Policia ushtron dhune ndaj 3 te dehurve ne Kruje

[Shpirt Njeriu]

Kundërshtimi ndaj një pronari për t'i liruar lokalin, pasi do ta mbyllte, u ka kushtuar shtrenjtë tre të rinjve nga qyteti i Krujës, të cilët ishin duke pirë. Familjarët e tyre pretendojnë se, ata janë masakruar nga grupi i gatshëm dhe deri dje në drekë kanë qëndruar në spital dhe më pas janë dërguar në qelitë e komisariatit. Familjarët e tre të rinjve, Shkëlzen Cengjilli 29 vjeç, Arjan Stafa 29 vjeç dhe Dritan Tafaruçi 27 vjeç kanë reaguar ashpër ndaj ndërhyrjes së uniformave blu, duke kërkuar që menjëherë të zbardhet e vërteta.

Sherri me policinë
Ka qenë ora 22.30 minuta e ditës së diel, kur Luan Ndreu, pronari i një lokali pranë stadiumit të Krujës, u ka kërkuar tre të rinjve të dehur, që ishin duke pirë në lokalin e tij, që të mbaronin pijet që kishin në gota dhe më pas të ngriheshin, pasi lokalin do ta mbyllte. Siç është bërë e ditur, ata nuk kanë pranuar, madje kanë kërkuar që pija t'u përsëritet. Në këtë moment, Ndreu ka lajmëruar policinë. Pas pak minutash, në lokal kanë hyrë uniformat blu, të cilat u kanë përsëritur të rinjve kërkesën e pronarit. Sipas policisë, Cengjilli, Stafa dhe Tafaruçi i kanë kundërshtuar me forcë uniformat blu. Madje, kanë goditur me grushta policin Ilir Lipo, ndërsa kanë dashur t'u bien me mjete të forta kolegëve të tij. Në këto kushte, sipas bluve, policët e komisariatit janë bërë të dhunshëm, duke përdorur forcën ndaj tre të rinjve. Ndërsa prindërit e tyre thonë se, fillimisht i kanë goditur në lokal, por "formaliteti" ka vazhduar më keq kur i kanë futur në furgon. "Në momentin që i kanë dërguar në komisariat, oficeri roje nuk i ka marrë në dorëzim, pasi gjendja e tyre ka qenë e rëndë. Të njëjtin veprim kanë bërë edhe bluzat e bardha të spitalit të Krujës. Kur e kanë parë veten ngushtë, uniformat blu i kanë sjellë tre të keqtrajtuarit në Spitalin Ushtarak të Tiranës, ku ata kanë marrë ndihmën e parë. Po natën, i kanë dërguar në Krujë, duke i futur në spital", ka thënë njëri nga të afërmit e të rrahurve, sipas të vilit, "pasi janë mjekuar deri në mesditën e djeshme, blutë i kanë marrë sërish të keqtrajtuarit, të cilët kishin fraktura në kokë, trup dhe këmbë, dhe i kanë dërguar në qelitë e komisariatit". Ata janë mbajtur gjatë gjithë kohës të ruajtur dhe larg çdo kontakti me gazetarë apo kamera. Madje, edhe mjekët nuk kanë pranuar të flasin. Në orët e mbrëmjes, kur situata ka qenë më e qetë, një mjek ka pohuar se ata kishin pësuar fraktura.

Reagimi
I menjëhershëm ka qenë edhe reagimi i familjarëve të tyre. Prindër, motra, vëllezër të të rrahurve kanë shkuar në spitalin e Krujës, por uniformat blu nuk i kanë lënë të takohen me ta. "Djali ka qenë duke pirë kafe me shokët e vet. Policia e ka torturuar dhe masakruar", ka thënë nëna e njërit prej viktimave të uniformave blu. Sipas pretendimit të saj, shteti duhet të marrë masa e t'i ndëshkojë policët, pasi ata edhe sot (dje) ishin në detyrë, ndërsa djali në spital. Një i afërm tjetër, i një tjetri prej të keqtrajtuarve, ka pohuar se policia i ka rrahur pa asnjë të drejtë ata, pasi po pinin në qejfin e tyre dhe nuk po bënin zhurmë dhe as që po i binin kujt në qafë. Të afërmit e të keqtrajtuarve kanë protestuar dje para spitalit të Krujës, ku ndodheshin dhjetëra forca policie, kundër dhunës së ushtruar mbi tre të rinjtë. Madje, familjarët as që janë lejuar të takohen me të rrahurit brenda ambienteve të spitalit. Kështu, qejfi i tre të rinjve për të pirë dhe mosbindja ndaj kërkesës së të zotit të lokalit për t'u ngritur u ka kushtuar atyre shtrenjtë. Jo vetëm janë masakruar, por edhe do të qëndrojnë në qelitë e vogla të komisariatit të Krujës, derisa gjykata të vendosë për fatin e tyre.

