"Mehmeti do helmonte Enverin" Dokumenti sekret i CIA-s: Do paguhej 3 milionë USD

[ALBA]

ZBULOHET LETRA E AMERIKANEVE E VITIT 1975



--------------------------------------------------------------------------------

Dashnor Kaloçi


Ky dokument i rrallë që po publikohet sot në faqet e gazetës sonë për ish-kryeministrin shqiptar Mehmet Shehu, i cili ndodhet në dosjen që iu hap atij nga Sigurimi i Shtetit pas 18 dhjetorit të vitit 1981 kur ai u gjend i vetëvrarë nga një plumb pistolete në dhomën e tij të gjumit në vilën e Bllokut, është një nga materialet krejtësisht të panjohura dhe nuk është publikuar asnjëherë. Dokumenti tepër sekret i shërbimeve të fshehta të SHBA i cili i përket vitit 1975, ka rënë në duart e njerëzve të zbulimit shqiptar që vepronin të kamufluar nën petkun e diplomatëve, dhe më pas të Ramiz Alisë, vetëm në vitin 1986 dhe kësisoj ai nuk bën pjesë morinë e akuzave të ndryshme që ishin bërë për Mehmet Shehun që kur ishte gjallë Enver Hoxha. Pra që nga ajo kohë, ky material ka qëndruar në skedarët e arkivave të shtetit shqiptar dhe për ekzistencën e tij kanë pasur dijeni vetëm një numër shumë i kufizuar njerzish. Nisur nga ky fakt, "Gazeta" vendosi që ta botojë atë të plotë dhe pa marrë përsipër të bëjë asnjë lloj komenti lidhur me përmbajtjen, origjinën apo autencitetin e tij, duke ia lënë atë gjë në dorë të lexuesit të saj.


Letra e plotë e shërbimeve sekrete të SHBA

Ambasada e Shteteve të Bashkuara të Ameri-kës.
Buenos Aires - Argjentinë.
Përkthim i teleteksit nr. 321-40-60 Nëntor 1975.
Objekti: Për t'u vendosur në bibliotekën e Ambasadës. Top secret- Shumë sekret. Vetëm për njohje të zotit Ambasador. Çështja: Shqipëria. Në shtatorin që porsa kaloi, u zhvillua në Nju Jork një mbledhje me një mik, të cilin po e quajmë M-008, udhëheqës i qeverisë shqiptare. Me atë u arritën një sërë përfundimesh: M-008 u zotua të marrë pushtetin, të zëvendësojë plotësisht Enver Hoxhën dhe pasuesit e tij. Agjenti ynë ka vetëm një pjesë të pushtetit.
Propozon të veprojë kështu:
Të ftojë për drekë Hoxhën dhe t'i hedhë në pije një helm me veprim të vonuar për të shkaktuar vdekjen e tij. Agjenti ynë na tha se kjo është e vetmja rrugë. Për më tepër është e domosdoshme të bëhet sepse Hoxha jeton duke pasur një dashuri të madhe nga masat të njëjtë si ajo e Gandit. Miku ynë, e konsideron plotësisht të mundshme, se do të zgjidhet për të vazhduar Hoxhën dhe me kohë, afërsisht një vit, do të fillojë të zëvendësojë vazhduesit e Hoxhës, duke vendosur në vend të tyre njerëzit e tij të besuar.
Në rast se do të fitojë lëvizja, kemi diskutuar një program minimum, i cili vazhdon më poshtë:
1) Vendosjen e marrëdhënieve zyrtare me të gjitha vendet e Perëndimit më të rëndësishme: Shtetet e Bashkuara dhe Anglinë. Konflikti i arit shqiptar do të zgjidhet nga gjyqi ndërkombëtar i Hagës.
2) Shqipëria do të bëhet anëtare e organizatave ndërkombëtare të ekonomisë: Fondit Ndërkombëtar dhe organeve të tjera të krijuara me këtë qëllim.
3) të bëjë paqe me fqinjët e tij (Jugosllavinë dhe Greqinë) për të zhdukur me të parën të gjitha kundërshtimet e ardhura nga lufta personale dhe ideologjike e Enver Hoxhës dhe e grupit të tij dhe duke firmosur me të dytën një traktat të paqes, miqësisë e kooperimit që hap në për të rastet kufijtë e vendit.
4) Qeveria do të jetë socialiste, nuk do të kthehet në regjimin e mëparshëm. Nuk do të njihen dëmshpërblimet e pronarëve të mëparshëm të tokave, por Shqipëria do të braktisë politikën e saj të izolimit ndërkombëtar.
5) Qeveria e re do të zgjedhjet brenda një kohe prej 3 / 5 vjetësh duke pranuar rilindjen e të gjitha partive politike, në formë të gjerë. Në qoftë se do të dështojë në tentativën e tij e do të zbulohet, agjenti ka kërkuar dhe për këtë është siguruar se do ti jepet strehim politik në SHBA, në mungesë të këtij në ndonjë tjetër vend mik. Për këtë ai ka kërkuar dhe është siguruar se do ti jepen 3.000.000 dollarë amerikanë.
Me këtë rast është zotuar të denoncojë të gjithë llojet e krimeve që ai parashikon se do të zhvillohen në Shqipëri nga ana e Hoxhës e vazhduesve të tij.
Po japim një shpjegim mbi agjentin për ta patur në kujtesë në të ardhmen:
Bëhet fjalë për një njeri shumë ambicioz. I tillë është edhe plani i tij. Nuk ka ndryshuar në ideologjinë e tij. Ai vetëm na bashkohet me çështjen e bashkëekzistencqës me perëndimin dhe me fqinjët e tij. I kemi sugjeruar, që deri sa të kryhen veprimet të jetë i bindur ndaj Hoxhës dhe vazhduesve të tij. Në rast të kundërt mund të zbulohet. Kjo do të ishte fatale për suksesin e planit. Të gjitha këto duhet të mbahen parasysh, në funksion të suksesit të planit. Duhet të përgatitemi të kemi marrëdhënie diplomatike të plota. Tema është e një karakteri shumë sekret. Nuk do ti jepet ambasadave të tjera. Ambasadori i Buenos Airesit (për këtë njoftoheni nëpërmjet këtij) do të jetë i caktuar ambasador në Tiranë në rast suksesi.


