Peng emigranti: Duam 100 mijë euro

[Genti^Itali]

Fatjon Lika është marrë peng dje nga 3 persona në rrugën Myslym Shyri, vetëm 300 metra larg Drejtorisë së Policisë

Peng emigranti: Duam 100 mijë euro

I ati, Shkëlqim Lika, ka denoncuar në polici ngjarjen. Pengmarrësit janë identifikuar dhe por kërkohen

Ened Janina

TIRANË- Merret peng 23- vjeçari në mes të kryeqytetit. Fatjon Lika është marrë peng pak pas mesnatës së djeshme nga tre persona vetëm 300 metra larg Drejtorisë së Policisë. Sipas denoncimit të bërë nga i ati, Shkëlqim Lika, pengmarrësit i kanë kërkuar atij 100 mijë euro për të liruar djalin. Lika sapo ishte kthyer nga Gjermania dhe do rrinte në Tiranë vetëm dy javë. Familja dhe policia kanë identifikuar tre pengmarrësit dhe janë vënë në kërkim të tyre. Sipas burimeve të policisë, pengmarrësit kanë qenë shokë të vjetër me Fatjon Likën. Gjatë darkës së djeshme, policia e Tiranës ka organizuar operacione të shumta për të gjetur pengun si dhe për të arrestuar tre personat e dyshuar si pengmarrës por pa rezultat. Në gatishmëri kanë qenë edhe forcat speciale të RENEA-s, të cilat prisnin zbulimin e vendit ku ndodhej pengu dhe fillimin e operacionit. Dje në mbrëmje familjarët e Fatjon Likës nuk kanë pranuar që të flasin për ngjarjen por kanë dashur që të presin përfundimin e operacionit të policisë.
Denoncimi
“Në orën 02.00 shtetasi Shkëlqim Brahim Lika ka bërë kallëzimin se është telefonuar nga një person i paidentifikuar, i cili ka deklaruar se i biri, Fatjoni, është marrë peng në rrugën Myslym Shyri. Policia po punon për gjetjen e Fatjon Likës dhe tre shtetasve të tjerë”,- thuhej në komunikatën zyrtare të policisë në lidhje me këtë ngjarje. Sipas saj, tre pengmarrësit i kanë kërkuar Shkëlqim Likës 100 mijë euro në këmbim të lirisë së djalit të tij Fatjonit. Burime nga grupi hetimor kanë pohuar dje se pengmarrja e Fatjon Likës është kryer pak pas mesnatës. Ai ndodhej në rrugën Myslym Shyri në afërsi të karburantit që ndodhet në këtë rrugë. Tre persona kanë dalë nga një makinë dhe me dhunë kanë marrë me vete djalin e ri. E gjithë skena është parë nga punëtori i turnit të natës në karburant. Ndërkohë ngjarjen e ka parë edhe një person tjetër, punonjës i Shërbimit Informativ Kombëtar, i cili ka njoftuar të atin e Fatjonit, Shkëlqim Likën. Ai i ka thënë Shkëlqimit se të birin ia kanë marrë peng tre persona. Dëshmia e tij dhe ajo e punëtorit të karburantit janë shënuar në procesverbalet e policisë në lidhje me ngjarjen. Pas kësaj, uniformat blu kanë kontaktuar edhe me familjarët e Fatjon Likës. Ata i kanë shpjeguar policisë se nuk kishin pasur probleme me askënd.
Pengmarrësit
Nga dëshmitë e familiarëve por edhe të personave që kanë parë ngjarjen, policia ka arritur që të bëjë një identifikim të pjesshëm të pengmarrësve. Njerëz të afërm me Shkëlqin Likën si dhe zyrtarë policie kanë pohuar dje për “Shekullin” se janë identifikuar disa persona mbi të cilët ka dyshime të forta se janë pengmarrësit e Fatjonit. Ata janë shokë të vjetër të tij, të cilën banojnë në zonën e Bërrylit në Tiranë. Policia ka kryer verifikime mbi këta persona por nuk ka arritur që të gjejë asnjërin prej tyre. Sipas dyshimeve të policisë, ata rrinë në zonën përreth rrygës Myslym Shyri, aty ku është kryer edhe pengmarrja e Fatjon Likës. Uniformat blu kanë kryer kontrolle të shumta në këtë zonë por pa rezultat. Ndërkohë policia i ka qendruar afër të atit të Fatjon Likës si dhe ka mbajtur telefonin e tij celular. Në këtë telefon pritet që të kontaktojnë pengmarrësit për të parashtruar kërkesat e tyre. Ky numër telefoni, ashtu si dhe telefoni i shtëpisë së familjes Lika, është mbajtur në përgjim përgjatë gjithë ditës së djeshme nga policia. Për këtë ngjarje është informuar edhe reparti i forcave speciale të RENEA-s. Një grup i këtyre forcave është urdhëruar që të qendrojë në gatishmëri në lidhje me këtë ngjarje. RENEA pritet që të ndërhyjë së bashku me policinë kriminale me një operacion blic për të shpëtuar pengun. Zyrtarët e policisë së kryeqytetit kanë mbajtur dje heshtje të plotë në lidhje me ngjarjen. Ata kanë publikuar vetëm një komunikatë të shkurtër për denoncimin e bërë nga Shkëlqim Lika por nuk kanë dashur që të japin detaje të tjera në lidhje me operacionin. Të kontaktuar në linjë telefonike nga “Shekulli”, ata kanë kërkuar që të ruajnë sekretin hetimor deri në zbardhjen e plotë të ngjarjes. Ndërkohë, dje në darkë është përhapur edhe një version i dyshimtë në lidhje me një borxh të familjes Lika. Kjo është përgënjeshtruar nga miq dhe fqinjë të kësaj familjeje, të cilët kanë deklaruar dje se Shkëlqim Lika nuk ka asnjë borxh.

