit. Atje ku ato dalin, krijojnë një ekosistem të veçantë, që dallohet jo vetëm për bukuri mahnitëse natyrore, por edhe për biodivesitet të jashtëzakonshëm: mori gjallesash bimore dhe shtazore me rëndësi të jashtëzakonshme ekologjike dhe shkencore. Në këto ujëra kalojnë një pjesë të ciklit të tyre jetësor jo pak gjallesa të liqenit të Ohrit, shumë prej tyre vijnë këtu për t’u shumëzuar. Prandaj ato me të drejtë konsiderohen si pjesë e pandarë e këtij liqeni, i cili me të drejtë është konsideruar si “muze i fosileve të gjalla”, pra i gjallesave të veçanta që jetojnë vetëm këtu, ndërsa gjetkë kanë miliona vjet që janë zhdukur. Për këto vlera dhe për shumë e shumë të tjera ky liqen, qysh në vitin 1985 është përfshirë në Listën e Trashëgimisë Natyrore Botërore dhe është marë në mbrojtje nga Konventa Ndërkombëtare e kësaj trashëgimie të drejtuar nga UNESCO-ja.
Shitja e Burimeve të Drilonit, njëherazi është edhe shitje e një pjese e këtij liqeni, e këtij thesari të trashëgimisë natyrore botërore, duke shkelur kështu me të dyja këmbët konventën ndërkombëtare dhe detyrimet që ne kemi si shtet pjesëtar i kësaj konvente.
Do të theksonim gjithashtu se Burimet e Drilonit, qysh në dhjetor të vitit 2002, kanë marë edhe statusin e monumentit të natyrës. Akti i turpshëm i shitjes së Burimeve të Drilonit njëherazi është edhe shkelje e ligjit tonë Nr. 8906, date 06.06.2002 “Per zonat e mbrojtura”, ku bëjnë pjesë edhe monumentet e natyrës, të cilët, sipas këtij ligji, janë të pacënueshëm. Por për fat të keq, duke e shitur këtë monument, mbi të me siguri do të ngrihen godina të mëdha shumëkatshe me xham dhe beton, të cilat së bashku me njerëzit e shumtë që do të lëvizin e punojnë në to, do të shkatërrojnë ekosistemin interesant natyror; do të dëmtojnë edhe vlerat e Liqenit të Ohrit.
Përse nuk merret përvoja maqedonase në burimet homologe të Shën Naumit, ku nuk është shitur dhe as do të shitet asnjë centimetër tokë e këtyre burimeve, por përkundrazi ruhen me fanatizmëm vlerat e tyre dhe në të njëjtën kohë shfrytëzohen për qëllime studimore, ekologjike dhe turistike?
Burimet e Drilonit mund të kthehen në një qendër ekologjike e shkencore, i cila të marë përsipër ruajtjen e këtyre vlerave dhe edukimin ekologjik dhe estetik të njerëzve Njëherazi ato do të shërbejnë edhe si një laborator i madh natyror, në të cilin mund të kryhen studime me vlera të veçanta, ndërsa nxënësit dhe studentët, gjithë dashamirësit e natyrës do të njihen me dukuri dhe ligjësi të shumta natyrore. Njëherazi kjo qendër do të ketë edhe vlera rekreative e turistike. Prandaj sa nuk është ende vonë, ju bëj thirje të gjitha instancave shtetërore që ta ndërpresin procedurën e shitjes së turpshme të këtij tempulli të natyrës.



03/09/2004

[Nickmaster]

