PS dhe PD, kompromis i vonuar për ndarjen elektorale zonale

[Albo]

Pas ndërhyrjes së ekspertëve të ODIHR-it, PS dhe PD gjejnë gjuhën e përbashkët

Marrëveshja, do të largohet anëtari i KQZ -së, Shimani


N.Perndoj

TIRANE - Është dashur mbërritja e ekipit të ODIHR, që socialistët të bindeshin përfundimisht për ndryshimin e Komisionit Qendror të Zgjedhjeve. Vetëm pas negociatave të ekspertëve të ODIHR me përfaqësuesit kryesorë të politikës shqiptare, dy partitë kryesore në vend kanë rënë dakord që të gjejnë një zgjidhje të përbashkët për KQZ. Pas takimit të zhvilluar dy ditë më parë mes Topit dhe Ruçit, ky i fundit paraqiti një projektdraft ku përmes një formulimi juridik, i bie që Maksim Shimani të largohet nga Komisioni Qendror i Zgjedhjeve, për t’i hapur rrugë zëvendësimit me një tjetër kandidaturë kësaj here nga Partia Demokratike. Rezultatin e negociatave e ka konfirmuar dje për mediat edhe bashkëkryetari demokrat në komisionin parlamentar për reformën zgjedhore, Jemin Gjana. Sipas tij, formula është mirëpritur nga PD dhe vetë ai është i gatshëm të kërkojë mbledhjen sapo palët të nënshkruajnë marrëveshjen. Largimi i Maksim Shimanit nga posti i anëtarit të KQZ ishte diskutuar kohë më parë, në variantin e katërt që ekspertët e OSBE-së përgatitën. Në këtë variant kërkohej shkurtimi i mandatit të vetëm 7 -vjeçar, që rezultoi nga zbatimi i Kodit Zgjedhor të miratuar në vitin 2000. Ekspertët e OSBE-së e justifikuan këtë ndryshim me faktin se kjo ishte e vetmja mënyrë për të siguruar rotacionin e anëtarësisë së KQZ-së të kërkuar nga Kushtetuta.
Sistemi zgjedhor
Në projektdraftin e depozituar nga socialistët parashikohet edhe ndryshimi i sistemit zgjedhor. Ekspertët socialistë sqaruan se përmes një neni të veçantë kërkohet ngritja e një komisioni të posaçëm parlamentar për të diskutuar gjerësisht mbi ndryshimin e sistemit zgjedhor. Ekspertët saktësuan gjithashtu se për sistemin zgjedhor do të përgatitet një paketë ligjore e posaçme e cila do të hyjë në fuqi vetëm për zgjedhjet parlamentare të vitit 2009. Ata shtuan se për çështjen e sistemit do të organizohen edhe debate të gjera me publikun, si dhe do të ketë një pjesëmarrje më të gjerë ekspertësh dhe subjektesh politike. Aktualisht në Shqipëri zbatohet sistemi mazhoritar me korrektim proporcional. Paraprakisht demokratët janë shprehur se janë për një sistem proporcional rajonal, qëndrim ky i mbështetur edhe nga partitë e vogla të opozitës. Ndërsa socialistët nuk janë shprehur zyrtarisht për këtë çështje.

[Albo]

