PS dhe PD, kompromis i vonuar për ndarjen elektorale zonale

[Albo]

Misioni amerikan në Këshillin e Përgjithshëm të Ambasadorëve në Vjenë vlerëson raportin e Liponen

SHBA: Duhet një KQZ e paanshme


N. Perndoj

TIRANE - Misioni i SHBA në Këshillin e Përhershëm të OSBE-së, në Vjenë, ka përshëndetur prezantimin e djeshëm që ambasadori i OSBE-së, në Tiranë, Osmo Liponen ka bërë në këtë këshill. “Ne falenderojmë ambasadorin Liponen për punën e tij të bërë prej mëse dy vitesh. Ne besojmë se puna e tij bashkë me qeverinë shqiptare ka thjeshtëzuar reformat. Ne vazhdojmë të mbështesim punën e Prezencës për reformën elektorale. Ne besojmë se OSBE dhe ODIHR janë duke i dhënë një asistencë jetike Shqipërisë, që ajo të vazhdojë të punojë në reformën e procesit elektoral dhe, të përforcojë zbatimin e ligjeve. Ne shpresojmë që gjitha partitë politike do të punojnë së bashku që ky proces të ecë për t’i paraprirë zgjedhjeve të ardhshme”,- thuhet në deklaratën e Misionit të SHBA-së në Vjenë. Në veçanti, misioni shpreson se do të arrihen marrëveshje për të siguruar një Komision Qendror Zgjedhor të paanshëm dhe lista të përmirësuara të votuesve. “Ne gjithashtu besojmë që mbështetja për programet parlamentare është jashtëzakonisht e nevojshme. Ne vazhdojmë të mbështesim asistencën konkrete të Prezencës në rikthimin shqetësues të pronës. Ne gjithashtu mbështesim fort programet antitrafik të Prezencës”,- thuhet në deklaratë.

[Albo]

PD: Variantet e OSBE për KQZ, PS të zgjedhë kë të dojë

N. Perndoj

TIRANË - Kryetari i Partisë Demokratike u shpreh dje pas takimit të zhvilluar me Trojkën Europiane se, ata janë të gatshëm që të negociojnë me socialistët për një nga katër variantet, që ekspertët e OSBE-së përgatitën për balancimin e Komisionit Qendror të Zgjedhjeve. “Ne jemi duke zhvilluar bisedime me përfaqësuesit ndërkombëtarë, por duhet t’ju them se janë katër variante për KQZ dhe, asnjëri prej tyre nuk është formuluar nga PD-ja. Secili prej tyre e “pickon” edhe PD-në, por që të gjitha këto janë totalisht në përputhje dhe brenda standardeve. Ndaj dhe ne jemi të gatshëm, që socialistët të zgjedhin njërin prej tyre dhe, ne jemi të gatshëm që të votojmë atë. Por fakti që ata janë për atë variant, që vjedh mandatet siç është e fiksuar në zgjedhjet e vitit 2000, fakti që ata janë për atë variant, do të thotë se ata kërkojnë sërish manipulimin e votave”, - tha ai. Katër variantet e përgatitur nga ekspertët e OSBE-ë për balancimin e KQZ-së nuk janë pranuar nga socialistët, të cilët janë shprehur se janë në kundërshtim me Kushtetutën dhe me rekomandimet e OSBE/ODIHR. Socialistët kanë kërkuar që ekspertët e OSBE-së të përgatisin një tjetër variant, edhe pse këta të fundit janë shprehur se nuk do të ndërmarrin asnjë hap në këtë drejtim.

