Centum primus singuli semel

[Diabolis]

Perëndimi nga çatitë u zhduk,
Zemrën korçari mbi mandolinë,
Shpirtin fut greku në buzuk
Nisin këndojnë, por çfarë, s’e dinë.
Shtruar korçari, (ah, i paudhi),
Për flokverdhën me kaçurrela,
Po ja që greku ja kthen dragudhi
Me lotë vaji dhe “ela, ela”.
Dridhet Athina përmbi buzuk
Korça gufon në mandolinë,
E than greku uzon në kupë
Me fund korçari kthen rakinë.
Një natë me yje ashtu e gdhijnë
Duke kënduar për dashurinë.

[Diabolis]

Më fal e mira kineze belhollë
Që në orizore të zë mëngjezi
Por vajza ime si kokërr mollë
Nuk vë në faqe pudër orizi.
Më fal o gjuetari eskimez
Që prenë e parë më tregoke
Me dashuri asaj buzët ja ndez
Ndaj nuk i lyen me dhjamë foke.
Veç kominoja që më duhet
Dhe streha mbi akuj ngritur
Dhe gjashtëmijë vjet si dua yjet
Pas zjarrit të vajzës ngjitur;
Antarktidës akujt ja shkrija,
E populloja sa gjashtë Kina!

[Diabolis]

Zonjat përpara! Aroma mbrapa,
Dhe shpirti im nis flet përçart
Harron se jemi larg veç dy hapa,
Po sytë mbyll, dhe hundën zgjat.
E deh aroma e jargavanit,
Që kurmi i saj përhap përqark
Pranon ti shitet edhe djallit
Vetëm që të kalojë atë prag.
Ermira para, shpirti nga pas,
“Ju jeni shumë e bukur sot!”
Më shpëton prej gojës një buzagas,
Se shpirtin e dehur nuk e mbaj dot.
Po kur ja shoh dy sytë e kafta,
Përgëzimet janë më e pakta.

[Diabolis]

Porsi amforë në fund të detit
Mbushur zemra është fundosur,
Ka verë nga vreshtat e bregdetit,
Me pisë Selenice taposur.
Në taban, amforës së vjetër
Nuk i shkuan kurrë dy buzë,
Shkon një vit dhe viti tjetër,
Mijëvjeçarët bërë tërkuzë.
Ah, që kur asaj ju mbyt gjëmia,
Plot vetë u zhytën por s’e gjetën
Se vetëm një mirëpret dashuria
Vetëm atë që rriskon dhe jetën,
Besomëni mua, lum kush e gjen
Për atë verë, çdo mundim ja vlen.

[Brari]

he me te lumte o Dritero Dagolli.. i forumit..

[Diabolis]

Si një orë e vjetër që ka ngelur
Një plake dashuria i ka mbetur.
Por ka ajo një dashnor të mirë
Që e do thesarin e tij me xhevairë.

Që ja lëmon lëkurën e florinjtë
Porsi një ore lehtë ja kurdis gjinjtë,
Që plot lezet e shkon në qostek
Mu në iliqen e kopsës në jelek.

Dhe shkon ashtu tek mjeshtër Murati,
I thotë që plaka kujton se aq e pati,
Nuk i shkon më akrepi dymbëdhjetë,
Se ajo ka mbetur veç dhjetë e dhjetë.

Po mjeshtër Murati është Nobelist,
Tak fak me kacavidhë e me pincë,
Një pikë vaj, dhe zembrekun e shtrëngon
Dhe zogu i orës dymbëdhjetë këndon.

[Diabolis]

The man is only half himself, the other half is his expression.

Ralph Waldo Emerson

Kam mbetur si ka i vetmuar
Shfryj lidhur mbas plepit të shkretë,
Shiko ç’palo brazda kam lëruar
Shiko ç’vargje të shtrembër në sonete.
Më dhe dënimin më të rëndë,
Me të ikurën tënde më le gjysmak,
E ku ka ka të tërheqë parmëndë
Duke patur gomarin përkrah?
Premtomë, thuamë që do të vish
Se ja po erret e ujqrit do na çajnë.
Të ndarë? Fati ynë dihet – mish,
Kasapët prehin kamat në kasapanë,
Eja, për të shkruar duhen dy vetë,
Si për të lëruar pendë bëhen qetë.

[Elna Durrësi]

D D
Diabolis Dassaretis

Sa kurioze që jam të di me se e ushqen frymëzimin ti. Po si nuk u shtere një moment pa vargje a rimë. Të mrekullueshme të gjitha poezitë . Të lexoj çdo hera me admirim.

Me respekt

Elna.

[Diabolis]

faleminderit,
them se me jete

Me verën ti ike, më lë si trung.
Gjethet e vjeshtës pëshpërinin
“E braktisi pa i thënë një tung!”
Rrënjët mbajta mos psherëtinin.
Më vrave në gjumë, jetën s’ma more,
Dhe nga unë s’doli asnjë pipëtimë,
Thikën ma ngule, zemrën s’ma nxorre,
Në gjoks era e dimrit, ulërimë.
Do mbyll plagët dhe vjen pranvera,
Dhe ja, po këtu ku më preve ti
Në krahë do mbaj bisqe të tjera
Prej palcës do ti mëkoj me dashuri.
Madhështore është pema, vërtet,
Se lëshon bisqe, lule dhe fletë.

[Diabolis]

Kur stisësit e ëndrrave përmbi re
Të zbresin në të gdhirë pjesën tënde,
Të them zgjohu e dashur a se sheh,
Dielli çau retë vende vende.
Mos u shtriq e mos më pushto,
Më shkau nga duart tabakaja
Hapi sytë e fjetur dhe shiko
Se në krevat po të pret haja.
Të solla dy sonete të thekur
Lyer me ritëm dhe mjaltë me rima,
Një kafe figurash sapo pjekur,
Një lule, dhe musht vargjesh të lira.