I grabisin fabriken,merr 3 peng

[StormAngel]

Policia arreston pronarin e fabrikës, vëllanë e tij dhe mikun e tyre 30-vjeçar, i dënuar më parë për vrasje

I grabisin fabrikën, merr 3 peng


Jorgjeta Gjançi

KORÇË- Demirali Bregu punonte si shofer provizor tek fabrika e miellit në fshatin Dishnicë por nuk e kishte menduar kurrë se pronari i saj, të cilin e ka dhe fis, do ta merrte peng dhe do ta keqtrajtonte duke e akuzuar atë si grabitës të kësaj fabrike. Grabitja e kasafortës së fabrikës së miellit tre ditë më parë është menduar të zgjidhjet me vetëgjyqësi nga pronari i saj dhe dy njerëzit e tij të afërt. Pavarësisht se Zalo Bregu, pronari i fabrikës së miellit në Dishnicë, kishte lajmëruar policinë për atë që kishte ndodhur ai së bashku me vëllanë e tij dhe një person tjetër kanë vënë gishtin mbi 3 persona, njëri prej të cilëve dhe Demiraliu, dhe duke i konsideruar ata grabitës i kanë marrë peng dhe i kanë keqtrajtuar, për t’u lënë më pas të lirë nga autorët. Mbi këtë akuzë, në bazë të denoncimit të të dëmtuarve, policia e Korçës ka arrestuar dje pronarin e fabrikës Zalo Bregun, vëllanë e tij Ramadanin, 32 vjeç, dhe mikun e tyre Ferdinad Bazelli, 30 vjeç, i dënuar një herë për vrasje.
Ngjarja
Pavarësisht se policia e Korçës kishte filluar hetimet për zbardhjen e grabitjes së fabrikës, për të cilën kishte shoqëruar dhe disa persona që punonin aty, pronari Zalo Bregu, 53 vjeç, së bashku me vëllanë e tij Ramadanin 32 vjeç, të dy banorë të fshatit Dishnicë dhe mikun e tyre Ferdinant Bazelli, 30 vjeç, banor i Korçës dhe i dënuar një herë për vrasje, kanë vendosur që t’i zbulojnë vetë vjedhësit e 3 milionë lekëve në kasafortën e fabrikës. Ngjarja për të cilën ata akuzohen ka ndodhur mesditën e dy ditëve më parë ku veç e veç dhe në intervale të ndryshme kohe kanë marrë peng tre banorë të fshatit, duke i detyruar ata që të kthejnë paratë e grabitura. Viktima të kësaj vetëgjyqësie kanë qënë tre bashkëfshatarë të Zalos, Romeo Hasani, 25 vjeç, Edi Kroji, 19 vjeç dhe Demirali Bregu, 47 vjeç. Sipas policisë, pengjet janë marrë dhe janë larguar nga fshati. Ndaj tyre është bërë presion, ndërsa janë rrahur dhe kërcënuar me marrjen e jetës në rast se nuk kthenin lekët e grabitura. Po sipas policisë, njërëz të pronarit të fabrikës kanë shkuar në banesën e 25-vjeçarit Hasani dhe i kanë bërë presion nënës së tij që t’i jepnin një milionë lekë, pasi në të kundërt do t’i vrisnin djalin. Po sipas këtij burimi, në shtëpinë e Romeos ata kanë marrë 800 euro. Ka qënë nëna e Romoes ajo që ka bërë e para denoncimin lidhur me këtë ngjarje. Denoncimi i saj ka ardhur pasi ka parë djalin e rrahur barbarisht Denoncim lidhur me këtë ngjarje ka bërë dhe 47- vjeçari Demirali Bregu.
Nëna e Romit denoncon dhunën dhe grabitjen e parave
