Stina e verës

[PLaku-i-Detit]

stina e verës

mjekët

Në Spitalin Pediatrik shtohet ndjeshëm numri i vizitave. Ja si mund të mbrohemi nga dielli


Alarmi i mjekëve: Vapa po sëmur fëmijët

“Të miturit po rrezikohen nga temperaturat e ditëve të fundit”



Tiranë

Fëmijët rrezikohen seriozisht nga temperaturat e larta të këtyre ditëve. Rritja e temperaturave, sipas specialistëve pediatër, ka shkaktuar kryesisht probleme takikardi, ose rrahje të shpeshta të zemrës.

Sipas Artiola Tahiri, kardiopediatre në Poliklinikën Qendrore, në Tiranë rastet që paraqiten janë shtuar së fundmi. “Në këtë poliklinikë ka mesatarisht 20 raste në ditë me komplikacione shëndetësore. Bëhet fjalë kryesisht për fëmijë të moshave nga 7 deri në 11 vjeç”, sqaron ajo. Ndërkaq, në urgjencën e Spitalit Pediatrik në Tiranë, mjekët tregojnë se janë shtuar rastet që paraqiten për vizita dhe me probleme të cilat vijnë kryesisht nga rritja e temperaturave, plazhi, ushqimet, etj. Janë këto shqetësimet kryesore, për të cilat edhe mjekët japin këshilla që të evitohen shkaqet që mund të sjellin edhe pasoja më të rënda për shëndetin e fëmiëjve të vegjël.

Këshillat e mjekëve
Mjekët këshillojnë evitimin e qëndrimit jashtë gjatë orëve të nxehta të mesditës, sidomos gjatë sezonit të plazhit. Sipas mjekes Tahiri gjatë këtij sezoni është i domosdoshëm konsumimi i perimeve dhe frutave të freskëta. “Këto janë edhe më të rëndësishme, pasi hidratojnë trupin e njeriut dhe i japin lëngjet që ka nevojë më shumë, në mënyrë më natyrale”, shpjegojnë mjekët.

Ndërkaq, për t´i shpëtuar helmimit ushqimor, sipas tyre, duhet higjienë dhe gatim i plotë i ushqimeve. “Nuk duhet harruar frigoriferi, i cili mudn të bëhet shkak për prishjen e ushqimeve. Kujdesi ëm i madh duhet t´i kushtohet atyre ushqimeve që mund të prishen në momentin kur mungon edhe energjia elektrike”, thonë mjekët. Çrregullimi, sipas mjekëve, është i lidhur ngushtë me të nxehtin dhe higjienën e të ngrënit. Nuk ka ushqime të rrezikshme ose jo, mjafton t’i gatuani tamam, pa i lënë gjysmë të ziera. “Qumështi, kërpudhat apo vezët, janë mjaft të ushqyeshme dhe të nevojshme për këtë sezon, por ato shihen shpesh si aleatë të mikrobeve. Thjesht duhet të gatuhen mirë dhe të mbahen në frigorifer. Por, është më mirë që të gatuhet aq ushqim sa mund të hahet brenda një dite, që të mos e hidhni në koshin e plehrave sasinë e mbetur”, sqaron mjekja. Mungesa e frigoriferëve nëpër zonat e varfra, sipas saj, është një nga shkaqet kryesore që kushtëzon helmimet ushqimore.