[Genti^Itali]

OSBE: KQZ, raporti 5 me 2 në favor të PS


Darina Tanushi

Liponen tha të enjten në Vjenë se grupi i ekspertëve parashtroi dy variante që synonin balancimin e përbërjes së KQZ-së, çështja e parë në rendin e punimeve të komisionit. “Mosmarrëveshja mbi përbërjen e KQZ-së doli si një çështje madhore para zgjedhjeve të tetorit 2003, ku fryma pas ndryshimeve të Kodit Zgjedhor dhe marrëveshjes parazgjedhore PS-PD u prish si rrjedhojë e plotësimit nga shumica qeverisëse të vendit të mbetur në KQZ, duke e çuar raportin e tij në 5 me 2 në favor të shumicës. Që prej asaj kohe, PD-ja ka kërkuar që një vend në këtë komision t’i kalohet opozitës. Varianti i parë i propozuar nga GET-i për trajtimin e kësaj çështjeje parashikonte ndryshimin e nenit 154 të Kushtetutës, i cili përcakton përbërjen e KQZ-së dhe emërimin e anëtarëve të tij, kurse një variant i dytë kërkonte të balanconte KQZ-në, duke ndryshuar në këtë rast Kodin Zgjedhor. Partia Socialiste i hodhi poshtë përfundimisht të dy variantet”,-theksoi Liponen.

[Genti^Itali]

Sekretari i përgjithshëm i PS tha se qëndrimi përfundimtar për reformën zgjedhore do të vendoset sot në KPD

Ruçi kundër OSBE: PS nuk kontrollon KQZ

“Nuk është e vërtetë që PS-ja kontrollon politikisht KQZ-në, pasi do të kishim një Kushtetutë të politizuar”

Darina Tanushi

TIRANË – Komisioni Qendror i Zgjedhjeve nuk kontrollohet nga socialistët, është shprehur dje, një ditë pas raportit të ambasadorit të sapolarguar të OSBE-së Osmo Liponen, sekretari i përgjithshëm i PS-së Gramoz Ruçi. Ai ka deklaruar se PS-ja do të japë qëndrimin e saj, sot në mbledhjen e Komitetit të Përgjithshëm Drejtues, në lidhje me komentet e ambasadorit Liponen, në Vjenë. “Do të kemi një qëndrim që do të institucionalizohet në mbledhjen e KPD-së”, -tha Ruçi, sipas të cilit, nuk ka asnjë ndryshim qëndrimi dhe asnjë kthim mbrapa apo ecje përpara nga ana e PS-së në lidhje me çështjet e reformës zgjedhore. Ruçi tha se PS-ja do të zbatojë rekomandimet e OSBE/ODIHR-it dhe do të gjejë zgjidhje ligjore konform Kushtetutës së Shqipërisë. Ruçi u shpreh se “nuk është aspak e vërtetë që PS-ja kontrollon politikisht KQZ-në, pasi nëse do të thoshim këtë, do të thoshim që Kushtetuta e Shqipërisë, është një Kushtetutë e politizuar dhe e miratuar në forumet e PS-së. Kushtetuta e Shqipërisë është bërë nga Parlamenti shqiptar dhe e ratifikuar nga elektorati shqiptar. Kështu që KQZ-ja është ngritur mbi bazën e kërkesave që kanë nenet e Kushtetutës”, -tha Ruçi. Sekretari socialist, nisur edhe nga deklaratat e ambasadorit Liponen në raportin e tij, një ditë më parë, është shprehur se “Komentet janë të ndryshme. Është e drejta e kujtdo të bëjë komente. Unë do të thoja që KQZ-ja sot përbëhet nga 2 veta të propozuar nga PD-ja, dy veta të propozuar nga PS-ja dhe 3 veta të zgjedhur nga institucionet kushtetuese siç është ai i presidentit dhe Këshilli i Lartë i Drejtësisë. Këto thotë Kushtetuta dhe kështu është bërë deri tashmë”. Ndërkohë numri dy i socialistëve Ruçi ka dhënë shpresa se do të vendoset konsensusi midis dy forcave politike kryesore, pra PS-së dhe PD-së, ndërsa u shpreh se negociatat me aleatët vazhdojnë çdo ditë. Ai hodhi poshtë edhe komentin e bërë nga organizmat ndërkombëtare se mungon vullneti politik për të bërë reformat në infrastrukturë zgjedhore. “Do të ishte shumë mirë sikur vullneti politik të shpalosej dhe të zgjidhej për 24 orë. Unë mendoj që nga të gjitha palët, pavarësisht nga diferencat që ka midis njëra-tjetrës ka një qëndrim permanent që janë të gatshëm për t’u ulur në tavolinë, për të biseduar dhe për të gjetur zgjidhjen më të mirë, sigurisht ka lexime të ndryshme dhe qëndrime të ndryshme”. “Derisa të vijmë në një konsensus politik midis spektrik politik shqiptar, pozitës dhe opozitës, do të duhet një kohë sigurisht brenda parametrave që kërkojnë edhe partnerët tanë ndërkombëtarë, brenda parametrave që kërkojnë edhe rekomandimet e OSBE/ODIHR-it dhe brenda kërkesave që ka Kodi Elektoral, infrastruktura e zgjedhjeve, e cila duhet të bëhet gjashtë muaj para datës së zgjedhjeve”, -bëri të ditur Ruçi. Ai tha se shqetësimi i strukturave të PS-së është që të garantojë një infrastrukturë zgjedhore sipas të gjitha standardeve dhe praktikave më të mira të Kodeve Zgjedhore. Sekretari i përgjithshëm Ruçi u shpreh se sot, në mbledhjen e KPD-së do të saktësohen të gjitha qëndrimet lidhur me situatën më të fundit politike në vend.