Gazeta Shqiptare

[ALBA]

MESAZHI ERDHI NGA AMBASADA SHQIPTARE E ARGJENTINES

Përse agjenti M-008 ishte Mehmeti
Ramiz Alia: Dokumenti të vihet në dosjen e Shehut


--------------------------------------------------------------------------------

Dashnor Kaloçi


A është ish-kryeministri Mehmet Shehu, personi i cili në letrën e shërbimeve të fshehta amerikane kodohet me pseudonimin "M-008"? Kjo gjë vërtetohet dhe bëhet e besueshme si nga letra në fjalë ku thuhet "udhë-heqësi i qeverisë shqiptare", ashtu dhe nga fakti që në vitin 1960, ish-kryeministri shqiptar Mehmet Shehu, në krye të një delegacioni të lartë shkoi në SHBA me rastin e një mbledhje të Asambles së Kombeve të Bashkuara që u zhvillua në Nju Jork. Po kështu kjo gjë konfirmohet edhe nga shënimi që gjendet në letrën që i bashkangjitet atij dokumenti ku thuhet që me porosi të Ramiz Alisë, ai të vendoset në materialet që gjenden në Arkivin Qëndror të Partisë për armikun Mehmet Shehu. Sipas asaj çka thuhet në këtë dokument të përbërë nga tre faqe të daktilografuara me makinë shkrimi, i cili disponohet i plotë nga Gazeta Shqiptare, ai është hartuar nga shërbimet e fshehta të Shteteve të Bashkuara të Amerikës në vitin 1960 dhe i është dërguar ambasadës së saj në Buenos Aires të Argjentinës vetëm në vitin 1975. Por ndërsa dokumenti në fjalë i shkruar në spanjisht dhe i përkthyer edhe në shqip, i përket kësaj periudhe kohe, ai ka rënë në duart e ambasadës shqiptare të akredituar në Argjentinë vetëm në vitin 1986.

Si erdhi dokumenti në Shqipëri
Letra i është dorëzuar ambasadës shqiptare në Buenos-Aires nga Kryetari i Shoqatës së Miqësisë Argjentinë-Shqipëri, Gerardo Ferran dhe sipas shënimit të bërë në letrën që Reiz Malile i dërgon Ramiz Alisë, thuhet se ai dokument është gjetur në skedarët e bibliotekës së ambasadës amerikane në Buens Aires nga një mik i Gerardos i cili punonte në atë ambasadë. Pasi ai dokument është bërë disponibël nga ambasada shqiptare e Argjentinës, është përcjellë menjëherë për në Ministrinë e Jashtëme në Tiranë, ku Ministri Reiz Malile, më 1 nëntor të vitit 1986, ka bërë një shënim dhe ia ka përcjellë atë kreut të shtetit shqiptar të asj kohe, Ramiz Alisë.


Letra e Reiz Maliles për Ramiz Alinë

Shokut Ramiz Alia,Bashkëlidhur ju dërgojmë kopjen e një dokumenti të Shteteve të Bashkuara të Amerikës, në spanjisht dhe në shqip, për të cilin ambasada jonë në Argjentinë ka njoftuar dhe me radiogram. Ambasada na njofton se ky dokument i është dhënë asaj nga kryetari i Shoqatës së Miqësisë Argjentinë-Shqipëri, Gerardo Farran. Sipas tij, ky dokument ishte gjetur nga një miku i Gerardos në skedarin e bibliotekës së ambasadës amerikane në Buenos Aires, i cili punon në këtë ambasadë. Reis Malile (firma). Tiranë, më 1 nëntor 1986. Në fund të këtij dokumenti është bërë shënimi me shkrim dore ku thuhet: "A.A. Me porosi të shokut Ramiz Alia ky material të vendoset me materialin që gjendet në Arkivin Qëndror të Partisë për armikun Mehmet Shehu. (firma e personit që e ka bërë shënimin) 15 nëntor 1986.


Akuzat e Enverit për Mehmet Shehun

Lidhur me ngjarjen e udhëtimit të Mehmet Shehut për në mbledhjen e OKB në Nju Jork, në kujtimet e tija të botuara në vitin 1982, midis të tjerash Enver Hoxha ka shkruar: "Në këtë kohë Mehmet Shehu u nis për në Nju Jork në krye të një delegacioni qeveritar për në OKB Ai udhëtoi me transatlantikun anglez luksoz "Kuin Elisabet". Ne e dinim se me këtë anije udhëtonte edhe Titoja , por as që na shkonte mëndja se Mehmet Shehu mund të takohej me Titon. Tani marrim vesh nga shoqërues që ishin bashkëpunëtorë të tij e që tani janë në burg se me këtë anije udhëtonte edhe Harri Fulci i CIA-s amerikane, edhe Randolf Çërçilli që ishte personalitet i Intelixhens Servisit e që në vapor u paraqit si gazetar. Mehmet Sehu si agjent i tyre, bëri gjatë disa ditëve të udhëtimit takime e bisedime të fshehta me Titon, Fulcin e Randolf Çërçillin, u parashtroi gjëndjen dhe qëndrimet e Partisë tonë, acarimet që po lindnin në Bashkimin Sovjetik dhe qëndrimin që mendonte të mbante Partia jonë në Moskë. Strategjitë e tri agjenturave, jugosllave, amerikane dhe angleze përputheshin dhe i sugjeruan agjentit të tyre që "të mbështeste" pa rezerva qëndrimet e udhëheqjes së Partisë, që do të sillte përçarjen e prishjen me Bashkimit Sovjet

Gazeta Shqiptare

[Pedro]

Edhe une e lexova me kureshtje.
E gjitha me duket nje truk i bukur i Gazetes Shqiptare per te rritur tirazhin e saj.
E ne mos qofte truk i gazetes, atehere eshte truk i atyre "miqve" te Shqiperise, qe jetonin me honoraret e ambasadave shqiptare.
Te bie ne sy mosorigjinaliteti (ose mund te jete edhe tallje b.ythe) ne emertimin e agjentit M-008 (007 ishte zene me kohe nga Ian Fleming) dhe ne hartimin e "planit" te postatentatit.

Megjithate autori ka sens gallate.

[Brari]

Qe eshte loj ai dokument nuk diskutohet por kaloci i GSH-s nuk e ben per gallat.
Ka nje linje ne krejt artikujt qe botohen kohet e fundit mbi figurat politike dhe ngjarjet e historise Enveristo-Puniste 50 vjecare.

Kjo linje eshte... te justifikohet Enveri..

Pra cka bere Enveri e ka bere mire ose nga halli se ja ata qe Ai i denoi nuk ishin te Bardhe por te zinj..

Shkruesit me porosi gjejne te permendin si te kqij ata qe enveri i etiketoi si te kqij...

Pra me krijue nji alibi..

Perderisa Gazeta RD si Gazeta qe doli per te thene te verteten ..ate te vertete qe ZP e kishte erresuar.. nuk can koke ti jape hapsire kujtimeve per te kaluaren nga njerez qe i dine gjerat e qe flasin te verteten.. natyrisht do e bejne kete vet ata qe e mashtruan nje popull.. ne gazetat e dores dyte ose anekse te ZP..sikurse jane shumica..

qashtu..

