Al Kaida godet Arabine Saudite.

[kolombi]

Al Kaida godet Arabinë Saudite -

Të paktën 16 persona të huaj përbëjnë bilancin provizor të sulmeve të kryera nga njerëz të dyshuar si militantë islamikë në qytetin naftëmbajtës saudit, Al Khobar, 250 kilometra në veri-lindje të kryeqytetit Riad, në gjirin Persik, një prej qendrave më vitale të sektorit të naftës në botë.
Lajmin e ka bërë të ditur televizioni i Katarit, “Al Xhazira”, sipas të cilit ndër viktimat janë disa qytetarë amerikanë, ndërkohë që disa të tjerë janë marrë peng në një kompleks rezidencial. Burime të sigurisë së Arabisë Saudite kanë dhënë informacionet e para për atentatet: sulmi i parë ka pasur në shënjestër ndërtesën e “Petroleum Center” në al Khobar. Dy makina me shenja ushtarake kanë hyrë në kompleks, ku dëshmitarë kanë parë trupat e një fëmije 9 vjeç dhe të një egjiptiani. Më pas, atentatorët janë drejtuar në dy komplekse ndërtesash, në të cilat gjenden zyrat e kompanivë të naftës, “Rami” dhe The Oasis”, si dhe punëtorë të tyre. Pikërisht, në ndërtesën e fundit janë mbajtur peng disa persona. Pesë libanezë, të cilët u rrëmbyen në orët e paradites, janë lëshuar. Nuk dihet ende se sa pengje janë në duart e sekuestruesve.
Al Kaida merr përgjegjësinë
Pak orë pas nisjes së sulmeve, të ndodhura në orën 7.00 (6.00 në Shqipëri), në një faqe interneti është shfaqur një komunikatë, e cila i atribuohet Al Kaidës. Në këtë komunikatë merret përsipër përgjegjësia e sulmeve të djeshëm në Arabinë Saudite nga organizata e drejtuar nga Osama Bin Ladeni. Dokumenti mban firmën e “rrjetit të Al Kaidës në gadishullin arabik”. “Falë vullnetit të Zotit- shkruhet në këtë mesazh- një skuadër e muxhahedinëve tanë heroikë ka sulmuar sot (dje) kompanitë amerikane…që janë të specializuara në industrinë e naftës dhe që vjedhin pasurinë e myslimanëve”. Faqja e internetit, në të cilën është botuar deklarata e marrjes së përgjegjësisë, i përket një disidenti saudit. Në këtë faqe janë shpërndarë edhe më parë të tilla komunikata. Disa javë më parë, një grup militantësh vrau pesë qytetarë perëndimorë në kompleksin industrial të Yanbu-së, gjithnjë në Arabinë Saudite, dhe një gjerman mbeti i vrarë javën e kaluar në kryeqytetin Riad. Të enjten, në një faqe interneti islamike, u shfaq një komunikatë, e cila i atribuohej liderit të rrjetit terrorist të Al Kaidas në Arabinë Saudite, Abdel Azizi al Mokrin. Në këtë komunikatë kërkohej nga mbështetësit e rrjetit terrorist që të niste një lloj “gueriljeje urbane” në mbretërinë saudite.
Lufta për naftën
Strategjia e re e Al Kaidës është goditja e zonave të terminaleve naftëmbajtëse, të cilat janë të lidhura me Shtetet e Bashkuara ose që janë në duar të amerikanëve. Atentati i djeshëm në Khobar është i dyti brenda një muaji në Arabinë Saudite kundër perëndimorëve që punojnë në këtë industri jetike në botë. Në ditën e parë të muajit, më 1 maj, një sulm i përgjakshëm është verifikuar në Yanbu, qytet industrial në brigjet e Detit të Zi. Tre terroristë, të cilët më pas u vranë nga forcat e sigurisë saudite, hapën zjarr kundër një grupi të huajsh. Bilanci është shumë i rëndë: tre inxhinjerë amerikanë, dy britanikë dhe një roje saudite, kanë mbetur të vrarë. Sulmi është kryer në pronën e kompanisë “Exxom Mobil”.


