Policia akuzohet për abuzime

[ALBA]

Pezullohet komandanti i dhomave të paraburgimit në komisariatin e Laçit Armando Muça

Policia akuzohet për abuzime seksuale

Të paraburgosurit kanë bërë kallëzim penal për disa drejtues të komisariatit të Laçit, pasi pretendojnë se ata kanë ushtruar dhunë mbi ta dhe kanë tentuar të ngacmojnë seksualisht të afërmet e tyre. 11 të dënuar të formës së prerë transferohen për në Rrogozhinë. Pjesa tjetër shpërndahet në komisariatet e qyteteve përreth.

Revolta e nisur nga rreth 40 të paraburgosur në qytetin e Laçit dy ditë më parë ka zbuluar majën e ajsbergut të një skandali të madh që përfshin uniformat blu. Shkaku kryesor që ka detyruar të dënuarit me vendim të prerë, por që rrinin në paraburgim të fillonin këtë grevë, nuk kanë qenë kushtet e këqija në të cilat jetonin, por tentativat për ngacmime seksuale të punonjësve të policisë ndaj të afërmeve të tyre që shkonin e i vizitonin në burg. Janë dashur disa orë që përpjekjet e policisë të drejtuar nga Xhavit Shala dhe të avokatit mbrojtës të të paraburgosurit Genci Lika, të përfundonin me qetësimin e revoltës në dhomat e paraburgimit të Laçit. I paraburgosuri Genc Lika është plagosur lehtë gjatë konfrontimit me gardianët ndërsa polici i shërbimit roje Geg Gega, i marrë peng nga të paraburgosurit, nuk është dëmtuar dhe është lënë i lirë pa asnjë plagosje. Forcat Speciale të shkuara nga Tirana dje në mesnatë janë larguar rreth orës 05:00 të mëgjesit të djeshëm, pasi situata ishte qetësuar.

Kallëzim penal për komandantin e "gardianëve"

Avokati i njërit prej personave të paraburgosur që nuk ka marrë ende dënimin e formës së prerë Ferdinand Doja thotë se klienti i tij i ka thënë se komandanti i dhomave të paraburgimit në komisariatin e Laçit, ish shefi i komisariatit dhe disa punonjës të tjerë të policisë, kanë tentuar të ngacmojnë seksualisht të afërmet e të paraburgosurve që shkonin e vizitonin ata në burg. Avokati Doja thotë se ky shkak dhe kushtet e këqija në të cilat rrinin në paraburgim, megjithëse janë dënuar me vendim të formës së prerë, kanë detyruar të burgosurit të nisnin një revoltë, e cila do të sensibilizonte për gjendjen e tyre. Avokati Ferdinand Doja në emër të këtyre të burgosurve, ka administruar dhe do të dorëzojë në Prokurori kallëzimin penal në ngarkim të komandantit Armando Muça, ish shefit të komisariatit të Laçit si dhe ndaj disa personave të tjerë, të cilët akuzohen për dhunim të të burgosurve. "Revolta ndodhi pasi policët roje janë futur si çdo natë tjetër në qelitë e të paraburgosurve dhe kanë filluar t'i keqtrajtojnë. Kështu më tha klienti im brenda qelive, nuk e di se sa mund të jetë e vërtetë" thotë avokati Doja.

Pezullohet inspektori Armando Muça

Pezullohet nga detyra komandanti i repartit të paraburgimit të Laçit, 2 gardianë dhe 3 punonjes të policisë së këtij komisariati. Të pezulluarit nga detyra do të hetohen nën akuzën "shkelje e rregullores në dhomat e paraburgimit". Ndjekja penale ka filluar edhe për disa të dënuar që akuzohen për "organizim të revoltës" në qelitë e komisariatit të Laçit. Drejtori i Policisë së qarkut Lezhë Xhavit Shala ka pezulluar dje nga detyra komandantin e repartit të paraburgimit të Kurbinit Armand Muçën. Burime pranë policisë së Lezhës thanë se me inspektorin janë pezulluar edhe pesë punonjës të tjerë me grada më të ulta. Sipas burimeve në policinë e Lezhës pezullimi nga detyra e inspektorit dhe pesë punonjësve të policisë të rolit bazë erdhi për shkak të revoltës që ndodhi në dhomat e paraburgimit. Pezullimi për inspektor Armando Muçën është bërë për të verifikuar të gjitha pretendimet që të paraburgosurit kishin për ët. Ata e akuzuan Muçën për abuzime nga më të ndryshmet, që nga dhuna e deri te ngacmimet seksuale.