[ALBA]

Dëshmia e kolenelit në pension, Elami Hado, ish-atashe ushtarak në Kinë, i cili vuajti 16 vjet burg e internim, pas disa raportimeve që kishte bërë nga Hanoi për Mehmet Shehun

"Raportova që në '63, se Mehmeti ishte agjent"


Dashnor Kaloçi


Pas botimit në numrin e djeshëm të gazetës sonë të letrës së shërbimeve sekrete amerikane, të vitit 1975, ku thuhej se ish-kryeministri shqiptar Mehmet Shehu, gjatë vizitës së tij në Nju Jork në 1960, kishte biseduar me amerikanët dhe u kishte premtuar atyre të helmonte Enver Hoxhën, një tjetër akuzë për ish-kryeministrin Shehu, si agjent i amerikanëve, mësohet të jetë bërë në vitin 1963 nga zv / Ministri i Mbrojtjes së Bullgarisë, Markov, akuzë e cila mbërriti deri tek Enver Hoxha në Tiranë. Po si qëndron e vërteta rreth kësaj akuze dhe ku bazohej ushtaraku bullgar në thëniet e tij? Lidhur me këtë na njeh intervista ekskluzive për "Gazetën" e kolonelit në pension, 81-vjeçarit Elami Hado, ish-atashe ushtarak në Pekin, i cili rrëfen të gjithë historinë se si padashur ai u bë protagonist i asaj bisede ku përmendej Mehmet Shehu, e cila i kushtoi 16 vjet burg e internim.


Zoti Elami, a mund të na thoni shkurti-misht se kush është e kaluara juaj?
"Unë kam lindur në vitin 1923 në fshatin Starje të Kolonjës prej nga është dhe origjina e familjes sime. Shkollën fillore e mbarova në Ersekë ndërsa uniken në qytetin e Korçës. Që në vitin 1941 u lidha me lëvizjen dhe në 1942 u burgosa prej italianëve. Pasi u lirova nga burgu në korrikun e '42, dola partizan në batalionin "Hakmarrje" dhe më pas në Brigadën e 15 sulmuese me detyrën e komisarit të batalionit e gradën e togerit".

Po pas mbarimit të Luftës në çfarë detyrash keni shërbyer?
"Në vitin 1945 shkova në Bashkimin Sovjetik dhe pasi studjova një vit për inxhineri ushtarake në Moskë, në '46 na kthyen në Tiranë në kuadrin e riorganizimit të ushtrisë. Në 1947 më çuan shef Xhenjo në Gjirokastër dhe në 1949 komandant i Brigadës Autonome në Elbasan. Në 1950 më thërritën në Shtabin e Përgjithshëm me detyrën e Drejtorit Operativ dhe dy vjet më vonë, në 1952, më dërguan në Akademinë Ushtarake "Frunxe" të Bashkimit Sovjetik të cilën e mbarova në 1955 me Medalje Ari. Kur u ktheva në Tiranë më emëruan përsëri në Shtabin e Përgjithshëm me detyrën e shefit të Degës së Përgatitjes, detyrë të cilën e mbajta deri në 1957 kur më ngarkuan për të punuar në organizimit të Akademisë Ushtarake nëTiranë, ku dhe u caktova zv / komandant i saj. Në vitin 1961 më dërguan në Kinë me detyrën e atasheut ushtarak në Pekin, ku qëndrova deri në 1964 kur u ktheva përsëri në Tiranë me detyrën e shefit të Punës e Përgatitjes Ushtarake e Shkencore në Shtabin e Përgjithshëm. Në vitin 1966 më goditën dhe më dërguan në Brigadën e Xhenjos në Rrëshen për t'u edukuar, ku pas gjashtë muajsh më transferuan Shef Shtabi në Korpusin e Shkodrës por pa emërim. Aty qëndrova deri në vitin 1969 kur më sollën në Tiranë si pedagog në Akademinë Ushtarake. Në atë akademi punova deri në vitin 1974 kur pas një konflikti që pata me Mehmet Shehun, më përjashtuan nga partia, më çmobilizuan si ushtarak dhe më internuan familjarisht në Vaun e Dejës duke më akuzuar si bashkëpunëtorë me Grupin e Puçistëve të Beqir Ballukut".

Cili ishte konflikti juaj me Mehmet Shehun?
"Zanafilla e atij konflikti që pata me Mehmet Shehun i përket vitit 1963 kur unë shërbeja si atashe ushtarak në Pekin. Në verën e atij viti do të mbahej në Hanoi të Vietnamit një mbledhje e Traktatit të Varshavës dhe qeveria shqiptare më caktoi mua të merrja pjesë aty si përfaqësues i ushtrisë shqiptare. Kur shkova në Hanoi takova dhe dy studentë shqiptarë që studjonin atje për frengjisht e vietnamisht, të cilët qeveria jonë m'i kishte caktuar si përkthyes. Ndonëse Vietnami, Kina dhe Koreja nuk ishin antarë të Traktatit të Varshavës, ishte vendosur që ajo mbledhje të bëhej atje meqënse filloi lufta e amerikanëve me Vietnamin. Pra ajo mbledhje bëhej për t'i dhënë një mbështetje Vietnamit. Para nisjes për në atë mbledhje, Ministri Beqir Balluku më dha orientimet politike që duhet të mbaja unë atje, sepse nga ana ushtarake i dija vetë ato. Në atë mbledhje merrnin pjesë përfaqësues nga të gjitha vëndet e Europës Lindore apo siç quheshin ndryshe vëndet e Demokracive Popullore dhe ato ishin ndarë në dy kampe të pashpallura zyrtarisht. Sipas orinetimeve që më kishin dhënë në Tiranë, unë duhet të mbroja Kinën, Vietnamin e Korenë të cilët ne i konsideronim marksisëtë-leninistë dhe duhet të isha kundër Bashkimit Sovjetik e vëndeve të tjera satellite të tyre që ne i quanim revizionistë"

Me kë delegacion shoqëroheshit më shumë gjatë asaj mbledhje?
"Unë qëndroja me të gjithë nga pak por më shumë me përfaqësiesin bullgar,zv / Ministrin e Mbrojtjes, Markov, pasi atë ma kishte rekomanduar atasheu ushtarak i Bullgarisë në Kinë, një gjeneral-major me të cilin kishim shumë miqësi. Atasheu bullgar ishte kundër politikës që ndiqte qeveria e tij dhe dyshonte edhe për qeverinë tonë. Gjenerali bullgar më kishte rekomnaduar që të flisja lirshëm me Markovin, por unë kisha frikë të shoqërohesha me të, sepse ai rrinte vazhdimisht vetëm me sovjetikët me të cilët ne sapo i kishim prishur marrëdhëniet. Me pak fjalë unë nuk kisha besim të flisja hapur me Markovin, sepse ai edhe bukë hante me gjeneralët sovjetikë që përfaqësonin qeverinë e tyre në atë mbledhje dhe më doli ndryshe nga ato që më kishte thënë atasheu bullgar në Pekin. Gjatë zhvillimit të asaj mbledhje na lindi një problem, pasi gjermanët kishin marrë detyrë që të raportonin mbi gjëndjen e ushtrisë amerikane. Mirpo përfaqësuesi i Koresë tha aty se ai nuk donte t'ia dëgjonte fare zërin ushtrisë amerikane dhe nuk ishte dakort që të raportonin gjermanët. Kështu ky konflikt u bë një problem i madh dhe unë nuk dija se kë të mbështesja, përfaqësuesin e Koresë apo Shtabin e Traktatit të Varshëvës që drejtonte mbledhjen".

