Manipulohen votat e deputeteve ne Kuvendin Popullor

[Albo]

Opozita kërkon masa ndëshkimore për shkelësit e votimit pa prezencë dhe largimin e Pëllumbit

PD: Të hetohet votimi për të përndjekurit

Kreu i Kuvendit akuzohet se ndërpret fjalën e opozitës
Vota për ish-të përndjekurit politikë do të hetohet nga Kuvendi.

Elisabeta Ilnica

Opozita ka kërkuar dje, veç dorëheqjes së kryeparlamentarit Pëllumbi, edhe verifikimin e numërimit të “butonave”. Vendimi është marrë gjatë mbledhjes së djeshme të grupit të PD-së, ku është propozuar që Komisioni i Ligjeve dhe ai i Rregullores e Mandateve, të nisin përkatësisht procedurat për shkarkimin e Pëllumbit dhe hetimin për votimin në Parlament, gjatë miratimit të ligjit për ish-të përndjekurit politikë. Duke e ngarkuar Pëllumbin me përgjegjësinë dhe moszbatimin e rregullores së Parlamentit, lideri demokrat, Sali Berisha, ka theksuar se kërkojmë urgjentisht që të ndërhyjnë të dy komisionet parlamentare. Sipas tij, anullimi i votimit, nga ana e Pëllumbit, erdhi vetëm se ai u kap befasisht duke vjedhur votën, jo se kishte dëshirë “të rrëfehej”. “Kryetari i Parlamentit u kap me presh në dorë, jo se e dorëzoi vetë plaçkën e vjedhur. Historia e llambushkave të tij, gjatë seancës, ishte njëlloj si hajduti që i thotë bashkëpunëtorit që m’i fik pak dritat, sa të grabis unë”, tha dje kreu i PD-së. Sipas tij, posti i Pëllumbit është vënë në dyshim, edhe nga vetë socialistët, por kanë heshtur për shkak të presioneve të kryetarit të tyre, Nano.

Largimi i Pëllumbit

Do t’i shkojmë deri në fund. Ky ka qenë premtimi i djeshëm i Berishës, para grupit të tij parlamentar, përsa i përket largimit të kreut të Kuvendit. Ai ka argumentuar se Pëllumbi, jo vetëm ka vjedhur votat e deputetëve, por në mënyrë të përsëritur, ka shkelur rregulloren në mënyrë flagrante. Duke i sugjeruar atij që t’u kërkojë falje deputetëve të opozitës, dhe më pas të japë dorëheqjen, Berisha tha se “në rast se nuk e bën një veprim të tillë, atëherë do ta bëjmë ne për të, me të gjitha mjetet që na lejon Kushtetuta”. Ai e ka akuzuar Pëllumbin për diskriminim të së djathtës në Parlament, duke ua ndërprerë fjalën ose duke mos ua dhënë fare, qoftë edhe për procedurë. Gjithashtu, Berisha ka bërë retrospektivë për prerjen e sinjalit televiziv shtetëror, kur në Parlament kanë referuar për çështje tejet të rëndësishme, deputetët e opozitës, përfshirë dhe atë vetë. Sipas tij, “në asnjë moment që opozita është dhunuar në Kuvend, Pëllumbi nuk e ka ushtruar funksionin e tij. Përkundrazi, nuk ka bërë gjë tjetër, veçse ka legjitimuar dhunimin e parlamentarizmit në Shqipëri”.


Rregullorja
Kryetari s’dënohet, nëse “vidhet”

Rregullorja e Parlamentit nuk parashikon asnjë ndëshkim për kryetarin e Parlamentit, në rast se vidhet vota. Duke qenë se nuk janë shënuar precedentë të tjerë, në “kushtetutën” e vogël të Kuvendit nuk ka sanksione. Vetëm në Nenin 99 të rregullores, thuhet që “Votimi është vetjak. E drejta e votës nuk mund të delegohet. Votimi bëhet i hapur ose i fshehtë”. Megjithatë, në rast delegimi të votës, nuk sqarohet se çfarë duhet të ndodhë. Në këtë dokument janë radhitur një sërë detyrash për kryetarin e Parlamentit, por jo për fatin e tij, në rast se nuk i zbaton këto detyra. Në dispozitat paraprake të rregullores, thuhet se “kryetari kryeson debatin në Kuvend, drejton punimet, siguron respektimin e të drejtave të Kuvendit dhe të anëtarëve të tij, në përputhje me Kushtetutën dhe Rregulloren e Kuvendit, deklaron hapjen dhe mbylljen e seancave ose të sesioneve të Kuvendit, drejton dhe njofton mbylljen e diskutimeve, cakton radhën e votimeve, njofton rezultatin e votimit”. Megjithatë, duket që rregullorja ua lë gjithë barrën e gabimeve sekretareve, për të cilat thotë se “verifikojnë zhvillimin e votimit të hapur dhe njoftojnë drejtuesin e seancës, për rezultatet e tij”.

