Opozita shqiptare ne Maqedoni kundershton ndarrjen territoriale

[Albo]

Maqedoni/ Kundërshtohet nga opozita shqiptare dhe ajo maqedonase propozimi për decentralizimin e vendit

PDSH: Maqedonia ka vendosur enklavat e veta në kufi me Kosovën e Shqipërinë


Ylber Lili

SHKUP – “Ndarja territoriale në Maqedoni paraqet kompromis të dëmshëm për shqiptarët, sepse krijimi i enklavave maqedonase siç janë komuna e “Çuçer Sandevës” dhe e “Mavrovës”, dëshmoi se LSDM po bën pazare në oborrin e shqiptarëve”. Kështu u shpreh dje për “Shekullin” zëvendëskryetari i PDSH-së Menduh Thaçi. Sipas tij gjithkush që do të ketë rastin të shohë hartën e skicuar të ndarjes, pa asnjë vështirësi do të kuptojë një strategji paradoksale. Sipas tij, krijimi i enklavave të lë të kuptosh se maqedonasit planifikojnë të luftojnë me shqiptarët, sepse edhe ndarja bëhet në baza ushtarake siç janë lumenjtë, liqenet, malet, aeroportet etj. Duke komentuar kompromisin më të fundit që u arrit me marrëveshjen mes partnerëve të koalicionit qeverisës, drejtuesi i opozitës shqiptare konsideron se me Strugën janë bërë paraprakisht pazarllëqe, ku maqedonasit arritën të vendosin enklavat e tyre. “Kur jemi te Struga, duhet kuptuar se është bërë pazar me vendosjen e disa enklavave maqedonase në kufijtë me Kosovën dhe Shqipërinë, siç janë komuna Çuçer Sandevës dhe ajo e Mavrovës. Komuna e Mavrovës ka tre mijë banorë, ndërsa ka 4-5 herë hapësirë më të madhe se komuna e Gostivarit, e cila ka mbi 80 mijë banorë”, -tha zëvendëskryetari i PDSH-së. Ndaj kompromisit të arritur mes LSDM – BDI - PLD për ligjet e decentralizimit, ku Shkupit pritet t’i bashkangjiten edhe komunat Saraj dhe Kondovë, kanë reaguar edhe autoritetet komunale të Sarajit si dhe partia tjetër opozitare PDK-ja. “Komuna Çair e cila do të jetë me shumicë shqiptare, sipas propozimit të qeverisë do të jetë e zhveshur nga çdo objekt apo institucion shëndetësor, kulturor, ekonomik, që janë objekte jetike për zhvillimin e një komune urbane”, -i tha dje “Shekullit” kryetari i komunës së Sarajit Imer Selmani. Ai thotë se komuna Çair paraqet “getoizim maksimal të shqiptarëve në një sipërfaqe të vogël tokësore, ku nuk ekziston asnjë resurs ekonomik ose publik”. Kjo, sipas tij, ka qenë e planifikuar më herët. “Gjuha ishte ombrella me anë të së cilës LSDM-ja i imponoi BDI-së t’i pranojë disa kufij artificialë të kësaj komune, duke e dënuar që në fillim me vdekje, sepse ajo s’ka gjasa të ekzistojë”, -thotë Imer Selmani, i cili shton se problemi i gjuhës shqipe në tërë Maqedoninë garantohet me Kushtetutë. “Ne nuk pajtohemi me këtë ndarje. Kufijtë e komunave duhet të jenë natyrorë dhe konkretisht, komuna shqiptare në Shkup duhet të shtrihet deri te lumi Vardar”. Ndërkohë bëhet e ditur se maqedonasit janë hedhur në rrugë duke protestuar dhe kundërshtuar përdorimin e shqipes në kryeqendrën e Maqedonisë, pra në Shkup në Strugë ku dihet se shumica është shqiptare si dhe në Kërçovë, e cila në vitin 2008 do të jetë po ashtu me shumicë shqiptare. Këto protesta janë organizuar nga opozita maqedonase VMRO-DPMNE, e cila është kundër propozimit të ri për ndarjen territoriale të Maqedonisë.

[StormAngel]

Zevendes kryetari i PDSH-se,Menduh Thaci eshte i mendimit se enklavat maqedonase sidomos ne Shkup,Struge dhe Kercove po pregatiten per nje lufte civile.