[Albo]

Gjana: Askush nuk do të marrë përsipër që t’i vejë nën kontroll

PD: Protestat për KQZ, mund të dalin jashtë kontrollit


N.Perndoj

TIRANE- Partia Demokratike paralajmëron protesta të ashpra në rast se socialistët nuk do të bien dakord për ndryshimin e Komisionit Qendror të Zgjedhjeve, para vitit 2005. Demokratët kanë avancuar në qëndrimet e tyre ndaj protestave, për shkak të mungesës së një kompromisi me socialistët, për zbatimin e një prej katër varianteve, që ekspertët e OSBE-së, kanë hartuar me qëllim balancimin e KQZ-së. Bashkëkryetari demokrat në komisionin parlamentar për reformën zgjedhore, Jemin Gjana, deklaroi dje se protestat do të jenë rruga që ata do të ndjekin në rast se KQZ nuk balancohet. Kësaj here, Gjana nuk garantoi sigurinë që mund të japë PD, për zhvillimin normal të protestave, ashtu siç u veprua në muajin shkurt të këtij viti. Ai shtoi se të gjitha përgjegjësitë do t’i marrë përsipër vetëm qeveria. “Opozita ka bërë rolin e frenave disa muaj më parë, në pranverë të këtij viti, atëherë kur u përpoq të vinte nën kontroll protestën e qytetarëve, për të mos e çuar në kulmet e saj rolin e protestës. Këto protesta mund të nisin, mund të përshkallëzohen dhe mund të jenë shumë më të ashpra dhe askush nuk do të marrë përsipër që t’i vejë nën kontroll”,- tha Gjana. Kjo është deklarata më e ashpër që deri më tani drejtuesit e lartë të selisë blu kanë dhënë për mediat, lidhur me deklaratat refuzuese të socialistëve, për të mos balancuar KQZ. Kërkesa për fillimin e protestave është shtruar parimisht edhe në strukturat e PD-së, por deri më tani në asnjë prej organeve më të larta të kësaj partie nuk është marrë vendim për këtë çështje. Edhe në mbledhjen e fundit të Këshillit Kombëtar të PD-së, Berisha, bëri thirrje për protesta, por vetëm në kohën e duhur. Protestat e paralajmëruara nga demokratët mund të fillojnë vetëm në muajin janar. Edhe për një muaj demokratët dhe socialistët do të debatojnë në komisionin parlamentar për reformën zgjedhore. Brenda këtij muaji, demokratët do të kërkojnë sërish kompromis për KQZ. Në të kundërt ata nuk do të marrin pjesë. Ndërkohë nëpër qytetet kryesore të vendit po zhvillohen edhe mbledhjet për ristrukturimin e degëve. Zgjedhjet për kryetarin dhe kryesinë e PD-së në degët kryesore të vendit, përfshi edhe Tiranën, do të përfundojnë vetëm në muajin dhjetor. Për këtë arsye, çështja e protestave do të mbetet për t’u diskutuar zyrtarisht në forumet më të larta të partisë vetëm në muajin janar, kohë kjo që përkon edhe me zhvillimin e Kuvendit të Partisë Demokratike.