Kundërshtojnë LSI e PDR dhe deputeti Dedja. Sot votimi në seancë

Kuvendi miraton ndryshimin e KQZ

Miratohet ndërprerja e mandatit të Shimanit

A.Rama

Komisioni i Ligjeve vendosi dje ndryshimin e Kodit Zgjedhor që i ndërpret mandatin Shimanit
TIRANË-Komisioni parlamentar i Ligjeve dhe Çështjeve Kushtetuese miratoi dje me shumicë votash amendamentin për balancimin e përbërjes së Komisionit Qendror të Zgjedhjeve. Dispozita kalimtare e hartuar pas marrëveshjes politike të arritur mes PD-së dhe PS-së në kuadër të reformës zgjedhore, i është përcjellë për shqyrtim seancës plenare që do të zhvillohet sot, për t’i hapur rrugë emërimit nga Këshilli i Lartë i Drejtësisë i një kandidati që do të propozohet nga opozita. Ndonëse për hartimin e këtij amendameti ishte arritur konsensusi politik PS-PD, ish -kryetari i komisionit të Ligjeve, Spartak Braho dhe deputeti reformator Nard Ndoka e kundërshtuan dispozitën, duke e konsideruar atë antikushtetuese. Braho dhe Ndoka duke votuar kundër miratimit të amendamentit në fjalë, pohuan se ai nuk ishte i bazuar në Kushtetutë, por ishte rezultat i pazareve politike mes dy partive kryesore. “Rekomandimet e OSBE/ ODIHR-it shprehen për balancim të KQZ-së, por jo për bipolarizim të saj. Me anë të kësaj nisme aventuriere në KQZ do të jenë të përfaqësuar politikisht dy partitë PS e PD, kur duhet të ketë vend edhe për partitë e tjera parlamentare”, -tha Ndoka. Por të gjithë deputetët e tjerë në komision, si rrallë ndonjëherë, kanë mbështetur dispozitën kalimtare, duke e konsideruar atë në përputhje me nenin 154 të Kushtetutës. Bardhul Agasi tha se në asnjë nen të Kushtetutës, nuk ishte saktësuar procedura e hedhjes së shortit, dhe kjo mungesë rregullohej me anë të këtij amendamenti që nuk e prekte atë. I vetmi nga përfaqësuesit e PS-së në komisionin e Ligjeve që shprehu rezerva për dispozitën e ripërtërimit të KQZ-së, ishte deputeti Taulant Dedja, i cili tha se duhej pranuar se nëpërmjet këtij artifici, nuk po realizohet reformë zgjedhore, pasi vendimi ishte politik. “Nuk kemi pse ta shesim për reformë zgjedhore, pasi amendamenti është produkt i një marrëveshje politike. Këto lloj artificesh janë zgjedhje politike që njihen dhe pranohen kudo në botë. Por ky është një artific që nuk e cënon Kushtetutën”, -tha Dedja. Projektligji parashikon që anëtarit të KQZ-së Maksim Shimani të zgjedhur me Kodin Zgjedhor të vitit 2000, i përfundon mandati pas hyrjes në fuqi të këtij ligji. Shimanit sipas shortit të hedhur në atë kohë, i përfundonte mandati në vitin 2007. Mospërmendja e termit short ne Kushtetutë, është shfrytëzuar nga PS dhe PD, për të hartuar amendamentin në fjalë duke i dhënë fund debatit të zgjatur për balancimin e përbërjes së institucionit zgjedhor. Ndërkaq në nenin 3 të projektligjit të miratuar, është përcaktuar dispozita për rishikimin e sistemit të zgjedhjeve, ku thuhet se pas përfundimit të zgjedhjeve parlamentare të vitit 2005, kjo dispozitë shfuqizohet, për t’i hapur rrugë funksionimit të komisionit të posaçëm parlamentar që do të fillojë procesin legjislativ për rishikimin e sistemit të zgjedhjeve.

[Genti^Itali]

Moskthimi në ligj i marrëveshjes rrezikon që të përsëritet skema e vjetshme e zgjedhjes së Subashit

Marrëveshja mes PD dhe PS për KQZ, në rrezik

Topi: E nevojshme t’i dorëzojmë Moisiut marrëveshjen. S’mund të jap garanci për PS