KRONOLOGJIA
Arabia Saudite, atentatet kundër të huajve

Arabia Saudite prej kohësh është në qendër të aksioneve terroriste, pjesa më e madhe e të cilave është e lidhur me Al Kaidën
20 shkurt 2003: Në Riad, një britanik që punonte për industrinë ushtarake “Bae Systems” vritet nga një saudit me armë zjarri
1 maj 2003: Një amerikan që punonte në një bazë detare në lindje të Arabisë u plagos nga të shtënat e një të panjohuri
12 maj 2003: Grupe të armatosura, në bordin e kamionëve të mbushur me tritol, sulmojnë tre komplekse rezidenciale të Riadit (Al Hamra, Cordoval dhe Gedeval), ku banonin qytetarë amerikanë dhe të tjerë perëndimorë. Sipas burimeve qeveritare, atentati i trefishtë, i kryer nga 15 kamikazë, shkaktoi vdekjen e 35 personave (ndër të cilët 9 amerikanë) dhe plagosjen e mbi 200 të tjerëve.
8 nëntor 2003: Një autobombë me dy kamikazë në bord, shpërthen në kompleksin rezidencial të Muhajas, në periferinë perëndimore të Riadit. Në shpërthim mbetën të vdekur 18 persona të kombësive të ndryshme, ndër të cilët edhe 5 fëmijë.
1 maj 2004: Në qytetin portual të Yanbu-së, një prej terminaleve më të fuqishëm naftëmbajtës, 350 kilometra në veri-lindje të Riadit, të paktën 4 terroristë sulmojnë zyrat e grupit zvicerano-suedez “Abb Lummus” dhe më pas banesat e punëtorëve. Bilanci është 10 të vdekur, ndër të cilët 2 amerikanë, 2 britanikë dhe një australian

Ballkan, 30/05/2004

[kolombi]

Arabi, militantët sulmojnë perëndimorët.