[StormAngel]

Ja se cka po shkruan gazeta ditore Flaka per kete:
Zgjidhja e ofruar qeveritare për decentralizimin në dioptrinë e kampit politik shqiptar

BDI optimiste, PDSH, PPD dhe PDK të rezervuara

Sipas Rafiz Halitit nuk duhet të druhet se a do të kalojnë ligjet në Parlament megjithë protestat e mëdha maqedonase,pasi kjo tanimë është punë e kryer, ndërsa partitë opozitare nuk janë të kënaqura gjithaq dhe paralajmërojnë propozim amendamente gjatë debatit parlamentar

Pas propozim-zgjidhjes qeveritare për pako ligje e decentralizimit dhe organizimit territorial , opozita maqedonase ka reaguar ashpër,dhe ka organizuar protesta në disa qytete të Maqedonisë.Protestat edhe më do të masivizohen,ngaqë opozita maqedonase paralajmëron se me protesta do të mund të pengohet sjellja e ligjeve të decentralizimit dhe organizimit terriotrial.

Në këtë aspekt,partitë shqiptare nuk kanë mendim unik rreth zgjidhjes qeveritare.

Derisa Bashkimi Demokratik për Integrim thotë që protestat nuk mund të bllokojnë zgjidhjen e ofruar sepse për të janë më se 7o përqind e popullatës së Maqedonisë, partitë opozitare shqiptare nuk i komentojnë protestat maqedonase të organizuara nga opozita,por,madje paralajmërojnë se do të propozojnë amendameënte në ligjet e ofruara ngaqë ,siç thuhet, “shumë punë nuk janë të përfshira në propozimin”

Çka mendojnë partitë shqiptare lidhur me reagimet e opozitës maqedonse dhe disa qytetarëve maqedonas dhe fatin e ligjeve të decentralizimit?

Koordinatori i Grupit parlamentar të BDI-së,Rafiz Haliti thotë se “ligji për ndarjen teritoriale është i pranueshëm për të gjithë qytetarët e Maqedonisë dhe është në interes të tyre”. Sa u përket reagimeve të opozitës maqedonase,Haliti mendon se opozita maqedone thjeshtë ka humbur rrugën. Bllokadat e rrugëve dhe protestat e ndryshme të opozitës maqedonase nuk çojnë drejt asaj që të krijojmë një shtet multietnik,thotë ai dhe shton se këto janë në dëmë të vet maqedonasve.

Koncepti i BDI-së për ndarjen teritoriale, pikërisht është atë që e thonë edhe akademikët maqedonas se “duam të ndërtojmë shtet multietnik me qytetarë të barabartë” shprehet deputeti Haliti. Në pyetjen se për shkak të presionit të madhe të opozitës maqedonase, a mund të ndoshë që zgjedhja e propozuar nga Qeveria të mos kalon në Kuvend, Haliti përgjigjet se “ne kemi marrë materialin dhe kjo është punë e kryer, pavarësisht reagimeve të palës maqedonase, ligji do të votohet, sepse mbi 70 për qind e popullatës e përkrahin këtë propozim”.

Ndërsa, kryetari i Partisë Demokratike Shqiptare, Arben Xhaferi lidhur me miratimin e këtij propozimi, ka deklaruar se shqiptarët nuk kanë fituar asgjë. “Me marrëveshjen në mes partnerëve të koalicionit qeveritar, nuk është arritur asgjë, sepse deri më vitin 1996 e kemi pasur këtë ndarje të organizimit territorial. Shqiptarët nuk fituan asgjë që nuk e kishin më parë. Më brengos vetëm kualiteti i përdorimit të gjuhës shqipe. Pala maqedonase krijon iluzione se bën kompromis, por faktikisht asgjë nuk po ndodhë. Shqiptarët do ta paguajnë taksën e kompromiseve të këtillë me ligjin për decentralizim dhe me ligjin për përdorimin e gjuhëve”, pohon Xhaferi.

Kryetari i Partisë për Prosperitet Demokratik, Abdulmenaf Bexheti, lidhur me miratimin e pakos së ligjeve për decentralizim, deklaron se “ kështu siç janë propozuar zgjidhjet ligjore nuk i pranojmë”. Ai ka bërë të ditur se do të prezentohen me amendamente, edhe pse nuk presin që të jenë të pranuara. “Për këto arsye nuk do të votojmë për propozimet. Ligjet për decentralizim janë verifikuar si jotransparente. Me këtë zgjidhje nuk mendoj se është tejkaluar kriza, por ajo ende ekziston”. Ai gjithashtu ka thënë se në këtë shtet nuk ka ambient politik, veçanërisht tek partitë opozitare maqedonase, sepse siç ka shtuar ai ” reagimet e tyre janë me frustrime, të cilat për fat të keq janë të prkrahura edhe nga AMSHA”. Ndërkaq për përdorimin e gjuhës shqipe ë qytetin e Shkupit, ai është shprehur se kjo ka plotësuar vetëm një parakusht, ndërsa së pari duhet të definohet mënyra dhe kapaciteti i përdorimit të gjuhës.