A. Rama

TIRANË - Hije dyshimi po sillen së fundi mbi marrëveshjen PD-PS për zëvendësimin e anëtarit të KQZ-së Maksim Shimani me një kandidaturë të Partisë Demokratike që duhet të zgjidhet nga Këshilli i Lartë i Drejtësisë. Paqartësisë së marrëveshjes dhe mosfutjes së saj në amendamentin e miratuar të enjten nga Kuvendi, që risjell të njëjtën situatë si një vit më parë gjatë zgjedhjes së Dëshira Subashit, ju shtuan dje akuzat e Partisë Demokartike për rolin e presidentit. Por nënkryetari i PD-së Bamir Topi konfirmoi dje se të hënën marrëveshja e plotë e miratuar edhe nga Parlamenti do t’i dorëzohet zyrtarisht kryetarit të shtetit. Edhe nga Presidenca u konfirmua dje një takim i Moisiut me Ruçin dhe Topin për këtë çështje. “Mendoj që është lançuar prej kohësh që marrëveshja e dy grupeve parlamentare, do të shoqërohej me një takim në Presidencë ku do t’i dorëzohet presidentit marrëveshja, e cila presupozon zëvendësimin e një personi në KQZ, nga propozimet që do të bëhen nga PD, dhe do të miratohen nga KLD-ja. Kjo bëhet e nevojshme kur ditët e fundit, madje orët e fundit, nga ana e tij ka pasur një lapsus, ku i drejtohet PS-së nëpërmjet një komunikate që është dhënë nën dorë nga zyra e presidentit që PS të paraqesë kandidaturën. Ndërkohë që në aktmarrëveshje shprehet në mënyrë shumë eksplicide që janë tre kandidatura alternative që do të propozohen nga PD”, -tha Topi, i cili theksoi se “Nnuk mund të jap garanci për PS-në, edhe për një arsye tjetër sepse kohe mbas kohe ata nuk i kanë qëndruar në mënyrë luajale atyre që janë firmosur. Ky do të ishte akti i fundit i një elementi që nuk doja të shprehja”.
Rreziku
Ndërkaq marrëveshja e 14 tetorit mes PD-së e PS-së parashikon që në vend të anëtarit të KQZ-së Maksim Shimanit të cilit të enjten ju ndërpre mandati, të zgjidhet nga KLD një anëtar i ri në bazë të tre propozimeve që do të vijnë nga PD. Por fraza e fundit dhe më e rëndësishmja nuk është sanksionuar në Kodin Elektoral të ndryshuar nga Kuvendi vetëm tre ditë më parë. Situata është shumë e ngjashme me një vit më parë, ku PD e PS ranë dakord që KLD të zgjidhte si anëtar të shtatë të KQZ-së një propozim të PD-së, gjë nuk e bënë me ligj. PS fshehtas dërgoi kandidatura në KLD dhe ky institucion zgjodhi propozimin e socialistëve, Dëshira Subashin.
Edhe pse këtë vit, Topi e Ruçi priten të takohen me Moisiun për të dorëzuar marrëveshjen në fjalë sërish vakumi në ligj i krijon mundësi KLD-së që të votojë sërish kandidaturat e PS-së dhe të mos e llogarisë marrëveshjen partiake kur të votojë zëvendësuesin e Shimanit. Sepse mungesa e implementimit të marrëveshjes në fjalë në Kodin Elektoral mund të bëjë që PS të mos mbajë fjalën dhe të çojë kandidatura në KLD (këtë e parashikon ligji) dhe KLD të thotë se votoi sipas ligjit që e ka detyrim dhe jo sipas marrëveshjes së partive.
Vendimi i Kuvendit i marrë të enjten përcakton se KLD, duhet të vendosë duke iu referuar nenit 22, pika 3 gërma “a” e Kodit Elektoral, që thotë: “KLD zgjedh tre anëtarë të KQZ-së, sipas kësaj procedure: a) dy anëtarë të KQZ-së miratohen me nga dy kandidatura të propozuara respektivisht nga dy partitë më të mëdha”. Pra në amendament nuk bëhen ndryshime ligjore për të përcaktuar se KLD duhet të votojë vetëm kandidatët e sjellë nga PD, siç edhe është rënë dakord në paktin politik PS-PD. Por kjo marrëveshje ka përplasje edhe me Kodin Zgjedhor, pasi në nenin 2 thuhet se numri i kandidaturave të propozuara nuk është më i madh se dy, ndërsa në marrëveshje thuhet se do të jenë tre kandidatët që do të propozohen nga PD. Ndërkohë vitin e kaluar për shkak të një mangësie të ngjashme mes kodit dhe marrëveshjes politike, KLD-ja nga 4 kandidatët që paraqitën palët, zgjodhi me votim të fshehtë kandidaten e PS-së Subashi.