Konfirmohen 7 perëndimorë dhe 9 sauditë të vrarë. Të huajt: “Ky është një sulm ndaj sektorit të naftës”
Militantë të lidhur me “Al-Kaedën” kanë vrarë dje, të paktën 9 sauditë dhe shtatë të huaj në një seri sulmesh në qytetin industrial të naftës, Khobar. Më pas ata kanë marrë disa pengje dhe janë larguar, ndërsa forcat e sigurimit u janë vënë pas. Burimet saudite të sigurimit thanë se një amerikan, një britanik, një egjiptian, dy filipinas, një indian dhe një pakistanez kanë vdekur gjatë sulmeve të djeshme në kompleksin e të huajve në qytetin lindor të Khobarit, së bashku me dy civilë sauditë dhe shtatë anëtarë të forcave të sigurimit. “Unë mund të konfirmoj vdekjen e të paktën një amerikani, por atje ka edhe të tjerë”, -tha dje një zëdhënës i ambasadës amerikane, i cituar nga “Rojteri”. Forcat saudite më pas nisën një operacion duke hyrë në kompleksin e ndërtesave në Khobar, për të bërë të mundur lirimin e pengjeve. Ambasadori libanez në Arabinë Saudite njoftoi se ishin liruar pesë pengje libaneze. Por ai shtoi se nuk e dinte nëse kishte pengje të tjera. Është folur për një numër të madh burrash, grash dhe fëmijësh, të cilët u morën peng nga personat e armatosur, por nuk përmendet numri i saktë. Ndërkohë në një faqe interneti, rrjeti i “Al Kaedës” ka marrë përsipër sulmet e kryera dje në Arabinë Saudite. Ky grup i fajësuar për sulmet e 11 shtatorit 2001 në SHBA, ka njoftuar se do të destabilizojë Arabinë Saudite - monarkinë aleate të SHBA-ve dhe një nga eksportuesit më të mëdhenj të naftës në botë.
Dëshmitarët thanë se një kufomë po tërhiqej nëpër rrugë, siç dukej nga militantët. Ky është sulmi i tretë kundër të huajve në më pak se një muaj në vendlindjen e Islamit. Televizioni arab “Al-Arabyia” dha pamje të një burri me tiparet e një perëndimori, i shtrirë në makinën e tij, siç duket i qëlluar për vdekje nga njerëz të armatosur. Sulmi kryhet dy ditë pasi lideri i “Al-Kaedas” në këtë mbretëri, Abdulaziz al-Muqri, ka bërë publik një plan beteje për luftën urbane guerile, duke specifikuar edhe hapat që duhet të marrin militantët për të rrëzuar familjen mbretërore. Selia e sulmuar përfshin zyrat e firmave me të mëdha perëndimore të naftës. Aty ndodheshin zyrat e shërbimeve të naftës dhe shërbenin edhe si vend strehimi për të punësuarit në këto firma. Gjithashtu bëhet e ditur se militantët kanë vrarë edhe një fëmijë. Disa punonjës të kompanive “Shell”, “Honeywell” dhe “General Electric” jetonin në këto ndërtesa. Ndërsa rezidenca prej pesë yjesh “Oasis”, strehonte drejtuesit ekzekutivë nga kompanitë më të mëdha të naftës “Royal Dutch/Shell”, “Total” dhe “LUKOIL”, të cilët zbatojnë projektet e gazit. “Ky është një sulm i qartë kundër sektorit të naftës”, -tha një zyrtar ekzekutiv perëndimor në kryeqytetin Riadh. “Askush nuk mund të japë një shifër të saktë të viktimave”, -tha një diplomat perëndimor për “Rojterin”.
Në fillim të këtij muaji, militantët kanë vrarë pesë të huaj në një sulm të paprecedentë në një zonë petrokimike në qytetin e Yanbu dhe kanë tërhequr trupin e një amerikani nëpër rrugë. Gjithashtu këtë muaj është vrarë edhe një gjerman në një zonë dyqanesh në lindje të Riadhit. Sulmi i fundit në Riadh ndodh pak pasi Arabia Saudite premtoi se do të rrisë prodhimin e naftës për të stabilizuar çmimet e paqëndrueshme. Po kështu, kjo ngjarje ndodh para takimit të OPEC-ut që do të zhvillohet javën e ardhshme. Mbretëria e Arabisë, aleate e SHBA-së lufton prej kohësh me militantët. Vitin e kaluar një sulm vetëvrasës, pas të cilit qëndronte “Al-Kaeda” vrau të paktën 50 vetë, përfshi nëntë amerikanë. Muajin e kaluar, ambasada amerikane në vend u bëri thirrje qytetarëve të saj të largohen nga Arabia Saudite për shkak të sulmeve të mundshme. Por ndjenjat antiperëndimore janë shtuar në këtë mbretëri veçanërisht pas imazheve të publikuara edhe nga media arabe në lidhje me abuzimet që trupat amerikane kanë kryer ndaj të burgosurve irakianë si dhe ndaj operacioneve të tankeve izraelite ndaj shtëpive palestineze.

Kronologji
Sulmet në Arabinë Saudite gjatë 2004
29 janar – Forcat e sigurimit saudit kapën një militant të dyshuar dhe të tjerë pas luftimeve në Riadh në të cilat u vranë 7 policë
15 mars – Policia saudite vrau dy militantë të dyshuar në Riadh të kërkuar nga autoritetet
13 prill- Militantët të dyshuar vranë katër policë në pikat kufitare në veri të Riadhit.
21 prill- Një makinë bombë shkatërroi një ndërtesë të forcave të sigurimit në Riadh, duke vrarë 5 vetë dhe plagosur 150 të tjerë në sulmin e parë të madh kundër qeverisë. Brigadat “Al Haramain” morën përsipër sulmin
23 prill – Policia ka vrarë një militant të dyshuar dhe një tjetër hodhi në erë veten në Jeddah, disa orë pasi tre militantë të tjerë u vranë
1 maj - Njerëz të armatosur vrasin 5 perëndimorë dhe dy policë në një breshëri sulmesh në qendrën e naftës në Yanbu.
20 maj- Katër militantë të dyshuar dhe dy policë vdiqën gjatë të shtënave në qytetin e Buraidas.




Shekulli