Irakienet ekzekutojne 12 nepaleze

[StormAngel]

Një video e shpërndarë në internet, paraqet pamje tronditëse të vrasjes së 12 punëtorëve nepalezë në Irak

Irakianët ekzekutojnë 12 pengje nepalezë


Shekulli

Njërit i pritet koka, ndërsa 11 të tjerë qëllohen me plumba nga pas. Rritet frika për vrasjen e dy gazetarëve francezë
Pamje tepër tronditëse janë shfaqur dje në një video të botuar në Internet, ku shfaqet ekzekutimi i 12 pengjeve nepalezë, nga një grup islamik në Irak. Vetëm një personi i është prerë koka, ndërsa 11 të tjerët janë qëlluar me plumba nga prapa kokës. Videoja tregon njerëz të armatosur, të veshur me kamuflazh shkretëtire, që po i prisnin fytin një personi të gjakosur, i cili qëndronte i shtrirë në tokë. Njeriu me sy të lidhur rënkoi dhe një gulçim u dëgjua më pas. Pastaj njerëzit e armatosur e shfaqën kokën e tij në kamera, para se ta linin pranë trupit pa kokë. Agjencitë e ndryshme televizive, kanë shfaqur këto pamje të marra në internet. Një nga stacionet televizive, CNN, gjithashtu i ka shfaqur këto pamje, por ka nisur punën për të parë nëse këto imazhe janë autentike. Ministria e Jashtme nepaleze, në Kathmandu, tha se nuk ka asnjë konfirmim zyrtar për atë që ka ndodhur. “Ne po kryejmë dënimin e dhënë nga Zoti për 12 nepalezët që erdhën nga vendi i tyre, për të luftuar myslimanët dhe për t’u shërbyer hebrejve dhe kristianëve… që besojnë te Buda si Zoti i tyre”, - thuhej në një deklaratë, në faqen islamike të Interentit nga Jaish Ansar al-Sunna. Kjo deklaratë u bë pasi një tjetër grup islamik, që mban peng dy gazetarë francezë, kërcënoi se do t’i vrasë nëse qeveria e Francës nuk ndryshon ligjin për ndalimin e mbajtjes së shamive myslimane në shkollat publike. Gjithashtu, kjo deklaratë në interent thoshte se do të vazhdojë luftë ndaj amerikanëve në Irak. “Amerika sot ka përdorur të gjitha forcat e saj, bashkë me ndihmën e të tjerëve, për të luftuar Islamin nën të ashtuquajturën ‘luftën kundër terrorit’, e cila nuk është gjë tjetër përveçse një kryqëzatë e egër kundër myslimanëve”, - thuhej në deklaratë. Në fund të videos katër-minutëshe, një tjetër person lexon një tjetër deklaratë, ku militantët bëjnë thirrje për të luftuar qeverinë e Irakut. “Ne do të punojmë për t’i asgjësuar ata, deri në ushtarin e fundit”, - thuhej në këtë deklaratë, cituar nga CNN.
Iyad Mansoor, drejtor i Përgjithshëm i Kompanisë “Morning Star”, një firmë shërbimesh me bazë në Jordani, që kishte punësuar me kontratë 12 nepalezët, tha se nuk kishte asnjë informacion mbi ekzekutimin e pengjeve. “Jam i shokuar nga këto lajme”, - tha ai për AP. “Gjëja e fundit që kisha dëgjuar ishte se qeveria nepaleze ishte në kontakt me disa zyrtarë irakianë, për t’i liruar 12 nepalezët”. Ndërkohë, familjarët e nepalezëve janë shokuar dhe kanë shpërthyer në vaj e lot, pas dëgjimit të lajmit. Javën e kaluar u shfaq një videokasetë në rrjetin televiziv arab Al-Jazeera, ku shfaqeshin të 12 pengjet, me pasaporta në duar. Ministri i Jashtëm i Nepalit, Prakash Sharan Mahat, tha se qeveria e tij i kishte kërkuar Al- Jazeeras, të ndihmonte në vendosjen e një kontakti me grupin militant që kishte rrëmbyer pengjet. Por asgjë nuk u arrit në këtë drejtim. Vetëm disa ditë më parë u vra pengu i fundit në Irak, gazetari italian Enzo Baldoni. Tashmë ekziston frika edhe për ekzekutimin e dy gazetarëve francezë, pavarësisht nga shtimi i përpjekjeve të Parisit për t’i shpëtuar ata. Megjithatë, në një njoftim të vonë, televizioni “Al Arabyia” bëri të ditur se ka mundësi që gazetarët francezë të lirohen. Po dje, bëhet e ditur se ka gjetur vdekjen një tjetër ushtar amerikan, nga një bombë e vënë në anë të rrugës në Mosul. Dy ushtarë të tjerë u plagosën. Gjithsej, numri i ushtarëve amerikanë të vrarë në Irak, ka arritur në 977.