[Albo]

PD: PS po bllokon reformen elektorale

E Merkure, 10 Nentor 2004

Drejtuesit e Partise Demokratike reagojne ndaj propozimit te socialisteve qe vendimet ne Komisionin Qendror te Zgjedhjeve te merren me shumice te thjeshte 4 me 3. PD: "Vendimarrja ne KQZ duhet te jete me shumice te cilesuar, ne raportet 5 me 2". Legalistet ankohen te OSBE per komisionerin

Drejtuesit me te larte te Partise Demokratike, kane akuzuar socialistet se po perpiqen te fusin ne nje "udhe pa krye" punen ne komisionin parlamentar bipartizan per reformen elektorale. Lemshi eshte krijuar rishtazi ne kete komision, per shkak te vendimarrjes ne Komisionin Qendror te Zgjedhjeve. Sipas drejtuesve te departamentit te ligjeve ne PD, vendimarrja ne KQZ duhet te jete me shumice te cilesuar, ne raportet 5 me 2. Nje gje e tille, sipas tyre, percaktohet edhe ne Kodin e Venecias. Formula e kerkuar nga PS per marrjen e vendimeve eshte 4 me 3 dhe ajo eshte e rekomanduar ne fakt edhe ne raportin e OSBE/ODIHR per zgjedhjet vendore te vitit 2003. Por kjo nuk pranohet nga demokratet.

Ne rekomandimet e OSBE/ODIHR nenvizohet se skema e shumices se cilesuar ne vendimarrje nuk funksionoi ne Shqiperi gjate zgjedhjeve vendore te vitit 2003. Nisur nga kjo, ne raport rekomandohet qe komisionet te kalojne ne skemen e shumices se thjeshte gjate vendimarrjes neper te gjitha nivelet e komisioneve zgjedhore. Megjithate, ajo qe eshte ende e turbullt, eshte fakti se nivelet me te larta drejtuese te PD, ende nuk kane marre nje vendim politik te formes se prere, lidhur me ceshtjen e shumices vendimarrese. Situata behet pak me e veshtire per t'u parashikuar se cila do te jete rrugezgjidhja e kesaj nyje te re ne komisionin parlamentar per reformen elektorale, po te kihet parasysh fakti se OSBE ka bere te ditur se kjo vendimmarrje u takon partive politike, duke bere indirekt terheqjen nga ndermjetesimi.

A.M

[Albo]

Komisioni i reformës zgjedhore, i bllokuar në lidhje me vendnumërimin e votave dhe vendimmarrjen e KQZ

OSBE: KQZ, vendimmarrja 5 me 2

Në një paketë të re nga grupi i ekspertëve thuhet se për çështjet e rëndësishme vendimet në KQZ të merren me 5 vota pro

Nevila Perndoj

TIRANE-Një paketë e re propozimesh ka mbërritur nga OSBE në komisionin parlamentar për reformën zgjedhore, lidhur me vendimmarrjen në KQZ dhe numërimin e përqëndruar të votave. Për paketën në fjalë është kërkuar konsensusi i dy partive kryesore në vend në mënyrë që të vazhdojë normalisht puna në komisionin për reformën zgjedhore. Aktualisht puna e komisionit parlamentar është bllokuar. Ndërkohë, bashkëkryetari demokrat në këtë komision, Jemin Gjana, deklaroi dje për “Shekullin” se për çështjet e mbetura pezull pritet një qëndrim nga ana e PS. Kjo e fundit nuk është deklaruar ende zyrtarisht se cili do të jetë qëndrimi përfundimtar lidhur me vendimmarjen, vlerësimin e fletëve të pavlefshme dhe numërimin e votave.
Propozimet
Anëtari i PR në komisionin për reformën zgjedhore, Aleksandër Garuli, bëri dje publike për “Shekullin” paketën e propozimeve, që OSBE u ka ofruar atyre me qëllim zhbllokimin e funksionimit të komisionit parlamentar për reformën zgjedhore. “Për disa çështje të rëndësishme, siç është shpallja e rezultatit, pavlefshmëria e fletëve të votimit dhe disa probleme të tjera, që mund të kërkojnë domosdoshmërisht konsensusin, vendimet në KQZ do të merren 5 me 2. Ndërsa për problemet rutinë administrative dhe, për një numër më të madh çështjesh, që nuk janë të një rëndësie të veçantë, vendimmarrja do të jetë 4 me 3. Pra ky është një mendim, që vjen nga OSBE. Problem tjetër është problemi i zonave zgjedhore dhe sipas propozimit të OSBE-së gjykohet se nuk ka kohë për të ndryshuar zonat zgjedhore dhe të mbeten këto që janë. OSBE i është rikthyer edhe njëherë numërimit të përqëndruar të votave në komisionet zonale. Këto janë tre çështjet që po tentohet për të zhbllokuar dhe për të nxjerrë nga situata këtë komision”,- tha dje Garuli, duke shtuar se çështjet në fjalë do të jenë pjesë e një debati derisa të arrihet konsensusi dhe, më pas të kalojnë formalisht në komision.
Gjana
Ndërsa bashkëkryetari demokrat në komisionin parlamentar për reformën zgjedhore, Jemin Gjana deklaroi dje për “Shekullin” se ai nuk do të kërkojë mbledhjen e komisionit derisa nuk do të bihet në konsensus me PS për çështjet që kanë mbetur pezull lidhur me vendimmarrjen, vlerësimin e fletëve të pavlefshme dhe numërimin e votave. Në rast se do të ketë konsensus, Gjana sqaroi se komisioni do t’i kërkojë Kuvendit shtyrjen e dytë të afatit. Në të kundërt ato do të mbeten siç janë parashikuar në Kodin Zgjedhor aktual. “Deri më tani problemet kanë ngecur tek vendimmarrja e KQZ-së, vendimmarrja aktuale në Kodin Zgjedhor është 5 me 2. PS insiston për të kaluar në një vendimmarrje 4 me 3. Ajo çfarë ne kemi toleruar si PD, është se ndryshe nga ato çfarë janë parashikuar në Kodin Zgjedhor ne nuk kemi kërkuar që të gjitha vendimet e KQZ-së të merren 5 me 2, por vetëm vendimet më të rëndësishme siç është problemi i ankimimit për rezultatin, i shpalljes së rezultatit të proporcionalit, i akteve normative. Vlerësimi konsensual i fletëve të votimit të pavlefshme është çështja e dytë e mbetur pezull në komision, që vazhdon të paragjykohet. Edhe për debatin që është hapur në komision në lidhje me vendnumërimin e votave në KZZ, për të cilën opozita ishte dakord në parim, përfaqësuesit e PS ishin kundër dhe nuk kanë dhënë ende një ok-përfundimtar. Nëse ata do të bien dakord atëherë grupi i ekspertëve do ta elaborojë çështjen dhe të hartojë një paketë amendimesh, që më pas mund t’i shohë edhe komisioni”, - tha Gjana.

