PS rrezon serish dekretin e Moisiut

[StormAngel]

Vetëm për tre vota Kuvendi nuk arriti të miratojë propozimin e presidentit për anëtar të KKRT-së

Anëtari i KKRT, PS rrëzon sërish dekretin e Moisiut

Braçe: “Ulqini mashtron hapur, të ndiqet penalisht. S’kemi miratuar kandidatura për KKRT” .

Anila Rama

TIRANE- Shumica parlamentare hedh poshtë një tjetër dekret të presidentit Alfred Moisiu duke thelluar hendekun e mosmarrëveshjeve me kreun e shtetit. Votimi i fshehtë rrëzoi dje me 62 vota kundër, 59 pro dhe 3 abstenime, kandidaturën e gazetarit Lutfi Dervishi i propozuar nga presidenti Moisiu për vendin vakant në Këshillin Kombëtar të Radio Televizionit. Ndërkaq u miratuan me shumicë votash katër anëtarët e rinj të KKRT-së, sipas propozimeve të ardhura nga PS dhe PD, përkatësisht, Halil Lalaj dhe ish -kryetari e KKRT-së Sefedin Çela, të ardhur nga selia rozë, ndërsa Visar Xhiti e Agim Duro, të propozuar nga opozita. Kreu demokrat Sali Berisha, e konsideroi votimin kundër kandidaturës së Dervishit si primitivizmin e radhës të socialistëve që hedhin poshtë dekretet e presidentit pa shkaqe të mirëqëna. Ai tha se nuk kishte asnjë pasion për presidentin, por këtu po votohej në një mënyrë të papërgjegjshme duke rrëzuar një përfaqësues të njohur të botës së medias. Pavarësisht nga rezultati i votimit për kandidaturat e miratuara dje, relacioni i paraqitur nga komisioni parlamentar i Mediave, është konsideruar i falsifikuar dhe në shkelje të plotë me procedurat parlamentare nga anëtarët e këtij komisioni, Nikollë Lesi dhe Erjon Braçe. Sipas tyre, për shqyrtimin e kandidaturave të ardhura nga dy partitë politike, nuk është marrë asnjë vendim nga komisioni i Mediave si dhe dorëheqja e ish -kryetarit të KKRT-së Sefedin Çela, ishte administruar nga komisioni në 28 korrik jo në datën 27, siç paraqitej në relacionin e firmosur nga Ulqini. Madje Braçe tha se do të jepte dorëheqjen si anëtar i komisionit të Medias në rast se Parlamenti do të miratonte një vendim që nuk ishte në rregull procedurialisht. “Ulqini mashtron hapur, sepse ka sjellë në Parlament një relacion që nuk është miratuar nga komisioni. Ky veprim që ai ka bërë duhet ndjekur penalisht. Ne kemi diskutuar në datën 27 korrik për çështje të tjera dhe jo për kandidaturat që u paraqitën një ditë më pas dhe nuk u miratua asnjë prej tyre. Duhet të shtyhet votimi i anëtarëve të rinj të KKRT-së për në shtator”, -tha Lesi. Ndërsa Braçe vërejti se relacioni ishte një gënjeshtër e madhe, pasi aty thuhet se ishin miratuar kandidaturat nga komisioni 2 orë para se të miratoheshin në grupin e PS-së. Lesi dhe Braçe i konsideruan të papërshtatshëm dhe joprofesionalë kandidaturat e paraqitura nga grupet parlamentare të PS-së dhe PD-së. Por Ulqini, i hodhi poshtë akuzat e Braçes dhe Lesit, duke pohuar se çdo gjë ishte e protokolluar në komision. Në mbështetje të tij u shprehën edhe deputetët e opozitës në komision Vili Minarolli, Edi Paloka dhe Preç Zogaj, të cilët kërkuan votimin e kandidaturave të paraqitura, pasi shtyrja do të shoqërohej me humbjen e kontrollit në tregun mediatik televiziv, pasi KKRT-ja nuk mund të funksiononte me 4 vende vakant. Nga ana tjetër deputeti tjetër i komisionit socialisti Luan Rama, tha se në rast se nuk ishte bërë mbledhja në 27 korrik ai do të jepte dorëheqjen dhe të njëjtën gjë duhet të bënte edhe Ulqini.

Kandidaturat për KKRT
Lufti Dervishi 59 pro, 62 kundër, 3 abstenime
Sefedin Çela 90 pro, 24 kundër, 3 abstenime
Halil Lalaj 86 pro, 24 kundër, 4 abstenime
Visar Zhiti 90 pro, 20 kundër, 5 abstenime
Agim Duro 78 pro, 34 kundër, 10 abstenime