BE: Qeveria, kujdes me pronat dhe zgjedhjet

[land]

Shpirt Njeriu... Rrofsh per informacionin qe na sollet.
A e kuptuat se Evropa po tall poturet me shqiptaret, apo duhet ta thote troc kjo Evrope? Cfare tjeter duhet te ndodhe qe shqiptaret te kuptojne gjuhen e njerezve? Paska dhe njerez qe nuk flasin shqip, por, cudia eshte se sarkazma dhe ironia tingellokan njesoj!
Zgjedhjet e korrikut, demek na qenkan shanci i fundit per Shqiperine?!?
E kush po na e thote kete gje?
A nuk po e thote e njejta Evrope qe i tha dhe Maqedonise?
A nuk u arrit deri ne bojkotim zgjedhjesh ne Maqedoni, megjithese kercenimi i Evropes ishte i njejte me ate qe po na bejne ne shqiptareve?
A nuk e njohu Evropa mashtrimin e zgjedhjeve ne Maqedoni dhe gjithsesi Maqedonia eshte 100 kate me lart se Shqiperia ne marredheniet e saj me Evropen? E cfare i ndodhi Maqedonise? Si nuk pame dhe nuk degjuam nje kritike more amani! Apo duhet lejuar tirania sllave mbi shqiptaret, ne menyre qe ata te asimilojne sa me shume shqiptare qe te jete e mundur para se gjithe rajoni, ose me mire, ajo qe mbetet nga rajoni, te futet ne BE, dhe te sjalle si pasoje njesimin e faktorit shqiptar ne rajon?
Sa per punen e ndihmes ekonomike; pritet qe Bullgaria dhe Rumania te marrin nja 15 miljard euro para se te behen pjese e BE, ndersa koshi i plehrave te Evropes, Ballkani perendimor merr ndihma materiale ne letra format, stilolapsa, plasteline dhe breke per ministrat.
Ore une s'e kam me Evropen dhe poshtersine e saj; ajo le te beje c'te doje, por me djeg fakti qe shqiptaret nuk po hapin dot syte, dhe edhe nje pale zgjedhje te shkreta duan te na i diktojne te tjeret. Madje, e shohin Evropen si Jeruzalemin e tyre. TURP, TURP, TURP!
Le te tallet Evropa, se ne luftera etnike e ka perfundimin dhe kjo fabula e Bashkimit Evropian!

[Pride]

EDITORIALI

Dorëshkrim për konkursin “Java e Europës”