Çështjet e mbetura pezull në komision:
Vendimmarrja e KQZ
Transferimi i numërimit të votave
Ndarja e Zonave Zgjedhore

Paketa e propozimeve të OSBE:
Vendimmarrja për çështje të rëndësishme të jetë 5 me 2
Numërimi i përqëndruar i fletëve të votimit pranë KZZ-së
Të mos ketë ndryshim në ndarjen e zonave zgjedhore

[Albo]

BE dhe OSBE, 800 mijë euro për listat e zgjedhësve

A.Rama

TIRANE- Komisioni Europian dhe OSBE kanë firmosur zyrtarisht fillimin e projektit që do të mundësojë lëvrimin e fondit prej 800 mijë eurosh në ndihmë të qeverisë shqiptare për përmirësimin e regjistrit vendor të zgjedhësve. Marrëveshja në fjalë u nënshkrua nga shefi i delegacionit të Komisionit Evropian, ambasadori Lutz Salzmann, dhe kreu i prezencës së OSBE-së në Tiranë, ambasadori Pavel Vacek. Projekti synon të mbështesë përpjekjet e Shqipërisë për të siguruar zgjedhje të lira dhe të ndershme në vitin 2005, duke ofruar asistencë teknike për Ministrinë e Pushtetit Vendor dhe Decentralizimit dhe Komisionin Qendror të Zgjedhjeve, KQZ, në bazë edhe të ligjit të ri “Për verifikimin, identifikimin dhe regjistrimin e qytetarëve” nga njësitë e qeverisjes vendore. Ndërkaq projekti edhe pse do të financohet nga KE-ja do të zbatohet OSBE e cila ndjek nga afër procesin për përgatitjen e procesit zgjedhor. Projekti do t’i kushtojë një vëmendje të veçantë fushatës për ndërgjegjësimin publik, përgatitjes së trajnuesve dhe krijimi i një rrjeti ekspertësh në terren, asistencë për KQZ-në dhe ministrinë për të rifreskuar listën e zgjedhësve, asistencë teknike për të 20 njësitë vendore, si dhe ndihmë për KQZ-në në informimin e zgjedhësve rreth vendndodhjes së qendrës së tyre të votimit.