[Genti^Itali]

Vetëm për një votë nuk arrin të miratohet projektligji për ndalimin e importit të plehrave

Nano humbet maxhorancën

Shumica dhe pakica, vota të barabarta: 59. PS-së i ikin 7 socialistë dhe 4 aleatë

Anila Rama

TIRANE- Qeveria e drejtuar nga kryeministri Fatos Nano humbet përfundimisht maxhorancën në Parlament. Dje në një provë force në votimin për ndalimin e importit të plehrave maxhoranca u përfaqësua me zor të madh nga vetëm 59 deputetë. Në fakt kjo shifër doli nga votimi në tërësi se në atë në parim maxhoranca kishte vetëm 55 vota. Përveç votave të deputetëve socialistë mbështetës të ish -kryeministrit Ilir Meta, që prej kohësh mbajnë qëndrim të kundërt nga grupi i PS-së, Nano ka humbur së fundi edhe votat e aleatëve të vjetër, PSD dhe PBDNJ, të cilët dje nuk u bashkuan me qëndrimin e mbajtur nga socialistët për votimin e amendamentit të hartuar nga lëvizja “Mjaft” për ndalimin e importit të plehrave për prodhimin e energjisë. Maxhoranca socialiste, së bashku me dy aleatët e vegjël, PAD dhe PAA, me vështirësi arriti të merrte vetëm 59 vota kundër moratoriumit të “Mjaftit”. Por po kaq vota, 59, u shprehën në mbështetje të këtij moratoriumi që u shqyrtua me procedura të përshpejtuara nga komisionet parlamentare, vota që ishin kryesisht të deputetëve të partive opozitare, përfshirë aty edhe 11 votat që jo shumë kohë më parë i përkisnin maxhorancës, 7 deputetë mbështetës të Metës, dy të PBDNJ-së, Kristo Goxhi, Ligoraq Karamelo si dhe 2 të PSD-së Skënder Gjinushi e Gaqo Apostoli, ndërsa munguan në votim nga aleatët vetëm Vangjel Dule dhe Paskal Milo. Amendamenti në fjalë, i përmirësuar pas ndryshimeve të bëra në komisionin parlamentar të Ligjeve, vetëm për një votë nuk arriti të bëhej pjesë e ligjit dhe të miratohej, pasi rezultati i votimit në tërësi ishte i barabartë, 59 pro dhe 59 kundër miratimit të tij, procedurë kjo jo e zakonshme në seancat parlamentare. Madje gjatë votimit në parim, amendamenti arriti të siguronte shumicën e thjeshtë me 59 vota në mbështetje të miratimit të tij, pasi socialistët kishin vetëm 55 vota kundër, ndërsa 7 ishin abstenime. Të vetmit që abstenuan gjatë dy votimeve në tërësi dhe në parim, ishin deputetët socialistë Petro Koçi, Ilir Zela dhe Taulant Dedja. Ndërsa tre socialistët Durim Hushi, Luan Rama dhe Ilir Gjoni të ndodhur nën presionin psikologjik të kryetarit të grupit parlamentar të socialistëve Gramoz Ruçi, që kontrollonte gjithë lëvizjet e deputetëve të tij, shfaqën në harkun kohor të 10 minutave, dy qëndrime krejtësisht të ndryshme, herën e parë duke abstenuar, ndërsa në votimin në tërësi, u bashkuan me votat kundër të grupit parlamentar. Tashmë socialistët do të duhet të bëjnë mirë llogaritë, përpara se të paraqesin në Kuvend projektligje të rëndësishme, apo votime, nga do të varet çështje që mund të ndikojnë drejtpërdrejt në vazhdimin e mëtejshëm të qeverisjes së tyre. Ndoshta rezultati i votimit të djeshëm në Parlament mund të përforcojë idenë e hedhur nga dy zyrtarë të lartë të selisë rozë për afrimin e zgjedhjeve parlamentare të planifikuara në qershor të vitit të ardhshëm. Nëse kjo ishte thjesht një presion për aleatët dhe grupin e Metës, dje në Kuvend u provua se nuk ka më maxhorancë.