Si u zgjidh kjo gjë?
"Kinezët më ngarkuan mua të propozoja tre ditë pushim në mënyrë që delegacionet të konsultoheshin me qeveritë e tyre dhe më thanë që t'i mbushja mëndjen koreanit që të tërhiqej, pasi ashtu si unë ai kishte mbaruar Akademinë "Frunze" dhe fliste mirë rusishten. Ndonëse Shtabi kërkonte vazhdimin e mbledhjes, propozimi im u pranua me shumicë votash dhe vietnamezët na sugjeruan që gjatë atyre tre ditëve të na shëtisnin në një vënd turistik në bregdet, ku kishte 300 ishuj. Aty ishte një vënd shumë i bukur që e kishin bërë francezët për turizëm dhe për të shkuar atje duhet të kaloje një xhungël dhe një lumë me një urë që ishte prishur nga bombardimet e amerikanëve. Pasi ura ishte e prishur ne e kaluam lumin me ****, i cili mbante dy makina dhe në makinën e parë (sipas alfabetit), pas vitenamezëve që na shoqëronin, më takoi mua të kaloja. Pasi kalova unë, i dyti kaloi bullgari Markov dhe ndërsa po prisnim makinat e tjera të autokolonës që të kalonin me ****, Markovi shfrytëzoi rastin dhe erdhi tek makina ime. Menjëherë ai më tha: "Mos më shiko që unë rri me sovjetikët dhe nuk rri me ty, se po të na shikojnë bashkë, ata menjëherë më raportojnë në Sofie. Unë dua të flas me ty hapur se pse ndodhin këto gjëra. Ju na akuzoni për tradhëti e revizionizëm, ndërsa pala jonë ju akuzon ju si të shitur te imperialistët amerikanë".

Po ju si iu përgjigjët?
"Kur unë i thashë se lufta politike i kishte ato gjëra, ai m'u përgjigj: "Po si gjendet e vërteta. Ne na thonë që udhëheqja juaj është e shitur tek imperializmi dhe kryeministri Mehmet Shehu është agjent i amerikanëve". Pas kësaj akuze të rëndë, që dëgjova për kryeministrin tonë, duke mos dashur ta mbështesja unë i thashë: Të sharat nuk kanë kufi". Pas kësaj ai vazhdoi përsëri duke më thënë: "Një gjeneral-kolonel bullgar në pension, më ka thënë se kryeministri juaj Shehu, kur ka qenë në Luftën e Spanjës, Shtabi i Brigadave Internacionaliste e ka pasur nën survejim dhe megjithëse ai ishte shumë i aftë si ushtarak, ata nuk i jepnin pozitë se dyshonin që ishte agjent i fashizmit". Unë i thashë: Hajde gjeji këto të vërteta, vetëm koha do t'i provojë. Me një fjalë as nuk e mbështeta dhe as nuk e kundërshtova. Por kur bëra raportin për Shtabin e Përgjithshëm në Tiranë lidhur me mbledhjen e Hanoit, unë e shkrova dhe të gjithë bisedën që kisha bërë me përfaqësuesin bullgar, pasi nuk mund ta mbaja dot atë gjë mbi supet e mija".

Me çfarë e sollët letrën në Tiranë dhe kujt i adresohej ajo personalisht?
"Raportin e solla me postë diplomatike siç ishte rregulli dhe ajo letër duhej t'i dorzohej Ministrit Beqir Balluku, i cili e ka lexuar atë letër patjetër. Por ndonëse isha më pritje që të më thërrisnin, mua nuk më thirri njeri".

As kur u kthyet në Tiranë nuk ju thirrën për t'ju pyetur në lidhje me akuzat që ishin bërë për Mehmet Shehun si agjent?
"As kur erdha në Tiranë nuk më thirri njeri për të më pyetur, por pashë një ftohtësi të madhe të Mehmet Shehut ndaj meje. Unë nuk kisha lidhje direkte dhe kontakte me Mehmetin, por e shikoja qëndrimin e tij gjatë stërvitjeve të ndryshme që bëheshin"

A ia kishit thënë njeriu bisedën që kishit bërë për Mehmet Shehun me zv / ministrin bullgar, Markov?
"Unë atë gjë e bisedova vetëm me shokun tim, Andon Shetin, Shefin e Zbulimit të Ushtrisë, i cili më tha: "Kjo gjë ka rëndësi dhe nuk mendoj se udhëheqja e lartë do ta lërë atë me kaq".
Nga disa kolegë tuaj, kolonelë e gjeneralë në pension, kam mësuar se raporti juaj i mbledhje së Hanoit, ku kishit shkruar edhe akuzat që dëgjuat për Mehmet Shehun, është hapur fillimisht prej Kadri Hazbiut, pasi edhe pse nuk e kishte të ligjëruar, ai kontrollonte të gjithë korespodencën diplomatike. Pas kësaj Kadriu ia ka çuar atë Mehmet Shehut nga i cili varej si ministër dhe një kopje tjetër ia ka çuar Hysni Kapos nga i cili varej në rrugë partie. As Mehmeti dhe as Hysniu nuk ia kanë dërguar atë raport Enverit, por e kanë mbajtur në kasafortat e tyre dhe thuhet se Enveri atë gjë e ka mësuar nga krerët kryesorë të Shtabit të Përgjithshën të Ushtrisë, pasi ata e kishin për të detyrë që ta njoftonin atë si Komandant të Përgjithshëm. Po kështu thuhet se pas kësaj, përveç Mehmetit, Enveri filloi që të dyshonte edhe ndaj Hysni

apos, duke e konsideruar atë si jo besnikë të tij. Si qëndron e vërteta?
"Edhe unë kam dëgjuar rreth kësaj dhe ajo gjë mund të jetë tamam kështu siç thuhet nga ish-kolegët e mij".

Pak më lart u shprehët se kur erdhët në Tiranë, Mehmeti filloi të mbante distancë ndaj jush, a e vazhdoi ai atë qëndrim ndaj jush?
"Jo vetëm që e vazhdoi, por e çoi deri në fund hakmarrjen duke më goditur deri sa unë përfundova burgjeve dhe internimeve".

Më konkretisht si u hakmorr Mehmeti ndaj jush?
"Goditja e parë mua m'u bë në vitin 1966 kur nga Shtabi i Përgjithshëm më dërguan për edukim në Brigadën e Xhenjos në Rrëshen. Në atë kohë për mua ishte vendosur arrestimi njëlloj si varëtsi im, Dilaver Radëshi, i cili përfundoi në burg, por Beqir Balluku iu lut Enver Hoxhës dhe unë shpëtova vetëm me transferim. Shkak për goditjen time u bënë tezat e Artit Ushtarak të Luftës Popullore që i kisha përgatitur me urdhër të Beqir Balllukut, pas porosisë së Enver Hoxhës. Enveri ngarkoi Beqirin për hartimin e tezave dhe mënjanoi Mehmetin e Petrit Dumen. Hartimi i tezave realisht i takonte Petritit si Shef Shtabi, por ndoshta duke e konsideruar si njeri të Mehmetit, Enveri e mënjanoi edhe Petritin. Por pasi i kishim mbaruar tezat, ato ishin prishur duke u vënë kryqe me laps të kuq dhe ishin transformuar krejtësisht. Ato ishin prishur nga Enveri pas ndërhyrjes së Mehmetit, si shenjë xhelozie që ishte spostuar nga ajo punë, pasi vetë Enveri nuk merrte vesh nga punët e ushtrisë. Unë isha hartuesi kryesor i atyre tezave dhe i thashë Beqirit se do ta ndiqja më tej atë problem, pasi nuk e mbaja dot mbi kokë. Beqiri më tha: "Kokën tënde do hash" dhe gati sa nuk më tha hapur "Me Enverin do luftosh".

