Coca Cola - ambalazhi me flamur shqiptar

[dodoni]

Tregtia

Jeton Demi - 21/05/2004

“Coca-Cola” prezanton ambalazhin dhe presidentin e ri për Shqipërinë

Ambalazhi i ri i “Coca-Cola”-s do të jetë i mbështjellë me ngjyrën e flamurit shqiptar dhe me shqiponjën dykrenare në mes të shishes, ndërsa president i ri do të jetë i biri i Kristina Buzit, Luka


Ambalazhi i ri me ngjyrat e flamurit shqiptar dhe presidenti i ri janë prezantuar me rastin e 10-vjetorit të fillimit të aktivitetit të “Coca Cola Bottling Shqipëria” sh.p.k. (CCBS) në vendin tonë. Prezantimin e këtij ambalazhi të ri e ka bërë amdinistratorja e përgjithshme e CCBS-së, Kristina Buzi, ku nuk i ka kursyer superlativat për flamurin shqiptar, që do të jetë simbol i këtij ambalazhi të ri. Ky produkt i ri futet në treg jo rastësisht me nisjen e sezonit të ri veror, nisur nga fakti që, sipas Buzit, shitjet e pijeve freskuese të “Coca-Cola”-s rriten me 40 për qind gjatë sezonit veror. Dhe po të marrim parasysh lidhjen e fortë që ka simboli kombëtar (flamuri) me turistët kosovarë, por edhe për shqiptarët nga trojet e tjera, duket se Buzi me ambalazhin e ri ka synuar që të rrisë edhe më tej shitjet gjatë këtij sezoni, duke synuar grupin e turistëve nga Kosova apo edhe të shqiptarëve nga Maqedonia dhe më gjerë që do të pushojnë këtë verë në brigjet shqiptare.


Buzi Junior, presidenti i ri i “Coca Cola”-s
Luka Buzi është i biri i Kristina Buzit dhe është zgjedhur vetëm disa muaj më parë si president i “Coca-Cola Bottling Shqipëria” sh.p.k. Buzi gjatë fjalës përshëndetëse në gjuhën shqipe theksoi: “2 vitet e fundit kanë qenë themelore për sa i përket rritjes të të ardhurave të kompanisë sonë. Gjatë viteve të ardhshme do të punojmë më shumë mbi organizimin nëpërmjet trajnimit të stafit, ku do të përcaktohet edhe një zë i veçantë investimesh, si dhe në njohjen sa më të mirë të tregut në Shqipëri, shtimin e mjediseve në stabilimentin aktual, punësimin e punëtorëve të rinj – veçanërisht të moshës së re, por nuk mund të lëmë pa përmendur shpenzimet për energjinë elektrike për shkak të ndërprerjeve që vazhdojnë të jenë prezente në Shqipëri. Por pika më e fortë mbështetëse, e jashtme dhe e brendshme, është risia”.


Aktiviteti i CCBS për 2003-shin
Pesë milionë arka unitare të produktit “The Coca-Cola Company” të shitura gjatë vitit 2003, shpërndarja e ujit mineral “Tepelena”, 164 të punësuar janë këto shifra që e kanë bërë biznesin CCBS-në në Shqipëri një nga rastet e suksesshme të sipërmarrjes italiane.