Privatizimi

[dodoni]

Mbarëshqiptare

Eltion Hoxha - 21/09/2004

AKM: Konfiskim të ndërmarrjeve, kompanive që nuk përmbushin investimet e premtuara

Të gjitha kompanive që do të privatizojnë ndërmarrjet shoqërore në Kosovë me metodën “spin off”, në rast të mos përmbushjes së planeve të biznesit të paraqitura në momentin e tenderimit, do t’u konfiskohet prona e re


Blerësit e ndërmarrjeve shoqërore në Kosovë nëpërmjet “spin off”-it special (blerje e ndërmarrjes me disa kushtëzime) për t'u shpallur fitues duhet të paraqesin planin e biznesit, shumën e mjeteve që planifikohen të investohen dhe numrin e punëtorëve që do të angazhohen në punë. Nëse fituesi i ofertës për ndërmarrjet e shitura shoqërore dështon në përmbushjen e investimeve të premtuara në bazë të planit të biznesit, PSSP-ja ka të drejtën e rishitjes së asaj ndërmarrjeje, thanë zyrtarë të Agjencisë Kosovare të Mirëbesimit (AKM). Në raundin e tretë, nga 18 ndërmarrje, vetëm tri prej tyre do të shiten me “spin-off” special (”Ferronikeli”, “Përparimi”, Banja e Kllokotit), ndërsa për 15 ndërmarrje të tjera janë shpallur fituesit e përkohshëm.
Për raundin e tretë të privatizimit u shpallën 18 pronarët e përkohshëm të ndërmarrjeve shoqërore. Në këtë raund, për “spin off” të rregullt janë dorëzuar 97 oferta. Ndërsa vlera totale e ofertave finale që janë fituese të përkohshme ka qenë mbi 16 milionë euro. Ahmet Shala, zëvendësdrejtor i AKM-së, tha se është i kënaqur me numrin e madh të të interesuarve, si nga vendi, ashtu edhe nga Europa dhe, sipas tij, kjo tregon se investitorët kanë besim në procesin e privatizimit, në AKM-në dhe në investimet në Kosovë.
“Raundi i tretë ka qenë një kthesë e veçantë për të gjithë. Ai ka kthyer besimin për ndërmarrjet të cilat janë në proces të privatizimit dhe do të kthejë edhe besimin e investimeve që do të reflektohen edhe në pasqyrën e zhvillimit ekonomik të Kosovës”, tha Shala. Shala tha se shumë shpejt do të fillojë edhe raundi i katërt i procesit të privatizimit dhe për çdo muaj do të jenë së paku 10 ndërmarrje të ofruara për privatizim.
Kirk Adams, zëvendësdrejtor i Departamentit të Privatizimit, tha sa “spin off”-i special mundëson që investimet e bëra në ndërmarrje të shpenzohen në Kosovë. “Niveli i investimeve garanton vënien e aseteve në përdorim si dhe mundësi të reja për të punësuarit”, tha ai. Adams, sa i përket “Ferronikelit”, tha se për momentin janë duke pritur që të përfundojë parakualifikimi, para datës 24 shtator, por, sipas tij, të interesuarit për këtë ndërmarrje duhet të jenë kompani profesionale lidhur me mineralet. Sipas tij, kompanitë që parakualifikohen për “Ferronikelin” do të bëjnë ofertën më 17 nëntor dhe kjo u jep atyre mjaft kohë që të rishikojnë pasuritë e kompanisë. Tetë dhjetori është afati i fundit i dorëzimit dhe hapjes së ofertave. Çmimet e ofertave ishin nga më të ndryshmet duke shënuar shpeshherë dallime të mëdha mes tyre. Oferta më e lartë, me një çmim prej mbi 4 milionë eurosh, i është bërë Shtëpisë së Mallrave “17 Nëntori” në Pejë, e pasuar nga oferta prej rreth 3.5 milionë eurosh për Banjën e Kllokotit, ndërkohë oferta më e ulët me çmim prej 45 250 eurosh i është bërë një dyqani në Gjakovë.


