Moisiu: Zgjedhjet na lanë jashtë NATO-s

[Albo]

Konferencë shtypi e Presidentit Moisiu pas Samitit të Stambollit

Moisiu: Zgjedhjet na lanë jashtë NATO-s

Shqipëria ndahet nga Kroacia dhe Maqedonia në kushtet që duhet të plotësojë për të hyrë në NATO

Pyetje: Sikurse e dini dhe ju, është se Shqipëria mund të mos pranohet për shkak të problemeve të tilla, si instabiliteti politik, që herë pas here kapllon Shqipërinë ose korrupsioni, apo krimi i organizuar, që janë tashmë të njohura, ose fakti që parlamenti p.sh., është një nga hallkat më të dobëta të institucioneve demokratike shqiptare. Cili është mendimi juaj?

Përgjigje: Presidenti Bush gjatë takimit që pati me ne të tre, presidentët e Shqipërisë Kroacisë dhe Maqedonisë, theksoi: "Klima është e favorshme për integrimin e tre vendeve tuaja; klima po shkon drejt përsosjes. Problemet që ju përmendët përsa i përket stabilitetit politik. janë probleme të cilat politika shqiptare duhet t'i ketë kujdes. Unë mendoj se të gjithë së bashku duhet të nxjerrim mësimet e duhura, që në vitin 2006 apo 2007, pasi nuk është marrë ende vendimi për kohën e mbajtjes së Samitit tjetër, që Shqipëria t'i ketë plotësuar të gjitha kushtet e nevojshme.

Pyetje: Në takimin që 3 vendet e "Adriatik 3" zhvilluan me presidentin Bush, çfarë u diskutua më konkretisht dhe hollësisht me detaje?

Përgjigje: Diskutimi ishte pak a shumë në frymën e inkurajimit të tre vendeve tona përsa i përket perspektivës së integrimit të tyre në NATO (Shqipëria, Kroacia, Maqedonia). Presidenti Bush duke na u drejtuar tha "a e ndieni klimën, e cila është në mbështetje të plotësimit të aspiratave tuaja". Ne para këtij takimi patëm dhe një takim tjetër të veçantë mes tre presidentëve, në të cilin ne biseduam se çfarë duhet të bëjmë gjatë kësaj periudhe prej këtij Samiti deri në të ardhshmin. Të tre ramë dakord të forcojmë punën për koordinimin e veprimeve nëpërmjet institucioneve të ndryshme, sikurse janë MJ e MM për plotësimin e kërkesave për integrimin në NATO. Njëkohësisht ne biseduam për të rritur më tej bashkëpunimin tonë dhe sigurinë e paqen në rajonin tonë. U theksua dhe angazhimi i parlamenteve tona. Pak ditë më parë parlamenti turk u shpreh në vijim të Deklaratës së Kongresit amerikan për integrimin e tre vendeve tona. U tha se duhet të vazhdojmë në të ardhmen punën me parlamentet e tjera, që të kemi një mbështetje sa më të madhe.

Pyetje: Zoti President në deklaratën përfundimtare të Samiti të Stambollit u theksua se pranimi në NATO është individual. Çdo të thotë kjo për Shqipërinë?

Përgjigje: Në deklaratën e përgjithshme të Samitit theksohet se të tre vendet tona kanë marrë një mbështetje serioze për të ardhmen. Parimi i pranimit individual është parim kryesor në NATO; ka qenë dhe mbetet dhe nuk ndryshon. Kohët e fundit nga ish Grupi i Vilniusit me 10 vende, u pranuan 7 shtete; "Adriatik 3" ku bëjmë pjesë dhe tre vendet tona është inkurajuar e mbështetur koordimi, bashkëpunimi, dhe përgatitja e përbashkët për integrim.

Dje ne Presidentët e tre vendeve të "Adriatik 3" të ftuar nga Presidenti bullgar Parvanov patëm një drekë pune. Midis të tjerave Presidenti Parvanov tha: "Dje në takimin që kam patur me vendet e anëtarëve të NATO-s, kur trajtuam vendet e Kartës "Adriatik 3" u vunë në dukje dhe problemet politike, që kanë si çështja e zgjedhjeve", e cila është bërë botërisht e njohur dhe përcaktuese për të ardhmen tonë integruese. Politika shqiptare duhet ta ketë shumë mirë parasysh përgatitjen për zgjedhjet dhe zhvillimin e zgjedhjeve të ardhshme. Lidhur me pyetjen për Grupin e të urtëve, mendoj se ai e bëri punën e tij, i dha mendimet tani është radha e forcave politike të japin mendimet e tyre, çfarë pranojnë e çfarë nuk pranojnë. Unë them se nuk ka kohë shumë, por dhe nuk jemi vonë të merremi me përgatitjen e korrigjimeve që i duhen bërë Kodit ekzistues Zgjedhor.