Nga Mero Baze

Dje Ministrja e Integrimit, Ermelinda Meksi, na kujtoi
se duhet të shpejtojmë të shkruajmë një shkrim, si
gazetarë shqiptarë, për Bashkimin Europian, pasi ajo
dhe partnerët europianë të Shqipërisë kanë shpallur
një konkurs në “Javën e Europës”. Tani jemi të qartë
për afatin e dorëzimit të shkrimit dhe honoraret që
marrim. E vetmja gjë që mungonte në thirrjen e djeshme
të Ministres sonë të Integrimit, ishte tema për të
cilën duhet të nderohet një gazetar shqiptar kur
shkruan për integrimin europian. Një përpjekje për të
shkruar rreth temës reale që na mban larg Europës,
është shumë e diskutueshme. Për këtë shkak unë po
shkruaj një shkrim pozitiv për integrimin e Shqipërisë
në Europë me idenë se kjo qeveri do të jetë ajo që do
të na integrojë.
Kështu që në fillim të shkrimit do të përshkruaj
shanset e mëdha që i ka dhënë kjo qeveri biznesit.
Kështu gruaja e kryeministrit shqiptar fitoi tenderin
e parë për transportin publik ndërkombëtar
Tiranë-Athinë, ditën që burri i saj fitoi mandatin e
kryeministrit. Prej asaj dite biznesi i gruas së
kryeministrit ka ecur dhe ajo ka blerë helikopterë pa
dogana, disa autobusë modernë, është duke privatizuar
stadiumin Dinamo, dhe po përpiqet të jetë e pranishme
në disa kompani sigurimesh në Tiranë. Shpejtësia me të
cilën ka ecur biznesi i gruas së kryeministrit, është
një tregues i shanseve që i ka dhënë biznesit qeveria
e integrimit.
Përparësia e madhe që ka qeveria shqiptare për t’u
përshtatur me reformat ekonomike të BE-së, duket edhe
në shembullin e Ministrit të Bujqësisë dhe Ushqimit
Agron Duka. Ai është njëkohësisht importuesi i vetëm i
sheqerit, orizit, makaronave, miellit dhe vajit nga
vendet e BE-së. Kështu që Komisioni Ekonomik ka punë
vetëm me një njeri përsa i përket ushqimit në Shqipëri
dhe ai është Agron Duka. Me të njëjtin person ata kanë
punë edhe për ushqimin e kafshëve, pasi ai është
ministër i Bujqësisë dhe importues i vetëm i
produkteve ushqimore për kafshë dhe pronar i disa
fermave me kafshë dhe shpendë në vend. Po ashtu me të
njëjtin njeri kanë punë edhe për importin e industrisë
së bardhë në vend si lavatriçe, frigoriferë,
televizorë etj.. Pra lehtësia e parë që i ofrojmë ne
BE-së është përqendrimi i importit nga vendet e BE-së,
tek një njeri i vetëm, që është dhe ministër në
qeverinë e integrimit.
Më tej është e udhës të përshkruajmë se ministrja e
Integrimit, Ermelinda Meksi, është një milionere
zyrtare, pa asnjë histori biznesi, gjë që përbën një
zhvillim të ri për vendet e Europës. Ajo zotëron
dhjetëra dyqane dhe apartamente në pronësi të familjes
së saj, pa pasur asnjë trashëgimi, përveç faktit se
burri i saj ka qenë zëvendësministër disa muaj në
vitin 1991, kurse ajo ka qenë 8 vjet ministre
socialiste.
Më tej akoma një përshkrim pozitiv është fakti që
kompanitë e mëdha shtetërore dhe administratorët e
mëdhenj shtetërorë po i çojnë kompanitë, ose drejt
falimentimit për t’i privatizuar me pak lekë, ose
drejt një menaxhimi piramidal, ku blihet shtrenjtë,
shitet lirë dhe dilet me fitim duke gjobitur
qytetarët.
Shtypi është po ashtu një arritje e madhe. Rreth 80
për qind e pronarëve të gazetave janë ndërtues të
lidhur me qeverinë, e cila siç dihet është dakord në
parim me integrimin në BE dhe kështu shtypi nuk ka
arsye të jetë kundër. Duke prishur tregun e shtypit
dhe duke e futur atë nën kontroll, qeveria ia ka dalë
të mos fajësojë veten për mosintegrimin në BE, por
t’ia lërë BE-së këtë përgjegjësi.
Drejtësia po ashtu ka bërë hapa përpara, pasi tashmë
Prokurori i Përgjithshëm nuk lejon askënd të ngrejë
zërin për korrupsion apo trafik, pasi del në ekran dhe
akuzon ata që shkruajnë turpe të tilla. Rasti i fundit
është kërkesa e tij këmbëngulëse për t’i hequr
imunitetin Nikoll Lesit, pse ka publikuar në Kuvend
një dosje komprometuese për kryeministrin lidhur me
trafikun e drogës dhe armëve në vend.
Dhe në fund mbeten zgjedhjet. Ka dhjetë vjet që në
këtë vend nuk bëhen zgjedhje të lira dhe shkaku është
se disa forca të shoqërisë duan të rrëzojnë nga
pushteti qeverinë. Për të shmangur këtë, qeveria ka
angazhuar një sërë biznesmenësh dhe njerëzish të
pasuruar nga lidhjet direkte me kryeministrin, të
kandidojnë në zona të vështira elektorale, me shpresë
se ata do të përdorin paratë e tyre për të blerë
pushtetin që i duhet qeverisë për të na integruar në
Europë. Po ashtu qeveria ka marrë masa që dhe nëse nuk
ka më shumë se 30 për qind të votave, 21 për qind t’i
marrë duke rritur artificialisht votat e partive
satelite me skemën e Dushkut. Qeveria e cila është e
angazhuar që të integrojë vendin në Europë dhe në
strukturat euroatlantike, është e vendosur të ruajë
pushtetin e saj për të mirë të Integrimit. Ajo pranon
që zgjedhjet të prishen, por kurrë të humben. Qeveria
vazhdon të mbetet e angazhuar për zgjedhje të lira me
kusht që ato të mos e rrëzojnë atë nga pushteti; nëse
dhe ky kusht plotësohet, atëherë qeveria do të pranojë
të integrohemi në Europë. Mbetet pastaj të vendosë
Europa nëse do të na pranojë si popull, që i kemi
deleguar biznesin Agron Dukës, trafikun kryeministrit
dhe gruas së tij, zgjedhjet gardianëve të qeverisë,
dhe reformat një gruaje që çuditet pse BE-ja nuk i
ngjan Bashkimit Sovjetik. Unë po e paraqes njëherësh
këtë shkrim për konkursin “Java e Europës” dhe nëse ka
ndonjë përgjigje nga juria, le të më kthejnë përgjigje
tek adresa ime e e-mail-it merobaze@..., ose
në redaksi.

[Albo]

paralajmerimi

Takimi në Bruksel, Priebe kërkon vëmendje për tokat në bregdet


BE: Qeveria, kujdes me pronat dhe zgjedhjet

bledar hoti

Bashkimi Evropian i kërkon qeverisë shqiptare të ketë kujdes me procesin e kthimit të pronave, si dhe të shpejtojë procesin për kthimin dhe kompensimin e pronave.

