Kompania Dukagjini

[dodoni]

Artiola Alimadhi - 26/08/2004

"Dukagjini" në fillim të shtatorit në treg

Futja e sistemit on-line, informatizimi i tij, ofrimi i produkteve në sigurimin e bujqësisë etj. do të jenë disa nga risitë që do të sjellë kjo kompani


Intervistë me Kol Puta, drejtori i përgjithshëm i kompanisë së parë kosovare “Dukagjini”, e cila do të hyjë në fillim të shtatorit në tregun shqiptar të sigurimeve



1- Cila është veprimtaria e kësaj kompanie?
Kompania e sigurimit “Dukagjini” është një shoqëri me aksioner themelues dy biznesmenë të fuqishëm kosovarë: vëllezërit Agim Lluka dhe Ekrem Lluka, ku udhëheqës i biznesit është Ekrem Lluka. Këta janë dy biznesmenë të fuqishëm kosovarë me një spektër biznesi shumë të gjërë. Biznesi i tyrë është i shtrirë në shumë fusha duke filluar që nga tregtia, import-eksporti, fushën e mediave, shtypshkronja, fushën e ndërtimit, të sigurimeve etj. Pra “Dukagjini” është një grup ekonomik i kompletuar dhe së fundi pritet të hyjë edhe në fushën e operatorëve celularë.
Hyrja e kësaj kompanie në tregun shqiptar të sigurimeve përbën hyrjen e parë të një kompanie kosovare në këtë treg.


2- Në cilën fazë ndodhet aktualisht kompania e sigurimit “Dukagjini” dhe kur do të hyni në tregun shqiptar të sigurimeve?
Kompania e sigurimit Dukagjini ka marrë autorizimin zyrtar nga rregullatori sigurues në Shqipëri që është Komisioni Mbikqyrës i Sigurimeve (KMS). Ne jemi në fazën e marrjes së liçencës përfundimtare. Aktualisht jemi në fazën e përfundimit të masave tekniko-organizative dhe në krijimin e strukturës së nevojshme për të dalë në treg. Tashmë kemi gjetur ambjentet e punës, selinë qëndrore në Tiranë si dhe në rrethet kryesore të Shqipërisë. Gjithashtu kemi rekrutuar personelin e fillimit të punës, kemi përfunduar kompletimin e produkteve apo policave të sigurimit (të cilat janë në fazën e shtypjes përfundimtare) etj.
Ne shpresojmë që nga fillimi i shtatorit të pajisemi me liçencë përfundimtare për të hyrë në treg. Nga ana jonë ne jemi bërë gati dhe shpresojmë që edhe KMS të na përgjigjet në kohë për dhënien e liçencës përfundimtare.


3-Cila do të jetë shtrirja e kompanisë Dukagjini në Shqipëri?
Shoqëria “Dukagjini” do të ketë selinë qëndrore në Tiranë dhe do të ketë shtrirje në shumicën e prefektuarave kryesore të vendit si për shembull në Shkodër, Durrrës, Lezhë, Elbasan, Korçë, Fier, gjirokastër, Vlorë etj.