[Leandra]

hajde shko ne Shqiperi po deshe...

[Genti^Itali]

Prokuroria ka pohuar dje se Fatjon Demirlika u kishte marrë borxh pengmarrësve të tij në Frankfurt të Gjermanisë

Hetimi, pengu Demirlika i kishte borxh Kodumit

Fatjoni dhe pengmarrësit kanë qenë bashkë në Gjermani ku janë marrë zyrtarisht me tregti makinash

Ened Janina

TIRANË- Prokuroria për Krimet e Rënda pohon se ekzistojë dyshime për aktivitetin e pengut Fatjon Demirlika dhe njohjes së tij me tre pengmarrësit. Fakti që Demirlika u ka pengmarrësve të tij një shumë parash borxh është konfirmuar dje nga ana e burimeve të grupit hetimor të çështjes. Sipas tyre, ky borxh është gjatë qendrimit të Fatjon Demirlikës në Frankfurt të Gjermanisë. Në po të njëjtin qytet jetonin edhe pengmarrësit, të cilët kishin lidhje me të. Dyshime ka për një implikim të mundshëm në trafikun e lëndëve narkotike. Sipas burimeve të prokurorisë, këto fakte nuk e ndryshojnë aspak akuzën e ngritur për tre pengmarësit. Ndërkohë, hetime po kryhen edhe në lidhje me plagosjen e Ilir Kodumit në nëntor të vitit të kaluar nga dy vëllezërit Erjon dhe Armando Kapollari përballë kinema Dajtit.
Dyshimet
Burime nga grupi hetimor i çështjes pohuan dje se është vërtetuar se pengu Fatjon Demirlika u ka pengmarrësve të tij një shumë që ende nuk është saktësuar. Nga hetimet e organit të akuzës ka rezultuar se pretendimi i të arrestuarit Ilir Kodumi është i saktë dhe se viktima u ka atyre një shumë parash borxh. Sipas hetimeve të prokurorisë, Fatjon Demirlika dhe tre pengmarrësit e tij kanë qenë emigrantë në Gjermani. Ata jetonin në qytetin e Frankfurtit dhe si aktivitet të deklaruar kanë pasur tregtinë e makinave të përdorura nga Gjermania në Shqipëri. Gjatë aktivitetit të tyre është grumbulluar edhe borxhi që i ka Fatjon Demirlika pengmarrësve të tij. Ndërkohë nga hetimi ka dalë në skenë dhe një tjetër detaj që ka komplikuar çështjen. Sipas burimeve nga grupi hetimor, në Gjermani ka dyshime në lidhje me aktivitetin që zhvillonin shqiptarët. Policia gjermane, kohë më parë, ka bllokuar një nga makinat në të cilën është gjetur një lëndë që nga prokuroria shqiptare është konsideruar si “e dyshimtë”. Mbi këtë çështje si dhe atë të borxhit po kryhen ende verifikime dhe prokuroria nuk ka arritur në një konkluzion të qartë. “Fakti që Demirlika i ka pasur borxhe pengmarrësve nuk e ndryshon akuzën e ngritur për ta. Ata kanë marrë peng një person dhe kjo dënohet nga ligji”,- thanë dje burimet e prokurorisë në lidhje me ngjarjen. Ndërkohë është pohuar se dhe një nga arsyet përse Fatjon Demirlika është lënë i lirë është edhe kthimi i borxhit që ai u ka pengmarrësve të tij.
Kodumi