“Beselica” ka fituar tenderin për “Fazitën”
Ndonëse AKM-ja ende nuk ka shpallur emrat e fituesve të tenderit të tretë të privatizimit, drejtuesit e kompanisë “Beselica” nga Podujeva pohuan se ata janë fitues të tenderit për blerjen e fabrikës së tapetave “Fazita” në Prishtinë. Xhevdet Beselica, njëri prej pronarve të “Beselica”, tha se oferta e tyre prej 2.8 milionë eurosh ishte më e larta dhe se ata janë shpallur fitues. Kjo është ndërmarrja e dytë shoqërore që blehet nga “Beselica”. Në raundin e dytë të privatizimit, ata gjatë raundit të dytë blenë ndërmarrjen për prodhimin e blloqeve “17 Nëntori” në Podujevë.

[dodoni]

Besim Djaloshi - 20/09/2004

Vlera fillestare e ARMO-së, 65 milionë dollarë

ARMO është e përbërë nga dy rafineri me kapacitet prodhues 1.5 milionë ton gazoil në vit si dhe nga një rrjet i madh pikash karburanti, trojesh e depozitash për import-eksportin e hidrokarbureve.


ARMO është një kompani, e cila është krijuar në prill të vitit 1999, nga ndarja e ish- ndërmarrjes së Albpetrolit. Kapitali themeltar i kësaj kompanie llogaritet të jetë rreth 5.3 miliardë lekë, shumë të cilës do t’i shtohen minimalisht edhe 1.5 miliardë lekë të tjera, kjo pas përfundimit të regjistrimit dhe vlerësimit të aseteve të kësaj shoqërie, të cilat janë të shpërndara pothuajse në të gjithë territorin e vendit. Është një kompani me kapital tërësisht shtetëror. Ajo ka si pronarë Ministrinë e Ekonomisë dhe punon në varësi të Ministrisë së Industrisë dhe Energjetikës. Sipas drejtorit të përgjithshëm të kompanisë ARMO, Përparim Hajnaj, duke u bazuar në vendimin e Këshillit të Ministrave si dhe në kapitalet që zotëron aktualisht kjo kompani, vlera minimale e çmimit me të cilin do të hapet tenderi ndërkombëtar për blerjen e saj është afërsisht 7 miliardë lekë. Konvertuar në dollarë kjo shifër kap vlerën e afro 65 milionë dollarëve amerikanë.
Produktet dhe asetet e kësaj kompanie
Kompania në fjalë për volumin e produkteve dhe nënprodukteve që prodhon zë rreth 25 për qind të tregut të gazoilit në vend. Gjithashtu ARMO është furnizuesi i vetëm i tregut vendës me bitum dhe i TEC-it të Fierit me lëndë djegëse, solar. Produktet kryesore të saj janë: nafta virxhine, qymyri koks dhe solari. ARMO ka në pronësi të sajë dy rafineri në Ballsh dhe Fier, të cilat janë të vetmet rafineri përpunuese të naftës në Shqipëri. Gjithashtu ajo zotëron një rrjet të madh për shitjen e karburanteve në të gjithë territorin e vendit, një stacion në Vlorë për import-eksport hidrokarburesh si dhe një laborator bashkëkohor.
Kapaciteti përpunues
Kapaciteti përpunuers i kompanisë ARMO, e cila ndodhet në prag të privatizimit, është 1.5 milionë tonë gazoil në vit, ose 35 mijë barrela në ditë. Ky kapacitet prodhimi arrihet nëpërmjet 2 rafinerive, rafinerisë së Ballshit, e cila ka një kapacitet prodhues prej 1 milion tonë në vit, si dhe rafinerisë së Fierit me kapacitet përpunimi 0.5 milion tonë gazoil në vit.
Numri i të punësuarve në kompaninë ARMO
ARMO aktualisht ka të punësuar në kompaninë e saj rreth 1925 punëtorë. Ndërkohë që në programin e zhvillimit ka të programuar jo më shumë se 1770 punëtorë. Sipas drejtorit të kësaj kompanie, stafi i punonjësve është i kualifikuar dhe paguhet në mënyrë të kënaqshme, krahasuar me tregun e punës në vend.
Rafineria e Ballshit
Rafineria e Ballshit është vënë në punë në vitin 1978 me asistencën e specialistëve kinezë dhe përbehet nga këto impiante: Koksifikim i vonuar 70 mijë tonë në vit, prodhim hidrogjeni 50 mijë tonë në vit, reformingu katalitik 150 mijë tonë në vit, etj.
Farineria e Fierit
Kjo rafineri është vënë në punë për herë të parë në vitin 1986 nga specialistët vendës. Produktet kryesorë të kësaj rafinerie janë: benzina 7 për qind, gazoili 20 për qind, mbetjet e mazutut dhe bitumit 70 për qind, lëndë djegëse 2 për qind.