Ligjet e decentralizimit nuk janë pranuar tërësisht edhe në Partinë Demokratike Kombëtare e cila shpreh rezervë edhe për kualitetin,por edhe zbatueshmnërinë e tyre ,po qe se kalojnë në Parlament

[Llapi]

AHMETI:"KEMI ZGJIDHJEN MË TË MIRË TË MUNDSHME"



Ali AHMETI, kryetar i Bashkimit Demokratik për Integrime



EVROPA E LIRË
Ndërkohë që opozita maqedonase thotë se shqiptarët kanë marrë me shume nga ajo që u takon rreth përdorimit të gjuhës shqipe në nivel të kryeqendrës së Maqedonisë - Shkupit, opozita shqiptare vlerson se cungohet e drejta e qytetarëve shqiptarë që të perdorin në nivel të duhur gjuhën shqipe, ashtu siç e garanton Marrëveshja e Ohrit. Cila është e vërteta?

ALI AHMETI
Mendoj se këtu nuk duhet të ketë dilema, pasi është Kushtetuta dhe Marrëveshja e Ohrit ajo që i sanksionon të gjitha këto probleme. Gjuha shqipe është gjuhë e dytë në perdorim zyrtar në të gjitha nivelet në Republikën e Maqedonisë dhe normat e regullat janë të përcaktuara se si do të jetë përdorimi praktik i gjuhës shqipe.

EVROPA E LIRË
Pse ishte aq e vështirë që të harmonizoheshin qëndrimet me partnerin tuaj qeverisës LSDM-në, për dy komunat në Maqedoninë perëndimore (Strugën dhe Kërçovën)?

ALI AHMETI
Tash, për të qenë i hapur më duhet të them se bisedimet lidhur me decentralizimin e pushtetit vendore më shumë kanë zgjatur brenda Bashkimit Demokratik per Integrim se sa me partnerin në koalicionin qeveritar, LSDM-në. Në BDI çështja e decentralizimit është biseduar shtatë muaj dhe sigurisht përderisa kaq kanë zgjatur bisedimet brenda një partie mendoj se shumë pak kohë na kanë marrë bisedimet me partnerin tonë qeverisës për t'u arritur marrëveshja. Në rradhë të parë kemi caktuar parimet dhe në bazë të parimeve kemi diskutuar për të gjetur zgjidhje që do të jetë e pranueshme për të gjithë qytetarët. Jo në mënyrë ideale ngase është e pamundur që të gjithë të pajtohen, por mendojmë se zgjidhja më e mirë është kjo qe e kemi aktualisht.

EVROPA E LIRË
Analistët vlerësojnë se forma e negociatave për decentralizimin pa përfshirjen e opozitës si nënshkrues të Marrëveshjes së Ohrit, ka bërë që ata pakënaqsinë e tyre ta shfaqin parmes protestave dhe bllokimit të rrugave. Cili është komenti juaj në këtë drejtim?

ALI AHMETI
Mendoj se nëse kyçej dhe opozita në këto bisedime nuk do të kishte asgjë të keqe, por zgjidhje nuk do të kishte, sepse opozita do të përpiqej për të përfituar politikisht duke thënë se nuk pajtohet për këtë ose atë ose nuk u pranua ky qëndrim ose ai qëndrim, ashtu që negociatat do të zgjasnin pafund. Përgjegjësinë për zbatimin e marrin institucionet që e kanë verdiktin e popullit dhe këto institucione e marrin dhe përgjegjësinë për të implementur këto ligje dhe në praktikë.

EVROPA E LIRË
Zoti Ahmeti, si e komentoni nismën e bllokut opozitar maqedonas si dhe një numri të akademikëve maqedonas për organizimin e një referendumi kundër propozimit të Qeverisë për organizimin e ri territorial?

ALI AHMETI
Unë mendoj se nuk është hap i qëlluar për momentin, ngase Maqedonia do angazhim pak më të gjerë si nga partitë ashtu dhe nga personalitetet e ndryshme, kështu që këtë iniciativë nuk e shoh si të rrugës, sepse një gjë e tillë mund të nxisë reaksione tek komuniteti shqiptar. Një thirrje po t'u bëhet shqiptarëve brenda javës ata do të grumbullojnë 150 mijë nënshkrime për çfarëdo iniciative që mund të ndërmerret.