Burimet e prokurorisë pohuan dje se hetime po kryhen edhe në lidhje me plagosjen e Ilir Kodumit më nëntë nëntor të vitit të kaluar në rrugën Myslym Shyri. Kodumi është plagosur me pistoletë nga dy vëllezërit Erjon dhe Armando Kapollari, të cilët kanë qenë shokë të tij si dhe të pengut. Pas arrestimit Kodumi ka bërë një denoncim në polici se Fatjon Demirlika ka dashur vrasjen e tij. Sipas denoncimit, ai ka paguar dy vëllezërit Erjon dhe Armando Kapollari që ta vrisnin në mënyrë që të mos paguante borxhin që i kishte. Në atë kohë Kodumi është plagosur në krah ndërsa dy vëllezërit Kapollari janë arrestuar nga policia më 29 prill të këtij viti. Gjatë këtyre ditëve pritet që prokuroria të marrë në pyetje edhe dy vëllezërit Kapollari për të zbardhur të vërtetën e denoncimit të të arrestuarit. Në prokurori Kodumi e ka argumentuar marrjen peng të Demirlikës si të vetmen mundësi që familja e tij të kthente borxhin që ai u kishte. Kodumi ka qenë i arrestuar më parë nga policia dhe i dënuar nga gjykata për akuzën e vjedhjes me armë. Ai është arrestuar në viti 1999 pasi grabiste paratë e studentëve. Kodumi shkonte në Qytetin Studenti dhe pasi u vinte granata tek koka konviktorëve u kërkonte atyre paratë. Këtë gjë ai e bënte zakonisht gjatë mbrëmjes. Arrestimi i Kodumit në atë kohë është kryer nga Komisariati i Policisë nr.1.

[PINK]

wow kisha ne mend dhe me shku ne tirane soon .. jeez .. i am not going then .. apo sjam worth $$$$$ ;PPP

pink

[Shpirt Njeriu]

Fiqrete Kodumi, nena e Ilirit te arrestuar pas rrembimit te dhunshem te emigrantit Fation Demirlika ne qender te Tiranes, u shpreh dje e indinjuar per "dajakun qe i dhane tim biri". Dhe kerkesa: "Te pakten te ma mjekojne ne spital". Hetimet zbardhin se pengu i kishte borxh tre grabitesve te tij, dy ngarkeesa heroine me vlere 100 mije euro

Dashamir BICAKU

TIRANE - "Nese djali yne beri ate qe thone, policia te mos e katandise ne ate gjendje dhe te pakten ta coje ne spital dhe ta mjekoje". Me keto fjale ka pershkruar dje per "Korrieri"-n, lajmin e arrestimit te djalit te saj Ilirit, Fiqrete Kodumi duke shtuar se "per ate qe policia i ka bere djalit, do te ankohem ne te gjitha instancat shteterore". Jo shume larg vendit ku te dielen ne mesdite, disa persona moren peng 22 vjecarin Fation Demirlika, banon Ilir Kodumi, 21 vjecari i arrestuar nga policia pikerisht ne lidhje me kete ceshtje. Vetem 200 metra poshte karburantit "Sik Oil", ne krahun e tij, ne nje rrugice te vogel, thuajse ne krye te saj, ndodhet nje dere e kuqe te ciles i ka dale paksa ngjyra. Brenda mureve te saj, ndodhet nje shtepi e vjeter, ne gjendje jo te mire, ndertuar dekada me pare. Gjendja e saj, pamja e saj nuk te le vend per aludime. I perket nje familjeje, ne gjendje jo te mire ekonomike.