Po goditja tjetër ndaj jush kur erdhi?
"Goditja tjetër ndaj meje erdhi në korrikun e vitit 1974 kur isha pedagog në Akademinë Ushtarake "Mehmet Shehu" dhe drejtoja kursin e lartë të asaj akademie. Aty mua m'u desh që të zbatoja tezat e Mehmet Shehut mbi "Teorinë e kalimit" të cilat ishin futur si material plotësues i tezave të mbrojtjes. Unë nuk pranova ta jepja atë leksion duke e quajtur aventurë disfatiste dhe ajo u dha prej komandantit të akademisë, Koli Mborjes. Për atë temë më kërkoi ndihmë edhe Veli Llakaj që e kishte për diplomë, por unë nuk pranova ta ndihmoj. Mirpo të gjitha këto kundërshti të miat, si duket shkonin në veshin e Mehmetit dhe kur ai erdhi për të ndarë diplomat e kursit, duke mos më parë mua që isha në rreshtin e tretë, sa u ul në presidium, pyeti: "More po ku është ky Elami Hado". Unë u ngrita në këmbë dhe ai më tha: "Ti je teoricien, por je teoricien disfatist. Teksa vazhdonte të fliste ashpër kundër meje, unë ndërhyra duke i thënë se ato gjëra nuk zgjidheshin aty, por ai nguli këmbë në të tijën dhe vazhdoi të fliste me të njëjtën gjuhë".

Çfarë ndodhi me ju pas asaj mbledhje?
"Pak ditë më pas në korrikun e 1974, mua më përjashtuan nga Partia dhe më çmobilizuan edhe nga ushtria. Unë isha ushtaraku i dytë që u godita në Pleniumin e pestë direkt pas Beqir Ballukut. Pas kësaj më hoqën nga Tirana dhe më internuan në Vaun e Dejës, familjarisht me bashkëshorten e gjashë fëmijët tanë. Pas gjashtë vjetësh qëndrimi atje, më arrestuan e më dënuan me dhjetë vjet burg politik".
A mendoni se në goditjen e dënimin tuaj kishte ndikuar letra që kishit bërë nga Hanoi në 1963, ku kishit shkruar edhe për akuzat ndaj Mehmetit?
Patjetër që ajo ka qenë një nga primaret në dënimin tim".

gazeta shqiptare

[Iliriani]

U bene ca kohe qe nje pjese e shtypit shqiptare e borbardon lexusin me shkrimet nga ish nomeklatura e kuqe.
Ketu shto dhe ato shkrimet e Liliana Hoxhes qe zihet me vjerren Nexmien.
Thua se vertet lexusi shqiptar i do keto?
A nuk eshte ngopur ai per 50 vjet me shkrime te panumerta per ta?
Akoma kemi ate koncepti inferioriteti ndaj ish nomeklatures se pa zgjedhur nga populli?
Apo ca segmente te shtypit me kete fushate dua qe te mbajne ne faqet tij keto
ne menyre per te mbajtur gjalle ate kohe qe lame pase dhe protagonistet e saj.

Mua nuk me terrheqin se pervec titujve bombastik nuk japin asnje gje te re.

Dhe shkrimi i misiperm njelloj si ne diktature akuzohet Mehmeti pa nje fakt po vetem me llafe qe i tha dikush e keto miren si kapital/
Te kujtoj kohen e monizmit ku njerezit futeshin ne burrge vetem nga nje llaf qe tha dikush e shume here keto akuza nuk qene asnje gje tjeter vetem inskenime qe kush e ka jetuar ate kohe e mban mend mire.
Nuk dua ta diskutoj qe apo nuk qe Memeti po duket qarte se ku bazohet autori jane ca llafe qe i ka thene nje atasha tjeter.

Keto jane dhe pjese e nje fushate per te reabilituar diktaturen e per te genjyer ndoshta brezin e ri qe nuk e ka jetuar ate kohe dhe nuk i kap ato djallezite e inskenimet e atij sistemi.
Shihet qarte qe duan te vertetojne ato akuzat e Enverit.
Po per mua e per shume miq te mije keto shkrime jane aq te parendesishe pa ndonje matrial a fakt a dicka qe ja vlen ti lexoh e jane shume bajate e shume here ne to shikon propaganden qe behej ne kohe e komunizmit.

Dhe perpjekja per te hapur debate per keto tema eshte thjeshte per te mbajtur gjalle akoma ate kohe dhe ato personazhe qe njerezit i harran me nje muaj dhe asnje nuk do ti kujtoj.

Une nuk kam qejf te pronocohem per kete teme se me shkrimet dhe akuzat alla diktaturce, nuk ke ca te debatosh e nuk me terheqin keto personazhe groteske qe koha e lufta e ftohte i vuri nga fshatare maleve ne udheheqes e gjithe jeten nuk u ngriten ne lartesine qe duhet te kete nje udheheqes e ne si vend trasheguam udheheqjen me injorante e me ekstreme komuniste e staliniste me ekstreme se Moska Kina e dile dhe Vjetnami.

E me kriminalia nuk shikon asnje pendim e sinqeritet te keta njerez e te vjen te vjellesh kur edhe sot pas 20 vjetesh vazhdojne te mbrojne denimet e Enver Hoxhes per grupet armiqesore e armiqte e partise e spiunet e CIAs Amerikane UDB jugosllave e KGB Sovietike.

Dhe ku shkrim sot eshte shume e nuk ja vlen te meresh prape me diskutime per Lilianen ,Enverin,Ramizin,Hysniun amo Nexhin.

Diktaturen e nomeklaturen populli e hodhi ne kosh te plehrave lejeni aje se ju ben pis.

Kaq

[Redi]

Eshte e vertete ajo qe thone disa nga ju. Shtypi shqiptar prej kohesh ka filluar publikimin e nje sere artikujsh qe me demek kane si qellim zbardhjen e disa ngjarjeve qe kane ndodhur gjate epokes komuniste.

Nuk jane gje tjeter vecse nje tentative per te humanizuar ate sistem vampirash. Njerezit e zgjuar e dine te verteten ose mund ta gjejne ate me shume pak mundime.

Qe Enver Hoxha krijoi nje sistem vampiresh me njerez qe jetonin duke pire gjakun e shqiptarit kjo nuk do shume tru ta kuptosh. Problemi qendron qe ka shume individe te cilet kane kapacitet te kufizuar dhe ndikohen shume lehte nga propaganda indirekte e adhuruesve te sistemit komunist dhe gje cdo gje e marrin per fakt dhe i besojne.