[Albo]

Solana: Zgjedhjet jetike, qeveria të ndryshojë KQZ-në

Shekulli

Përfaqësuesi i lartë i Bashkimit Evropian për Politikë të Jashtme, Havier Solana, i ka bërë thirrje qeverisë së Shqipërisë që të përshpejtojë përgatitjet për zgjedhjet e ardhshme parlamentare të qershorit 2005.
Këtë mesazh Solana ia dha të mërkurën në Bruksel ministrit të Jashtëm shqiptar, Kastriot Islami, dhe ministres për Integrimin Evropian, Ermelinda Meksi.
Zëdhënësja e Solanës, Christine Gallack në një intervistë për BBC tha se qeveria duhet të jetë e para që të zhbllokojë ngërçin e krijuar rreth KQZ-së. Sipas saj qeveria duhet të vendosë për ndryshimin e KQZ-së.

Ç’të re përmbante mesazhi i shefit të Bashkimit Evropian për politikën e jashtme?

Mesazhi që zoti Solana i dha ministrit të Jashtëm ishte krejt i ngjashëm me mesazhin që ai i dha kryeministrit të Shqipërisë kur u takuan gjatë punimeve të sesionit të Asamblesë së Përgjithshme të Kombeve të Bashkuara, para dy javësh. Qëndrimi i Bashkimit Evropian mbetet i njëjtë. Për Bashkimin Evropian dhe zotin Solana, ka shumë rëndësi të pranohet se Shqipëria ka lënë përshtypje shumë të mira në procesin e reformave ekonomike dhe miratimin e legjislacionit. Por duke pasur parasysh ambicjet e mëdha të Shqipërisë për të qenë pjesë e strukturave euro-atlantike, Bashkimi Evropian nuk është i kënaqur me ritmet e reformave. Për Bashkimin Evropian është e nevojshme që të përshpejtohen përpjekjet dhe është e nevojshme që të bëhet një thirrje zgjimi për të gjithë udhëheqësit që të inkurajojnë reformat ekonomike dhe politike.
Dhe çfarë u tha për reformën zgjedhore, e cila është momentalisht një mollë sherri në Shqipëri?
Kjo është një çështje jashtëzakonisht e rëndësishme. Ne mendojmë se përgatitjet për zgjedhjet parlamentare që parashikohen të mbahen në qershor 2005 duhet të shpejtohen. Këto zgjedhje janë një provë e rëndësishme për pjekurinë demokratike të vendit, prandaj janë edhe një provë e rëndësishme për ta afruar Shqipërinë drejt Bashkimit Evropian. Ne mendojmë se është e nevojshme që qeveria të hedhë disa hapa dhe të tregojë vullnet të mirë për zhbllokimin e situatës.