"Im bir gaboi"

Fiqretja, nena e Ilirit, nje grua rreth 50 vjece, e veshur thjeshte, me floke te shkurtera te cileve sapo ka filluar t'iu bjere boja e tyre e ngjyre roze. Duket se i vjen keq me teper per faktin se i biri eshte rrahur ne rajonin e policise, pas ndalimit, se sa per faktin se ai tashme rrezikon jo pak vite burg, per rrembimin e kryer ne bashkepunim me dy miqte e tij, Gjergji Cukalin dhe Lerbi (Ledio) Liton. Edhe keta te dy, banojne thuajse ne te njejten lagje me Ilirin, tashme i arrestuar nga policia, ndersa ata te dy munden te shpetonin fale faktit se Iliri, ishte personi qe do te merrte parate ne brendesi te varrezave, ne Tufine. Ajo eshte e ndergjegjshme per veprimin qe ka kryer i biri, kur ka bashkepunuar per te marre peng, Fatjon Demirliken, nje personazh per te cilin ajo shprehet se nuk e njeh. Po keshtu ajo thote edhe per dy te tjeret e shpallur ne kerkim nga policia. "Im bir nuk ka vepruar mire, kur ka marre peng nje njeri, por askush nuk mund te dhunohet dhe te rrihet ne nje menyre te tille barbare".

"E mesova nga mediat"

Nena e pengmarresit te dyshuar kujton kur ka pare per here te fundit te birin,. "Te dielen ai doli si perdite dhe tha se do te takonte disa shoke. Ne mbremje nuk erdhi ne shtepi. Policia erdhi ne shtepi dhe pas nje kontrolli, u largua qe ketu". Me tej, gruaja e moshuar tregon se mezi ka qendruar kur ka pare nepermjet televizionit, te birin e nxire ne polici. Ajo shton se nuk ka mundur te shohe te birin, pervecse ne televizion, ndersa i kishte cuar disa rroba ne komisariatin nr.3 ne Tirane.

"Te pakten ta mjekojne"

Fiqretja ka kerkuar qe se paku te birit, t'i jepej nje mjekim dhe ai te mos dergohej menjehere ne qelite e paraburgimit, te 313-es. "Te pakten ta dergojne ne spitalin e burgut, ku edhe mund te mjekohet dhe mund te behet me mire",- thote Fiqretja, nena e Kodumit. Nderkaq ajo shton se do te ankohet, por pak beson se mund te gjeje zgjidhje. "Do ta provoj, ne ministri, tek Avokati i Popullit, apo gjetke". Do te presim qe Gjykata t'i caktoje nje avokat, se ne nuk kemi para, - thote Fiqiretja e cila e ka mesuar nje procedure te tille, per shkak se djali i saj, eshte perballur me togat e zeza, disa here, per vjedhje dhe shperndarjes droge.

[DeuS]

Qe ne fillim, kur lexova kete ndodhi, me shkoi mendja qe kishte ndonje femer, miell, apo pisllik tjeter ne kete mes.

Jam plotesisht dakort me nenen e Ilirit.
Edhe pse eshte kriminel, nuk duhet te trajtohet ne ate menyre nga forcat e policise.
Denimin rreth krimit qe ka bere e vendos gjykata. Prandaj kemi burgjet, gjobat etj...

Por druvaret qe marrin rrogen te veshur si police aq tallazh kane brenda kafkes...
Aq tallazh kane edhe pushtetaret qe lejojne njerez te tille te vishen police , aq me keq qe nuk reagojne ndaj veprimeve te tilla. Derra dhe inkompetente jane pothuajse 80% e forcave te rendit. Personalisht e denoj kete akt dhe uroj qe ne te ardhmen numri i druvareve ne polici te pakesohet. Uroj qe njerez kompetente dhe mbi te gjitha me shkolle te veshin uniformen e nderuar te policit.

