Vritet per nje vije uji!!

[Shpirt Njeriu]

KUKES

Vetëm dy muaj kishte që e shijonte lirinë, pasi kishte dalë nga qelitë e paraburgimit. Ymer Koldashi, mësues në fshatin Ujmisht, 40 kilometër larg qytetit të Kukësit ishte arrestuar dy herë pasi ishte akuzuar për një vrasje në vitin 2001, dhe dy herë ishte liruar nga Gjykata, "për mungesë provash".

Vrasja
Ka qenë ora 21.30 minuta e të merkurës, kur disa të shtëna arme kanë prishur qetësinë e fshatit Ujmisht. Banorët e fshatit kanë vënë re pak më vonë në rrugë trupin e mbuluar në gjak të mësuesit Koldashi. Menjëherë është lajmëruar policia, e cila e ka nisur atë për në spital. Por, sa ka mbërritur në duart e bluzave të bardha ai ka vdekur. Policia ka vënë re se ai ishte qëlluar me dy plumba, një në shpinë dhe një në kokë, të cilët kanë qenë vdekjeprurës për 43-vjeçarin. Një grup i policisë kriminale dhe asaj të rendit, të cilët kanë shkuar në vendgjarje kanë nisur menjëherë kërkimin e autorëve, por deri dje në mbrëmje nuk ishte bërë i mundur arrestimi i tyre. Burime zyrtare nga Drejtoria e Policisë së Kukësit kanë bërë të ditur dje se, për këtë ngjarje janë shoqëruar disa persona. Gjithashtu, sipas uniformave blu, është bërë i mundur idenfitikimi i autorit (emri nuk bëhet publik), por deri në orët e vona të mbrëmjes së djeshme nuk është arrestuar. Policia dhe prokuroria e Kukësit kanë punuar intensivisht edhe për zbardhjen e motivit të vrasjes dhe sipas tyre, pista kryesore dhe më e mundshme që po hetohet, është gjakmarrja. Të dyshuar të policisë janë edhe dy vëllezërit e vajzës së vrarë në vitin 2001 Beqir e Lavdërim Koldashi.

Historia
Ymer Koldashi, më parë drejtor i shkollës së fshatit Ujmisht, ishte arrestuar dy herë nga policia, pasi akuzohej për vrasjen e një kushërire të tij L.Koldashi 22 vjeçe, në vitin 2001. Sherri mes familjes së mësuesit dhe kushëririt të tij kishte nisur për një rrugë dhe një vijë uji. Në atë periudhë u vra 22-vjeçarja dhe sipas policisë në atë kohë, Koldashi ka qëlluar në drejtim të kushërinjëve të tij, me të cilët ishte në konflikt, duke vrarë kështu (ndoshta aksidentalisht) 22-vjeçaren. Gjithashtu, u përfol edhe se, vajza kishte hypur në një qershi, pemë kjo edhe për të cilën ziheshin kushërinjtë. Pas disa seancash gjyqësore, gjykata e Shkallës së Parë në Kukës kishte provuar të kundërtën e kësaj dhe e kishte liruar Koldashin për mungesë provash. Më vonë, rinisi hetimi dhe drejtori i shkollës u arrestua sërish. Ndodhi e njejta gjë. Pas 7-8 seancash, e njëjta gjykatë e la të lirë Koldashin, "pasi nuk kishte prova për ta dënuar". Ndërsa të mërkurën, dy muaj pasi kishte lënë qelitë është ekzekutuar. Që nga vrasja e vajzës 22-vjeçare, familja e saj ka braktisur fshatin dhe kishte ardhur me banim në Tiranë. Fenomeni i gjakmarrjes është shumë pak i përhapur në Kukës, krahasur me rrethe të tjera të Veriut dhe Verilindjes.