Atnand Kola, Besim Djaloshi - 20/09/2004

Biznesi vëndës përjashtohet nga privatizimi i ARMO-së

Kompanitë shqiptare, nga kushtet e vëna (certifikim i ISO 9000) nga Ministria e Ekonomisë, nuk mund të marrin pjesë në privatizimin e 51 për qind të aksioneve të kompanisë së naftës ARMO dhe nga shitja e 76 për qind të aksioneve të Albtelekomit . Grosistët e naftës:”Përjashtim i qëllimshëm dhe tendencioz


Asnjë nga kompanitë private shqiptare nuk mund të marrin pjesë në procesin e privatizimi të kompanisë shtetërore të naftës ARMO. Në vendimin më të fundit që ka marrë Ministria e Ekonomisë, në lidhje me kriteret se cilat kompani kanë të drejtë të marrin pjesë në tenderin e shoqërisë së naftës ARMO, është përjashtuar biznesi vëndës, duke bërë kështu të mundur favorizimin kompanive të huaja. Burime pranë Ministrisë së Ekonomisë bëjnë të ditur se “sipas kushteve të vëna nga kjo ministri për privatizimin e vetëm 51 për qind të shoqërisë së naftës ARMO, biznesi shqiptar nuk ka të drejtë të marrë pjesë në këtë proces tenderimi”. Kushti kryesor është fakti se kompanitë që janë të interesuara për blerjen e ARMO-së duhet të kenë standardet e certifikimit ISO 9000, ku aktualisht këtë standard nuk e përmbush asnjë kompani vëndëse. Sipas këtyre burimeve një tjetër kusht për pjesëmarrje në këtë privatizim të këtij sektori të rëndësishëm është që “kompanitë e interesuara duhet të kenë një vlerë neto të konsoliduar jo më të vogël se 133 milionë dollarë si dhe të jenë të specializuara në fushën e përpunimit dhe tregtimit të naftës për një periudhë jë më pak se trevjeçare”.
Sipas Lad Fishekut, pronar i kompanisë “Fisheku” dhe aksioner në “Petrolimpex”, të cilat merren me tregtimin e naftës së importuar, vendosja e kritereve të tilla të cilat automatikisht përjashtojnë kompanitë vendëse nga pjesëmarrja në privatizimin e kompanisë shtetërore ARMO, bëhet në mënyrë të qëllimshme, tendencioze dhe për interesa të caktuara. “Shuma bazë e konsoliduar perj 133 milionë dollarësh që duhet të kenë kompanitë për të marrë pjesë në privatizim nuk përbën problem, kjo pasi vlera e kompanisë sime llogaritet të jetë afro 150 milionë dollarë, por është standarti ISO 9000 që përbën pengesën kryesore”, shprehet ai.
Pak ditë më parë Ministria e Ekonomisë, me kushtet e vënë për kompanitë private që janë të interesuara në tenderin e 76 për qind të aksioneve të kompanisë shtetërore të telefonisë fikse Albtelekom, ka nxjerrë jashtë loje të gjitha kompanitë vëndëse dhe ka favorizuar vetëm kompanitë e huaja.

