Në Shqipëri rreth 60 mijë përdorues drogërash, më të vegjlit 14- vjec

[ALBA]

NE QENDREN EMANUEL NE DITEN BOTERORE KUNDER DROGES


"Më shumë përdorues fëmijë intelektualësh"


--------------------------------------------------------------------------------

Agime Kastrati


TIRANE

Dita Botërore kundër Drogës e gjen Shqipërinë me plot 40 mijë përdorues të drogave të ndryshme. Në rrjetin famëkeq të helmit vdekjeprurës janë përfshirë kryesisht të rinjtë. Ndërkohë që vetëm në Tiranë janë 10 mijë përdorues. Një e katërta e tyre janë përdorues të drogave intravenoze. Në një raport të Qendrës për Zvogëlimin e Dëmit "Aksion Plus" thuhet gjithashtu se mosha mesatare e përdoruesve është 18-24 vjeç, me grupe më të rrezikuara adoleshentët, romët, punonjëset komerciale të seksit. Ndërsa drogat më të përdorura janë kanabisi, heroina, kokaina, kombinime të drogave me alkoolin dhe më rrallë ekstazi, që është dhe më e shtrenjta. Në ditën botërore kundër drogës janë zhvilluar aktivitete edhe në Tiranë. "Të rinjtë ndërtues të së ardhmes", kështu është titulluar aktiviteti i zhvilluar në qendrën "Emanuel", në bashkëpunim me Bashkinë e Tiranës, Ministrinë e Punës dhe të Çështjeve Sociale dhe OSCE-në janë dhe organizuesit dhe sensibilizuesit e opinionit në ditën kundër drogës. Eshtë i gjashti vit që të rinjtë shqiptarë përdorues drogash të ndryshme kanë gjetur prehje te komuniteti "Emanuel", qendër kjo që bën të mundur diagnostikimin e tyre të plotë. Përdoruesit e "miellit të bardhë" i kanë shpallur "luftë" helmit vdekjeprurës dhe kanë nisur jetën nga fillimi. Të parët që kanë shkelur dyert e komunitetit "Emanuel" janë djemtë tiranas.

Qendra
"Para gjashtë vjetësh, të parët që kanë shkelur dyert e qendrës ishin të rinj nga familje intelektualësh. Ndërsa tani droga është bërë gjithëpërfshirëse. Së fundmi në rrjetin e drogës janë përfshirë dhe romët". Kështu është shprehur për Gazetën Besa Rroshi, kryetare e komunitetit "Emanuel" në Shqipëri. Ajo sqaron se terapia që ofron për të rinjtë komuniteti që ajo drejton është shumë e veçantë dhe bën të mundur vetëndër-gjegjësimin e tyre. Aktualisht komuniteti "Emanuel" në Shqipëri vepron përmes dy qendrave, një qendër ditore në Tiranë dhe rezidencës së saj në Vaqarr.

Më pak femra
"Aktualisht në rezidencën tonë trajtohen 20 djem të moshave të ndryshme. Rreth 14 muaj është koha e plotë e trajtimit të përdoruesve në qendër. Kjo kohë mundëson që të rinjtë t'i shpëtojnë drogës", rrëfen Rroshi. Mungesa e elementit femër në qendër sa vjen e theksohet më shumë. Që nga hapja e qendrës së distoksikimit në Vaqarr e deri tani janë trajtuar vetëm 4 femra. Që nga '98-a e deri tani në qendrën tonë janë këshilluar e trajtuar vetëm katër femra.


Sociologu italian: Shqiptarët dalin më shpejt nga droga

Numërohen me dhjetëra të rinj shqiptarë të kuruar nga duart e tij. Jo vetëm kaq, por ka vite të tëra që viziton Shqipërinë, njëkohësisht dhe të rinjtë përdorues drogash të ndryshme që trajtohen në komunitetin "Emanuel" në Vaqarr. Gigi Za, profesor në Universitetin e Leçes shprehet se: me komunitetin shqiptar ekziston një marrëdhënie respekti shumë e fortë. Çdo herë që më thërrasin unë bashkohem me ta. Unë punoj me të rinjtë jo vetëm si professor, por kam rastin të bëj projekte të posaçme për ta. Sipas mendimit tim, këtu në Shqipëri është një situatë delikate, është pak më ndryshe se te të rinjtë italianë, kjo për shkak se te të rinjtë shqiptarë ekziston një gjendje e keqe. Ata kanë shumë vështirësi të njohin vetveten në një shoqëri në tranzicion. Nuk harron të shtojë faktin se të rinjtë shqiptarë në pak kohë ia dalin më mirë të lënë drogën. Problem në Shqipëri është se ka shumë pak ndihmë dhe qendra kuruese që të ndihmojnë të rinjtë të dalin nga droga.