Ketu ku jetoj une , polici perfaqeson shtetin.
Polici eshte nje fugure e nderuar dhe respektuar nga shumica e popullsise.
Kam hasur raste ku terroristet jane kapur nga policia , por nuk pashe ndokend te masakroje tjetrin. Kam pare raste ku manjaket , te cilet kishin kryer serial vrajse mizore dhe barbare jane arrestuar nga policia , por prape nuk i pashe kriminelet me gjak , shenja ne fytyre , apo demtime te tjera. Trafikante te medhenje droge jane arrestuar , por jo ne kete menyre.

Jemi shume mbrapa bote or vellezer!

Te me kuptoni drejte , nuk me vjen keq ndopak per grabitesit , thjesht nuk bie dakort me menyren sesi porcedojne forcat e rendit ne Shqiperi!

[friendlyboy1]

100mij Eruo ?! O My God. Kta me duket se po e bejn si Dr Evil te Austin Powers :"I want...100 BIlion dollars, or I'll blow out the world". Ska bota aq para sa kerkojn keta. Qenkan ftohur ne prapanic.

[StormAngel]

Gjergji Cukali dhe Ledio Lito janë arrestuar dje nga policia në Grabian të Lushnjes. Me ta është arrestuar dhe Eduart Skukaj

Kapen në Lushnjë dy pengmarrësit e tjerë të Fatjon Likës

Policia ka gjetur dje në banesën e braktisur edhe armët me të cilat është kryer pengmarrja e Fatjon Demirlikës