Te me falni te nderuar bashkeatdhetare une do ta trajtoja ne nje menyre tjeter shkrimen ku secili, sipas mendimit te tij ne kete forum jep opinionin e tij sic e medon e gjykon. Ne radhe te pare (Nano + Moisiu) jane Greker te mirefillte dhe sbesoj qe asnjeri nga ne qe jemi ne chat ta kundershtoje nje mendim te till duke ju referuar disa fakteve, psh, largoj nga puna Kryetarin e Shish, donte te vendoste jo paqellim Irakli Kocollari (safi Shqiptar!!!!), Moisiu dekoron Nanon!!!!!!?????? Ne te gjitha postet ku qarkullon monedha vendose si Dhimitraq, Sotir, Sofokli, ata kuptohet jane te betuar shqiptar dhe del e thote ne Itali se Shqiperia nuk perbehet me me shumice Muslimane!!!!???? a thua politikanet Italiane e hengren kete se ata ne fakt kane maredhenie te mira me Greqine (Nanon). Shikoni me kujdes se kujt i kerkon te beje aleance, Vangjel Dules, Genc Pollos, e te tjere si kete, se pse ne partine e tij dihet te gjthe ne 97' shkuan ne Greqi bile kane dosje dhe pseudonime si Jorgo Ruci, me falni se harrova dhe politikanin e madh Stefan Cipen, cfatkeqesi qe Shqiperia sundohet nga plehrat!!!!!!!!! Plaku matuf e mer karriken per te regulluar situaten politike, dhe ne fakt regullon familjen e tij sepse eshte i ndergjegjshem se si ka vajtur dhe sa force ka dhe keshtu me mire thot te regulloj te afermit e mi dhe jam ne regull. Nuk e di kur do jete ajo dite qe Shqiperia te kete ne krye shqiptar bir shqiptari te beje vertet per kete vend dhe ne te kemi autoritetin e duhur kudo ne bote. Ti kerkoje me force Greqise per diskriminimin e madh qe u behet Shqiptareve aty dhe kudo tjeter. Se mos na del ndonje ne shkrim e na qan per Thanas Shtrengo Rripin Nano se ka nga ata qe ne shkrim u dukem sikur jam me Saliun sepse dhe aji ka meselete e tija ne kete gatim, qe nga Janullatosi e deri tek Plehu per hardhi Gejxh. Jam shqiptar bir shqiptari si ju dhe disa te tjere por qe vertet qe pak jemi por ne force behemi shume, jam nga ata qe njof shume mire Idajet Beqirin, Gafur Adilin, te cilet koha e Nanos dhe Moisiut donin ti denonin (Adem Jasharin Legjendariheroin e popullit shqiptar qe u vra pabesisht nga shqiptare te shitur). Shqiperia duhet te kete vendin e saj ne bote, histori pavaresisht se jemi vend i vogel, dhe historikisht kane luajtur, por gjithmone ka nxjerre trima. Lexoni dhe analizoni me gjakftotesi te gjitha letrat qe dergon Gery Kokalary, ose shqiptar te tjere, dhe pastaj behet analiza per Drilonin, Kakomen, Bishtin e Palles, apo ndonje problem tjeter. Analizat se cberi Nano apo Moisiu jane te kota dhe per mendimin tim jane te teperta ne diskutim, ata duhet te japin llogari fije per pe, per gjitha bizneset favorizuese te tyre, ose greke, nuk jane rastesi ose ardhja e Gruas te tij nuk eshte ndonje koincidence e radhes per kete e di fare mire ish Shish, por cedo qe tani skemi Shish dhe ne meremi me chat. Gjithe kete shkrim qe bera te dashur bashkeatdhetare e bera se dhe une bashkohem me ju per te njentin shqetesim por mendoj se tregova ne shkrim opinionin tim, dhe nuk dua qe te ndahet problemi i shkrimit si partiak por si shqetesim i nje shqiptari emigrant ku me dhimset gjithcka per vendin time se si te gjithe ju dhe une kam njerezit e mi aty. Duhet te kuptojme nuk eshte Driloni problem, se mbas atyre fshihen te tjere Drilonas (politikane te ndyre te korruptuar te pashpirt), qe cdo gje e duan per vete se po vjen koha qe disa do te qerohen dhe thone te marrim cte marrim por ketu te tregohemi te forte e te zote ne qofte se Enverin e hoqem zvare ne bust ky duhet te terhiqet zvare persegjalli te jape llogari per te gjitha parate ku i ka dhe sa ka, ti konfiskohet gjithcka, nuk shikon dhe gruan e pare e vuri zevendes ambasadore ne France dhe te dyten Zonje e Pare, dhe brenda gjysmen e vitit e ka kavalishence ne gjithe Globin, me thoni te dashur vellezer bashkeatdhetare, cili eshte ai president ose kryeminister i ndonje shteti qe ka levizur kaq shume ne bote. Kaq politike te madh qe nuk dime ne shqiptaret luajne politikanet tane, siduket ne jemi shtet me i madh dhe se Kina, per kuriozitet vitin qe kaloi Kryeministri Kinez kishte bere pese vizita, eshte cudi? ne cdo ftese te gatshem politikanet tane dhe kuptohet paraja paguhet nga takspaguesit shqiptare. Edhenjehere te me falni qe ndoshta u zgjata por e ndieja to sqaroja disa gjera jo se si dinit por mos te shqetesoheni per ato qe ndodhin kur ka probleme shume te medha para tyre.

