Vdekje mister, zhvarroset emigranti

[Genti^Itali]

Dyshimi i familjarëve se djalin e tyre e kanë vrarë e detyron prokurorinë që të urdhërojë zhvarrimin

Vdekje mister, zhvarroset emigranti


Kujtim Boriçi

PËRRENJAS - Zhvarroset 3 ditë pas ceremonisë mortore emigranti 18-vjeçar që u gjet i vdekur në rrethinat e Tetovës së Maqedonisë. Ermal Skura u zhvarros dje me urdhër të prokurorisë së rrethit, pas pretendimeve të familjarëve se djali i tyre është vrarë me sende të forta. Ndërkohë sipas versionit zyrtar të policisë maqedonase i riu nga Përrenjasi ka humbur jetën pas një infarkti. Paraprakisht, sipas mjekëve, eksperto-ligjorë, Bardhyl Cipi, Besim Ymaj, Liman Mënalla, mësohet se kufoma nuk kishte shenja dhune me pasojë vdekjen. Por gjithsesi, sipas tyre, për dhënen e konkluzionit përfundimtar do të duhen edhe dy javë kohë, pas ekspertizës histopatologjike dhe asaj toksilogjike.

Familjarët
“E nisëm djalin në kurbet nga halli, për të na siguruar bukën e gojës, pasi ishte dhe më i madhi i fëmijëve, por na u kthye i vdekur. Nuk dimë sa ka vuajtur, ç'vdekje pati, se për ne kjo nuk është vdekje e natyrshme”, thonë prindërit e Ermalit, Rakipi dhe Çveta. Ndërsa zhvarrosej kufoma e 18-vjeçarit, të njëjtin version pohuan dhe Agim Skura, djali i xhaxhait të viktimës dhe Dilaver Skura, një i afërmi i tij, të cilët ishin në morgun e Tetovës për të sjellë në vendlindje të riun nga Përrenjasi. Zyrtarët maqedonas që takuam atje na thanë se Ermali kishte gjetur vdekjen nga infarkti, shton Agimi, i cili siç tregon më tej u ka thënë atyre (zyrtarëve maqedonas) se një gjë e tillë nuk është e vërtetë. “Në fyt dhe në trup Ermali kishte shënja dhune, në gojë gjak të tharë”, vijon Agimi.

Zhvarrimi
Në prezencë të prokurorëve të rrethit, mjekëve eksperto-ligjorë Bardhyl Cipi, Besim Imaj e Liman Mënalla të ardhur nga Tirana dhe shumë të afërmëve të viktimës, zhvarrimi nisi në orën 10:00 dhe vazhdoi deri në orën 11:15 të ditës së djeshme. Më pas kufoma e të ndjerit , u dërgua më pas për ekspertizë në spitalin e Përrenjasit. Burime të rezervuara pranë ekspertëve, paraprakisht konfirmojnë se në trupin e viktimës nuk janë konstatuar shenja të qarta dhune që kanë sjellë vdekjen. Por njëkohësisht, sipas tyre, është e domosdoshme, që të përfundojë ekzaminimi histopatologjik e ai toksikoligjik në kryeqytet, për të nxjerrë kështu konkluzionin përfundimtar. Pas mesditës, trupi i të ndjerit u përcoll përsëri në varreza.


Ermali, që 13 vjeç emigrant
Familja e Ermalit banon në katin e dytë të ish-konviktit të minierave, në periferi të qytetit të
Përrenjasit. Të afërmit tregojnë se Ermali ishte djali i madh i familjes Skura, që tashmë ka dy djem dhe një vajzë. Për shkak të kushteve të këqija në të cilën jeton familja Skura, djali ishte detyruar që të emigronte që moshën 13 vjeç. Ai merrte rrugën e emigrimit kryesisht gjatë muajve të verës. “Iku dy muaj më parë dhe gjatë kësaj periudhe punoi si çoban tek një shqiptar i maqedonisë”,- thonë të afërmit e tij, të cilët nuk ngurrojnë të thonë dyshimet se djali i tyre është vrarë për motive grabitjeje. Nga ana tjetër, të afërmit nuk i falin zemërgurësinë pronarit maqedonas, që ndonëse i kërkuan ndihmë (duke i premtuar dhe para) për të sjellë trupin e Ermalit në Shqipëri, mbajti një qëndrim jo
njerëzor. Aty mes të afërmëve të familjes Skura mësuam dhe një fakt tjetër të dhimbshëm. Një bashkëfshatar i Ermalit (familja Skura vetëm pak kohë më parë është zhvendosur në qytet nga fshati Pishkash, 5 km larg Përrenjasit), 21- vjeçari Besart Brisku, pak kohë më parë u gjet i vdekur në fshatin Poroj të Tetovës. Trupi i tij, i mbuluar me shkarpa,u diktua nga era e dekompozimit, ndërkohë që megjithë përpjekjet e familjarëve, vdekja e 21-vjeçarit ka mbetur enigmë. Familjarët e viktimës nuk ngurrojnë të thonë se "dikush vret fëmijët tanë emigrantë sezonalë që punojnë andej për bukën e gojës". Ndoshta i vrasin për para, thotë xhaxhai i viktimës së fundit, por djemtë po na ikin.

[Administrator1]

E mor Genti !!
Kjo është një nga qindra histori të dhimbshme të mërgimit.
Por sot nuk kemi viktima vetëm nga mërgimi, por dhe në Shqipëri.
Nuk janë vetëm ''të ikurit jashtë'' që pakësohen, por dhe vetë djemtë në atdhe.
Mungojnë ligjet (ose nuk zbatohen) mungon siguria, mungojnë kërkesat më themelore për një jetë të sigurt dhe të qetë.
Vritet njeriu si kafshë, për një fjalë goje.
Kujt shekulli i jemi rikthyer vallë??

[Genti^Itali]

ADMINISTRATOR1 ca ti besh lal kshu e ka jeta:
Megjithate jeta vazhdon per te gjith "te vdekurit me te vdekurit & te gjallet me te gjallet"