Flejne ne sportelet e ambasades greke!!

[Shpirt Njeriu]

TIRANE

Radhët e gjata të emigrantëve e turistëve pranë sporteleve të Ambasadës Greke janë bërë shkaktarë të ankesës së banorëve të kësaj zone në Njësinë Bashkiake nr.7 në kryeqytet. "Emigrantët dhe hallexhinjtë qëndrojnë ditënatë në sportelet e ambasadës. Nuk ka ditë që të mos na dalin probleme me ta. Kemi frikë të lëvizim natën, sepse vetëm në lagjen tonë mbidhen lloj-lloj njerëzish", thuhet në peticionin e banorëve. Eshtë e vetmja lagje që pothuajse nuk pastrohet fare. Kutitë e kartoneve nuk shqiten nga dyert e pasme të ambasadës, ndërsa mbeturinat ushqimore i shikon të hedhura vend e pavend. Edhe pse nuk kanë shumë mundësi qarkullimi, makinat i sheh të parkuara në çdo cep të ambasadës. Madje, hapësira e vetme e pjesës së pasme të ambasadës është kthyer në vend parkimi makinash që vijnë nga qytete të ndryshme. Jo vetëm kaq, por janë bërë problem dhe shitësit ambulantë, të cilët nuk ka cep të ambasadës që të mos i shohësh.

Dhe telashet s'kanë të sosur
Nuk ka ditë që në dyert dhe sportelet e Ambasadës Greke të mos ketë zënka mes emigrantëve. Radhët nuk kanë të sosur, sportelet janë bërë stres për banorët. Numërohen me dhjetëra sherre e incidente të ndodhura vetëm në këtë zonë. "Vetëm para pak ditëve ndodhi një zënkë që desh përfunduan në burg dy të rinj. Nuk ka ditë që të mos ketë ngjarje të tilla. Na është futur frika në kockë. E kemi shumë problem dhe punën e fëmijëve, duhet t'i nxjerrim me shoqërues në oborr, sepse qarkullimi i makinave është shumë problem", ankohen banorët e pallateve pranë ambasadës. Problem tjetër për ta janë bërë dhe shitësit ambulantë. Policia Bashkiake i ka hequr disa herë nga ai territor dhe ambulantët sërish u janë vërsulur dyerve të ambasadës. Eshtë e vetmja zgjidhje që ata mundohen të nxjerrin bukën e gojës.

Njësia 7
"Banorët pranë Ambasadës Greke kanë ditë që janë ankuar për rrëmujat që u shkaktojnë radhët e gjata të turistëve e të emigrantëve. Jo vetëm kaq, por ajo zonë është bërë e pakalueshme, sepse njerëzit nuk lëvizin nga oborret e pasme të godinës. Janë shfaqur vështirësi të mëdha dhe në pastrimin e lagjes, pasi radhët e gjata të njerëzve konsumojnë ushqime dhe nuk lejojnë pastrimin e mbeturinave ushqimore", u shpreh Pandeli Sara, kreu i Njësisë Bashkiake nr.7 në kryeqytet. Kreu i njësisë pohon se problemi i banorëve të kësaj zone do ketë një zgjidhje të menjëhershme. Ai shton se janë marrë të gjitha masat për përmirësimin e kësaj zone, njëkohësisht dhe për ndryshimin e kushteve të emigrantëve e turistëve, të cilët kalojnë ditënetë të tëra nëpër sportele. Jo vetëm kaq, por ka nisur puna dhe për përmirësimin e ndriçimit rrugor, sidomos në mes të lagjes, i cili ka qenë problem prej kohësh për banorët.


Çifti i moshuar, shetradhën tek ambasada helene

Një çift pleqsh, banorë të Njësisë Bashkiake nr.7, janë punësuar pranë Ambasadës Greke duke u shitur radhët emigrantëve. 2 mijë lekë vendi i parë. Kjo është dhe puna që bëjnë të moshuarit për një ditënatë. Vetëm për një ditë çifti i të moshuarve fiton 4 mijë lekë. Kanë zënë rehat në biznesin e ngritur në dyert e ambasadës dhe nuk lëvizin që andej. Jo vetëm kaq, por kanë shumë probleme me klientët. Orët e para të mëngjesit janë dhe kulmi i punës së tyre. Kanë vënë në dispozicion dhe një numër telefoni, i cili u shërben si mangnet për tërheqjen e klientelës së tyre. Janë të kënaqur nga puna që bëjnë dhe nuk kanë asnjë problem me turistët apo emigrantët. U mjafton vetëm t'u japësh paratë në dorë dhe puna e tyre mbaron me kaq.