[jonidapasho]

Kete lajm e mesova vetem para 5 javesh ndersa po pija kafe ne nje lokal ne Tushemisht ne POgradec. Villa ART (inicialet e emrave te pronareve te saj) ishte blere nga pronaret e saj te viteve te fundit (te cilet jane funksionare te shtetit dhe nuk kane lidhje me hoteleri) ne nje cmim qesharak per vleren e vertete te saj. Ata kane ne pronen e tyre picarine me te njohur te qytetit Pica ART. Kur me thane se kush ishin keta persona (shoke te ngushte midis tyre , nuk ka dyshim) u habita disi pasi u perpoqa te gjej nje pik lidhje midis deges se hotelerise dhe ministrise se rendit ne te cilen njeri prej tyre eshte nepunes i larte.
E vetmja lidhje qe mund te mendoj deri sot e kesaj dite jane lehtesirat qe ka nje punonjes i larte i rendit per te shtene ne dore mes korruptimit cdo lloj monumenti natyror driloni apo syri i kalter qofte.
Dhe ndersa keto ndodhin ne Shqiperine tone , Vetem 10 minuta larg Pogradecit Ohri ne anen e Maqedonise eshte mahnites ashtu si dhe parku natyror i tyre ne Shen Naum...... nje perle e vertete e mbajtur me kujdes gjithe keto vite dhe ku numri i vizitoreve te huaj rritet cdo vit e me shume.

[ALBA]