Ju përmendët disa hapa. Për çfarë hapash e keni fjalën konkretisht?
Para së gjithash, ne do të dëshironim që të kryhej reforma zgjedhore. Përndryshe do të jetë shumë e vështirë të ecet me përgatitjet e tjera për zgjedhjet. Ne vërejmë një problem kyç në Komisionin Qendror Zgjedhor. Pra, dëshirojmë të shohim vullnet të mirë nga ana e qeverisë për të ecur përpara, për të hedhur hapin e parë në zhbllokimin e situatës dhe për të lejuar edhe ndryshimin e përbërjes së KQZ-së po të jetë e mundur. Ajo ka më shumë rëndësi është që të tregohet vullnet i mirë dhe të hidhen hapat e parë.
A u përmendën afate në takimin e zotit Solana me delegacionin shqiptar për përmbushjen e këtyre masave?
Marrëdhëniet tona me Shqipërinë janë marrëdhënie partneriteti. Ne nuk u vëmë afate partnerëve tanë. Por është e qartë se të gjitha palët në Shqipëri, duke filluar nga qeveria, duhet t’i shohin zgjedhjet e vitit të ardhshëm si një provë të madhe dhe të rëndësishme për pjekurinë demokratike të vendit, dhe procesi zgjedhor duhet të përgatitet mirë. Prandaj mesazhi është, ai i mbështetjes dhe inkurajimit për të siguruar përparim të shpejtë në reformën zgjedhore.

[Albo]

Ekspertët e ODIHR-it takohen me dy bashkëkryetarët e komisionit për reformën zgjedhore

ODIHR: Vullnet politik për KQZ

Gjana: ODIHR-i ndan të njëjtin mendim me OSBE-në për KQZ-në

Nevila Perndoj

TIRANË – Mbërritja e ekspertëve të ODIHR nuk ka ndryshuar asgjë në qëndrimet e dy partive kryesore politike në vend për çështjen e KQZ-së. Në takimin 90 minutësh të zhvilluar dje, në selinë e OSBE-së, bashkëkryetari demokrat Jemin Gjana dhe ai socialist Elmaz Sherifi nuk kanë gjetur një gjuhë të përbashkët për përbërjen e re të KQZ-së. Ndërkohë, zv/kryetari i sektorit të OSBE/ODIHR për Zgjedhjet, Nikolai Vulçanov dhe këshilltari i OSBE/ODIHR, Gilles Safi, nuk kanë ofruar asnjë variant të ri për KQZ. “Nuk ka kundërshtime pikëpamjesh mes ekspertëve të ODIHR dhe OSBE-së për problemet që janë trajtuar”,- tha Gjana pas takimit. Dy ekspertët e ODIHR i kanë kërkuar dy partive kryesore politike në vend që përbërja e re e KQZ-së të zgjidhet vetëm përmes një vullneti politik.

Debati

Edhe pas takimit të zhvilluar me ekspertët e ODIHR, Gjana dhe Sherifi nuk kanë mbajtur të njëjtin qëndrim për mesazhin që kishin transmetuar ekspertët gjatë takimit. Bashkëkryetari demokrat në komisionin parlamentar për zgjedhjet, Jemin Gjana, deklaroi dje pas takimit se qëndrimet e socialistëve janë ende të “murosura” për përbërjen e re të KQZ-së. “Ne deklaruam atë qëndrim që kemi mbajtur prej shumë kohësh se jemi të gatshëm që të pranojmë secilin prej varianteve të përgatitura nga grupi i ekspertëve dhe, konkluzioni i takimit ishte se çdo gjë mund të arrihet vetëm nëse ekziston një vullnet politik. Mesazhi i Vulçanovit të cilit iu kërkua në mënyrë eksplicite është se duhet ta bëjnë ata një zgjidhje për KQZ. Mesazhi ishte se ju duhet të respektoni rekomandimet tona dhe ne jemi këtu për të mbështetur zgjidhjet tuaja politike dhe, vullneti politik duhet të jetë ai që duhet të mbizotërojë për të zgjidhur çështjen e shumëpërfolur të balancimit të KQZ-së”,- tha Gjana pas takimit. Ndërsa bashkëkryetari socialist në këtë komision, Elmaz Sherifi, deklaroi dje pas takimit se duhen gjetur zgjidhjet ligjore për formulën e KQZ-së. “Ne nuk vajtëm për të përcaktuar formulën aty. U diskutuan problemet që janë në axhendë. Prekja apo jo e KQZ-së nuk mbetet që ta përcaktojmë tek zyra e OSBE-së. Nuk ka ndonjë propozim për KQZ. Në takim u diskutuan rrugët që duhet të ndjekim me kontributin e përbashkët të të dyve. Do të ndiqen vetëm rrugët ligjore”, - tha ai. Ndërsa Gjana shtoi se, “fatkeqësisht pozicioni i kolegut është se ata janë larg idesë për të pasur një KQZ tjetër për zgjedhjet e vitit 2005”.

