AMBO - 2005 fillon realizimi

[dodoni]

Presidenti i AMBO: Në 2008 nis funksionimi i pjesshëm i naftësjellësit


A.Rama

TIRANË - Presidenti i kompanisë “AMBO”, Ted Ferguson konfirmoi dje se “viti 2005 do të shënojë hapa konkretë për fillimin e zbatimit të projektit që parashikon shtrirjen e naftësjellësit me rëndësi rajonale Burgas-Vlorë. Gjatë një takimi të zhvilluar dje me kryeministrin Fatos Nano, Ferguson tha se “prej disa kohësh është punuar kryesisht për të siguruar financimin e projektit të naftësjellësit AMBO”. “Është bërë një progres i madh, si me kompanitë e naftës, ashtu edhe me investitorët, për projektin e naftësjellësit, falë mbështetjes që kemi patur edhe nga qeveria juaj, dhe ne besojmë të ndërmarrim hapa konkretë në fillimin e punimeve inxhinierike, në fillim të vitit të ardhshëm”, - tha Freguson. Sipas tij, “aktualisht është siguruar financimi i të gjitha marrëveshjeve që do të kompletohen deri në fund të vitit, proces që do të mundësojë progresin e projektit, me qëllim që funksionimi i pjesshëm i naftësjellësit të bëhet në vitin 2008”, - vijoi më tej kreu i AMBO-s. Kryeministri Nano dhe z.Ferguson, diskutuan më tej mbi përgatitjet për nënshkrimin e Memorandumit trepalësh mes Kryeministrave të tre vendeve pjesëmarrëse në këtë projekt, Shqipëri-Maqedoni-Bullgari. Nano u takua dje edhe me Drejtorin e Përgjithshëm të kompanisë “Ascott ONYX”, z.Warren R.Phillips.
Përfaqësuesit e këtyre dy kompanive prestigjioze, diskutuan me kryeministrin mbi mbështetjen nga qeveria për përgatitjen e marrëveshjes së shitjes së energjisë, e cila do të mundësojë edhe financimin e projektit për një TEC të ri në Parkun Energjetik të Vlorës, me një kapacitet prej 400 Megawat, i propozuar për t’u ndërtuar nga kompania “Ascott ONYX”. Sipas zotit Warren R. Phillips, “në fazën e parë, ky termocentral do të funksionojë me një kapacitet prej 200 megawat, duke mundësuar burime të energjisë, jo vetëm për Shqipërinë, por edhe më gjerë në rajon.



01/09/2004
KATEGORIA: Politikë