Privatizimi i Drilonit dhe “shtetëzimi” i Kakomesë


FETI ZENELI

Publikimi këto ditë i skandalit të ri qeveritar për privatizimin e 1750 m2 truall së bashku me objektet përkatëse në zemër të Drilonit ka zgjuar reagimin e natyrshëm të mbrojtësve të ligjit, të cilët jemi mësuar t’i shohim të rreshtuar, gjithnjë e më shumë, në krahun e qytetarëve, dhe kundërreagimin e shkelësve të ligjit, që vazhdimisht qëndrojnë në strukturat e ndryshme drejtuese të shtetit. Janë kryetarët e tre shoqatave joqeveritare të lidhura funksionalisht me mbrojtjen e monumenteve natyrore, ku përfshihet prej kaq vitesh edhe zona e Burimeve të Drilonit, të cilët kanë kundërshtuar procedurat e privatizimit të këtij objekti, por janë kujtuar shumë vonë për një reagim të tillë. Procedurat e privatizimit të Drilon 1 kanë filluar qysh më 18 dhjetor 2003, sipas shkresës Nr. 8553 të Ministrisë së Ekonomisë dhe Privatizimit. Një shkresë e tillë ka vënë në lëvizje Ministrinë e Rregullimit të Territorit dhe Turizmit, e cila për 5 muaj rresht ka bërë vlerësimin e pronës në masën 2,6 milionë lekë. Më pas dosja ka ndjekur rrugën e njohur të kalimit nga një zyrë qeveritare në tjetrën, si të ishte një pronë e zakonshme, pa u konsultuar, sipas rregullit me institucionet, të cilat administrojnë zonat me status të veçantë ambiental, kulturor, historiko-shkencor, gjografiko-natyrore e të tjera thesare të pasurisë sonë kombëtare, sikundër është dhe Driloni i Pogradecit. Zona për të cilën bëhet fjalë, së bashku me shumë pasuri të tjera natyrore rreth e qark, prej më shumë se njëzet vitesh figuron në Listën e Trashëgimisë Natyrore Botërore dhe është marrë në mbrojtje nga Konventa Ndërkombëtare e kësaj trashëgimie të drejtuar nga UNESCO. Duke ditur se marrja e siglave të tilla mund ta vështirësonte apo dhe mund të zhvleftësonte procedurën e privatizimit të këtij monumenti natyror, atëherë u kalua direkt në ankandin përkatës dhe më 7 korrik të këtij viti u realizua shitja e objektit Drilon 1 së bashku me sipërfaqen e parcelave dhe atë funksionale përreth tyre në vlerën 8,5 milionë lekë.
Këndvështrimi i dosjes së privatizimit të Drilon 1 me syrin e shitjes së një prone të zakonshme publike nuk evidenton ndonjë shkleje të rëndë ligjore, përveç vlerësimit qesharak dhe shpërfilljes së satusit të veçantë të pronës prej Ministrisë së Turizmit apo indiferencës së Ministrisë së Mjedisit dhe ndonjë institucioni tjetër qeveritar pas shpalljes së ankandit në media. Por Drilon 1 nuk është një pronë e zakonshme publike, sikundër janë, fjala vjen, magazinat apo objekte të tjera të ish-kooperativave bujqësore. Këshilli i Ministrave, prej nga varen edhe ministritë apo institucionet e tjera të përfshira në procedurat e privatizimit të Drilon 1, i ka dhënë statusin “monument natyror” zonës ku ndodhet objekti në fjalë. Vlerat e shumta shkencore, ekologjike, didaktike, turistike, etj., kanë bërë që monumenti ynë natyror në brigjet e Liqenit të Ohrit të renditet në Listën Ndërkombëtare të Trashëgimisë Botërore Natyrore. Janë pikërisht shkelja e statusit kombëtar dhe shkelja e statusit ndërkombëtar, ato që përbëjnë shkeljet më të mëdha ligjore në këtë rast. Sipas këtyre akteve administrativo-ligjore nuk lejohet shitje qoftë edhe e një metri katror tokë në këtë zonë të mbrojtur në shkallën më të lartë legale, por jo atë të praktikës qeveritare, pavarësisht angazhimeve verbale të passkandalit lidhur me vënien nën kontroll shtetëror të investimeve private në objektin e sapoprivatizuar.
E vetmja barrikadë e pakapërcyeshme për revanshin e shfrenuar të pushtetarëve tanë në keqadministrimin e pronës publike, mund të kishte qenë në këtë rast statusi ndërkombëtar i mbrojtjes së këtij objekti, por faktet tregojnë gjithnjë e më shumë se qeveritarët shqiptarë kanë filluar t’ia bëjnë tetëshin, jo vetëm legjislacionit vendas por edhe atij të huaj. Nga ana tjetër, mosreagimi i faktorit ndërkombëtar, ndonjëherë, shkon deri atje saqë tek një pjesë e mirë e qytetarëve shqiptarë është konsoliduar opinioni se, të majtët në pushtet janë të përkëdhelurit e misionarëve të huaj. Dhe një opinion i tillë nuk është dhe aq i paargumentuar. Reagimi i ashpër i BE-së apo SHBA-së ndaj ngjarjes së Lazartit më shumë sesa vendosjen e drejtësisë synon vendosjen në vend të dinjitetit fals të një shteti të përkëdhelur padrejtësisht prej tyre. Çështja e Lazaratit është një problem mjaft i rëndomtë administrativ që nuk meriton kaq shumë përkushtim ndërkombëtar.