Bisedoi: Zerijeta HAJRO – JAHJAGA

[StormAngel]

PDSH-ja bojkoton debatin, paralajmëron krizë


Y.Lili

Deputetët e PDSH-së nuk do të marrin pjesë në debatin parlamentar rreth pakos së ligjeve të decentralizimit, për shkak se ky proces nuk korrespondon me Marrëveshjen e Ohrit. Kështu ka deklaruar dje në Tetovë koordinatori i grupit parlamentar të kësaj partie, Zamir Dika. “Grupi parlamentar i Partisë Demokratike Shqiptare (PDSH) nuk do të marrë pjesë në debatet parlamentare rreth pakos së ligjeve të decentralizimit, për shkak se konsideron se decentralizimi nuk bëhet në pajtim me Marrëveshjen e Ohrit dhe e gjithë rrëmuja që krijohet në lidhje me këtë proces i ngjan një teatri”, -tha dje shefi i grupit parlamentar të kësaj partie, Zamir Dika në një takim me gazetarët në Tetovë. “Rrëmuja që krijohet në Maqedoni me protestat e maqedonasve në lidhje me decentralizimin është në funksion të asaj që të kalojë ky ligj, i cili është i dëmshëm për shqiptarët dhe kjo bëhet me qëllim që shqiptarët të mos hyjnë në thelbin e këtij problemi”, -theksoi Dika. Sipas tij, i tërë ky teatër organizohet nga vetë qeveria për të krijuar përshtypjen se shqiptarët fitojnë shumë, se BDI-ja qenka e fortë në negociata, se LSDM-ja është treguar e dobët. “Në fakt ky do të jetë mashtrim epokal i shqiptarëve, të cilët zhvilluan një luftë për hiçgjë. Asnjë luftë ndëretnike në botë nuk ka përfunduar me këtë lloj oferte konfuze, ku nuk dihet përfundimisht çfarë kanë fituar shqiptarët dhe kur do të realizohen këto të drejta”, -u shpreh shefi i deputetëve të PDSH-së, Zamir Dika. Zyrtarët e kësaj partie në opozitë paralajmëruan se do të ketë riciklim të krizës nëse qeveria vazhdon me këtë agoni për të manipuluar me Marrëveshjen e Ohrit. “Nëse kriza do të riciklohet, nga kjo nuk do të fitojnë as shqiptarët e as maqedonasit”, -tha Dika. Sipas PDSH-së, në Maqedoni ka krizë dhe kjo është e natyrës etnike dhe të gjitha ofertat që bëhen në hartimin e ligjeve të tilla, duhet t’i zgjidhin kërkesat etnike.
Për PDSH-në, referendumi i paralajmëruar i maqedonasve është një spektakël që ka për qëllim që të largohet nga thelbi dhe me këtë tregohet se elita politike maqedonase nuk ka ofertë konkrete dhe nuk është e gatshme që shqiptarët e Maqedonisë të jenë të barabartë me popujt e tjerë.

[StormAngel]

Debat kuvendor rrreth ligjeve të decentralizimit

Opozita kërkon “dëbimin” e Kondovës nga Shkupi

-Argument kryesor i opozitës është se kjo paraqet një kompromis për shkak të sigurimit të të drfejtës për përdorim të gjuhës shqipe në Shkup.-Qëndrimi i pozitës: Kompromis po, por jo dhe bashkangjitje e panatyrshme

Në debatin e ditës së djeshme të Kuvendit të Maqedonisë, në pjesën e parë u diskutua për amandamentin e propozim-ligjit për organizim teritorial, me të cilin kërkohej që komuna e Kondovës të ngelë në kufijtë e deritanishëm, dhe së bashku me Sarajin të mos i bashkangjitet Shkupit. Amandamenti në fjalë u propozua nga deputeti i opozitës maqedonase VMRO-DPMNE, Nikolla Gruevski.

Deputetët e opozitës gjatë diskutimit të këtij amandamenti akuzuan pozitën se propozimi i Qeverisë për bashkangjitjen e Kondovës dhe Sarajit qytetit të Shkupit, është rezultat i marrëveshjes politike për të siguruar dygjuhësinë në kryeqytetin e vendit. Ata gjithashtu kritikuan tezën e qeveritarëve se Kondova duhet t’i bashkangjitet qytetit të Shkupit, për shkak të kontrollit që do ta ketë qyteti ndaj burimit të Rashçës.

“Burimi i Rashçës ka domethënie të madhe për gjithë shtetin, për këtë edhe nuk mbanë kjo tezë, ndërsa për objekte te ketilla strategjike nuk ka dilema se ku do të jetë burimi në Kondovë, Saraj apo Novaci, por ku do që të jetë shteti, duhet të sigurojë kushte të njejta për të gjithë qytetarët”, theksoi deputeti i VMRO DPMNE-së, Spiro Mavrovski. Ai gjithashtu vlerësoi se argumenti qeveritar për bashkangjitjen e Kondovës qytetit të Shkupit është i tejdukshëm, si dhe rezultat i marrëveshjes ndërpartiake dhe shtoi se kjo bëhet për shkak të dygjuhësisë në kryeqytetin e vendit.