Paketa ligjore për privatizim
Miratimi nga qeveria e paketës ligjore për vazhdimin dhe përfundimin e procesit të privatizimit të dy prej kompanive më të mëdha të vendit lejon që investitorët strategjikë të privatizojnë 51 për qind të aksioneve të kompanisë së naftës ARMO. Burime zyrtare pranë Ministrisë së Ekonomisë bëjnë të ditur se "në paketën e akteve nënligjore, për shoqërinë Albtelekom investitorit strategjik do t’i ofrohet maksimumi që lejon ligji dhe që në këtë kuptim do të jetë e hapur paketa prej 76 për qind”. Ndërsa për shoqërinë shtetërore të naftës ARMO, paketa e aksioneve që i ofrohet investitorit është miratuar në rreth 51 për qind, duke lënë hapësira për përcaktimin e saj në kontakt të vazhdueshëm me spektrin e investitorëve që do të shfaqin interes gjatë fazës së “shprehjes së interesit”. Ndërkohë, pjesa e mbetur e paketës së aksioneve është e hapur për të gjithë publikun, përfshi edhe investitorin strategjik.

Kriteret për kompanitë e interesuara për blerjen e ARMO-s
- Të jetë person juridik që zotëron garanci financiare dhe të jetë i njohur në veprimtarinë ekonomike në një sektor të caktuar, në përputhje me standardet e certifikimit ISO 9000, ose me standardet e njësuara me to.
- Të ketë një kapital tërësisht të paguar në mbi 51 milionë dollarë, apo barazvlerën e kësaj shume në valutë, në të cilën është shprehur kapitali. Gjithashtu duhet që vlera neto e konsoliduar duhet të jetë, të paktën, 133 milionë dollarë.
- Të jenë shoqëri të specializuara në fushën e përpunimit dhe tregtimit të naftës, gazit dhe nënprodukteve të tyre, e cila t’i ketë siguruar këto kompani për një periudhë jo më pak se tre vjet. Në rast të konsorciumeve apo bashkimit të investitorëve, anëtari kryesor duhe të të përmbushë kërkesat e lartpërmendura.
- Nuk do të pranohen në procedurën e tenderit palët që nuk janë në likujdim, që nuk kanë aftësi paguese, ose kanë mbingarkesë në borxhe.
- Në rastin e bashkimit të shoqërive për t’u paraqitur si palë e vetme për blerjen e aksioneve, investitori strategjik duhet të ketë kontrollin e bashkimit.
- Duhet që kërkesa të vërtetohet me certifikata zyrtare, të lëshiuara nga autoritet përkatëse, ose me dokumente të tjera të shkruara zyrtare.


Lad Fisheku, pronar i kompanisë “Fisheku”

“Përjashtimi i kompanive shqiptare, tendencioz dhe për interesa të caktuara”


Lad Fisheku, pronar i kompanisë “Fisheku” dhe aksioner në “Petrolimpex”, një ndër importuesit më të mëdhenj të hidrokarbureve në Shqipëri, duke marrë shkas nga vendimet e fundit të qeverisë u shpreh se këto vendime janë të padrejta. Sipas tij, vendosja e kritereve të tilla të cilat automatikisht përjashtojnë kompanitë vendëse nga pjesëmarrja në privatizimin e kompanisë shtetërore ARMO, bëhet në mënyrë të qëllimshme, tendencioze dhe për interesa të caktuara. Fisheku shprehet se ”nuk ka përse të vendosen kushte të tilla ku të përjashtohet biznesi vendës nga pjesëmarrja në privatizimin e kompanisë së vetme përpunuese të naftësë në vend. Për më tepër, ndërmarrja e një hapi të tillë, vijoi ai më tej, dëmton rëndë biznesin vendës, ku numri i kompanivë te interesuara për të marrë pjesë në blerjen e ARMO-së është tepër i lartë. Vetë Lad Fisheku bëri të ditur për gazetën “Biznesi” se është shumë i interesuar për të marrë pjesë në privatizimin e kësaj kompanie. Ai u shpreh se shuma bazë e konsoliduar perj 133 milionë dollarësh që duhet të kenë kompanitë për të marrë pjesë në privatizim nuk përbën problem, kjo pasi vlera e kompanisë së tij llogaritet të jetë afro 150 milionë dollarë, por është standardi ISO 9000 që përbën pengesën kryesore, kjo sepse asnjë kompani shqiptare nuk ka një standard të tillë. Madje, për më tepër, një pjesë e mirë e biznesmenëve dhe importuesve as nuk e njohin e jo më ta posedojnë atë.


