Bageti, Bujqesi E Shoqeria…

[Brari]

nga GSH

-------

BAGETI, BUJQESI E SHOQERIA…


-------------------------------------

Genc KONDI


Në Universitetin Bujqësor të Babrrusë-Mbi-Tërkuzë kohët e fundit u thirr teoricieni më në zë spanjoll Prof. Dr. Akad. Don Amigo Barbudo de la Buenaventura y Sierra Madre de Dios @ Lopez.com, për të folur rreth temës: "Bashkëjetesa njerëz-kafshë të dobishme dhe organizimi shoqëror". Me shumicë votash të studentëve, ndër leksionet që ai mbajti, më tërheqës u shpall i mëposhtmi. Metoda krahasuese me të shënon kulme të reja, duke e bërë realitetin e ngatërruar tepër të kapshëm dhe të shpjegueshëm. Vetëm se, në shembujt e tij, abuzohet pak me një kafshë të vetme, me sa duket, nën ndikimin e dukshëm të emrit të farefisit të tij. Ndryshe nga Oruelli në "Fermën e Kafshëve", nuk favorizon derrin. Ja se si e sheh ai historinë dhe të ardhmen e organizimit shoqëror të njerëzimit nën shembullin klasik të... lopës!
Socializëm: Ke dy lopë. Fqinjët të ndihmojnë të kujdesesh për to dhe qumështin e ndan me ta.
Socializëm tufëzash: Kishe dy lopë. I there për të mos i dorëzuar në kooperativë dhe gëzon të drejtën për 100 gr. qumësht në ditë.
Komunizëm: Ke dy lopë. Shteti t'i merr të dyja dhe të jep qumështin, për të cilin duhet të rrish në rradhë.
Fashizëm: Ke dy lopë. Shteti t'i merr të dyja dhe të shet qumështin.
Nazizëm: Ke dy lopë. Shteti të merr lopën e bardhë dhe ther të zezën.
Diktaturë: Ke dy lopë. Policia të konfiskon lopët dhe të dërgon në punë të detyruar: shërbim lopëve të shtetit në burg.
Demokraci: Ke dy lopë. Vendoset me votë kujt i përket qumështi.
Demokraci përfaqësuese: Ke dy lopë. Bëhen zgjedhje; ai që fiton do të vendosë se kujt i përket qumështi.
Demokraci Bangladeshi: Ke dy lopë. Gjobitesh për mbajtje kafshësh në apartament tej numrit të përcaktuar me ligj.
Anarki: Ke dy lopë. I lë të mjelin njera-tjetrën.
Kapitalizëm: Ke dy lopë. Shet njerën dhe blen një dem që të të bëjë me viça.
Kapitalizëm parajsash fiskale: Ke dy lopë. Tri ia shet shoqërisë tënde në bursë, duke paraqitur dokumenta të përgatitura nga kunati, i cili punon në bankë. Bën falsifikim dokumentash në bashkëpunim, shoqëruar me një ofertë publike; kështu, të vijnë në dorë katër lopë, por ke fituar, njëkohësisht, edhe një ndihmë financiare për mbajtjen e pesë lopëve. Një ndërmjetës panamez transferon të drejtën mbi qumështin e gjashtë lopëve në llogarinë e një shoqërie të ishujve Kaiman, pronari i së cilës - në të zezë - arrin t'ia shesë aksionet e qumështit të shtatë lopëve shoqërisë tënde në bursë. Në dokumentat e shoqërisë së sapopërmendur figurojnë tetë ripërtypës; gëzon të drejtën e blerjes edhe të një kafshe më shumë.
Kapitalizëm amerikan: Ke dy lopë. Shet njerën, tjetrën e detyron të prodhojë sa për katër, pushon nga puna argatin që kujdesej për të pasi nuk është i leverdisshëm.
Burokraci: Ke dy lopë. Shteti shpall rregullat e higjienës, sipas të cilave do të ishte mirë të therje njerën. Pastaj të kërkon të deklarosh se sa qumësht do të kishte prodhuar lopa që there, ta blen qumështin dhe e hedh. Më në fund, të kërkon të mbushësh një formular, ku deklarohet se lopa nuk është më.
Ekologji: Ke dy lopë. Mban qumështin, shteti të blen bajgat.
Feminizëm: Ke dy lopë. Shteti të gjobit për diskriminim. Ti blen një dem, të cilin duhet ta tredhësh.
Surrealizëm: Ke dy lopë. Shteti, me detyrim, kërkon t'u japësh mësime fizarmonike.
Kapitalizëm Brukseli: Ke dy lopë. Merr subvencione për të blerë një lopë të tretë. Fiksohen kuotat për vitin e ardhshëm: duhet të paguash një gjobë për superprodhim. Vitin e tretë përfiton një ndihmë për të therur lopën e tretë.
Monarki kushtetuese britanike: Ther një lopë dhe ia jep mishin tjetrës për ta ngrënë. Lopa e gjallë çmendet. Evropa të jep një ndihmë financiare për therje. E ther edhe atë dhe ua hedh mishin dhënve.
Kapitalizëm alla frënga: Për të financuar pensionin e lopëve, shteti vendos taksë. Dy vjet më vonë, Francës i jepet e drejta e shfrytëzimit mbi një pjesë krerësh të gjedhit anglez; sistemi rezulton defiçitar. Për të mbyllur defiçitin, shpallet një taksë e re mbi prodhimin e qumështit. Lopët bëjnë grevë. S'ka më qumësht. Francezët manifestojnë zemërimin e tyre nëpër rrugë. Qeveria, nën presion, ndërton një laktodukt paralel me tunelin e La Manshit për t'u furnizuar me qumësht anglez. Evropa e shpall qumështin anglez të papijshëm. Hyn në fuqi një taksë e re për mirëmbajtjen e laktoduktit të pavlefshëm.
Regjim i Italisë së Jugut: Ke dy derra, që bredhin për qejf të vet nëpër pyje. Deklaron se je duke mbarështuar 20 lopë dhe merr ndihma nga Komuniteti Evropian. Me ato blen dy prostituta moldave, 500 koli " Marlboro " kontrabandë dhe një thes hashash.
Bota shqiptare e çudirave: Merr pa paguar dy lopë me plasje nga Maqedonia dhe, nëpërmjet maleve, i sjell dhe i shet për mish. Këtë punë e bën dy vjet rrjesht. Largohesh nga zona e thellë malore dhe vjen në periferi të Tiranës, ku zë një tokë pa zot dhe ndërton një vilë pa leje. Hap një supermarket me produkte mishi, një lokal në Bllok, bëhesh deputet dhe miraton ligjin për ndalimin e shitjes së mishit të gjedhit. Fillon të njejtën gjë me mish thiu, ndonëse vazhdon, bashkë me Lalën, të shkosh në xhami.


GSH