Të njejtin qëndrim kishte edhe bashkëpartiaku i Mavrovskit, Gjorgji Orovçanec i cili tha: “Kjo zgjedhje teknike për përpjekjet që Shkupi të jetë dygjuhësor, bëhet për shkak të nevojave të koalicionit. Kjo është një zgjedhje e gabuar si për Shkupin ashtu edhe për Kondovën”.

Ndërkaq, deputeti i Partisë Liberale, Andrej Zhernovski lidhur me këtë shtoi se Rashçja është objekt kryesor strategjik që duhet të jetë në kompetencat e Shkupit. “Ajo është një kërkesë logjike e Qeverisë, sepse në inters të çdo shkupjani është që qyteti i Shkupit t’i ketë ingerencat mbi këtë vend strategjik” tha Andrej Zhernovski.

Sashko Kedev, nga rradhët e VMRO-DPMNE-së, replikoi Zhernovskin, i cili pyeti se ky propozim a do të thotë një paralajmërim për krizë, se qyteti i Shkupit vallë duhet ta kontrollojë këtë objekt të rëndësishëm strategjik?

Zhernovski me përgjigje, se nuk duhet të lejojmë në kriza eventuale nga çfarë do lloj karakteri, burimin e Rashçes ta ruajnë njerëz të cilët nuk janë nën ingirencat e shtetit dhe të qytetit të Shkupit.

Për qëndrimin e tij, reagoi deputeti i PPD-së, Ismet Ramadani, i cili tha se ky sqarim është në një nivel shumë të ulët dhe bëhet nga diverzioni që ndjejnë ndaj gjuhës shqipe.

“Nuk i jap të drejtë, Zhernovskit në mënyrë kaq të ulët të sqarojë se s’është shumë strategjike, ta kenë nën kontrollë burimin Rashçe. “Duhet t’i kemi nën kontrollë armiqtë të cilët janë afër Shkupit dhe për deri sa nuk i kemi nën kontrollë si shumicë maqedonase atëherë mund që të na paraqitet problem’. Shumë gaboni për deri sa na trajtoni në këtë mënyrë. Shumë herë flasim në gjuhën shqipe, por deri më tani askush nuk e fitoi SIDA-në nga gjuha shqipe dhe nuk lejoj diskutime dhe ofendime të këtilla” shtoi deputeti Ramadani. Kryetari i opozitës më të madhe maqedonase, Nikolla Gruevski, theksoi se bashkangjitja e Kondovës qytetit të Shkupit, ka për qëllim të formojë territor të madh artificial dhe në atë mënyrë të sigurohet numri i nevojshëm i shqiptarëve që Shkupi të jetë dygjuhësor.

Deputeti i BDI-së, Rafiz Haliti, në replikën që dha për fjalimin e Gruevskit tha: “Nuk mban teza se në mënyrë artificiale sigurohet përqindja e nevojshme shqiptare, sepse sipas rezultateve nga regjistrimi i fundit i popullsisë, ajo përqindje sigurohet edhe në pjesët urbane të Shkupit”. Ai i bëri të ditur se komuna e Kondovës dhe Sarait kanë qenë pjesë e qytetit të Shkupit që gjatë periudhës së vitit 1974 deri në vitin 1996.

“Bashkangjitja e Sarajit dhe Kondovës është zgjedhje me kompromis, por jo edhe jonatyrore. Ajo është pjesë e funksionimit natyror të qytetit të Shkupit”, reagoi ndaj deputetit Nikolla Gruevski, ministri i Vetqeverisjes Lokale, Aleksandar Geshtakovski. Ai tha se qëllimi kryesor i decentralizimit është që qytetarët të fitojnë kushte më të mira dhe më kualitative dhe të vendosin për nevojat e tyre të përditshme.

Në diskutimin e djeshëm u diskutua edhe për amandamentin, i cili poashtu u propozua nga opozita, që komuna e Konopishtes të mbetet komunë në veti. Edhe për këtë pasuan diskutime të shumta. I cili amandament nuk u votua nga pozita.

Nga diskutimet tre ditëshe, lidhur me pakon e ligjeve për decentralizim, nga 160 amandamentet e propozuara kanë kaluar mbi 20 amandamentet, prej të cilëve asnjë prej tyre nuk është miratuar