Ened Janina

TIRANË- Arrestohen dy pengmarrësit e tjerë të Fatjon Demirlikës. Gjegji Cukali dhe Ledjo Lito janë prangosur dje nga policia e kryeqytetit në bashkëpunim me atë të Lushnjës. Dy të kërkuarit ishin fshehur në fshatin Grabian të Lushnjes në shtëpinë e shtetasit Ejup Skukaj. Dje policia ka arrestuar edhe Eduart Skukaj, nipin e strehuesit të dy të kërkuarve. Policia ka mundur dje që të sekuestrojë edhe armët me të cilat është kryer pengmarrja e Fatjon Demirlikës. Lajmi është pohuar dje nga burimet zyrtare të policisë së kryeqytetit. Sipas tyre, arrestimi i dy të kërkuarve është bërë në orën 06.00 të mëngjesit të djeshëm dhe po dje të arrestuarit janë sjellë në Tiranë.
Operacioni
Në rrugë operative policia e kryeqytetit ka zbuluar se Gjergji Cukali dhe Ledjo Lito ishin larguar nga Tirana menjëherë pas arrestimit të Kodumit dhe lirimit të pengut. Sipas informacioneve që kishte siguruar policia, Cukali dhe Lito ishin fshehur në rrethin e Lushnjes dhe më saktësisht në fshatin Grabian. Agjentët e policisë kanë arritur të saktësojnë se Cukali dhe Lito ishin fshehur në banesën e shtetasit Ejup Skukaj. “Që nga dita e shpalljes në kërkim të këtyre shtetasve strukturat e policisë kriminale të kryeqytetit zhvilluan një punë intensive dhe mjaft profesionale për të bërë lokalizimin e vendndodhjes së tyre, ç’ka u bë e mundur në një kohë shumë të shkurtër”,- tha dje kreu i policisë së Tiranës, Albert Dervishi. Pas grumbullimit të të gjitha të dhënave, policia e kryeqytetit dhe ajo e Lushnjes kanë ngritur një grup të veçantë pune për të kryer arrestimin e dy të kërkuarve. “Në orët e para të mëngjesit të sotëm (dje) në bazë të një plani operacional të hartuar me shumë kujdes, duke patur parasysh edhe rrezikshmërinë që paraqisnin personat e lartpërmendur, forcat e Komisariatit Nr.3 të Policisë së Tiranës dhe forcat e Komisariatit të Policisë së Lushnjes kanë kryer operacionin në fshatin Grabian dhe rreth orës 06.00, u bë e mundur t’i vënë në pranga Gjergji Cukalin dhe Ledio Liton”,- pohoi përpara gazetarëve Drejtori i Policisë së Tiranës. Sipas tij, Cukali dhe Lito ishin në banesë në momentin e arrestimit. Ndërkohë në prangat e policisë ka rënë edhe nipi i të zotit të shtëpisë, shtetasi Eduart Halim Skukaj. Ai është personi që ka ndihmuar dy të kërkuarit që të fshihen nga policia dhe u ka vënë në dispozicion banesën e xhaxhait të tij.
Hetimi
Pas arrestimit, policia kreu një kontroll të imtë në banesën e Skukajt dhe si rezultat u zbuluan dy pistoleta dhe një armë automatike tip kallashnikov të cilat i mbanin pa leje. Sipas drejtorit Dervishi, nga hetimet paraprake rezulton se me këto armë është realizuar edhe pegmarrja e shtetasit Fatjon Demirlika. Hetimet në lidhje me këtë çështje po kryhen në një bashkëpunim të ngushtë ndërmjet policisë së Tiranës dhe Prokurorisë për Krimet e Rënda. Dje përpara gazetarëve kreu i policisë së kryeqytetit, Albert Dervishi tregoi disa nga të dhënat e hetimit. Ai shpjegoi se ende nuk janë sqaruar të gjitha detajet e pengmarrjes dhe se nuk është zbuluar as motivi i saktë i saj. Ekistenca e një borxhi në mes ia ka vështirësuar punën grupit hetimor, i cili gjithsesi e konsideron aktin e gjashtë ditëve më parë një pengmarrje. Kreu i policisë së Tiranës ka pohuar dje se po hetohet edhe në lidhje me pengun. Pyetjes së gazetarëve se është apo jo në hetim Fatjon Demirlika, Dervishi i është përgjigjur duke thënë se po hetohet edhe mbi të por është shumë herët që të flitet për gjëra konkrete. Gjithashtu ai ka pohuar se po hetohet edhe në lidhje me implikimin e një çështjeje droge në të gjithë këtë histori pengmarrjeje. Ai ka pohuar se në bashkëpunim të ngushtë me Prokurorinë për Krimet e Rënda po punohet për zbardhjen dhe dokumentimin e plotë të veprimtarisë kriminale të këtij grupi.

[StormAngel]

Prokuroria ka deklaruar dje në gjykatë se Florian Metalla ka folur në telefon me kunatin e tij, Cukalin, për pengun

"Demirlika", Metalla ishte ndërmjetës në pengmarrje

Gjykata ka vendosur burg pa afat për të arrestuarin. Metalla: Jam i pafajshëm, s’kam lidhje me pengun

