Këshilli Kombëtar Shqiptaro-Amerikan organizon darkën për ndarjen e çmimeve për Bejkerin, Bardhën dhe Kole
SHBA, lobi shqiptar darkë me liderët e politikës shqiptare
A.Rama
TIRANE- Politikanët dhe figurat kryesore të trevave shqiptare do të jenë si rrallë ndonjëherë të gjithë pjesëmarrës në një darkë të veçantë, organizuar nga diaspora në Shtetet e Bashkuara të Amerikës. Darka organizohet në 18 qershor nga Këshilli Kombëtar Shqiptaro-Amerikan në Hotel Plazza New York, për të dekoruar ish Sekretarin e Shtetit James Baker dhe dy shqiptaro-amerikanët e njohur Ekrem Bardha dhe Peter Kole. Çmimet që do të akordojë ky këshill janë për ish Sekretarin Baker, çmimi “Duart e Shpresës”, ndërsa Ekrem Bardha dhe Peter Kole me çmimin “Arritjet gjatë jetës”. Kjo ceremoni organizohet çdo vit duke ndarë çmimet e përcaktuara dhe kjo është hera e tetë që Këshilli planifikon këtë ceremoni.
Pagesa
Organizimi i darkës është shoqëruar edhe me elementë të veçantë sidomos për ata shqiptarë që banojnë në SHBA dhe që do të duan të marrin pjesë në këtë ceremoni kundrejt një pagese të caktuar. Sipas përcaktimit që kanë bërë organizatorët, 10 mijë dollarë kushtojnë 10 bileta, për ata që do të preferojnë të ulen në tavolinën kryesore, ku do të jenë të vendosur të ftuarit e nderit. Përkatësisht në këtë tavolinë do të jenë vendosur të ftuarit kryesorë nga Shqipëria Fatos Nano, Sali Berisha, Presidenti Alfred Moisiu, Presidennti i Kosovës Ibrahim Rugova, Kryeministri Rexhepi si dhe të ftuar të tjerë të rëndësishëm. Ndërsa pagesa për pasur një vend në tavolinat e tjera, vjen duke u ulur. Kështu në tavolinën ku do të vendosen sponsorët e aktivitetit, pagesa për grupin e 10 biletave të tjera shkon në 5000 dollarë, ndërsa në një kënd tjetër të quajtur “tavolina e përkrahësve”, pagesa për 10 bileta është përcaktuar 2 500 dollarë. Organizatorët kanë menduar edhe për ata që e kanë të pamundur të jenë në këtë darkë, edhe pse kanë dëshirë, duke mundësuar që të dërgojnë dhuratë individuale 250 dollarë në adresën ku është vendosur selia e Këshillit Kombëtar Shqiptaro-Amerikan. Ndërkohë për të kryer prenotimet është vënë në dipozicion web-site-i i organizatës duke krijuar mundësinë që pagesa të bëhet me kartë krediti. Është parashikuar që në koktejin që do të organizohet në hollin e Hotel Plazza, të zhvillohet edhe një seancë e shkurtër pyetjesh me ish Sekretarin e Shtetit Baker. Nga të ftuarit shqiptarë të Shqipërisë dhe të viseve të tjera shqiptare nuk është dhënë konfirmimi, për të marrë pjesë në këtë aktivitet.
24/05/2004
Përgjigju Duke Cituar
Krijoni Kontakt