[Albo]

Presidenti Moisiu mbajti një fjalim para Këshillit të Partneritetit Euroatlantik

Shqipëria zotohet për plotësimin e kushteve politike që i ka vendosur NATO

Presidenti i Republikës, Alfred Moisiu mbajti një fjalim gjatë takimit të djeshëm të kryetarëve të shteteve të Këshillit të Partneritetit Euroatlantik. Moisiu tha se shqiptarët janë të vetëdijshëm se Ballkani i sotëm është i tillë falë dhe ndërhyrjeve të NATO-s. "Kosova është një dëshmi e një historie të suksesshme për Aleancën dhe Perëndimin, por edhe një sfidë e cila për flet për nevojën e angazhimit të tyre të mëtejshëm për të mos e lënë atë, një punë të pambaruar," tha Moisiu. Ai theksoi se Shqipëria do të vazhdojë angazhimet në kuadër të NATO-s. "Shqipëria ka bashkuar forcat me fqinjët për të forcuar dialogun dhe paqen duke e shndërruar faktorin shqiptar në prodhues të sigurisë e stabilitetit. Në këtë kontekst, përmend Nismën "Adriatik 3" si një tregues i këtij bashkëpunimi në kuadër të integrimit në NATO. Duke u sjellur si anëtar "de facto" e Aleancës, Shqipëria u është bashkuar konkretisht operacioneve të NATO-s në Bosnje, Kosovë e Afganistan. Edhe në të ardhmen vendi im do të vazhdojë këtë angazhim, duke i ofruar Aleancës lehtësira aeroportuale, poligone, qendra trainimi e stërvitjeje si dhe forca speciale për dislokim të shpejtë," tha presidenti shqiptar. "Gjykojmë se nuk duhet pritur nga secili vend për t'u goditur nga terrorizmi për të besuar në këtë rrezik të madh që na kanoset të gjithëve. Vendi im i qëndron zgjedhjes së bërë në mbështetje të koalicionit kundër terrorizmit, sepse është i bindur se pasojat që mund të vijnë prej tij mund të jenë shumë më të mëdha sesa kostoja e angazhimit kundër tij," tha Moisiu. Presidenti deklaroi se përpjekjet për anëtarësim kanë vepruar në të njëjtin shtrat si reformat në ushtri, ekonomi dhe politikë. "Ne do të vazhdojmë me thellimin e reformave tona të bindur se ato prodhojnë më shumë zhvillim dhe mirëqenie për qytetarët, duke iu bërë barrierë kryesore korrupsionit dhe krimit. Ne çmojmë rikonfirmimin e politikës së Dyerve të Hapura nga NATO, që konfirmohet në Deklaratën e Samitit. Vlerësimin e bërë në këtë deklaratë për progresin tonë në rrugën e anëtarësimit e lexojmë si një mesazh tjetër inkurajues që rrit shpresën dhe angazhimin tonë për vazhdimin e reformave të domosdoshme për anëtarësim në NATO. Duke shprehur bindjen se vendimet e Samitit do t'i kontribuojnë më tej forcimit të NATO-s, Shqipëria mbetet e vendosur për të përmbushur me sukses përgjegjësitë e saj që burojnë nga cikli i ri i MAP dhe angazhimet e axhendës së ardhshme të Aleancës," u shpreh Presidenti. Ndërkohë kreu i shtetit ka lëshuar dhe një deklaratë në lidhje me samitin. "Pjesëmarrja jonë në këtë Samit të NATO-s ishte e një rëndësie të veçantë: vjen pas zgjerimit të NATO-s në Samitin e Pragës mbajtur më 2002, - pra shënon një stad të ri për vetë Aleancën Veriatlantike dhe angazhimin e saj ndërkombëtar në mbrojtje të paqes dhe sigurisë. Gjithashtu ai mbahet në një moment kur vendi ynë, së bashku me Kroacinë e Maqedoninë, tre vende të Kartës Adriatik 3, kanë bërë hapa individuale dhe kolektive drejt përmbushjes së standardeve për anëtarësim në NATO," thuhet në këtë deklaratë.



Nga deklarata e Ministrave të Punëve të Jashtme të Republikës së Shqipërisë, Kroacisë dhe Maqedonisë.

- Ne, Ministrat e Jashtëm të Republikës së Shqipërisë, Republikës së Kroacisë dhe Republikës së Maqedonisë shprehim mbështetjen tonë të plotë ndaj përmbajtjes dhe ndaj frymës së Raportit të Samitit të Stambollit të Këshillit të Atlantikut të Veriut.

- Ne riafirmojmë gatishmërinë e vendeve tona për të dhënë mbështetje dhe siguri kurdoherë që kërkohet, me kontributin tonë efektiv ndaj politikave, iniciativave, misioneve dhe veprimeve të ndryshme të NATO-s.