[Albo]

Blushi: Ata drejtues vendorë që po tregojnë indiferentizëm në raport me zbatimin e ligjit do të penalizohen deri në largimin nga puna.

Listat e zgjedhësve, regjistrimi i popullsisë rrezikon dështimin


A.Rama

TIRANE- Rrezikon seriozisht dështimin procesi i regjistrimit të popullsisë dhe hartimit të listave zgjedhore nga zyrat e gjendjes civile deri në fund të muajit shkurt. Ligji i përkohshëm për këtë çështje i miratuar një muaj më parë nga Kuvendi, nuk po zbatohet nga njësitë vendore, që në mjaft raste kanë shfaqur neglizhencë dhe indiferencë të theksuar për ngritjen e grupeve të punës që do të merren me regjistrimin dhe verifikimin e popullsisë. Ministri i Pushtetit Vendor Ben Blushi, përballë një situate të tillë mosangazhimi serioz për punën që duhet të përfundojë në 28 shkurt të vitit 2005, konfirmon se ata drejtues vendorë që po tregojnë indiferentizëm në raport me zbatimin e ligjit do të penalizohen deri në largimin nga puna. Blushi i ka konsideruar dje absurde dhe të pabazuara ankesat e disa drejtuesve të njësive bashkiake të Tiranës, se askush nuk mund të punojë pa fondet e nevojshme. Sipas ministrit Blushi, buxheti i shtetit ka vënë në dispozicion për punonjësit që do të angazhohen në procesin e regjistrimit të popullsisë 1.5 milion dollarë.“Kjo burokraci e minibashkive nuk po funksionon siç duhet. Jam i shqetësuar se ka më shumë llafe se punë në një fazë parapërgatitore që i takon në mënyrë të veçantë minibashkive të Tiranës të merren kryesisht me hartat dhe me ngritjen e grupeve të punës, të cilat janë të financuara nga buxheti qendror. Eshtë një faturë që shkon 1.5 milionë dollarë dhe parashikon mbulimin e plotë të gjithë këtij procesi. Ata kanë të gjitha atributet që sipas ligjit të marrin duke aktivizuar nëpunës socialë apo arsimtarë”, -tha Blushi. Sipas tij, të gjitha njësitë vendore duhet të punojnë intensivisht që regjistrimi i popullsisë që do të jetë bazë edhe për hartimin e listave zgjedhore të përfundojë në kohë. “Do të ketë kryetarë njësish vendore të cilët jo se nuk kanë mundësi, por sepse janë indiferentë dhe të papërshtatshëm për detyrën dhe që duhet të penalizohen në proces deri në sanksione maksimale që mund të jenë deri në largim nga detyra”, -vijoi Blushi. Ndërkaq kryetarja e njësisë bashkiake nr. 10 në Tiranë Mira Veizi, ka deklaruar se askush nuk mund të punojë falas dhe se minibashkitë që duhet të angazhojnë njerëzit në këtë proces, nuk kanë marrë ende asnjë fond.

[Veshtrusja]

Qeveria amerikane akordon një fond prej 400 mijë dollarësh për procesin zgjedhor në Shqipëri
Armand Mero, Tiranë
24 nëntor 2004
Zeri i Amerikes

Qeveria amerikane akordoi një fond prej 400 mijë dollarësh në mbështetje të procesit të verifikimit dhe regjistrimit të votuesve në Shqipëri.
Ambasadorja e Shteteve të Bashkuara në Tiranë u shpreh sot edhe një herë se zgjedhjet e vitit 2005 janë shumë të rëndësishme për zhvillimin e institucioneve demokratike në vend dhe të ardhmen e integrimit të Shqipërisë.


Prodhimi i hartave të dixhitalizuara të rajoneve të vendit që do të realizohen nëpërmjet fotografimit nga ajri do të jetë një tjetër mjet shtesë në duart e autoritetve shqiptare për të ndihmuar në procesin e verifikimit dhe regjistrimit të votuesve. Për këtë do të përdoret një fond prej 400 mijë dollarësh i akorduar nga qeveria amerikane, e cila iu përgjigj me shpejtësi kërkesës së bërë vetëm pak ditë më parë nga ministri i Pushtetit Vendor, Ben Blushi. Projekti përfshin prodhimin e hartave për 30 qendra urbane dhe rifreskimn e 12 hartave satelitore, në të cilat do të përcaktohet qartë vendodhja e çdo objekti deri dhe të qendrës së votimit.