Shqipëria ndodhet tashmë në vitin e dytë të hapjes së negociatave me BE-në dhe reagimi i duhur i misionarëve të huaj që monitorojnë ecurinë e proceseve demokratike në vendin tonë, mund të ishte i ashpër në rastet e shfaqjes së veprimeve korruptive apo abuzimeve të tjera me ligjin në dëm të reformave integruese dhe interesave tona kombëtare. Fjala vjen, duhej të ishte ngritur zëri në kupë të qiellit sapo u publikua projektmarrëveshja e qeverisë shqiptare me firmën italiane “Albaniabeg” për importin dhe përpunimin e plehrave në Shqipëri. Siç dihet edhe për këtë rast ekzistojnë konventa e ligje të aprovuara nga zyrat e Brukselit e institucione të tjera ndërkombëtare, të cilat ndalojnë importin e plehrave nga vendet e zhvilluara drejt vendeve të prapambetura. Sipas këtyre akteve vendet e vegjël, të varfër dhe me teknologji të pazhvilluar, nuk duhet të firmosin kontrata me karakter ambiental, sikundër është edhe marrëveshja e qeverisë shqiptare me firmën italiane për importin dhe përpunimin e plehrave, pa asistencën e instituteteve të specializuara evropiane me qendër në Angli. Por kjo marrëveshje po shkon drejt konkretizimit dhe askush nga të mëdhenjtë e Evropës dhe të Amerikës nuk e ka kundërshtuar një masakër të tillë ambientale me pasoja mjaft të rënda për ekonominë dhe demokracinë shqiptare. Në këto kushte tingëllojnë paksa absurde deklaratat e personaliteteve dhe institucioneve të ndryshme ndërkombëtare për ta mbështetur Shqipërinë në kurorëzimin me sukses dhe në një afat sa më të shkurtër të procesit të integrimit. Mesa duket deklarata të tilla janë më shumë elozhe politike për pushtetarët tanë sa herë që promovohen iniciativa investimesh të huaja, për t’u krijuar këtyre investitorëve jo shumë potencialë mundësi përfitimesh të padrejta nga prona publike dhe pasuritë tona kombëtare.
Por preh e makinacioneve propagandistike apo tekniko-ligjore të qeveritarëve shqiptarë në veprimtarinë e tyre të shthurur administative bien ndonjëherë edhe firma të huaja me reputacion ndërkombëtar siç është rasti i “Club Med”, një ndër kompanitë më të famshme turistike në botë, reputacioni i të cilës u shfrytëzua prej KRRTRSH-së së Republikës për të marrë një vendim jo shumë të ligjshëm për ndërtimin e një fshati turistik në Kakome të Sarandës. Prezantimi para publikut dhe zyrtarëve vendimmarrës i “Club Med” si firmë investitore, kur në fakt ajo mund të jetë vetëm një menaxhuese e aktivitetit turistik, pas ndërtimit të objektit, u bë për të ulur disi tonet kundërshtuese të banorëve të Nivicës, të cilëve për këtë qëllim po u “shtetëzohen” 70 ha truall nga prona e tyre private e trashëguar në breza. Sipas një gojëdhëne, që para një shekulli, banorët e fshatit me 126 shtëpi përplasen ne autoritetet vendore të Perandorisë Osmane dhe arritën të blejnë me anë të një kontrate të rregullt kullotat e ndodhura në luginën dhe pyllin përreth gjirit të Kakomesë me një sipërfaqe të përgjithshme prej 4300 ha. Por në vitin ‘94 gojëdhëna u kthye në realitet, kur përfaqësues të fshatit gjetën në arkivën qendrore të shtetit Fermanin që i shpallte këta banorë pronarë të kullotave të mësipërme. Përballë dokumentesh të tillë historikë të vërtetimit të pronës private në mijëra hektarë, rezulton i sajuar çdo dokument tjetër zyrtar i viteve të mëvonshme për t’i ofruar si pronë shtetërore 70 ha. Fshatarët e kësaj zonë po bëjnë rezistencën e duhur përballë këtij shtetëzimi të paskrupullt të pronës private, por duke patur parasysh rrjedhën e marrjes së një vendimi të tillë, një notë proteste pritej të bëhej pranë qeverisë shqiptare edhe nga “Club Med”, për t’u treguar zyrtarëve tanë që të mos abuzojnë me autoritetin e firmave të tilla të huaja siç abuzojnë me ligjin dhe autoritetin e qytetarëve të tyre.
Shkaku kryesor i abuzimit maramendës me pasuritë tona kombëtare është se, maxhoranca qeveritare vetë shkruan dhe vetë vulos për tetë vite rresht me një pushtet absolut, dhe nuk ka kush t’ia ndalë dorën e krimit, pasi ka përballë një opozitë qaramane, të një prokurori apatike dhe një kontroll shtetëror ngordhalaq. Bile në vitet e mëparshme, edhe publikimi i skandaleve të ndodhura ka qenë i kufizuar, jo më kontrolli, parandalimi apo hetimi i tyre me drejtësi e profesionalizëm. Gjatë muajve të këtij viti qeveritarëve tanë të korruptuar u ka hasur, disi, sharra në gozhdë sepse është vënë në pozita disa më shëndosha reflektimi shoqëria civile, duke reaguar me mjetet e saj përballë shkeljes së ligjit dhe abuzimeve të tjera me liritë dhe të drejtat themelore të njeriut nga ana e qeveritarëve dhe pushtetarëve të majtë.
Në këto kushte duket se opozita e vetme, prokuroria e vetme, kontrolli shtetëror i vetëm në Shqipëri kanë mbetur aktualisht përfaqësuesit e shoqërisë civile. Me veprimet dhe qëndrimin e tyre të vazhdueshëm, gjatë këtij viti, ata po tregojnë se keqpërdorimi i institucioneve qeverisëse, qoftë ky dhe i dendur sikundër ndodh tek ne, nuk është fatalitet, por një çrregullim i përkohshëm administrativ. Shoqëria civile po dëshmon me protestat e saj se përballë institucionit të lëvizjes qytetare, institucionet qeveritare nuk duhet ta kenë aq të lehtë veprimin e pakontrolluar. Por në këtë rast duhet ta thonë fjalën e vet edhe institucionet e mbrojtjes së veprimtarisë së lirë private, si shoqatat e biznesit apo zyrat e konkurrencës dhe zyrat antimonopol, nëse ato nuk funksionojnë si ingranazhe të sistemit keqqeverisës.




05/09/2004