[Albo]

OSBE theksoi dje se ekspertët e ODIHR nuk janë ftuar nga partia shqiptare

OSBE: ODIHR-i u ftua nga ne

N.Perndoj

TIRANË – Ekipi i përbërë nga dy ekspertë zgjedhjesh të Zyrës së OSBE-së për Institucione Demokratike dhe të Drejtat e Njeriut (ODIHR), Nikolai Vulçanov dhe Gilles Safi mbërriti dje në Tiranë me ftesë të Prezencës së OSBE-së në Tiranë. Kjo është theksuar qartë në deklaratën për shtyp të OSBE-së ku thuhet gjithashtu se vizita e tyre është në përputhje me qëllimin e deklaruar të autoriteteve shqiptare, partive politike dhe shoqërisë civile për ta përshpejtuar reformën aktuale zgjedhore dhe për ta çuar atë drejt një fundi të suksesshëm. Në njoftimin për shtyp thuhet gjithashtu se vizita zhvillohet për të çuar më tej rekomandimet e mëparshme të OSBE/ODIHR. “Vizita bëhet në kuadër të përpjekjeve të koordinuara të Prezencës së OSBE dhe të OSBE/ODIHR, për të mbështetur procesin e reformës zgjedhore në Shqipëri, përpara zgjedhjeve të përgjithshme të vitit 2005, si dhe për të çuar më tej rekomandimet e mëparshme të OSBE/ODIHR-it. Kjo përfshin një shqyrtim tërësor të Kodit Zgjedhor dhe të dispozitave të tjera ligjore për zgjedhjet”,- thuhet në njoftimin për shtyp të Prezencës së OSBE-së në Tiranë. Ekipi i ODIHR do të zhvillojë disa takime edhe me personelin e Prezencës së OSBE-së dhe përfaqësuesit e bashkësisë ndërkombëtare në Shqipëri.

[Albo]

Sekretari i përgjithshëm i PS-së deklaroi dje se ishte rënë dakord për një paketë të reformës zgjedhore