Ky financim konfirmon vëmendjen e veçantë që komuniteti ndërkombëtar po i kushton zgjedhjeve të ardhshme parlamentare të vitit 2005, të cilat siç përsëriti edhe një herë sot Ambasadorja e Shteteve të Bashkuara në Tiranë Marsi Rise janë të një rëndësie të madhe për të ardhmen e vendit:

"Qëllimi i këtij projekti është të japë ndihmesë në përgatitjen e listave të votuesve që do të bëhet nga qeveria shqiptare. Ofrimi i këtyre hartave besojmë se do ta bëjë këtë process më të lehtë, më efektiv dhe më të saktë. Zgjedhjet parlamentare do të jenë të rëndësishme për Shqipërinë dhe është e rëndësishme që ato të jenë të drejta e të lira. Zgjedhja të tilla janë të rëndësishme për zhvillimin e institucioneve demokratike, por dhe për aspiratat euroatlantike të integrimit të Shqipërisë", tha ambasadorja Rise.

Ajo tha se këto harta do të mund të përdoren më pas edhe për sistemin e adresave apo planifikimin urban duke saktësuar se megjithatë është përgjegjësi edhe e vetë qytetarëve shqiptarë që të regjistrohen për të votuar dhe për këtë duhet të bashkëpunojnë në procesin e verifikimit derë më derë që ka nisur në të gjithë vendin.

Ministri i Pushtetit Vendor Ben Blushi deklaroi se është i kënaqur nga ecuria e procesit i cili duhet të përfundojë më 28 shkurt:

"Mund të raportoj sot se mbi 90 përqind e grupeve të identifikimit janë në terren për të verifikuar derë më derë shtetasit, po ashtu jam i kënaqur të konstatoj se të gjitha njësitë vendore po i përgjigjen me shumë impenjim kësj fushate të regjitrimit të shtetasve dhe kjo është premisa kryesore për të përfunduar procesin e verifikimit brenda 28 shkurtit".

Për procesin e verifikimit dhe regjistrimit të votuesve qeveria shqiptare ka akorduar 1.5 milion dollarë, ndërsa një javë më parë edhe Bashkimi Europian dha një financim prej 800 mijë eurosh. Ky financim do të përdoret nga OSBE-ja në një project për të ndihmuar në rishikimin e listave të votuesve në 20 bashki dhe komuna të vendit. Projekti synon krijimin e një rrjeti ekspertësh në terren, ndihmë në rifreskimin e listave dhe informimin e zgjedhësve rreth vend-ndodhjes se qendrës së tyre të votimit.

[Albo]

Në prag të mbledhjes së Komitetit të Ndarjes së Zonave Zgjedhore, OSBE sugjeron shtyrjen e procesit

OSBE: Jo ndarje e re e zonave zgjedhore

“Nuk ka kohë për ndarje të re të zonave zgjedhore, edhe pse kufijtë aktualë nuk sigurojnë përfaqësim të drejtë”