Temperaturat rebele shtojnë numrin e vizitave

Gjashtë ditët e fundit në Urgjencën e Tiranës është vënë re një fluks i vizitave dhe i rasteve që paraqiten për nevojë. Sipas shefit të Urgjencës, Emanuel Dungu, me rritjen e temperaturave kanë filluar të shtohen edhe problemet me shëndetin e njerëzve. “Këto ditë është vënë re një shtim i rasteve të diarreve, të të sëmurëve kronikë, me tension dhe me probleme me zemrën. Në disa raste edhe pse nuk është tipike për kohën, është vënë re edhe shtimi i rasteve me alergji. Të gjitha këto nuk kanë pasur dallime për sa i përket moshës së pacientëve që janë paraqitur”, tha dje për “Panoramën”, Emanuel Dungu. Sipas tij, në krahasim me ditët e tjera, është vënë re një shtim i rasteve të paraqitura me 25-30 për qind. “Ne si mjekë kemi arritur në konkluzionin se rritja e rasteve ka ardhur edhe si rezultat i pranisë së pluhurave të shumta në ajër dhe i qëndrimit statik të shtresave të ajrit, që kanë ndikuar dhe ndikojnë drejpërdrejt në shëndetin e njerëzve”, sqaroi Dungu. Këto temperatura, sipas Dungut, janë temperatura rebele, që nuk bien menjëherë dhe shkaktojnë probleme në shëndet pa shkaqe mikrobiale. Ndërsa, diarretë shkaktohen më shpesh për shkak të përdorimit të ushqimeve të konservuara, të cilat janë të rrezikshme të përdoren në temperatura të larta.



Të ruhen nga dielli, fëmijët dhe pleqtë

Të moshuarit dhe fëmijët janë dy kategoritë e moshave më të rrezikuara, nga temperaturat e larta që kanë pushtuar kryeqytetin dhe të gjithë vendin këto ditët e fundit. Sipas mjekëve specialistë, të moshuarit nuk duhet të dalin nga shtëpia në orët e pikut të vapës, pasi temperaturat e larta bëhen shkak për konplikacione të tjera të funksioneve të trupit të njeriut dhe në këtë mënyrë mund të rrezikohet edhe jeta e tyre. ndërsa, për fëmijët nënat duhet të tregojnë kujdes më të madh, pasi ata janë më delikatë dhe mund të preken lehtë nga virozat e ndryshme që qarkullojnë në ajër, mund të ftohen më kollaj, pasi ndryshimi i ambjenteve në mënyrë të shpeshtë dhe ndryshimi i temperaturave, por në të njëjtën kohë edhe ajri shumë i thatë i verës, i bën më të dobët. Një nga këshillat e mjekëve është pirja sa më e shpeshtë e lëngjeve. “Uji është ndihmësi më i mirë për t´i shpëtuar vapës, sepse vera është stina që than më tepër lëngjet e trupit. Këshillojmë që të gjithë të pinë sa më shumë edhe lëngje të tjera natyrale, si dhe të hani sa më shumë perime, sepse japin sasinë e nevojshme të ujërave që nuk mund të merret as nga lëngjet”, sqarojnë ata.



Ja rastet e vdekjeve vetëm për një muaj verë

Deri tani temperaturat e larta kanë qenë shkak për vdekjen e disa njerëzve. Sipas të dhënave, në Durrës nga vapa kanë gjetur vdekjen 2 persona, ndërsa në Tiranë vetëm një. Viktima e kryeqytetit është gjetur në një cep rruge. Deri tani ai nuk është identifikuar, por mjekët theksuan se ai ka vdekur nga vapa. Një rast tjetër unik është vdekja e ushatrit italian në Vlorë. Ushtari vuante nga një sëmundje që i hapte venat. I shtrirë në krevat, nga vapa e madhe venat e tij janë zgjeruar dhe sipas mjekëve, i kanë sjellë edhe hemarogji të brëndëshme me pasojë vdekjen.



KESHILLA
Si t’u shpëtoni goditjeve të diellit, alergjive, infarkteve dhe diarresë

Mos i lini pas dore lëngjet. Uji është ndihmësi më i mirë për t´i shpëtuar vapës, sepse vera është stina që than më tepër lëngjet e trupit.
Pini sa më shumë edhe lëngje të tjera natyrale (qumësht, çaj, lëng supe).
Shmangni ushqimet e rënda dhe hani sa më shumë perime, sallatëra dhe fruta. Lajini me kujdes.
Dilni sa më pak në diell mes orëve 10.00-16.00. Është mirë që të sëmurët me tension, fëmijët dhe të moshuarit të mos dalin fare jashtë në këto orare.
Mbani sa më shpesh kapele dhe syze dielli.
Vishni rroba të lehta dhe të pambukta, që t’ju pijnë djersën.