Themeluesi i komunitetit "Emanuel": Qendra juaj më e mira në Ballkan

Atë Mario Marafioti, "kumbari" i të rinjve shqiptarë, ka ardhur të kalojë ditën kundër drogës së bashku me ta. Ai është themeluesi i dhjetëra komuniteteve në çdo qytet të Italisë dhe jashtë saj. Njëkohësisht është dhe mbështetësi dhe themeluesi i komunitetit "Emanuel" në Shqipëri. "Kam ardhur këtu nga dashuria ime për komunitetin "Emanuel" në Shqipëri, për të rinjtë shqiptarë që i ndjekim për vite të tëra, për të cilët ëndërroj një të ardhme më të bukur," nis të tregoj Atë Marafioti. Ai shton se problemi i drogës në Shqipëri mendohet se është një dukuri e lidhur me vështirësitë e kalimit nga regjimi i vjetër në demokracinë aktuale, dhe nga ambiente social-kulturore të mbyllura dhe homogjene gjatë kohës së regjimit, në një klimë kaq të hapur siç është sot. Është dëshira e vazhdueshme për ikjen drejt një mirëqenieje ekonomike në mënyrë sa më të thjeshtë e të shpejtë. "Droga është një vrapim, një ikje", kështu e përkufizon Atë Mario drogën për shqiptarët. Atë Mario kujton dhe vitin kur ai është shtyrë nga domosdoshmëria e shqiptarëve për të marrë ndihmë nga ai. Ai shton se qendra e komunitetit "Emanuel" në Vaqarr është një ndër qendrat më të mira në Ballkan. Në këtë qendër pritet të kurohen dhe të rinjtë kosovarë.

[Albo]

Në Shqipëri rreth 60 mijë përdorues drogërash, më të vegjlit 14- vjec

TIRANË- Numri i përdoruesve të drogës në vend ka ardhur në rritje, ndërsa përllogaritet që numri të variojë midis 40 000 dhe 60 000 përdorues të drogave ilegale. “Ashtu si në çdo vend të botës, përdorimi dhe abuzimi me substancat ilegale është një fakt i pamohueshëm dhe numri i përdoruesve të drogës është në rritje.

Llogaritet që në vendin tonë janë rreth 40.000 – 60.000 përdorues të drogave ilegale, ku droga më e përdorur rezulton marijuana dhe më pas vijne heroina, kokaina apo droga të tjera”, tha sot drejtori i Përgjithshëm i Politikave Shëndetësore në Ministrinë e Shëndetësisë, Pëllumb Pipero.

Lëndët që përdoren janë kanabis, gjë që paraqitet problematike në shkollat e e mesme, heroina (tymosje, injektim, e përzierë, shkëmbim shiringash, më shumë injektim), kokaina (tymosje), si dhe po vihen re dhe kombinime (Diazepam, alkool, ketaminë,etj)

Ndërsa, substancat psikoaktive që përdoren më masivisht janë prodhimet e kanabis (rreth 65 %); përdoruesit e opiateve, kryesisht heroinë, janë 20-25% ( një pjesë e konsiderushme e të cilave administrohet intravenoz duke përbërë një kërcënim potencial për sëmundje të trasmetueshme); rreth 10% janë përdorues të kokainës. Vëzhgimet dhe konstatimet konstatojnë një rritje të preferencave për substanca sintetike, veçanërisht e stimulantëve të tipit të amfetaminës (ekstazi etj).

Grupet vulnerabël konsiderohen të rinjtë, nën 34 vjeç, kryesisht të papunë, 14 –17 vjeç, të cilët nuk shkojnë në shkollë, por dhe nxënës. Në grupët vulnerabël përfshihen dhe punëtoret e seksit (prostituta, travestitë, etj), romët, të rikthyerit e zhgënjyer nga emigracioni, personat që kanë tentuar disa herë abstinencën. Por, nga ana tjetër, studimet e ndryshme kanë treguar se të rinjtë janë ata që eksperimentojnë më shumë me drogat, edhe pse me një rritje të lehtë gjatë viteve.