Nuk është e vërtetë që asnjë kompani shqiptare nuk ka një standard të tillë por unë mendoj se qeveria shqiptare në raste si këto duhet të ketë parasysh këto tre gjëra:

- A është ARMO apo kompania që po privatizohet, strategjike për kombin? në rast se po atëherë mund t'i kërkohet kompanive shqiptare që të marrin ISO 9000 brenda tre viteve të ardhshme (sepse kaq vite duhen për tu certifikuar me të) dhe të lejohen ta privatizojnë këtë kompani me këtë kusht

- A ka kontraktor ARMO që e kërkojnë medoemos këtë lloj çertifikimi? dhe sa të rëndësishëm për fitueshmërinë dhe suksesin e ARMO-s janë këta kontraktorë? Nëse po, atëherë medoemos duhet kërkuar kompani me ISO 9000. Nëse jo atëherë prapë sikur në rastin e parë, mund të privatizohet edhe nga kompanitë shqiptare por me kusht që të certifikohen me ISO 9000 brenda tre viteve të ardhshme

- Sa ka mundësi që kompanitë shqiptare ta investojnë diku tjetër (brenda në Shqipëri) atë shumë parash kurse ARMO të privatizohet nga kompani të huaja që përndryshe nuk do të investonin në vendin tonë, pra është ARMO që po i bën të investojnë ekskluzivisht në vendin tonë. Kështu sigurojmë më shumë investime si nga kompanitë shqiptare ashtu edhe nga ato të huaja

Mendoj se këto tre gjëra përveç tjerash duhet të kihen parasysh nga qeveria shqiptare sa herë që privatizojnë kompanitë shtetërore.

[dodoni]

Mbarëshqiptare

Eltion Hoxha - 23/09/2004

Biznesmenët kosovarë privatizojnë dy ndërmarrje me “spin-off” special

“Banja e Kllokotit” në Viti është shitur për 4 milionë e 600 mijë euro, ndërsa “Përparimi” në Skënderaj për 1,2 milionë euro


