Donianna

[dodoni]

Ndërmarrjet

Jeton Demi - 03/09/2004

“Donianna”: “N.q.s hiqet TVSH-ja për lëndën e parë, 10-fishohet prodhimi”

Administratorja e fabrikës së prodhimit të këpucëve “Donianna”, Donika Mici, është shprehur se heqja e Tatimit mbi Vlerën e Shtuar (TVSH) për lëndën e parë do të krijonte mundësi për 10-fishim të prodhimit si dhe kalimin nga firmë prodhimi nënkontraktuese në prodhuese vendëse


Deri më tani të gjithë prodhuesit e këpucëve dhe konfeksioneve në vend prodhojnë si nënkontraktorë të firmave italiane duke prodhues me material të porositësit. Këtë kërkesë për heqjen TVSH-së si dhe mbështetjes me lehtësira të tjera nga qeveria për këtë sektor Mici e mbështet me argumentin se kjo industri – e prodhimit të këpucëve dhe konfeksioneve – zë peshën më të madhe të eksporteve që realizon vendi ynë si dhe numrin më të madh të të punësuarve. “Heqja e TVSH-së për lëndën e parë, ulja e pagesës së sigurimeve shoqërore mbi një nivel të caktuar punonjësish si dhe mbështetje të tjera fiskale do të bënin të mundur që ne si kompani të 10-fishonim prodhimin tonë. Në këtë mënyrë në do të mund të ktheheshim nga nënkontraktorë në pordhues vendës duke shtuar ndjeshëm edhe numrin e të punësuarve”, është shprehur për gazetën “Biznesi” Mici. Ajo mendon se ky është momenti më i rëndësishëm dhe vendimtar që qeveria të mbështesë nxitjen e eskporteve përmes mbështetjes së këtij sektori për t’u kthyer nga nënkontraktorë në prodhues direkt. “Kjo do të sillte një bum investimesh në këtë sektor që do të çonte në rritje të ndjeshme të numrit të të punësuarve dhe shtim të eksporteve”, vazhdon Mici.
Eksportet
Fabrika e prodhimit të këpucëve “Donianna” ka disa muaj që ka lidhur një marrëveshje për eksportim të këpucëve të para nën siglën “Made in Albania” për në Shtetet e Bashkuara të Amerikës. Mbas rreth 6 muaj eksport, Mici shprehet se është rritur numri i llojeve të këpucëve të eksportuara në këtë vend nga 2 në 9 sosh. Gjithashtu mësohet se është rritur edhe numri i kompanive importuese të këtyre këpucëve nga Shqipëria për në SHBA nga 1 në 4. Ndërsa niveli total i eksportit për në këtë vend mendohet të jetë rritur me rreth 20 për qind që nga fillimi i aktivitetit. “Ndërkohë që ne kemi rritur eksportet për në Amerikë, ne kemi patur një rënie të eksporteve për Bashkimin Europain. Kjo pasi mundësitë tona të prodhimit janë të kufizuara dhe jemi të detyruar që të heqim sasitë e eksportit nga një vend për t’i dërguar në një vend tjetër që ka më shumë përparësi. Në këtë rast ka patur më shumë përparësi prodhimi nën shenjën e “Made in Albania”. Megjithatë, niveli total i eksporteve tona për 6-mujorin e parë të këtij viti, në krahasim me të njejtën periudhë të një viti më parë është rritur me rreth 8 për qind”, shprehet më tej Mici.
Planet për të ardhmen
Ideja e hapjes së një supermarketi të veçantë për prodhimet e “Doniannas” në Tiranë ka kohë që është hedhur dhe së shpejti mendohet të vihet në jetë. Sipas Micit, “brenda këtij viti, ose deri në fillim të vitit 2005, ne besojmë se do të arrijmë të hapim një dyqan për prodhimet tona “Made in Albania”. Pritet që çmimet e prodhimeve të kësaj kompanie të jenë të lira në krahasim me çmimet e këpucëve në dyqane e modës. Kjo për shkak se edhe prodhimet e kësaj kompanie nuk janë marka mode, por prodhime masive supermarketesh. Bile, sa i përket këtij elementi, vetë Mici shton: “Ne nuk mendojmë të prodhojmë këpucë mode sepse vetë fabrika prodhuese ka mjedise dhe makineri për një prodhim masiv dhe jo për një prodhim mode shumë të ndryshueshëm në një kohë të shkurtër”.



Shteti duhet të heq TVSH-në për lëndën e parë sepse kështu ndihmon prodhimin vendas, rrit të ardhurat nga taksat tjera dhe krijon më shumë vende të reja pune.