11 të burgosur dërgohen në Rrogozhinë

Është dashur që në qelitë e komisariatit të Laçit të shpërthente një revotë që Ministria e Drejtësisë të reagonte për të sistemuar në vende të tjera personat me dënim të formës së prerë. 11 persona që janë dënuar nga Gjykatat janë dërguar dje drejt burgut të Rrogozhinës. Burime pranë Ministrisë së Drejtësisë thanë se 11 të dënuar me vendim të formës së prerë, që ndodheshin në komisariatin e Laçit, janë dërguar në burgun e Rrogozhinës. Ministria e Drejtësisë ia ka hedhur fajin Ministrisë së Rendit përsa i përket ngjarjes së djeshme. Ministri Xhafaj ka thënë se "paraburgimi i Laçit dhe shumë paraburgime të tjera janë ende nën juridiksionin e Ministrisë së Rendit dhe jo të Ministrisë së Drejtësisë".

Boshatisen qelitë e komisariatit të Laçit

Në dhomat e paraburgimit të komisariatit të policisë së Laçit nuk ka mbetur asnjë nga të dënuarit, të cilët organizuan revoltën. Policia i ka transferuar ata nëpër komisariate të ndryshme. Burime pranë policisë së Lezhës thanë se kjo ka ndodhur pasi mjediset e komisariatit u shkatërruan gjatë revoltës dhe jane jashte kushteve të sigurisë për të mbajtur të izoluar të burgosurit. Sipas burimeve policore rreth 30 të paraburgosur janë sistemuar në ambjentet e komisariateve të policisë së Lezhës, Dibrës, Fushë-Krujës etj.. Burimet thonë se akomodimi i të paraburgosurve në këto ambjente është bërë për efekt sigurie.

Të paraburgosurit: Tre orë të lirë nëpër korridoret e komisariatit

Revolta e të paraburgosurve në komisariatin e Laçit ka filluar rreth orës 22:30 të mbrëmjes së djeshme. Ata kanë shpërthyer dyert e dhomave të paraburgimit dhe kanë dalë nëpër korridoret e komisariatit. Menjëherë kanë marrë peng policin roje Gegë Gega, të cilin nuk e kanë keqtrajtuar. Ata kanë mbajtur peng policin duke kërkuar realizimin e kërkesave të tyre. Negociator me të paraburgosurit kanë qenë drejtori i policisë së Lezhës, Xhavit Shala, Prokurori i Rrethit, avokati i njërit prej të paraburgosurve si dhe drejtues të forcave speciale. Pas katër orësh negociata, acarim nervash e përplasje, të paraburgosurit janë tërhequr nëpër dhomat e paraburgimit. Atyre u është premtuar transferim i menjëhershëm i atyre që kanë marrë dënim të formës së prerë për në burgje, si dhe të tjerëve kushte më të mira jetese. Një ndër premtimet e policisë ndaj të revoltuarve ishte edhe shikimi i pretendimeve të tyre se komandanti i dhomave të paraburgimit, si dhe drejtues të tjerë të policisë së Laçit i dhunonin ata dhe kanë ngacmuar seksualisht të afërmet e tyre. Pas pranimit nga ana e policisë e këtyre kushteve të të paraburgosurve është bërë edhe dorëzimi i policit të marrë peng rreth orës 01:30 të mëngjesit. Policia ka ndërhyrë duke marrë shumë prej të paraburgosurve dhe shpërndarë nëpër komisariate të tjera.



Policia e ka arrestuar atë në orët e vona të ditës së premte pas një denoncimi

Pranga ish-shefit të tenderave në Durrësit

Artan Arapi akuzohet për marrjen rryshfet të 3 milion lekëve ndaj një qytetari në Durrës, falsifikimin e dokumentave zyrtare duke nxjerrë një vërtetim pronësie të falsifikuar dhe për veprën penale të kanosjes. Arapi është akuzuar vazhdimisht se në funksionin e tij si shef i shërbimeve publike ka abuzuar me detyrën

Policia e Durrësit ka arrestuar në orët e vona të ditës së premte ish drejtorin e shërbimeve publike në Bashkinë e Durrësit Artan Arapin. Burime pranë policisë së Durrësit konfirmuan se rreth orës 22:30 të mbrëmjes së premte është arrestuar Arapi, pasi është denoncuar nga një qytetar nga Durrësi, emri i të cilit nuk bëhet publik. Sipas burimeve në polici është arrestuar edhe një person tjetër, i quajtur Rudin Tullai, i cili është 29 vjeçar. Arrestimi i Arapit, sipas policisë, është bërë pasi ai ka lëshuar një vërtetim të rremë pronësie për një qytetar përkundrejt rryshfeteve si dhe për akuzën e kërcënimit.

Arrestimi, mbahet sekret deri ditën e djeshme

Arrestimi i ish drejtorit të Shërbimeve Publike në Bashkinë e Durrësit Arapi është bërë që dy ditë më parë, por është mbajtur sekret nga ana e policisë. 35 vjeçari është prangosur në orët e vona të ditës së premte dhe është bërë publik vetëm paraditen e djeshme. Ai është arrestuar në shtëpinë e tij në lagjen 17 të qytetit bregdetar.

