Tiranë, kapet super-hajduti i 13 vjedhjeve

[Genti^Itali]

Domeniko Kol Doda është arrestuar nga policia si autor i 13 vjedhjeve të ndryshme të ndodhura në kryeqytet

Tiranë, kapet super-hajduti i 13 vjedhjeve

Policia ka filluar operacionin për ruajtjen e banesave dhe makinave të qytetarëve gjatë sezonit veror

Ened Janina

TIRANË - Policia e kryeqytetit arreston një superhajdut të firmave dhe shoqatave të ndryshme. Domeniko Kol Doda është arrestuar nga uniformat blu të kryeqytetit me akuzën e vjedhjes. Arrestimi i tij është bërë për dy vjedhje të ndodhura në Tiranë. Ndërkohë, verifikimi i gjurmëve të gishtërinjve ka treguar se Domeniko Kol Doda është autori i 11 vjedhjeve të tjera të ndodhura në kohë të ndryshme në Tiranë. Ndërkohë, policia e kryeqytetit ka filluar një operacion për ruajtjen e rendit dhe parandalimin e veprave të ndryshme kriminale gjatë sezonit të verës. Kjo pasi qytetarë të shumtë kryeqytetas largohen nga banesat e tyre për pushime dhe në këtë kohë grabitësit e banesave hidhen në sulm. Lajmi është pohuar dje nga burimet zyrtare të Drejtorisë së Policisë së Qarkut Tiranë. Sipas tyre, operacioni do të vazhdojë deri në fund të sezonit veror të pushimeve.

Arrestimi
Dy ditë më parë efektivat e Komisariatit të Policisë Nr.3 në Tiranë kanë kryer arrestimin e shtetasit Domeniko Kol Doda, 26 vjeç, për veprën penale të vjedhjes. Ndaj tij kishte dalë një urdhër-arresti si autor i dy vjedhjeve të kryera në Tiranë. Nga hetimet e policisë kishte rezultuar se 26- vjeçari Doda ishte autori i vjedhjes së kryer në firmën “Estidem” dhe në atë të kryer në zyrat e Shoqatës së Grave Kristiane. Duke u bazuar në këto materiale uniformat blu i kanë hedhur prangat shkodranit me banim në Tiranë. Atij i janë marrë gjurmët e gishtërinjve dhe janë krahasuar me ato të gjetura në disa vjedhje të tjera të ndodhura në territorin e Qarkut Tiranë. Nga verifikimi ka rezultuar se Domeniko Kol Doda, 26 vjeç, është autori i 11 vjedhjeve të tjera të ndodhura në Tiranë kohët e fundit. Objektivi i tij kishin qenë selitë e shoqatave të ndryshme, zyrave shtetërore dhe firmave private. Me anë të thyerjes ai kishte arritur që të kryente 13 vjedhje. Madje i arrestuari kishte arritur që të vidhte pa u vënë re tre herë rresht zyrat e shoqatës “Ndihmoni Jetën e Re”, në rrugën “Hoxha Tasim”. Arrestimi i Domeniko Kol Dodës ka ndihmuar policinë e Tiranës që të zbardhë mekanizmin e të gjitha këtyre vjedhjeve. Doda ka lindur në qytetin e Shkodrës por prej disa vitesh banonte në Tiranë. Ai ka kryer vetëm katër klasë shkollë dhe është dënuar më parë për të njëjtën vepër penale, atë të vjedhjes. Materialet në lidhje me 26- vjeçarin Domeniko Kol Doda i janë dërguar Prokurorisë së rrethit Tiranë për të kryer hetimet e mëtejshme.
Operacioni
Sipas burimeve zyrtare të policisë së kryeqytetit, dje ka filluar një operacion i madh për ruajtjen e rendit dhe sigurisë publike në të gjithë Qarkun Tiranë. “Prioritet për këtë sezon veror i janë dhënë masave për sigurimin e rendit e të qetësisë në zonën e plazheve (bregdetin e Kavajës), për sigurimin e ambienteve, banesave, lokaleve e automjeteve. Këto masa lidhen edhe me faktin se një pjesë e mirë e qytetarëve shkojnë me pushime.”, thanë dje burimet zyrtare të Drejtorisë së Policisë së Tiranës. Gjithashtu masa janë marrë edhe nga policia rrugore për normalizimin e trafikut në kryeqytet dhe sidomos në linjën Tiranë- Durrës- Kavajë. Me urdhër të drejtorit të policisë së Tiranës, Albert Dervishi, janë ngritur grupe të posaçme të përbëra nga inspektorë dhe agjentë të policisë kriminale dhe asaj të rendit, të cilët kryejnë patrullimin e lagjeve të veçanta. Gjithashtu autopatrullat e Shqiponjave do të mbështesin në këtë operacion. Ndërkohë janë shtuar kontaktet me komunitetin dhe veçanërisht organet e qeverisë vendore për të evidentuar problemet e komunitetit. Sipas burimeve zyrtare të policisë, vetëm gjatë këtyre 17 ditëve të para të këtij muaji janë ndaluar rreth 40 persona të akuzuar për vepra të ndryshme penale si dhe janë shkatërruar shtatë grupe kriminale.

Vjedhjet e Domeniko Kol Dodës

Vjedhja e firmës “ Estidem ”
Vjedhja e zyrave të Shoqatës së Grave Kristiane
Vjedhja e mbetur në tentativë e njësisë Nr.10 në Rr.A.Z.Çajupi
Vjedhja e Institutit të Kulturës Popullore në Rr.Kont Uran
Vjedhja e mbetur në tentativë e Zyrës Noteriale në Rr.Durresit
Vjedhja e studios muzikore Ballkanike në Rr.”Him Kolli”
Vjedhja e shkollës 8-vjeçare “ Servete Maçi” në Rrugën e Dibrës
Vjedhja e zyrave të firmës “Olimpia Trans” në Rr.Dibrës
Vjedhja e firmës “Eromez” në Rr. S.Pasha
Vjedhja 3 herë në kohë të ndryshme e Shoqatës Ndihmoni Jetën e Re, në Rr.H.Tasim