Vasilika Hasani, edukatore në një kopsht fëmijës tregon momentin kur në shtëpi i kanë shkuar njerëzit e Zalos dhe i kanë kërkuar 1 milion lekë. “Nuk e dija se ku e kisha djalin kur në shtëpi më erdhën njerëzit e Zalos. Më kërkuan t’u jepja 1 milion lek se në të kundërt do të ma vrisnin djalin para syve të mi. U tmerrova dhe fillova të ulërija”,- thotë Vasilika. Në shtëpi ndodheshin dhe dy motrat e saj të cilat kishin ardhur aty për vizitë. Ato dolën me vrap dhe mësuan se nipi i tyre akuzohej për vjedhje. Për të shpëtuar djalin njëra prej tyre u tha se do t’ua jepte ajo lekët vetëm djalin mos e vrisnin. “Motra ime shkoi në shtëpinë e saj mori lekët dhe ua dha njerëzve të Zalos. Mandej ata e lanë të lirë djalin para derës së shtëpisë”,- shprehet për gazetën Vasilika që nuk nuk mund të harrojë momentin kur ka parë djalin e saj të keqtrajtuar. Gjendja e tij, siç rrëfen nëna, ishte e mjerueshme. E kishin goditur në gjithë trupin, por dhimbje më të forta kishte në pjesët intime. Ai nuk ishte në gjendje të hynte vetë brenda. Ndërsa vetë Romeo tregon se e ka marrë me makinë Ferdinand Bazelli nga Korça. “Ai më nxorri jashtë fshatit dhe më rrahu aq shumë sa thashë se do të vdisja. Që t’i shpëtoja nga duart i thashë që të shkonim në shtëpi për të marrë 1 milion lek sa më kërkoi”.
Rrëfimi i Demiraliut
Demirali Bregu, punonte në fabrikë vetëm në ditët që kishte nevojë pronari dhe për to edhe paguhej. Baba i dy fëmijëve ai është ndier shumë i ofenduar nga qëndrimi dhe veprimet e dy vëllezërve Bregu. Me ta është rritur, por me sa duket siç shprehet ai “paraja të prishka dhe harrohet se ka gjëra që po i humbe nuk i blen dot as me para”. Demiraliu ishte mes atyre personave që u thirrën në polici pas denoncimit për grabitjen e kasafortës së fabrikës. Ai u mor në pyetje për t’u lënë më pas i lirë. Kur u kthye në shtëpi e lajmëruan se e kërkonte pronari. “Shkova në fabrikë, por Zaloja së bashku më vëllanë e tij më morrën në makinë dhe më nxorrën nga fshati. Më çuan drejt Voskopojës. Rrugës filluan të më bënin presion që të pranoja se kisha vjedhur paratë e kasafortës”,- rrëfen për gazetën babai i dy fëmijëve. Sipas tij, Ramadani e ka goditur me grushta në fytyrë dhe e ka kërcënuar. “Kur arritëm tek kthesa e Gjonomadhit ata ndaluan makinën dhe më kërkuan me forcë që unë të pohoja se u kisha vjedhur lekët. Më goditën ne fytyre dhe në pjesë të ndryshme të trupit. Kur e panë që nuk mundën të më mposhtnin me kërcënuan se në rast se nuk u dorëzoja 2.7 milionë lekë për dhjetë ditë atëherë do të më vrisnin dhe do të më flaknin në bunkerët e Voskopojës”,- rrëfen Demiraliu që ka mbetur i tmerruar. Ai nuk e mendonte se dy bashkëfshatarët e tij, me të cilët është rritur dhe është dhe fis, do të arrinin deri këtu. Jorgjeta Gjançi

Të arrestuarit
Zalo Bregu, pronar i fabrikës së miellit
Ramadan Bregu, vëllai i pronarit të fabrikës
Ferdinad Bazelli, i dënuar një herë për vrasje
Të keqtrajtuarit
Romeo Hasani, 25 vjeç
Edi Kroji, 19 vjeç
Demirali Bregu, 47 vjeç