N.Perndoj

TIRANE-Ndarja ose jo e zonave zgjedhore për zgjedhjet e vitit 2005 pritet të jetë debati më i freskët mes socialistëve, demokratëve dhe së fundmi edhe OSBE-së. Kjo për arsyen se, socialistët ashtu dhe OSBE kërkojnë që të mos ndryshohen zonat zgjedhore, ndërsa demokratët këmbëngulin, që të zbatohet Kodi aktual Zgjedhor, që flet pikërisht për ndarje të re të zonave zgjedhore si rezultat i parregullsive, që u shfaqën zgjedhjet e kaluara parlamentare. Ndryshimet e ndarjes territoriale të zonave elektorale, sipas Kushtetutës duhet të realizohen një herë në 10 vjet. Ndryshimet e fundit janë bërë në vitin 2000 dhe në 2010 duhet të fillonte ndryshimi i kufijve aktualë. Por Kodi Zgjedhor i miratuar në vitin 2003, parashikonte që zonat zgjedhore duhen riparë. Po sipas kodit aktual si bazë për përcaktimin e zonave zgjedhore duhet të shërbejë numri i pjesëmarrësve në votime gjatë zgjedhjeve të vitit të kaluar. Një fakt i tillë është marrë parasysh edhe nga OSBE, por si rezultat i faktorit kohë, ndryshimet në fjalë, sipas saj, nuk mund të realizohen. Në propozimin konfidencial, që ajo u ka bërë partive politike pjesëmarrëse të komisionit zgjedhor thuhet se OSBE nuk është dakord për ndarjen e re të zonave zgjedhore. Në paketën e propozimeve, sqarohet se nuk ka kohë për ndarje të re të zonave zgjedhore, edhe pse pranon se kufijtë e saj aktualë nuk sigurojnë një përfaqësim të drejtë. Në këtë paketë propozimesh, që është konfirmuar për “Shekullin” edhe nga republikanët, thuhet se ky proces mund të pengohet nga mospërfundimi në kohë i regjistrimit të zgjedhësve. Sipas saj, një rishikim i plotë për zonat zgjedhore do të bëhet pas zgjedhjeve pasardhëse mbi bazën e të dhënave të regjistrimit të popullsisë. Në bazë të Kodit Zgjedhor, në rast se Kuvendi nuk e miraton ligjin për zonat zgjedhore para 6 muajve të fundit të mandatit të tij, zgjedhjet më të afërta për Kuvendin zhvillohen në bazë të zonave ekzistuese. Në të njëjtën kohë KQZ do të fillojë në datën 1 dhjetor diskutimin për raportin e paraqitur nga Komisioni i Kufijve të Zonave Zgjedhore. Në bazë të Kodit Zgjedhor, KQZ nuk ka rol vendimtar në procesin e ndarjes së zonave, pasi pas shqyrtimit të raportit mbi ndryshimet, që duhet të bëhen në 100 zonat elektorale, do të jetë Kuvendi që do të marrë vendimin përfundimtar. Dhe pikërisht Kuvendi duket se do të vendosë edhe për dy qëndrimet krejtësisht të ndryshme, që janë servirur në raportin pranë KQZ nga komisioni i ndarjes së kufijve të zonave zgjedhore. Qëndrimi i parë është se kriteret e përcaktuara në Kodin Zgjedhor nuk duhen marrë parasysh, pasi është në kundërshtim me standardet për caktimin e zonave zgjedhore dhe përfaqësimin në Parlament dhe qëndrimi i dytë përcakton detyrueshmërinë e zbatimit për sa kohë që është e sanksionuar në ligj. Në rekomandimet paraprake raporti përfshin shmangien e numrit të zgjedhësve të çdo zone zgjedhore nga numri mesatar i zgjedhësve për zonë zgjedhore në shkallë vendi, si dhe shmangien e numrit të zgjedhësve nga numri minimal, apo sipas rastit maksimal, i zgjedhësve të lejuar për zonë zgjedhore.

[Albo]

Votimi, fiton varianti i PD

E Merkure, 15 Dhjetor 2004

Ceshtja e vendimmarrjes ne Komisionin Qendror te Zgjedhjeve, e cila u be per nje kohe te gjate nje "molle sherri" mes dy partive kryesore te vendit, duket se ka shkuar drejt nje zgjidhjeje perfundimtare. Grupi i Eksperteve Teknike te OSBE-se ka paraqitur dje, perpara Komisionit Parlamentar dypalesh per reformen zgjedhore propozimet perkatese qe do te tentojne te zgjidhin ceshtjen ne fjale. Sipas ketyre propozimeve, shpallja e rezultatit te votimit per listat shumeemerore per Kuvendin, vendimet lidhur me ankimet kunder vendimeve te KZZ-se ose KZQV-se per rezultatin e zgjedhjeve, si dhe vendimet lidhur me kerkesat per deklarimin e pavlefshem te zgjedhjeve do te miratohen vetem kur votojne "pro" jo me pak se 5 anetare te KQZ-se. Ndersa, vendimet e tjera merren me shumicen e votave te te gjithe anetareve te KQZ-se.

Kjo formule, e cila eshte mbeshtetur fuqimisht nga Partia Demokratike, eshte pranuar pak kohe me pare edhe nga vete socialistet me ane te deputetit, Elmaz Sherifi. Ne kete pike, pritet vetem qe bashkekryetaret e Komsionit dypalesh te firmosin miratimin e ketij propozimi, ne menyre qe ai te paraqitet ne Kuvend per shqyrtim.

R. Kalemi