Drejtoresha ekzekutive e Kongresit Islamik Amerikan mban një fjalim në Konventën Republikane
Një irakiane falenderon Bushin për lirinë e Irakut
Shekulli
NJU JORK - Drejtoresha e lindur në Irak e një organizate private, e cila i përkushtohet promovimit të tolerancës fetare, doli në sesionin e hapjes së Konventës Kombëtare Republikane më 30 gusht për t'u thënë delegatëve që tani Iraku përballet me një të ardhme më të ndriçuar. Zainab Al-Suwaij, drejtoreshë ekzekutive e Kongresit Islamik Amerikan, tha që kishte ardhur në konventë për të thënë “që Iraku po gëzon një ditë të re. Po, ka ende gjakderdhje dhe pasiguri, por Amerika, nën udhëheqjen e fortë dhe dashamirëse të presidentit Bush, u ka dhënë irakianëve dhuratën më të çmuar që ndonjë vend i ka dhënë ndonjëherë një kombi tjetër, dhuratën e demokracisë dhe lirisë për të përcaktuar vetë të ardhmen”. 33-vjeçarja Al-Suwaij u lind në Basra dhe ishte pjesë e kryengritjes së dështuar të vitit 1991 kundër Sadam Huseinit. Ajo u arratis në Shtetet e Bashkuara pas Luftës së Gjirit dhe tani është drejtoreshë ekzekutive e Kongresit Islamik Amerikan, një organizatë e ngritur për të promovuar tolerancën fetare pas sulmeve terroriste të 11 shtatorit 2001. Ajo mori pjesë në ditën e hapjes së Konventës Kombëtare Republikane, e cila theksonte temën “Një Komb me Kurajo” dhe vinte në dukje përkushtimin e amerikanëve për t’u ballafaquar me sfidat e terrorizmit qysh nga 11 shtatori i vitit 2001. Folës të tjerë përveç Al-Suwaij ishin Rudolf Xhulianin, i cili ishte kryebashkiak i Nju Jorkut në kohën kur ndodhën sulmet terroriste; senatori Xhon MekKein nga Arizona, i cili ka qenë i burgosur lufte gjatë Luftës së Vietnamit; Bernard Kerik, ish -punonjës i komisariatit të policisë së qytetit të Nju Jorkut; Robert Khuzami, një ish-ndihmësprokuror në Nju Jork, i cili u mor me çështjen e terroristëve; si dhe të afërm të disa prej viktimave të 11 shtatorit.
“Kur unë erdha në Shtetet e Bashkuara të Amerikës 12 vjet më parë, nuk do ta kisha imagjinuar kurrë veten duke folur përpara një grupi të tillë. Duke jetuar nën sundimin e Sadam Huseinit, ne nuk mund të mblidheshim si tani për të diskutuar gjëra të tilla si demokracia dhe liria”, -tha Al-Suwaij, e shoqëruar nga brohoritjet dhe duartrokitjet e mijëra delegatëve të konventës.
“Ajo që mund të bënim ishte të ëndërronim për ditën kur do të mund të flisnim lirisht dhe të adhuronim Perëndinë në mënyrën që zgjidhnim vetë. Por, në fakt jetonim nën sundimin e një vrasësi që përdori çfarëdo arme që përfshihej në arsenalin e tij kundër nesh, nga tanket tek dhomat e torturës, tek gazi helmues”, -tha ajo. “Kur njerëzit flasin mbi luftën në Irak, unë dua t’u kujtoj që në Irak ka pasur një luftë që zhvillohej gjatë tre dhjetëvjeçarëve të fundit. Një luftë e kryer nga Sadami kundër popullit të tij. Unë e jetova vetë këtë. E pashë se si më brutalizoi miqtë dhe familjen”, -tha Al-Suwaij.
“Prandaj, ndërkohë që hidhërohem për amerikanët dhe irakianët e guximshëm që u vranë dhe u plagosën gjatë çlirimit të Irakut, u them me krenari që kauza e tyre fisnike nuk ishte kot”, -tha Al-Suwaij. “Tashmë farat e demokracisë po japin fryte dhe ndër këto janë zgjedhjet e fundit popullore të mbajtura për zyrtarë vendorë. Dhe e dimë që fëmijët tanë përballen me një të ardhme më të ndriçuar”, -tha ajo.
“Ndërkohë që irakianët marrin mbi vete sovranitetin e plotë, ata përqafojnë popullin amerikan me miqësi dhe mirënjohje. Unë ju premtoj që ne nuk do të harrojmë kurrë atë që bijtë dhe bijat tuaja bënë për ne”, -tha Al-Suwaij. Judy Aita (Anëtare e Stafit të Buletinit të Uashingtonit).
Përgjigju Duke Cituar
Krijoni Kontakt