Kompania kosovare “Gazi Trade” nga Gjilani është fituese e tenderit për “Banjën e Kllokotit”, ndërsa kompania “Vllezërit Geci” ka blerë ndërmarrjen “Përparimi” në Skënderaj. Këto janë rezultatet e publikuara të mërkurën nga Agjencia Kosovare e Mirëbesimit (AKM). Për herë të parë gjatë privatizimit të këtyre ndërmarrjeve është përdorur metoda e “spin-off”-it special.
“Banja e Kllokotit”, përveç banjës kurative, posedon edhe fabrikën për prodhimin e ujit mineral. Ndërkohë që “Përparimi” është fabrikë e cila merret me prodhimin e blloqeve. Prentendetë për privatizimin e këtyre ndërmarrjeve fillimisht kanë qenë 16 oferta, ndërkohë dje në fazën e dytë të ofertimit ishin gjashtë oferta, nga tri për secilën. Ofertat janë hapur në prani të anëtarëve të bordit të AKM-së dhe përfaqësuesve të kompanive konkurruese. Ofertuesi nga Gjilani, për fabrikën e prodhimit të ujit mineral “Banja e Kllokotit”, e cila gjendet në Viti, e bleu ndërmarrjen për 4 milionë e 600 mijë euro, ndërsa është zotuar se do të investojë mbi 4 milionë euro dhe do të punësojë 252 punëtorë. Ndërsa fituesi i ndërmarrjes për prodhimin e blloqeve “Përparimi” në Skënderaj ka ofruar një çmim mbi 1,2 milionë euro dhe ka premtuar investime në vlerë prej 2 milionë eurosh. Ai ka premtuar se do të punësojë në këtë ndërmarrje 150 punëtorë.
Jasper Dick, drejtori menaxhues i AKM-së, beson se fituesit do të përmbushin investimet dhe punësimin e premtuar. “AKM-ja ka në funksion medodat me të cilat do të vlerësojë në se po realizohen investimet dhe punësimi i premtuar”, tha Dick. Gazmend Alidema, përfaqësues i ndërmarrjes “Gazi Trade” në Gjilan, e cila merret me përpunimin e mishit dhe shitjen me shumicë të produkteve ushqimore, tha se çmimi që kanë ofruar për “Banjën e Kllokotit” është real dhe jo i lartë, për shkak se kjo ndërmarrje ka emër dhe treg të majftueshëm. Sipas tij, ata do të fillojnë me disa riparime në objekte, pastaj me krijimin e linjave të reja të prodhimit të shisheve të plastikës dhe lëngjeve të gazuara. Arben Geci, përfaqësues i ndërmarrjes “Vllezërit Geci” në Skënderaj, fitues i ndërmarrjes “Përparimi”, beson se kjo firmë ka kapacitet të mjaftueshëm për prodhimin e blloqeve të kualitetit të lartë. “Kemi ofruar çmimin më të lartë dhe besoj se në të ardhmen do të dimë të menaxhojmë këtë firmë, punëtorët do të kenë mjaftë punë dhe më nuk do të kemi importim të blloqeve nga jashtë”, tha Geci. Ky është raundi i tretë i privatizimit në të cilin janë shpallur edhe 18 pronarët e përkohshëm të ndërmarrjeve shoqërore me “spin-off” të rregullt për të cilat janë dorëzuar 97 oferta. Ndërsa vlera totale e ofertave finale që janë fituese të përkohshme ka qenë mbi 16 milionë euro.
Ndërsa sa i përket “spin-off-it” special “Banja e Kllokotit” në Viti dhe ndërmarrja “Përparimi” në Skënderaj janë dy ndërmarrjet e para që po privatizohen në këtë raund.


Metoda “spin-off” special
“Spin-off”-i special është njëra nga tri metodat që do të përdoren gjatë privatizimit të ndërmarrjeve shoqërore në Kosovë, krahas “spin-off”-it të rregullt dhe metodës së likuidimit vullnetar. Me “spin-off” special, në dallim nga dy metodat tjera, blerësit e ndërmarrjeve obligohen që të mbajnë në punë një numër të caktuar të punëtorëve dhe të paraqesin një plan biznesi në të cilin parashihen edhe zotimet për investimet që do të bëhen në ndërmarrjet e privatizuara.

[dodoni]

Besim Djaloshi - 24/09/2004

Importuesit peticion kryeministrit për ARMO

Grosistët më të mëdhenj të naftës, pas takimit ndërmjet tyre janë shprehur të gatshëm për të marrë pjesë në tenderin ndërkombëtar për privatizimin e 51 për qind të aksioneve të ARMO-së