[Brari]

Redush..

pamvaresisht kush i tregon historite ato duhen lexuar e duhen ruajtur ketu e ti kete mileti e te mesoje.
E kam thene dhe me pare se sa do te genjeje dikush ai pa i thene Ca te verteta nuk mundet do sdo.. Pikerisht aty eshte lezeti..

Psh kur lexon kete dosjen poshte e pamvaresisht cka thene llambi apo kadriu..nje gje del eqarte.. qe edhe se llambi i ngrate ka pranuar te thote cduan ATA.. perseri plumbit nuk i ka shpetuar..

E kjo vlen..

Ca thone..nuk lexoj une budalliqe..


e po prandaj se ka te tille marrin vota ruco-Nanot..

Se psh alba qe i lexon keto megjithse e re ajo kur do votoje ..krimineleve nuk do u jape vote pik..

jo si dallëndishja qe thote.. heren e pare votova Saline po te diten ama votova Nanon.. mbaje pra .. ketej thone qe na kan shk komunistet e enverit ketej i japin vote klonave te enverit..nano edvinave..

Zaloshnja shkruante nje dizaj..qe miletu u merzitnë me saline e pane drit shprese te Nano.. po u zhgenjien..
Jo mo ed Zalua se te Nano nuk ka pare Drite askush qe do drite..po leri mashtrimet te llojit qe perdorin spiunet per te justifikuar Voten..

VOTA nuk i jepet Partise qe ndertoj Maliq e Spac..pik.

Kush ja jep domethene se eshte i dakorduar ne Zemer me kriminelet..pik..

Llafet jane loje..

Si psh e Djathta shkodrane e atij kopilit Boricit shkoj te Zan Caushi votoj ne 97-te..

Pra skan qen e djathte Shkodrane por rezerv e deges brendeshme te Shkodres e llojit me NI_GJU cka po thon te Kafja madhe e ne autobus..

nejse..


------

DOSSIER I

Për herë të parë publikohen deponimet në hetuesi të ish-Ministrit të Shëndetësisë, Llambi Ziçishti, ku ai pranon bashkëpunimin me Mehmetin për të eleminuar Enverin

"Mehmeti me mjekët kinezë do helmonte Enverin"


--------------------------------------------------------------------------------

Dashnor Kaloçi


Para dy ditësh në faqet speciale të gazetës sonë publikuam një dokumet tepër sekret të shërbimeve të fshehta amerikane të vitit 1975, që i drejtohej ambasadës amerikane të akredituar në Buenos Aires të Argjentinës, në të cilin thuhej se udheheqësi i qeverisë shqiptare, ( i koduar në dokument me pseudonimin M-008") gjatë vizitës së tij në SHBA në vitin 1960, kishte premtuar të helmonte Enver Hoxhën dhe të ndryshonte kursin politik të Shqipërisë duke marrë vetë pushtetin. Në atë dokument që disponohet i plotë nga "Gazeta" (në shqip dhe spanjisht) aludohet për Mehmet Shehun, gjë e cila konfirmohet edhe nga shënimi që është bërë në letrën e bashkëngjitur me të, nga Ministria e Punëve të Jashtëme në vitin 1986, ku thuhet se me porosi të Ramiz Alisë, ai dokument të vihet në materialet e tjera që gjenden në Arkivin Qëndror të Partisë për armikun Mehmet Shehu. Pas botimit të atij dokumenti, në numrin e djeshëm ne publikuam një intervistë ekskluzive me ish-atasheun ushtarak të Shqipërisë në Pekin, kolonelin në pension, Elami Hado, i cili që në vitin 1963 me anë të një relacioni të nisur nga Hanoi, njoftonte udhëheqjen e lartë në Tiranë, se zv / Ministri i Mbrojtjes i Bullgarisë, Markov, i kishte thënë atij se kryeministri shqiptar Mehmet Shehu, ishte agjent i amerikanëve. Në vitin 1974 kur Hado shërbente si pedagog në Akademinë Ushtarake në Tiranë, ai pati një konflikt me kryeministrin Mehmet Shehu dhe pak ditë më pas ai përfundoi për 16 vjet në burgje dhe internime si armik i popullit. Sipas Hados, të gjitha ato peripeci e vujatje të pafund, e kishin zanafillën edhe prej relacionit që ai pati bërë nga Hanoi në vitin 1963, ku mes të tjerash thuhej se Mehmet Shehu ishte agjent i amerikanëve. Pas botimit të dokumenetit të shërbimeve sekrete amerikane dhe dëshmisë së kolonelit në pension, Elami Hado, në numrin e sotëm dhe të nesërëm, ne po botojmë edhe një dokument tjetër që ka dalë nga Arkivat e Ministrisë së Punëve të Brendëshme, që i përket vitit 1982 e ndodhet në dosjen hetimore të ish-Ministrit të Shëndetësisë, Llambi Ziçishti, i cili ishte arrestuar dhe mbahej i izoluar në qelitë e Burgut 313 në Tiranë, së bashku me Ministrin e Mbrojtjes, Kadri Hazbiun, Ministrin e Brendshëm, Feçorr Shehu, Ministrin e Jashtëm , Nesti Nasen, Drejtorin e Sigurimit të udhëheqjes, Llambi Peçinin etj, të akuzuar si pjestarë të Grupit Armiqësor të kryesuar prej Mehmet Shehut. Pas një procesi hetimor që zgjati nga nëntori i vitit 1981 e deri në shtatorin e vitit 1983, Llambi Ziçishti u nxorr në gjyq dhe u dënua me vdekje duke u pushkatuar (në 17 shtator 1983) së bashku me Kadri Hazbiun, Feçor Shehun e Llambi Peçinin. Sipas deponimeve të ish-Ministrit Ziçishti, të shkruara dhe firmosura prej tij në dokumenetin në fjalë, ai pranon të ketë bashkëpunuar me ish-kryemnistri Mehmet Shehu, i cili që në vitin 1973 ka dashur që ta helmonte Enver Hoxhën, me anë të mjekëve kinezë që ai kishte thërritur apostafat nga Kina. Po si qëndron e vërteta e këtyre dokumeneteve që po botojmë në faqet e gazetës sonë, a ka qenë vërtet Mehmet Shehu në shërbim të agjenturave të huaja perendimore dhe a ka bashkëpunuar ai me to për të eleminuar fizikisht Enver Hoxhën? Apo ato dokumente janë thjesht kombinacione të agjenturave të huaja për të futur përçarjen në rradhët e udhëheqjes së lartë komuniste të Shtetit shqiptar, apo dhe lojra e fabrikime të Sigurimit të Shtetit, të inicuara nga vetë Enver Hoxha dhe pasuesit e tij, (Nexhmija e Ramizi) për të bërë sa më të besueshme akuzat që ata i bënë Mehmet Shehut, pas eleminimit të tij në 18 dhjetorin e vitit 1981? Konkluzionet mbi këto enigma, më mirë se kushdo tjetër, i bën vetë lexuesi.