Ardita Hysa

TIRANË – Përfundon në burg pa afat edhe pengmarrësi i pestë i Fatjon Demirlikës. Gjykata e Krimeve të Rënda, ka lënë në fuqi dje vendimin e marrë në mungesë dy ditë më parë për lënien në qeli të Florian Metallës. Ky i fundit ka preferuar të mos shprehet dje para togave të zeza dhe ka miratuar pretendimin e mbrojtjes së është i pafajshëm. Akuza e ngritur ndaj tij, nuk ka patur ndryshim nga ajo e Gjergji Cukalit dhe Ledio Litos, Eduart Skukës dhe Ilir Kodumit, mbajtje peng e personit e shoqëruar me tortura fizike dhe psikologjike. Si përfaqësues i Prokurorisë së Krimeve të Rënda, prokurori Altin Dumani ka provuar përpara gjykatës implikimin e Metallës në marrjen peng të Demirlikës para dhjetë ditësh. Sipas provave të paraqitura në gjykatë nga Dumani, i pandehuri është kunati i të akuzuarit tjetër Cukali, dhe kishte komunikuar me të në telefon në kohën e kryerjes së veprës penale. Një bisedë e tillë, që ishte regjistruar nga policia dhe është përdorur kundër tij. Sipas avokatit Detar Hysi, kjo ishte e vetmja provë që paraqiti dje në gjykatë prokurori Dumani. Së bashku me avokatin tjetër, Ardian Ndoja, Hysi ka vendosur ta apelojë vendimin që iu komunikua dje 28-vjeçarit Metalla. Dy mbrojtësit e Metallës janë gjetur pak të papërgatitur për seancën e djeshme, dhe siç tha Hysi për “Shekullin”, ata kanë pohuar se nuk kishin në dorë provat që e implikonin klientin e tyre në pengmarrjen e dhjetë ditëve më parë por tashmë do të përgatisnin më së miri mbrojtjen. “Edhe në denoncimin që kishte bërë në polici i ati i pengut Shkëlqim Demirlika, nuk është përmendur në asnjë vend emri i Florianit”,- vazhdoi Hysi. Pas arrestimit të Cukalit, Metalla u kishte kërkuar të dy avokatëve të bënin mbrojtjen e burrit të motrës, dhe nuk i kishte shkuar ndër mend se do të binte vetë nën pranga. Arrestimi i tij është bërë tre ditë më parë në Sukth, dhe është cilësuar nga akuza si ndërlidhësi i grupit të pengmarrësve. Siç e ka lexuar edhe dje prokurori Dumani, detyra e Metallës ka qenë të bënte lidhjet e mundshme për të kërkuar 100 mijë eurot nga familjarët e pengut. Gjithashtu, po sipas akuzës, ai është edhe personi që kishte marrë makinën e shtrenjtë të Demirlikës, të cilës pasi i kishte ndërruar targat, e kishte fshehur në një parking në Tiranë. Ky fakt ishte provuar pas gjetjes së makinës, me vënien nën pranga të Cukalit, Litos dhe Skukës. Në dorezën dhe timonin e automjetit ishin verifikuar gjurmët e gishtave të Metallës. Arrestimi i tij, ku ishin angazhuar efektivët e komisariatit nr.3 në kryeqytet dhe të atij të Durrësit, ishte mbajtur i fshehtë për një ditë të tërë me shpresën se pas tij do të bëheshin edhe arrestime të tjera. Policia ende dyshon në ekzistencën e një rrjeti të mundshëm të trafikut të drogës. Por një pistë e tillë është hedhur poshtë nga prokuroria, gjatë hetimeve të deritanishme të marrjes peng të Demirlikës.

[StormAngel]

Policia ka kërkuar ndihmën e homologëve gjermanë, për zbardhjen e aktivitetit të pengmarrësve në Gjermani

Pengmarrësit, hetime në Gjermani

Policia dyshon se grupi i pengmarrësve ka vendosur gjoba të tjera. Priten denoncimet e të dëmtuarve