DHUNE

4 Janar 2003
Gjatë një tentative për ta arrestuar, policët e komisariatit të Korçës ka goditur për vdekje Gazmend Tahirllarin. Ai iu ka vdekur në duar, ndërsa edhe ekspertiza mjeko-ligjore e vërtetoi këtë. Për këtë vepër, policët e grupit të gatshëm u dënuan nga Gjykata.


23 Korrik 2003
Fatmir Avdolli nga Korça vdiq si pasojë e goditjeve pas koke nga uniformat blu. Këto të fundit në fillim deklaruan se ai vdiq pas një aksidenti me makinë. Por pas denoncimit të familjes u zbulua se ai është qëlluar në kokë nga një polic, fakt që u vërtetua.


2 Gusht 2004
Rrihet nga policët e grupit të gatshëm të Komisariatit të Policisë së Vlorës tregtari i karburanteve Gramoz Halla, 33 vjeç. Halla, është nën masën burg pa afat për kanosje të policëve. Kurse ai vetë ka denocuar blutë për ushtrim dhune e rrahje.



Kryepolici: Uniformat bënë detyrën Denoncim dhe ne Prokurori

Policia është gjendur përballë dhunës së tre të rinjve që ishin të dehur". Kështu ka pohuar dje për Gazetën Shqiptare shefi i komisariatit të Krujës, Sali Skura. Sipas tij, uniformave blu u ka kërkuar ndihmë pronari i një lokali pranë stadiumit të qytetit. "Sapo ato kanë shkuar aty, tre të rinjtë që po pinin janë ngritur për t'i rrahur. Madje, kanë qëlluar në drejtim të tyre me mjete të forta, si dhe njëri ka nxjerrë edhe thikën", ka thënë Skura. Ai ka bërë të ditur se uniformat që ai drejton kanë vepruar konform ligjeve dhe nuk e shkanë shkelur atë aspak. Më tej, kryepolici i Krujës, duke mos e mohuar dhunën e ushtruar nga vartësit e tij ndaj tre qytetarëve, ka thënë se pas mjekimit të marrë në spital, ata janë dërguar në komisariat, ku dhe u është komunikuar arrestimi. Nga ana tjetër, policët e grupit të gatshëm, të cilët kanë rrahur tre të rinjtë, janë treguar më të shkathët se familjarët e të dhunuarve (këta të fundit nuk kanë pasur mundësi të denoncojnë, pasi kanë qenë të izoluar). Ndërsa familjarët vetëm kanë protestuar, uniformat blu kanë bërë denoncim në prokurorinë e rrethit, për tre të rinj, duke pretenduar se "ata i kanë goditur, teksa po kryenin detyrën, duke i ardhur në ndihmë një qytetari që i kishte telefonuar".

[Shpirt Njeriu]

Policia: Te keqtrajtuarit e Krujes te mos na sulmonin
TIRANE - Drejtoria e pergjithshme e Policise se Shtetit deklaron se eshte e prirur te ndeshkoje te gjithe policet qe keqtrajtojne qytetaret por ne te njejten kohe thote se nuk toleron dhune ndaj uniformave blu. Zedhenesja Edlira Teferici e pasqyroi keshtu incidentin e dhunshem: "Ngjarja ndodhi me 27 gusht 2004 ne mbremje, kur ne lokalin e Ramadan Ndreu ne lagjen "Hoxhe" te Krujes, disa te dehur po debatonin me tone te larta jo vetem me pronarin e lokalit, por dhe me disa banore te tjere, duke sjelle shume shqetesim edhe te te tjeret. Ne lokal erdhi grupi i gatshem, por te dehurit, te acaruar, po kercenonin vellain e pronarit te lokalit, te cilin me pas e goditen pse kishte njoftuar policine. Policet e grupit te gatshem urdheruan personat e dehur te nderpresin veprimet dhe per te hipur ne furgonin e policise, me qellim shoqerimin ne Komisariatin e Policise se Krujes. Por shtetasit e acaruar jo vetem qe nuk i jane bindur ketij urdheri, por kane reaguar me fjale te ashpra ndaj punonjesve te policise dhe me tej duke vepruar ne menyre aktive ndaj tyre, te pajisur me thike dhe nje tub hekuri te cilin e shkulen nga rrethimi i lokalit, shtyne punonjesit e policise. Meqe punonjesit e policise ishin ne nje numer me te vogel nga personat e dehur, pas nje perleshje rreth gjysem ore kane arritur te prangosin e te shoqerojne ne komisariat Dritan Tarafuci, Shkelzen Pengili dhe Arian Stafa. Gjate kohes ne te cilen eshte zhvilluar kjo ngjarje punonjesit e policise nuk kane patur mundesi te komunikojne me radio me sallen operative. Para se te izoloheshin ne policine e Krujes, te shoqeruarit u derguan ne spital per mjekim. Pas vizites mjeku roje ka konkluduar se ata duhet te qendronin nen mbikqyrjen e tyre, edhe per disa ore. Vizites se mjekut i eshte nenshtruar dhe nje punonjes i policise, Ilir Llupo, i cili pas goditjeve qe kishte marre, kishte enjtje te dukshme ne fytyre. Pasi u njoftua, prokurori i sektorit vendosi arrestimin ne flagrance te tre shtetasve per kundershtim te punonjesve te policise". Zyrtaret e policise vune dje ne dukje se ky ishte nje i perseritur i dhunes se shtetasve ndaj uniformave blu. "Nga 1 janari deri ne 16 gusht te ketij viti, jane regjistruar 124 vepra penale te kundershtimit te punonjesve te policise, nga te cilat 122jane zbuluar. Ato jane kryer nga 147 autore, ndaj te cileve 16 jane ndaluar, 92 jane arrestuar, 27 jane ndjekur ne gjendje te lire, etj". Nisur nga keto te dhena, Policia e Shtetit thekson se "punonjesit tane jane te detyruar te zbatojne ligjin, por nga ana tjeter jane te paprekshem, sepse kane nje mision te shenjte dhe nje detyre te veshtire per te siguruar rendin dhe qetesine publike te qytetareve, per te garantuar zbatimin e ligjit dhe per te respektuar lirite dhe te drejtat e njeriut". nderkohe, familjaret e te arrestuarve vazhduan edhe dje akuzat ndaj policise. Nena e njerit prej tre djemve, thote se i biri "eshte goditur barbarisht si te ishte kriminel ordiner". Te afermit shtojne se dhuna vazhdoi edhe ne mjediset e policise se Krujes derisa u derguan ne spitalin Ushtarak te Tiranes, pasi u refuzuan sipas tyre, ne spitalin civil te qytetit. red.kro