Deponimet e Ziçishtit
Procesverbal (I pyetjes të pandehurit)
Tiranë, më 18.5.1982
Ne, D.P e S. F, hetuesa në Ministrinë e Punëve të Brendshme, rimorëm në pyetje të pandehurin Llambi Ziçishti...

Pyetje: Vazhdoni i pandehur të jepni shpjegime rreth akuzës që u bëhet?...
Përgjigje: Unë falenderoj Partinë për diferencimin që më bëri duke mos konsideruar mua armik një lloj si Mehmet Shehu e Fiqret Shehu. Për këtë unë jam i vendosur dhe i premtoi hetuesisë së Partisë se do t'ja them hollësisht gjithshka që di për veprimtarinë armiqësore që kanë kryer armiqtë Mehmet e Fiqret Shehu kundër Partisë së Punës së Shqipërisë dhe shtetit tonë sado e rëndë që të jetë dhe futja ime në këtë veprimtari armiqësore. Unë jam futur në veprimtari armiqësore kundër Partisë e shtetit tonë fillimisht, direkt nga Fiqret Shehu. Fiqret Shehu, për një kohë të gjatë dhe në mënyrë graduale më ka përpunuar mua shpirtërisht e ideologjikisht për interesat e saj e të Mehmet Shehut për të goditur vijën e Partisë së Punës të Shqipërisë, siç po e shpjegoj më poshtë: Duke filluar nga viti 1965, kur unë isha mjek kirurg në spitalin klinik nr.2 dhe Fiqret Shehu sekretare e Komitetit të Partisë të qytetit të Tiranës, ka filluar prej saj përpunimi im gradual për të më futur në veprimtari armiqësore. Ky përpunim ka vazhduar të bëhet më i fortë, sidomos në vitet e mëvonshme, kur unë e kam shoqëruar si mjek në kontrollet mjekësore që ajo ka bërë disa herë në Paris. Kështu, Fiqret Shehu shpesh më bënte mua lëvdata dhe më thurte elozhe për aftësitë e mia si mjek kirurg i zoti, i aftë, me kulturë e dije të thella në fushën e mjekësisë, gjë të cilat mua më pëlqenin dhe ndjenja kënaqësi që këto vlerësime m'i bënte Fiqret Shehu, e cila në të njëjtën kohë ishte edhe bashkëshortja e kryeministrit. Për të më patur më afër, mbasi spostoi profesor Petro Canin, Fiqret Shehu më bëri mjekun personal të familjes, si njeri tepër i besuar dhe i gatshëm për të plotësuar dëshirat dhe urdhërat e tyre, duke parë në të njëjtën kohë edhe gatishmërinë time për të qenë i nënshtruar ndaj kësaj familjeje, gjë që, shpesh në biseda më të e konsideroja një nder të madh që më bëhej. Në bisedat që kam zhvilluar me Fiqret Shehun,si gjatë kohës që kemi qenë së bashku në Paris edhe kur jemi kthyer në Shqipëri, ajo hapur më ka folur me mua për jetën e mirë e të lirë që bëhej në botën perëndimore, duke i ilustruar shpesh këto biseda me dëfrimet që bënte borgjezia, parisiene, sidomos gjatë kohës së lirë. Këto biseda unë ja përkrahja asaj se lidheshin edhe me nostalgjinë që unë kisha për jetën studenteske që unë kisha kaluar në Paris. Fiqret Shehu duke parë edhe përuljen që unë kisha ndaj mjekësisë franceze, ku edhe kisha studiuar, në këto biseda më mburrte e më ngrinte lart profesorët e mjekësisë e kryesisht profesor Miliezin, të cilin unë e kisha pasur edhe profesorin tim. Në të njëjtën kohë ajo më thosh se ne duhet të hapemi më shumë me botën perëndimore, e sidomos me Francën, ku pavarësisht nga bindjet politike më shumë e më lirshëm të vinë personalite të shkencës e nga ana jonë të shkojnë në këto vende. Në këtë çështje ajo theksin e vinte në fushën e mjekësisë ku edhe mua më pëlqenin dhe ja përkrahja mendimet që shprehte. Një moment tjetër që Fiqret Shehu ka shfrytëzuar për të më vënë mua në shërbim armqiësor kundër Partisë e shtetit tonë është edhe një incident që unë kam pasur në moshën e rinisë kur kam qenë student në Paris, konkretisht në vitet 1946-1949. Në atë kohë unë, nga marrëdhëniet që pata me një vajzë pariziene, më lindi një fëmijë (djalë) ilegal, shqetësim ky që më ka shoqëruar gjatë gjithë kohës. Megjithëse mua nuk më kujtohet ndonjë rast që Fiqret Shehu të ma ketë përmendur këtë incident, isha i bindur se këtë ajo e dinte sepse unë e kisha shkruar në autobiografinë time në dokumentet e Partisë, ku ajo e ka mësuar si sekretare e Komitetit të Partisë që ka qenë... Në vitet e mëvonshme, edhe Mehmet Shehu, që siç më ka thënë Fiqret Shehu, ishte vënë prej saj në dijeni për pozicionin tim armiqësor, herë pas here më ka shprehur pikëpamjet që ai kishte kundër vijës së Partisë së Punës të Shqipërisë. Kështu si Fiqret Shehu dhe më vonë Mehmet Shehu nuk mbetën vetëm në përpunimin tim në aspektin ideologjik e shpirtëror, por siç do të shpjegoj hollësisht më vonë, mbas vitit 1970, kur unë u bëra ministër i Shëndetësisë, duke patur si bazë këtë përpunim filluan të më ngarkonin edhe detyra konkrete për realizimin e qëllimeve armiqësore. Kështu, Fiqret Shehu më ngarkoi detyra në fushën e shëndetësisë ku unë punoja e drejtoja. Ajo kërkonte dhe unë e kam informuar regullisht për diagnozat (sëmundjet) mjekimin dhe gjendjen shëndetësore të Sekretarit të Parë të Komitetit Qëndror të Partisë, të sekretarit të Komitetit Qëndror sot i vdekur si dhe për gratë e tyre, për të cilat shpesh më fliste edhe më përbuzje e mospërfillje të hapët, duke ngritur lart aftësitë e saj si teoriciente, si ish komisare gjatë luftës... Detyrë tjetër ka qenë që në sektorin e shëndetësisë të mundohesha të sillja shqetësim në popull, sepse ky sektor- thosh Fiqreti- është sektor shumë i ndjeshëm e që lidhet me shëndetin e popullit, ku si pasojë ndikon drejtpërsëdrejti në prishjen e unitetit të popullit me Partinë. Në kundërshtim me orientimet e Partisë, e cila porosit që shërbimi shëndetësor të zbresë sa më afër popullit, Fiqret Shehu dhe Mehmet Shehu më porositnin që të përkrahja me masa konkrete specialitetet e ngushta dhe jo shërbim të përgjithshëm të kualifikuar masiv, mbylljen në këto profile të ngushta kurative dhe nënvleftësim e profilaksisë. Për të realizuar këto detyra që viheshin në rrugë armiqësore unë ndërtova edhe metodën e punës sime.