- Duke marrë për bazë arritjet tona, ne përsërisim angazhimin për anëtarësimin e plotë në NATO në afatin më të shpejtë të mundshëm. Ne do të vazhdojmë në thellimin dhe shpejtimin e gjithë reformave të nevojshme për arritjen e një shkalle sa më të lartë të kompabilitetit dhe bashkëveprimit me Aleancën.

- Ne shprehim kënaqësinë tonë lidhur me ri-afirmimin e Këshillit të Atlantikut të Veriut të Politikës së Dyerve të Hapura të NATO-s vis-a vis tre vendeve tona, me faktin se procesi i zgjerimit do te mbahet nën rishikim të vazhdueshëm. Ne jemi të lumtur të vëmë re se Aleanca mirëpret progresin tonë dhe lavdëron kontributin tonë për stabilitetin dhe bashkëpunimin rajonal.



Nga deklarata zyrtare e shetateve anëtare të NATO-s

Shtetet anëtare të NATO:

-pranuan përfundimin e suksesshëm të SFOR-it, misionit të aleancës në Bosnjë dhe Hercegovinë dhe i uruan mirëseardhjen një tjetër misioni të ri që do të dislokohet në këtë vend nën drejtimin e Bashkimit Europian, në kuadër të Kapitullit VII të mandatit të Kombeve të Bashkuara, bazuar dhe në Marrëveshjen e Berlinit mes dy organizatave tona.

-konfirmuan se një prezencë e fortë e KFOR në Kosovë mbetet esenciale për rritjen e sigurisë dhe për nxitjen e procesit politik në Kosovë.

- vendosën të rrisin kontributin e Operacionit Përpjekjet Aktive, një operacion detar në Mesdhe, me qëllim luftimin e terrorizmit.

- vendosën për të ofruar asistencë për qeverinë e Irakut duke trajnuar forcat e sigurisë, duke iu përshtatur gjendjes sonë të pavarur që kemi ndjekur në Irak.

- pranuam të shtojmë masat e sigurisë për të forcuar kontributin tonë kolektiv dhe individual në luftën e përbashkët kundër terrorizmit.

- vendosëm që të transformojmë më tej kapacitetet tona ushtarake për t'i bërë ato më moderne, më të përdorshme dhe lehtësisht të dislokueshme për gjithë gamën e aksioneve të aleancës.

- riafirmuam se dyert e NATO-s vazhdojnë që të mbeten të hapura për anëtarët e rinj, dhe inkurajuam Shqipërinë, Kroacinë dhe Ish-republikën Jugosllave të Maqedonisë për të vazhduar reformat e nevojshme për progres drejt anëtarësimit në NATO.

- morëm një numër hapash për të forcuar më tej Partneritetin Euroatlantik, në veçanti përmes fokusimit dhe angazhimit me partnerët tanë në krahinat me rëndësi strategjike si Kaukazi dhe Azia Qendrore dhe vendosëm që të shtojmë dialogun Mesdhetar dhe të ofrojmë bashkëpunim për Lindjen e Mesme përmes "Iniciativës së Bashkëpunimit të Stambollit".

[Genti^Itali]

“Shqipëria u dënua nga Nano jo nga NATO”


N.Perndoj

TIRANE- Kryetari i PD-së, Sali Berisha deklaroi dje në një konferencë për shtyp se Shqipëria është e dënuara e madhe jo nga NATO, por nga kryeministri Fatos Nano. Duke komentuar punimet e samitit të Stambollit, Berisha theksoi se NATO i ka dyert e hapura për të gjitha vendet që ndërtojnë demokracinë në Europë. “Së dyti, Shqipëria është e dënuara e madhe jo nga NATO por nga Fatos Nano në qoftë se lexoni me vëmendje deklaratën e samitit, nuk shqipton asnjë gërmë, asnjë fjalë për Shqipërinë. Samiti deklaroi qartë se NATO i mban dyert e hapura për të gjitha ato vende që i përkushtohen demokracisë dhe përmbajnë përgjegjësit që ju takojnë pra kërkohen zgjedhje të lira si kushti vendimtar, por Fatos Nano, pasuritë e krimit i ka para zgjedhjeve të lira”, -tha ai. Dy ditë më parë, në një konferencë të përbashkët për shtyp me kryeministrin Fatos Nano, presidenti Alfred Moisiu pranoi se nuk kishte asnjë datë për anëtarësimin e Shqipërisë në NATO. Madje ai bëri të ditur edhe një nga detajet e bisedës së zhvilluar me presidentin bullgar, Parvanov, i cili është shprehur se në takimin me vendet anëtare të NATO-s, është theksuar se zgjedhjet janë përcaktuese për të ardhmen e Shqipërisë.