Partite e vogla kunder marreveshjes PS-PD

[StormAngel]

Partitë e vogla, kundër marrëveshjes PS-PD

Partitë parlamentare, me përjashtim të PS dhe PD,kundërshtojnë marrëveshjen e arritur për reformën elektorale dhe Komisionin Parlamentar. Përfaqësuesit e tyre do të bojkotojnë pjesmarrjen në këtë komision

Elton METAJ

Partitë e vogla parlamentare kanë deklaruar zyrtarisht mospjesmarrjen e tyre në komisionin parlamentar për përmirësimet në Kodin Elektoral. Ato e kanë cilësuar komisionin, e ngritur në bazë të një marrëveshje mes Partisë Socialiste dhe asaj Demokratike, si një institucion antikushtetues dhe që nuk garanton barazi ndërmjet forcave politike parlamentare.

Gjatë një tryeze, Kryetari i Partisë Socialdemokrate, Skënder Gjinushi, ka cilësuar ngritjen e komisionit, si një konflikt mes procedurës demokratike dhe jodemokratike, kushtetuese dhe jokushtetuese. “E gjithë procedura është antikushtetuese dhe nuk garanton barazinë e votës së deputetëve e si rrjedhojë nuk garanton as barazinë e votës së qytetarëve”, ka deklaruar Gjinushi. Nga ana e tij, kreu i republikanëve, Fatmir Mediu, ka propozuar që deri në momentin e shprehjes së Gjykatës Kushtetuese, mbi legjitimitetin e komisionit parlamentar, asnjë nga partitë e vogla parlamentare të mos jetë pjesë e këtij komisioni. Një propozim, i cili pas pak diskutimesh u pranua.

Gjithashtu, Mediu ka kërkuar, që në deklaratën përfundimtare të mos shtrohej pika, në të cilën të theksohej se partitë duhet të vëzhgojnë punën e komisionit, nëse kushtetuesja nuk u jep të drejtë atyre dhe lë në fuqi vendimin e ardhur nga marrëveshja PS-PD.

Kreu republikan ka nënvizuar se rregullorja e Kuvendit i lejon çdo deputeti të jetë vëzhgues në punimet e çdo komisioni parlamentar, i përhershëm apo ah hoc qoftë ai. Kështu që kjo pikë duhej të rrëzohej.

Një mendim i cili u pranua nga përfaqësuesit e tjerë politikë. Në tryezën e tyre të parë, të mbledhur në ambjentet e kryesisë së Kuvendit, “të vegjlit”, i kanë kërkuar Kuvendit të Shqipërisë të shfuqizojë pikën katër të protokollit PS-PD. Në këtë pikë, ndër të jera theksohet se “në interes të krijimit të vullnetit politik, hsumica në vendimmarrje kërkon konsensusin e të dy grupeve parlamentare (PS e PD), të përfaqësuara në këtë marrëveshje”.

Partitë e vogla theksojnë se kjo gjë i diskriminon ato dhe se i lë dorë të lirë dy forcave të mëdha, socialistëve dhe demokratëve, të vendosin në bazë të interesave personale dhe duke eliminuar propozimet e tjera, që mund të shkojnë në kundërshtim me interesat e tyre.

“Të vegjlit”, pasi diskutimesh kanë nënshkruar deklaratën e përbashkët, e cila i atribuohet asaj që ato e quajtën “Forumi i Votës së Lirë”. Ata kanë theksuar se pavarësisht nga bindjet politike, vjen nga aspirata e përbashkët, ajo për zgjedhjet të lira dhe larg manipulimeve të mundshme. Përfaqësuesit politikë rënë dakort që puna e tyre të vazhdojë në tryeza të tjera të përbashkëta, për diskutimin në bazë të rekomandimeve të dhëna nga faktorët ndërkombëtarë.

Por, këto tryeza tashmë do të jenë më shumë të karakterit teknik sesa politik.

Pikat e deklaratës:

- Partitë vendosën t’i kërkojnë Kuvendit që në zbatim të rregullores së vet dhe në respektim të sovranitetit të tij dhe të Kushtetutës së Shqipërisë, të shfuqëzojë pikën 4 (katër) të vendimit të datës 01. 07. 2004, lidhur me veton.

- Të mbështesin kërkesën drejtuar Gjykatës Kushtetuese për deklarimin antikushtetues të kësaj pike.

- Të mos marrin pjesë si anëtarë në komisionin e lartëpërmendur, nga i cili “de facto” dhe “de jure” janë përjashtuar, deri në plotësimin e kërkesave të mësipërme.

- T’i kërkojnë OSBE/ODIHR të përckatojë më qartë qendrimin e vet institucional për procedurat që duhen ndjekur në zbatim të rekomandimeve të tyre.

- T’i kërkojnë Presidentit të Republikës dhe tërë faktorëve ndërkomëbtarë të ushtrojnë influencën e tyre për të siguruar procedura transparente, të standarteve të kohës, në kryerjen e reformave zgjedhore.

- Të institucionalizojnë këtë tavolinë, për të mundësuar përcaktimin e qendrimeve të përbashkëta dhe pjesmarrjen aktive të tyre në reflektimin adeguat të rekomandimeve të OSBE/ODIHR dhe për çështje thelbësore të Kodit Zgjedhor, me synim kryerjen e një reforme zgjedhore transparente, në mbrojtie të votës së lirë.