Importuesit më të mëdhenj të hidrokarbureve pritet t’i dërgojnë sot një letër kryeministrit të vendit, Fatos Nano, për të riparë mundësinë e pjesëmarrjes së biznesit vendës në privatizimin e ARMO-s. Kjo për shkak se atyre u është mohuar e drejta për të marrë pjesë në tenderin e hapur ndërkombëtar për blerjen e 51 për qind të aksioneve të kompanisë së vetme përpunuese të naftës në vend, ARMO. Një fakt të tillë e bëri të ditur vetë kryetari i Shoqatës së Shoqërive Importuese të Hidrokarbureve, Viktor Nushi. Sipas tij, vendimi u mor pas një takimi që grosistët më të mëdhenj të naftës në vend patën ndërmjet tyre për të diskutuar rreth kësaj çështjeje. Pas bisedimeve ata arritën në përfundimin se përjashtimi i tyre nga tenderi ndërkombëtar është i padrejtë dhe për qëllime të caktuara. Për këtë ata do t’i dërkojnë një letër sot kryeministrit Fatos Nano ku të kërkojnë prej tij rishikimin e kushteve të vendosura nga Ministria e Ekonomisë. Vlen për tu theksuar fakti se kushtet që duhet të plotësojnë kompanitë për të marrë pjesë në tenderin ndërkombëtar janë të tilla që skualifikojnë në mënyrë automatike biznesmenët dhe importuesit shqiptarë. Prej tyre mund të përmendim se si kusht bazë është certifikata iso 9000, certifikatë e cila u jepet operatorëve pas një përvoje të gjatë në këtë fushë dhe përmbushjes së disa standardeve. Gjithashtu kompanitë e interesuara duhet të kenë edhe një kapital tërësisht të paguar prej 51 milionë dollarësh si dhe një bazë të kosoliduar prej jo më pak se 133 milionë dollarësh. Duhet të kenë një përvojë operimi trevjeçare në fushën e hidrokarbureve, nuk duhet të jenë të mbingarkuar me borxhe si dhe të paraqesin një kërkesë e cila të vërtetohet me certifikata zyrtare, të lëshuara nga autoritet përkatëse, ose me dokumente të tjera të shkruara zyrtare.


Lad Fisheku
Lad Fisheku, pronar i kompanisë “Fisheku” dhe aksioner në “Petrolimpex”, në lidhje me vendimet e fundit të qeverisë i vlerëson ato të padrejta. Sipas tij, vendosja e kritereve të tilla që përjashtojnë kompanitë vendëse nga pjesëmarrja në privatizim, bëhet në mënyrë të qëllimshme dhe për interesa të caktuara. Fisheku shprehet se ”nuk ka përse të vendosen kushte të tilla ku të përjashtohet biznesi vendës nga pjesëmarrja në privatizimin e kompanisë së vetme përpunuese të naftës në vend. Për më tepër, ndërmarrja e një hapi të tillë, vijoi ai më tej, dëmton rëndë biznesin vendës, ku numri i kompanivë te interesuara për të marrë pjesë në blerjen e ARMO-së është tepër i lartë. Gjithashtu ai shprehu gatishmërinë e tij për të marrë pjesë në tender për blerjen e 51 për qind të aksioneve të kësaj kompanie.


Cila është ARMO?
ARMO është një kompani, e cila është krijuar në prill të vitit 1999, nga ndarja e ish- ndërmarrjes së Albpetrolit. Kapitali themeltar i kësaj kompanie llogaritet të jetë rreth 5.3 miliardë lekë, shumë të cilës do t’i shtohen minimalisht edhe 1.5 miliardë lekë të tjera, kjo pas përfundimit të regjistrimit dhe vlerësimit të aseteve të kësaj shoqërie, të cilat janë të shpërndara pothuajse në të gjithë territorin e vendit. Është një kompani me kapital tërësisht shtetëror. Ajo ka si pronar Ministrinë e Ekonomisë dhe punon në varësi të Ministrisë së Industrisë dhe Energjetikës. Në bazë të kapitaleve që zotëron aktualisht kjo kompani, vlera minimale e çmimit me të cilin do të hapet tenderi ndërkombëtar për blerjen e saj është afërsisht 7 miliardë lekë. Konvertuar në dollarë kjo shifër kap vlerën e afro 65 milionë dollarëve amerikanë. Në vetvete ajo është e përbërë nga 2 rafineri, Ballshi dhe Fieri, me kapacitet përpunimi përkatësisht 1 milion dhe 0.5 milion tonë gazoil në vit. Në këto dy rafineri bëhet përpunimi i thellë i naftës dhe nënprodukteve të saj, siç janë benzina, vajguri etj.

[bebushe]

kot per kurjozitet sa esht nje aksion i Albtelekom ne Shqiperi dhe a ka njerez qe i blejne ato , a funksionon bursa Shqiptare apo akoma ?

[StormAngel]

Pyetje e mire bebushe.
A ka berza shqiptare web faqen e vete apo ... ?