Shërbimet e parandalimit dhe trajtimit
Ndërkohë, sipas Piperos, edhe pse të limituara në numer dhe shërbimi, programet e parandalimit dhe trajtimit të personave adiktiv jane prezente ne vendin tone. “Në krahasim me vendet e tjera të botës apo të rajonit, përsa i perket infeksioneve fatale si HIV, apo Hep C është nën kontroll, por me një tendencë kohët e fundit të rritjes së rasteve me Hep C tek përdoruesit e drogave intravenoze, kjo për shkak të shkëmbimit të shiringave, apo mjeteve te tjera te injektimit”, tha Pipero.

Lidhur me shërbimet ndaj drogës, në vizionin dhe programin e qeverisë shqiptare është zgjerimi i shërbimeve ekzistuese dhe hapja e atyre të reja. “Ka një vullnet politik për këtë çështje dhe shumë shpejt ne do të hapim Qendrën Kombëtare të adiksionit dhe shumë shpejt do të ngremë shërbime të tilla në 12 prefektuarat e vendit. Gjithashtu, jemi ne perpjekje per zgjerimin dhe hapjen e programeve te reja te trajtimit me agjent farmakologjik si metadoni, apo buprenorphina per perdoruesit e drogave, kryesisht ata te opiateve”. Por, sipas tij, situata kërkon jo vetem vullnet politik, por mbi te gjitha një pergjigje dhe mbështetje te gjithanshme.
Zvogëlimi i dëmit për përdoruesit e drogave (terapia zëvendësuese me metadon) është një ndër mënyrat, nëpërmjet të cilave synohet parandalimi i përdorimit të drogave. Një rol të rëndësishëm këtu merr dhe trajtimi i sëmundjeve të ndryshme, që lidhen ose jo me përdorimin e drogës (në qendër ose ndjekje në spitale/ambulanca).

(d.b/ATSH/BalkanWeb)

[Albo]

Droga, vetëm 420 përdorues marrin trajtim

TIRANE- Në Shqipëri përllogariten 40000-60000 përdorues të drogave ilegale por edhe pse këto shifra janë të larta, vetëm një numër i vogël i tyre kanë vendosur të marrin trajtim të specializuar në qendrat e terapisë mbajtëse metadon që ekzistojnë në vendin tonë.

Në këtë kuadër organizata humanitare 'Aksion Plus' ka ngritur një rrjet të trajtimit në rrethet Tiranë, Durrës, Korçë, Vlorë, Elbasan dhe Shkodër për të ndihmuar personat që përdorin substanca narkotike nëpërmjet terapisë mbajtëse me metadon. Për vitin që jemi duke lënë pas 420 persona kanë vendosur të marrin shërbimet që ofrojnë këto qendra, ndër të cilët 160 në Tiranë dhe pjesa tjetër në qytetet e tjera.

Për sa i përket qendrave në Korçë, Vlorë dhe Durrës është vënë re një numër në rritje për të hyrë dhe përfituar nga shërbimet e ofruara nga qendra. Aktualisht 80 është numri i personave që marrin shërbime në Korçë dhe 65 i atyre që marrin shërbime në Durrës. Ndërsa në Vlorë numri i këtyre personave është 52. Për t'u përmendur mbetet fakti se trajtimin me metadon janë duke e marrë edhe 18 të burgosur. 'Aksion Plus' e ofron terapinë në ato burgje ku ka përdorues të dënuar në bashkëpunim me Drejtorinë e Përgjithshme të Burgjeve dhe kryesisht në burgjet 312 dhe 325 në Tiranë si dhe në burgun e Fushë- Krujës dhe atë të Durrësit. Nga raporti vjetor i organizatës humanitare 'Aksion Plus' bëhet e ditur se në qendrën e Tiranës 141 persona që marrin trajtim janë shqiptarë dhe 16 prej tyre i përkasin komunitetit rom. Të gjithë përdoruesit e drogave që zgjedhin të trajtohen në këto qendra mund të marrin disa shërbime. Si fillim, merret shërbimi mjekësor që ofrohet nga mjekë toksikologë apo psikiatër.

Gjithashtu ofrohet shërbimi psiko-social që ka të bëjë me këshillim nga psikologët e qendrës. Ndër shërbimet e tjera mund të përmenden këshillim individual me klientë dhe prindër, terapi grupi, terapi familjare dhe edukim shëndetësor. Ndër problemet më të hasura në këto qendra janë çrregullimet e personalitetit, depresioni, ankthi, disfunksion psiko-seksual dhe çrregullime të tjera psikotike të cilat janë rekomanduar për tek psikiatri. Gjithashtu janë hasur dhe hepatite, probleme këto të lidhura me rrugën intravenoze të përdorimit të drogave.

(ma.ar/Gazeta Shqiptare/BalkanWeb)