-----gsh---

[Iliriani]

Per kedo qe ka jetuar kete kohe i kupton mire keto shkrime e i ngjallin nje ndjene te keqe.
Kur enveri nxirte nje grup e denonte ke donte ne ate kohe nuk qe e veshtire ta mirje njeriun qe enveri piketonte ta rrihje ne qeli sa te doje e me hire e pahire ai do deklaronte ca i kerkonin hetusit.
E shume veta i kane vrare e kane plotesuar procesverbale sikur ata kane deklaruar kete.

A i besohet ketyre letrave te dala nga hetusia e monizmit?

Te japesh shkrime te tilla pa shpjegime per kohen e te paraqitesh si fakte fletat qe hetusit i mbushnin si i donte qejfi apo sic donte shoku enver kjo eshte thjesht se do te mashtrosh opinionin e shume te rinj qe se kane njohur ate kohe.

Ne ate kohe qe model po denohej njeri do krijohej nje grup armiqesor e per tju futur friken njerezit qe te mos guconin se ai qe rregjimi i frikes do krijohej nje grup e per te krijuar keto grupe jane denuar dhe shume here dhe me vrasje njerez kote ce koti.
Hetusit e komunizmit mbushnin fletat si te donin dhe i paraqisnin me mburrje se antaret e grupit e pranuan aktivitetin e tyre armiqesor.

Kush do ti kontrollonte apo ndalonte ne ate kohe e aq me teper kur ja kerkonte udheheqja.

Dhe kete mund te thuash per rastin e mesiperm ku nuk mund te gjykosh e te nxjerresh gje nga ato letra hetusie te monizmit kur dihej mire stili dhe si i benin ata ato pune sic e sqarova dhe me siper.
Ne ate kohe po te donin i mbushnin dhe ato shkresa sikur ministri i ndjere kishte bashkepunuar me UFOT.

Jam dakort qe te tregohet historia e asaj kohe qe njerezit te mos ta harrojne e brezi i ri ta mesoj.
Shkrimi i mesiperm eshte thjesht nje justifikim i atyre qe akoma vazhdojne te kene ne koke enverin se enveri kishte te drejte dhe memeti qe armik.
Nuk sqaron kohen e asgje e aq me teper merr argumentat e hetusise kriminale te komunizmit e tezat enveriane per grupe armiqesore e spiune e perpiqet mbase gjen ca njerez qe mund ti besojne keto se ata qe e kane jetuar ate kohe i kuptojne keto shume mire.
Njesoj sikur te japesh justifikimet apo 'dokumentat' me te cila hitleri apo gestapua vrau kundershtaret politik apo hebret[izraelitet].

Pas viteve 90 ku kujtimi qe i fresket e njerezi i hodhen ne kosh te plerave nomeklaturen e veprat idjote te enverit nuk mund te beje shkrime te tilla.

Tani pas 10 vjetesh ca njerez kane ndermare nje fushate e na rikthejne nomeklaturen komuniste per ta justifikuar e vleresuar ate nga ana morale.
Kjo duket qarte ne shume shkrime te shtypit shqiptar.
E aq me teper ne kete kohe kur partia trasheguse e PPSH mbajti ate qendrim e hariti derri atje sa Malaj deklaroi se te perndjekurit te kerkojne pafajesine ne gjykate.
Pra justifikohen persekutoret dhe mohohen te persekutuarit.
Ndoshta kjo fushate behet se shume njerez qe jane ne pushtet duan te zbutin apo te ndryshojne a te lajne pak te kaluaren e tyre te piste ne syte e opinionit publik.
Keto jane disa mendime pas leximeve e ketyre shkrimeve e sidomos te ketij te fundit qe eshte me skandalozi e qe duan tju imponohen lexusit, mua e juve duke na justifikuar politiken dhe psiqiken e semure te enver hoxhes me shpalljen e grupeve armiqesore e armiqeve te partise e denimit te gjithe atyre njerezve se thjeshte enveri mendonte se ata qene armiq apo rezikonin ate apo thjesht nuk i pelqente.

E VERTETA ESHTE SI DIELLI

[Redi]

Brarush, shumica e ketyre shkrimeve me ngjajne si ato arrnat qe i vihen corapeve te grisura dhe sapo ti veshesh, perseri do te grisen dhe perseri do ti arrnosh.
Nuk shkruhet historia me arrna o Brar, por me studime te thelluara, me prova e fakte qe nuk mund te kundershtohen me lehtesi.
Historia nuk shkruhet ne faqe gazetash me editoriale dhe dossier sepse e ben mendjen e lexuesve si corap i arrnuar 300 qind ngjyrash ku i ka humbur ngjyra dhe modeli origjinal.

Bota kur eshte ndalur te shkruaje historine nuk e ka bere duke pyetur njerin kendej, tjetrin andej, dhe hopa, nje postim ne nje gazete dhe ja ku doli e verteta.


Kaloci e te tjere, le te ulen diku, te fillojne hulumtimet qe do te marrin kohe e vite dhe ti permbledhin ne libra te cilat pervec se do te sherbejne si Histori e mirefillte, do te ndihmoje dhe te tjeret te cilet jane te interesuar ne zbardhjen e fakteve.

Pas nje zbulimi, vjen nje tjeter me i madh, pasi te parat sherbejne si bazament per te tjerat ne vazhdim.
Duhej dikush te vertetonte qe Toka eshte e rrumbullaket dhe te tjeret te niseshin nga kjo per te bere zbulimet e tjera.

Ti mendon se rinia ne Shqiperi eshte e interesuar te lexoje shkrimet e Kalocit?? Joooo Brarush. Ata shohin qejfin, muziken, filmat, parfumet, fustanet, kepucet me taka, bizhuterite, celularet si cdo rini ne bote tek e fundit. Dhe ata qe nuk ja kane ngene ketyre qejfeve, ja kane ngene fotoksines apo litarit te lopes me te cilin varin veten.

Shkrimet e Kalocit i lexojne ata qe e kane mendjen te ndare, dhe qe veshtire se mund te influencohen nga dy faqe gazete.

Rinia ndergjegjesohet neper shkolla, duke lexuar librat e historise, filozofise, psikologjise, ekonomise, sociologjise etj. Ashtu u ndergjegjesua per se prapthi rinia e dikurshme.
Cfare thone sot librat e Historise per Enver Hoxhen? Ku bazohen ato? Sigurisht jo tek shkrimet e GSH-se.

Pra historianet shqiptare le te ulen e te kerkojne te verteten, ta publikojne neper libra te cilat do te sherbejne si baze per te vertetat e tjera.

Kjo, pervec punes, mbi te gjitha do kurajo, pasi nuk eshte e lehte te nxjerresh ne drite fakte qe shume nuk do ti pelqenin. Mendo cfare u tha ne lidhje me hapjen e dosjeve.

Keshtu Brarush.
Deri ne mungese te se vertetes Historike, le te kenaqemi me shkrimet e gazetave.