Manjani: Nano, veprim cubash

[Genti^Itali]

Ylli Manjani dha dje dorëheqjen nga kabineti i Nanos pas një konflikti, ku ende nuk janë të qarta detajet

Manjani: Nano, veprim cubash

Ish-këshilltari: Dhashë dorëheqjen. Kryeministri: E shkarkuam

N.Perndoj

TIRANE – Këshilltari i kryeministrit, Ylli Manjani dha dje dorëheqjen nga kabineti i Nanos pas një konflikti, ku ende nuk janë të qarta detajet. Kryeministri Fatos Nano, nëpërmjet një njoftimi për shtyp ka deklaruar dje se e ka shkarkuar këshilltarin e tij Ylli Manjani. Sipas njoftimit zyrtar të Këshillit të Ministrave, Ylli Manjani është shkarkuar me motivacionin e braktisjes së detyrës dhe thyerje të disiplinës në punë. Por prapa këtij shkarkimi qëndron një përplasje e madhe mes vetë kryeministrit dhe ish-këshilltarit Manjani. I kontaktuar mbrëmë nga gazeta “Shekulli”, Manjani ka deklaruar se ai kishte dhënë dorëheqjen dy ditë më parë, pranë drejtorit të kabinetit sipas procedurave që parashikon ligji, dhe se ajo çka thuhej në njoftimin zyrtar është në kundërshtim me ligjin. “Nëse njoftimi zyrtar është formuluar në këtë mënyrë, atëherë unë mund të them se ky është një veprim cubash dhe po punohet pas krahëve. Dorëheqjen time mund ta provojë protokolli. Dje mbasdite në orën 16.00 unë paraqita dorëheqjen pranë drejtorit të kabinetit të kryeministrit dhe ai nuk mund të marrë një vendim tjetër pas dorëheqjes time. Së dyti nuk ka ligj për këtë çështje”,- tha mbrëmë Manjani. Vetëm pak muaj më parë, Ylli Manjani dha dorëheqjen nga posti i Sekretarit të Përgjithshëm të Kryeministrisë, për t’ju afruar sërish stafit të kreut të ekzekutivit në postin e këshilltarit pak ditë më pas. Ndërsa dy ditë më parë në një mbasdite të zakonshme pune, juristi Manjani i ka dorëzuar drejtorit të kabinetit kërkesën e dytë për dorëheqje. Kësaj here edhe nga padia që ai kishte ngritur individualisht ndaj deputetit Nikolle Lesi për shpifje. Juristi Manjani deklaroi mbrëmë se dorëheqja e tij është krejtësisht personale. “Unë kam dhënë dorëheqjen për motive personale. Unë jam jurist profesionist ndaj dhe puna që unë bëja nuk më përshtatej me profesionin dhe natyrën time. Eshtë një funksion politik, që nuk kam pse ta mbaj ende për sa kohë, që nuk i përshtatet CV-së time”, - tha mbrëmë Manjani. Ndryshimet e shumta që shoqëruan ardhjen e Nanos në postin e kryeministrit në gusht të vitit 2002, përfshinë edhe postin e Sekretarit të Përgjithshëm të Kryeministrisë. Manjani përgjatë një viti e gjysmë të qeverisjes “Nano” ishte njohur si një bashkëpunëtorët e tij më të afërt. Dalja e tij në publik për çështjen e pesë rrogave shpërblim të marrë prej tij, drejtorit të kabinetit të kryeministrit Agim Isakut dhe vetë Nanos, duket se e rreshtoi atë ndër njerëzit më të afërt të kryeministrit. Por gjithçka krisi me dorëheqjen e paarsyetuar publikisht të Manjanit nga posti i Sekretarit të Përgjithshëm, tanimë edhe nga posti i këshilltarit. Manjani u angazhua në strukturat politike të maxhorancës pas një përvoje, që ai pati në OSBE si jurist. Në OSBE Manjani ka kontribuar në hartimin e Kodit Elektoral të miratuar në vitin 2000 si dhe në monitorimin e zgjedhjeve prej OSBE-së në qershor të 2001.

[Genti^Itali]

Intervista
TIRANE – Në një intervistë për “Shekullin”, dje në mbrëmje, Ylli Manjani sqaroi pozicionin e tij pas dorëheqjes. Sipas tij, deklarata e Kryeministrisë është veprim cubash.
Z.Manjani, cila është arsyeja e dorëheqjes suaj nga posti i këshilltarit dhe nga padia e ngritur ndaj deputetit dhe botuesit të gazetës “Koha Jonë”, Nikollë Lesi?
Unë kam dhënë dorëheqjen për motive personale. Unë jam jurist profesionist ndaj dhe puna që unë bëja nuk më përshtatej me profesionin dhe natyrën time. Eshtë një funksion politik, që nuk kam pse ta mbaj ende për sa kohë, që nuk i përshtatet CV-së time. Ndërsa lidhur me tërheqjen time nga padia mund të sqaroj se ajo ka qenë individuale dhe jo për shkak të detyrës. Unë nuk mund ta gjykoja më tej që e drejta ime të mbrohej duke u politizuar problemi, pa përmendur fajtorë. Unë mbroj thjesht profilin tim si jurist.
Ndërkaq, z.Manjani në njoftimin zyrtar të Kryeministrisë thuhet se ju jeni shkarkuar nga kryeministri Fatos Nano me motivacionin e braktisjes së detyrës dhe thyerje të disiplinës në punë………
Nëse njoftimi zyrtar është formuluar në këtë mënyrë, atëherë unë mund të them se ky është një veprim cubash dhe po punohet pas krahëve. Dorëheqjen time mund ta provojë protokolli. Dje mbasdite në orën 16.00 unë paraqita dorëheqjen pranë drejtorit të kabinetit të kryeministrit sipas procedurës që parashikon ligji. Ai nuk mund të marrë një vendim tjetër pas dorëheqjes time. Së dyti nuk ka ligj për këtë çështje

Shekulli:
03/06/2004