4-Cila do të jetë strategjia që do të përdorë “Dukagjini” për hyrjen në tregun shqiptar të sigurimeve? Do të mbushni boshllëqet apo do të konkurroni shoqëritë egzistuese?
Konkurrencë në kuptimin pozitiv të kësaj fjale natyrisht që do të bëjmë. Strategjia jonë në vija të përgjithshme është që të bëjmë një rindarje të tregut të sigurimit të detyrueshëm si dhe të sjellim produkte të reja në sigurimet vullnetare. Në qoftë se tregu i sigurimit të detyrueshëm sot ndahet në 5 kompani, nesër ai do të ndahet në 8 kompani. Ne synojmë që të vendosim rregulla për sa i takon tregut të sigurimit të detyrueshëm. për këtë duhet të bisedojmë me operatorët egzistues me qëllim që të krijohet një treg ligjor, formal dhe zyrtar që të mos operohet siç është bërë deri më sot ku policat e sigurimit shiten nën kosto. Së pari shitja e policave të sigurimit nën kosto nuk justifikohet nga ligji shqiptar. Së dyti dëmtohen rëndë interesat e vetë klientëve. Kështu duke shitur me tarifa shumë të ulëta kompanitë e sigurimit nuk kanë afësi paguese në momentin kur ndodh rasti i sigurimit. Pra nesër, ato do të dalin zbuluar dhe kjo herët a vonë çon në falimentimin e shoqërisë së sigurimit. Shitja nën kosto nga ana tjetër nuk është e mirë edhe për vetë shtetin sepse humbet një pjesë të TVSH. Ne synojmë që të japim kontributin tonë që këto mosfunksionime të rregullohen me qëllim që ta bëjme këtë treg më ligjor se sa është sot. Kjo kuptohet në bashkëpunim me operatorët, KMS-në, Ministrinë e Financave etj.
Gjithashtu rregullimi i tregut të sigurimit të detyrueshëm do t’i “shpëtonte” shoqëritë e sigurimit nga harzhimi i energjive në drejtimin e gabuar, në punimin me dy dokumenta etj. Duke përmirësuar sigurimin e detyrueshëm energjia e specialistëve do të orientohet në drejtimin e duhur, atë të sigurimit vullnetar që është një fushë e paeksploruar. Mesa kam lexuar në raportet e KMS thuhet se vetëm rreth 25 për qind të tregut zihet nga sigurimi vullnetar. Ky është një tregues i prapambetjes së industrisë së sigurimeve në Shqipëri. Prandaj konkurrenca jonë do të jetë kryesisht në fushën e sigurimeve vullnetare.


5-Cilat janë risitë që do të sjellë kompania juaj në tregun shqiptar?
Deri tani kompanitë e sigurimit janë liçencuar edhe për sigurimin bujqësor por ato në fakt e kanë lënë pas dore këtë fushë. Kjo dhe për faktin se sigurimi bujqësor nuk është edhe aq rentabël sa sigurimi industrial. Ne e kemi kërkuar këtë klasë sigurimesh dhe shpresojmë që ta zbatojmë gjërësisht. Kjo nënkupton se t’i ofrojmë produktet tona edhe zonave rurale, fermerëve dhe kapitalistëve të rinj që kanë filluar iniciativën e tyre të lirë në sektorin e bujqësisë në Shqipëri.
Kompania jonë në Kosovë ka të automatizuar dhe të informatizuar gjithë sistemin e operimit. Asnjë policë nuk plotësohet me dorë por me kompjuter dhe nëpërmjet sistemit on-line sigurohet mirë funksionimi me të gjithë operatorët dhe autoritet e interesuara. Ne e kemi propozuar dhe do ta mbrojmë me forcë idenë e futjes së këtij sistemi edhe në tregun shqiptar. Natyrisht që alikimi i këtij sitemi nuk varet plotësisht nga ne, por kjo është një nga zgjidhjet që do të shmangë informalitetin në tregun e sigurimeve.


6-Mbi cilat baza gjykoni për suksesin tuaj?
Kompania e sigurimit “Dukagjini” në Kosovë zë më shumë se 20 përqind të tregut të sigurimeve dhe është kompania e parë në pagesën e dëmeve. Këtë e tregon edhe fakti se nuk ka asnjë proces gjyqësor ndërkohë që shoqëritë e tjera kanë shumë të tilla. Pikërisht te kjo e mbështesim edhe suksesin tonë në Shqipëri.
Hyrja e shoqërisë së parë kosovare në tregun shqiptar të sigurimeve përbën edhe finalizimin e një ëndrre për integrimin Kosovë-Shqipëri.



Intervistoi: Artiola Alimadhi