[Shpirt Njeriu]

POLICIA ZBATOI VETEM LIGJIN

Çdo tentativë dhune apo ofendimi ndaj forcave të rendit do të ndiqet penalisht dhe dinjiteti i uniformave blu do të mbrohet dhe nuk do të cënohet në asnjë rast". Kështu ka thënë dje drejtori i Përgjithshëm i Policisë, Bajram Ibraj, një ditë pas denoncimit të disa familjarëve në Krujë, për dhunë të ushtruar nga uniformat blu ndaj djemve të tyre. Sipas Ibrajt, dhuna ndaj policisë nuk do të tolerohet, madje do të ndëshkohet në bazë të ligjit. Ndërkohë, pas ngjarjes së Krujës, ku arrestuan tre persona ka reaguar edhe Drejtori i Policisë së Qarkut të Durrësit, Muharrem Bardhoci. Sipas tij, efektivat e komisariatit të Krujës kanë zbatuar me përpikmëri ligjin. "Unë kam qenë vetë në Krujë dhe e kam ndjekur të gjithë situatën, si dhe proçedurën e dokumentimit të kësaj ngjarje", ka thënë Bardhoci. Sipas tij, të tre krutanët, Dritan Tarafuçi, Shkëlzen Pengili dhe Arian Stafa, tashmë janë të arrestuar në flagrancë. Siç është bërë e ditur, ata janë akuzuar për prishje të qetësisë publike dhe kundërshtim e goditje të policëve në shërbim. Më tej, drejtori i bluve të Durrësit ka bërë të ditur se, në dosjen hetimore që është hapur për hetimin e kësaj ngjarjeje, ndodhet edhe relacioni i mjekëve të spitalit Ushtarak të Tiranës, në të cilin thuhet se djemtë ishin thellësisht të dehur. Ndërsa sipas policisë, dy prej tyre ishin kontigjentë të policisë dhe përsa i përket përdorimit të pijeve alkoolike dhe si rrjedhojë edhe herë të tjera kanë prishur qetësinë publike. Bardhoci ka pohuar se, këtë ngjarje e kanë parë fare nga afër edhe katër qytetarë krutanë, të cilët kanë dëshmuar në hetuesi dhe dëshmia e tyre është e ngjashme me deponimin e policisë në organin e Prokurorisë.


Tre krutanët, pamja e hidhur e zbatimit të ligjit nga policia

Denoncimit të të afërmve të Dritan Tarafuçit, Shkëlzen Pengilit dhe Arian Stafës nga Kruja, se ata ishin keqtrajtuar barbarisht në policia, kjo e fundit iu përgjigj prerazi: Eshtë zbatuar ligji. Ashtu siç bën gjithmonë, policia filmoi tre të arrestuarit krutanë. Në pamje dukej qartë që, ata nuk ishin si të arrestuarit e tjerë për çfarëdo vepre penale, të cilët rrinë drejt, madje, në shumë raste edhe buzëqeshin, apo ngrenë njërën vetull. Pas murit të komisariatit të Krujës, mes dy policëve u shfaqën tre të rinjë. Më i forti dukej i mesit, dy të tjerët të këputur. Ata mezor qëndronin në këmbë dhe po të mos ishin duart e policëve, vështirë se do të rrinin pa rënë përtokë. Policia nuk pranoi se është ushtruar dhunë mbi ta. As nuk e mohoi një gjë të tillë. Sigurisht që dhuna ndaj uniformave blu është e patolerueshme. Por, pamje të tilla të shfaqura nga policia, i krijojnë kujtdo shijen e hidhur që të lë "zbatimi i ligjit" nga policët shqiptarë.