Artur Qoraj

TIRANË- Policia shqiptare u kërkon ndihmë homologëve gjermanë për të zbardhur aktivitetin e plotë të grupit që mori peng dhjetë ditë më parë Fatjon Demirlikën. Burime zyrtare të policisë thanë për gazetën “Shekulli” se pas zbulimit të ngjarjes dhe arrestimit të autorëve pengmarrës, dyshohet se ata kanë patur një aktivitet të paligjshëm edhe në Gjermani, ku mendohet se kanë nisur përplasjet e grupit. Për të zbardhur aktivitetin e tyre në Gjermani, policia ka kërkuar dokumenta të tilla si aktiviteti ligjor që kryenin aty, nëse ishin të punësuar apo kishin ndonjë biznes si dhe përgjime apo hetime për trafik të lëndëve narkotike përgjatë këtyre viteve. Policisë gjermane i është dërguar një faks, disa ditë pas arrestimit të grupit të pengmarrësve dhe sigurimit të dëshmisë së Fatjon Demirlikës, i cili u lirua nga policia gjatë momentit që ishte përgatitur kurthi i dorëzimit të 100 mijë eurove. Pala shqiptare u kërkonte homologëve gjermanë të dhëna për aktivitetin e pengmarrësve në Gjermani si dhe për precedentë që ata mund të kenë pasur gjatë qëndrimit të tyre në këtë vend.
Hetimet
Veprimtaria në Tiranë e pesë të arrestuarve për veprën penale të “rrëmbimit të personit dhe gjobëvënies” po hetohet nga një grup agjentësh të policisë kryeqytetase. Zyrtarë të policisë dyshojnë se anëtarët e këtij grupi kanë vendosur gjoba ndaj disa biznesmenëve të kryeqytetit dhe se kanë kryer të tjera vepra penale të rënda. Po për t’i faktuar këto dyshime është kërkuar të punohet në rrugë operative. Burime të sigurta policore thanë për gazetën “Shekulli” se po tentohet që të afrohen të dëmtuarit nga grupi në fjalë gjatë viteve të kaluara dhe deri më sot. Agjentët që kanë në dorë këtë çështje po përpiqen të grumbullojnë denoncime që lidhen me vënien e gjobave nga ky grup ndaj biznesmenëve apo njërëzve të tjerë në Tiranë. Deri në momentin e sigurimit të ndonjë dëshmie të tillë nga qytetarët e Tiranës, këto prova operative do të mbeten të tilla dhe vetëm dyshime për pjestarët e rrjetit që u përça pas prishjes së pazareve.
Precedentët penalë
Pothuajse të gjithë anëtarët e grupit që morën peng Fatjon Demirlikën kanë precedentë penalë të mëparshëm. Gjergj Cukali,i njohur si “truri” i planit të pengmarrjes ishte arrestuar më parë për vjedhje, Ilir Kodumi për plagosje ndërsa Florian Metalla akuzohet për vrasjen e Edmond Çullhajt në Londër, ngjarje kjo e ndodhur në janar të vitit 2002. Pas pengmarrjes së Fatjon Demirlikës, policia pohoi se shkak për këtë ngjarje është bërë prishja e pazareve të jashtëligjshme, ndërsa organi i akuzës mbrojti idenë e pengmarrjes për qëllime fitimi. Por pak ditë pas lirimit të Demirlikës, fare pranë banesës së tij u qëllua për vdekje Endri Shima dhe u plagosën dy miq të tjerë të tij. Dyshimet e para kishin të bënin me një hakmarrje të mundshme të njerëzve të afërt të pesë personave të arrestuar nga policia e Tiranës për pengmarrjen. Burime nga policia kryeqytetase pohuan se janë identifikuar autorët e vrasjes së Shimës dhe plagosjes së dy miqve të tij, ndërkohë që arrestimi i këtyre personave nuk është bërë ende i mundur nga policia. Ndërkaq, autoritetet policore janë duke pritur ndihmën e homologëve gjermanë për zbardhjen e aktivitetit të grupit prej 5 anëtarësh gjatë qëndrimit të tyre në Gjermani.

Gjergji Cukali, 25 vjeç, nga Tirana akuzohet si autor i pengmarrjes së Fatjon Demirlikës. Cukali ka qenë i dënuar më parë me 7 vjet burg për plagosjen e një shtetasi, falsifikim dokumentesh dhe shpërndarje droge

Ledio Lito, 24 vjeç, banues në Tiranë akuzohet nga prokuroria si autor i pengmarrjes së ndodhur më datë 18 korrik. Ledio Lito ka qenë i dënuar më parë nga drejtësia për veprat penale trafik dhe shpërndarje droge

Ilir Kodumi, 19 vjeç, nga Tirana, akuzohet si një nga pengmarrësit e Fatjonit. Ai ka qenë i dënuar për vjedhje me dhunë, armëmbajtje pa leje dhe shitje droge. Kodumi ishte shpallur në kërkim për tentativë vrasjeje

Eduart Skukaj, 23 vjeç, lindur në Grabian të Lushjes dhe banues në Tiranë akuzohet nga prokuroria si bashkëpunëtor në pengmarrje. Ai ka strehuar në shtëpinë e xhaxhait të tij Gjergji Cukalin dhe Ledio Litën

Florian Metalla, 28 vjeç, lindur në Shijak dhe Banues në Sukth, akuzohet nga prokuroria si bashkëpunëtor në pengmarrjen e Demirlikës. Ai ka marrë makinën e shtrenjtë të pengut dhe ka ndihmuar në pengmarrje