DEVOLL
Meqë nuk e pranon në shtëpi për të jetuar me vëllezërit, një vajzë ka tentuar të vrasë të atin e saj. Ngjarja ka ndodhur në fshatin Menkulas të Devollit. Sipas policisë lokale, Julianda Ametlli ka tentuar mbrëmjen e së martës të vrasë me thikë babanë e saj, Fiqiri Ametllin. Por thika e ka plagosur këtë në këmbë. Po dje policia ka arrestuar 27-vjeçaren, me akuzën e vrasjes së mbetur në tentativë. Burime të policisë bëjnë të ditur se, sipas deklarimeve që Julianda ka bërë në komisariat, qëllimi i saj ishte vrasja e të atit, pasi ai nuk e pranonte si bijën e tij dhe e cilësonte atë të shthurur. Ndërkohë, babai i saj, Fiqiriu, ka treguar për Gazetën konfliktin e tij me të bijën dhe tentativën e saj për ta vrarë.
Kur ju kanë lindur mosmarrëveshjet me vajzën tuaj?
Në vitin 1991 unë u divorcova me gruan time. Djalin e madh e mora unë, kurse vajza, Julianda, dhe djali i vogël ndenjën me të ëmën. Pas disa vitesh mora në shtëpinë time djalin e vogël, i cili nuk donte të rrinte me të ëmën. Kështu, vajza, Julianda, mbeti vetëm me nënën dhe të dyja, prej vitit '93 jetonin në Greqi. Kur ishte vetëm 16 vjeçe, vajza vendosi të jetonte me një burrë, me të cilin ka një djalë 10 vjeç. Ajo u nda nga i shoqi para pesë vjetësh dhe tani jeton me djalin, herë në Greqi dhe herë në Bilisht. Nuk e kam ditur asnjëherë se çfarë jete bënte ime bijë, por njerëzit thoshin se ajo nuk ishte e rregullt.
Çfarë ju ka kërkuar vajza që marrëdhëniet mes teje dhe asaj janë acaruar aq shumë?
Unë refuzoja ta takoja, edhe pse ajo këmbëngulte vazhdimisht. Vajza më kërkonte që unë ta merrja në shtëpi, ku jetoj me dy djemtë dhe gruan time të dytë, por kjo gjë nuk mund të pranohej. Para dy javësh, Julianda më sjell me një shoqen e saj kameriere një letër, por unë nuk pranova ta merrja atë, duke e kthyer mbrapsht. Siç e thashë më sipër, ajo bënte një jetë të shthurur dhe unë nuk doja të fusja në shtëpi një vajzë të tillë.
Çfarë ndodhi kur Julianda erdhi për t'ju vrarë?
Pasi unë refuzoja ta takoja, ajo, më 2 gusht, rreth orës 22.30, erdhi në furrën e bukës ku punoj dhe më kërkoi që t'u ktheja përgjigje atyre që më kishte shkruar. Unë i thashë se nuk e kisha marrë letrën e saj, pasi nuk doja të kisha punë me të. Si edhe herët e tjera, kërkonte që ne të kishim një komunikim normal. Unë pikërisht këtë gjë nuk kam për ta pranuar kurrë, sepse ajo ka jetuar gjithmonë sipas kokës së saj, duke më turpëruar mua dhe familjen time. Kur ia thashë këto, ajo filloi të më godiste me çfarë t'i dilte përpara dhe u largua. Por kthehet sërish pas një ore dhe duart i mbante mbrapa. Duke parandier rrezikun, u thashë dy kolegëve të mi të punës që të largoheshin. Në këtë çast vajza sulet të më godasë me thikë në bark, por unë u shmanga dhe thika më zuri në këmbën e majtë.
"Babanë doja ta vrisja, se më mohoi për 15 vjet rresht"
Duket se 27-vjeçarja është mërzitur shumë që ka plagosur babanë e saj. Në të vërtetë, nuk është mërzitur për këtë, por për faktin se nuk ka arritur ta vrasë. Ajo ka pranuar në polici se kishte shkuar e bindur në vetvete për të vrarë të atin. Para uniformave blu ajo ka treguar edhe arsyet, sipas saj, që e kanë detyruar ta ndërmarrë këtë veprim. "Shkova në furrën e bukës ku punonte babai për ta vrarë atë, pasi ai më ka mohuar për 15 vjet rresht. Madje, nuk ka denjuar asnjëherë të pyesë se çfarë bëja unë, vajza e tij", ka thënë Julianda, e cila ka pranuar se "për të marrë rrugën me thikë në dorë, i është dashur të kthejë disa gota me pije alkoolike. "Edhe pse kisha pirë disa gota, e kisha shumë të kthjellët mendjen për të realizuar qëllimin tim, që ishte vrasja e babait", ka thënë ajo. Pasditen e së mërkurës ajo pritet të dalë përpara gjykatës për të marrë vlerësimin e masës së sigurisë. Ndërsa për fëmijën e saj tashmë do të kujdeset e ëma, e cila, bashkë me të bijën, para disa kohësh është kthyer nga Greqia dhe banonin së bashku në një dhomë në qytetin e Bilishtit.
Përgjigju Duke Cituar
Postuar më parë nga friendlyboy1
Krijoni Kontakt