PS-PD, marrëveshje për zgjedhjet

Ruçi: Kemi arritur një marrëveshje me Topin për KQZ-në

Darina Tanushi

TIRANË – Partia Socialiste do të nënshkruajë sot me PD-në marrëveshjen për ndryshime në KQZ. Kjo është konfirmuar dje, nga sekretari i përgjithshëm i PS-së Gramoz Ruçi, i cili konfirmoi gjithashtu se kishte patur një takim paraprak me kryetarin e grupit parlamentar të PD-së Bamir Topi, ku janë përcaktuar paraprakisht ato që do t’i paraqiten sot, komisionit bipartizan. Ruçi tha se, do të ikë një nga anëtarët e KQZ-së, por nuk përcaktoi emrin e anëtarit që duket se do të jetë “kurbani” i kompromisit PS-PD. PS-ja, tha ai, i ka ofruar PS-së një paketë amendamentesh, e cila konsiston në dy drejtime kryesore. Sipas tij, së pari konsiston “në plotësimin e kërkesave të nenit 154, paragrafi i dytë i Kushtetutës së Shqipërisë, i cili thotë se, ripërtëritja e KQZ-së bëhet çdo tre vjet. Mënyra e ripërtëritjes bëhet me një ligj të veçantë, gjë që në kodin e vitit 2003 mungon. Kështu që këtu konsiston edhe paketa e propozuar nga PS-ja, PD-së”. Ndërsa së dyti, tha Ruçi, propozimet e PS-së janë të tilla: “veprimtaria e këtij kodi pushon së vepruari pas përfundimit të zgjedhjeve të 2005. Pas tyre ndërmerret një reformë e plotë zgjedhore me efekte për zgjedhjet e 2009”. Sipas socialistëve, pritet të ketë një tjetër marrëveshje që do të bëjë një reformë të plotë zgjedhore, ku përfshihet edhe ndryshimi i sistemit zgjedhor. Pas negociatave të ndryshme, shtoi Ruçi, është arritur mirëkuptimi i plotë me PD-në, me ekspertët e saj, me bashkëkryetarët e komisionit bipartizan dhe midis meje dhe zotit Topi. “Mund t’iu konfirmoj që implementimi i kësaj pakete të propozuar nga PS-ja do të mbështetet nga një marrëveshje dypalëshe midis meje dhe zotit Topi”, - theksoi Ruçi. Ndërkaq pritet që sot, rreth orës 10 të mblidhet komisioni bipartizan, i cili do të diskutojë mbi propozimet dhe marrëveshjen e arritur midis dy kryetarëve të grupeve parlamentare, Ruçit dhe Topit. Nga ana tjetër, burime nga PS-ja bënë të ditur se përveç këtij anëtari të KQZ-së ekziston mundësia e ndryshimit të mënyrës së vendimmarrjes nga 5 me 2, në 4 me 3, por kjo ende nuk është përcaktuar dhe pritet të jetë objekt diskutimi. Ruçi sqaroi sërish se paketa e propozuar kërkon të plotësojë një boshllëk ligjor, në zbatim të kërkesës së nenit 154, paragrafi i dytë i Kushtetutës, i cili thotë se ripërtëritja e KQZ-së bëhet çdo tre vjet. Mënyra e ripërtëritjes përcaktohet me ligj, tha Ruçi, por kjo sipas tij, nuk është në kod. Këtë e zgjidh pikërisht kjo paketë, tha Ruçi. “Përsa i përket asaj se sa ikin, sipas përllogaritjeve në zbatim të nenit kushtetues dhe formulimit të paragrafit të katërt në amendamentet që propozohen, i bie që të ikë një. Kush është ky, këtë nuk e marr përsipër dhe as nuk përcaktoj emër. Do të ikë ai që i takon të ikë nga Kushtetuta dhe në zbatim të Kushtetutës nga kodi”, -theksoi Ruçi. Besoj, tha ai, që kjo do të jetë marrëveshja e parë dhe e vërtetë. Nuk ka ndonjë marrëveshje tjetër që t’iua deklarojmë kështu, siç ua kemi deklaruar këtë, përfundoi Ruçi. Një ditë më parë ai është takuar me kryetarin e grupit parlamentar të PD-së Bamir Topi, në mjediset e kryesisë së Kuvendit. Ky ka qenë takimi, ku Ruçi ka dhënë “okejin” në emër të PS-së për ndryshimet e shumëkërkuara nga PD-ja në Komisionin Qendror të Zgjedhjeve. Po kështu dy bashkëkryetarët kanë diskutuar edhe për kryetarin e Komitetit Shtetëror të Kthimit dhe Kompensimit të Pronave.

[Dito]

Pa pesimizem por me realitetin kokeforte shqiptar jam i bindur qe kto zgjedhje si gjithe te tjerat do kontestohen nga palet humbese, kjo vjen si psoje e politikes shterpe ne shqiperi. Ka 10 vjet me kompromise dhe gjithmone njera nga palet nuk e zbaton kompromisin, atehere perse kete rradhe duhet te ndodhe ndryshe!
Do habitesha vertet te degjogja pas zgjedhjeve qe njera nga palet te thoshte humbem, vertet do ta vleresoja si force politike. Gjithsesi hajt se ngjohemi pas zgjedhjeve me budalliqet e rradhes nga humbesit