Arrestimi pasi kërcënoi një qytetar

Policia ka realizuar operacionin e arrestimit të Artan Arapit, pasi është denoncuar nga një qytetar i Durrësit për kërcënim. Prokuroria ka regjistruar kallëzimin e personit në fjalë dhe ka lëshuar urdhër-arrestin për Arapin. Policia i ka vënë prangat Arapit dhe e ka pyetur mbi kërcënimin që i ka bërë qytetarit durrsak. Sipas policisë kërcënimi lidhet me një vërtetim pronësie të lëshuar nga Arapi. Pasi ka arritur të falsifikojë vërtetimin e pronësisë ai ka kërcënuar djalin e personit që ka marrë vërtetimin, së bashku me persona të tjerë, njëri prej të cilëve është arrestuar.

Vërtetimi i pronësisë, Arapi përfitoi 3 milion lekë

I gjithë konflikti mes qytetarit durrsak dhe ish drejtorit të shërbimeve publike në Bashkinë e Durrësit duket se ka filluar pas marrjes së një sasie të madhe lekësh. Qytetari, emri i të cilit mbahet sekret për arsye sigurie, i ka kërkuar Artan Arapit që t'i nxirrte një vërtetim pronësie, për një pronë të tij. Arapi nuk ka nxjerrë një vërtetim origjinal, por e ka falsifikuar atë. Djali i personit që kishte porositur vërtetimin dhe që i kishte dorëzuar Arapit 3 milion lekë, ka shkuar dhe është ankuar për parregullsinë e vërtetimit. Ish shefi i tenderave në bashki së bashku me persona të tjerë kanë kërcënuar djalin dhe e kanë përzënë. Ky i fundit ka bërë menjëherë denoncimin e nevojshëm, dhe Arapit i janë vënë prangat.

Prokuroria e akuzon për tre vepra penale

Burime jozyrtare në Prokurorinë e Durrësit thonë se Arapi mund të akuzohet për tre vepra penale. Njëra prej veprave penale është ajo e kanosjes, që lidhet me kërcënimin që ai në bashkëpunim me persona të tjerë kanë bërë mbi një qytetar. Vepra e dytë penale është falsifikimi i dokumentave zyrtare që lidhet me nxjerrjen e një vërtetimi pronësie të falsifikuar. Ndërsa vepra e tretë penale është ajo e mitëmarrjes, që ka të bëjë me marrjen e tre milion lekëve, ndërkohë që ai është funksionar i Bashkisë së Durrësit.

Arapi bëri karrierë me Miri Hotin

Artan Arapi është emëruar në vitin 1998 sekretar i Bashkisë së Durrësit. Me urdhër të ministrit Arben Malaj ai shkarkohet, pasi kishte goditur ish kreun e tatimeve në vitin 1997. Me ardhjen në krye të bashkisë së Durrësit të Miri Hotit, ai rikthehet në Bashki. Këshilltarët e opozitës në Këshillin Bashkiak e kishin akuzuar atë vazhdimisht për korrupsion e mitëmarrje. Pretendimet e opozitarëve në Këshillin Bashkiak nuk janë arritur të vërtetohen. Ata i kanë kërkuar Miri Hotit shkarkimin e tij, por Hoti thoshte se Kontrolli i Lartë i Shtetit nuk kishte gjetur asnjë shkelje nga ky person.

Arapi kishte dhunuar edhe gazetarin Mustaqi

Artan Arapi, ndërsa ishte në postin e drejtorit të shërbimeve publike në Bashkinë e Durrësit, ka goditur për një shkrim, gazetarin më të vjetër të qytetit bregdetar Thanas Mustaqi. Ish kryetari i bashkisë së Durrësit nuk reagoi për këtë dhe nuk e largoi nga posti në Bashki. Rasti i dhunimit të gazetarit u pasqyrua edhe në raportin e Departamentit të Shtetit Amerikan për lirinë e mediave në Shqipëri.

Një vit më parë iu bë atentat me bomë

Një vit më parë Artan Arapit i është bërë një atentat me bombë, por ka shpëtuar pa u dëmtuar. Policia nuk e pasqyroi një fakt të tillë. Bomba ishte vënë para banesës së tij. Ajo ka shpërthyer duke shkaktuar disa dëme materiale jashtë banesës, por Arapi nuk ishte prekur. Partitë opozitare në qytetin bregdetar e kanë akuzuar Artan Arapin se në vitin 2001 ishte implikuar në vjedhjen e votave në qytetin bregdetar. Konkretisht ai u akuzua për vjedhjen e votave në zonën 26 duke favorizuar Gaz Bizhgën në marrjen e zgjedhjeve.

Deri dy ditë më parë Artan Arapi punonte si inspektor në zyrën e shërbimeve publike në bashkinë e Durrësit.

Artur Llana


Tema