Në takimin e djeshëm të zhvilluar në Bruksel në mes grupit të përbashkët konsultativ Shqipëri-BE i është vënë një rëndësi e madhe procesit për kthimin dhe kompensimin e pronave në Shqipëri. Në raundin e 12 të negociatave të grupit të përbashkët, Task Force, të cilët drejtohen nga Reinard Priebe për KE-në dhe ministrja e Integrimit, Meksi për palën shqiptare është diskutuar edhe për çështjen e zgjedhjeve parlamentare të 3 korrikut. Sipas drejtorit për Ballkanin Perëndimor në Drejtorinë e Përgjithshme të Marrëdhënieve me Jashtë të Komisionit Evropian, Priebe, i gjithë procesi zgjedhor do të jetë nën një vëzhgim të plotë nga ana e Bashkimit Evropian. Axhenda e takimit përfshinte çështjet që lidhen me përgatitjen e zgjedhjeve parlamentare të 3 korrikut, liria e shprehjes dhe e medias, procesi i Kthimit e Kompensimit të Pronave, si dhe problemi i krimit të organizuar, lufta kundër korrupsionit dhe pastrimit të parave.

Pronat
Në takimin e djeshëm që ishte i 12-i përbënte raundin e VI të negociatave Shqipëri-BE, pala komunitare ka bërë disa pyetje në lidhje me ecurinë e procesit për zbatimin e ligjit “Për kthimin dhe kompensimin e Pronave”. Kryetari i Komitetit Shtetëror për Kthimin dhe Kompensimin e Pronave, Sokrat Sina në këtë takim ka theksuar se: “Ende nuk ka ndonjë faturë financiare dhe se sa do të kushtojë i tërë ky proces për shtetin shqiptar”. Ndërkohë që Priebe ka vlerësuar, sipas burimeve, edhe miratimin e bërë së fundi nga ana e Kuvendit, të Metodikës për çmimin e kompensimit të pronave. Gjithashtu Sina ka shprehur rezerva edhe në lidhje me mungesën e kushteve të punës të institucionit që ai drejton. Pala shqiptare raportoi se është evidentuar harta e pronave në zonat rurale e urbane dhe se mbështetja financiare për kompensimin e pronave është në rritje nga një vit buxhetor në tjetrin. Pala komunitare ishte e interesuar veçanërisht në drejtim të regjistrimit të pronave në zonat rurale, e sidomos në ato bregdetare.

Zgjedhjet
Për përgatitjen e zgjedhjeve përpara ekspertëve të KE-së ka folur ministrja e Integrimit, Ermelinda Meksi. Sipas saj qeveria ka marrë të gjitha masat për këtë proces, duke përmendur edhe nënshkrimin së fundmi të Kodit të Etikës, mes partive politike shqiptare, ku në plan të parë është pranimi i rezultatit të zgjedhjeve. Priebe nga ana e tij vlerësoi progresin e arritur, por theksoi se procesi zgjedhor do të ndiqet me kujdes deri në realizimin e plotë të tij. Në ditën e dytë, bisedimet dypalëshe do të fokusohen për produktet e peshkut, në negocimin e disa neneve të lëna hapur ose dhe disa prej tyre të mbyllura në parim në raundet e mëparshme teknike, ku parashikohen periudha tranzitore në kapitujt e Drejtësisë dhe Punëve të Brendshme, të bashkëpunimit rajonal, të kapitullit mbi lëvizjen e punëtorëve, vendosjen, ofrimin e shërbimeve, përafrimin e legjislacionit, lëvizjen e lirë të mallrave si dhe të politikave sektoriale e bashkëpunimit financiar. Gjithashtu pjesë e bisedimeve do të jenë dhe tre protokolle, përkatësisht Protokolli i Produkteve Bujqësore të Përpunuara, Protokolli i Hekurit dhe Çelikut si dhe Protokolli mbi Rregullat e Origjinës.



Pyetjet e takimit te perbashket

Sa është fatura totale financiare e qeverisë shqiptare për kompensimin e pronave?

Sa është toka e lirë në dispozicion të pronarëve për t’u përdorur për kompensim fizik?

Si po procedohet për procesin e kthimit dhe të kompensimit të pronave aktualisht?

Deri më tani nuk është dhënë një faturë financiare se sa do të kushtojë procesi i kompensimit financiar të pronave

Tokë e lirë është paraqitur nga studimi i vitit 2003. Presim që qeveria të japë një qëndrim përfundimtar për tokat e lira

Komiteti, pas ngritjes së 12 komisioneve vendore ka nisur procesin për kthimin e tokave të lira të pronarëve



SHBA: Qeveria e re nga zgjedhjet demokratike

Shtetet e Bashkuara të Amerikës shprehen se zgjedhjet e ardhshme parlamentare të 3 korrikut duhet të jenë të pranuara nga të gjitha partitë politike shqiptare. Zv.ndihmësja e sekretares së shtetit, Stivens në lidhje me vizitën e saj në Shqipëri u shpreh se: “Nga shoqata joqeveritare në vend vura re një vendosmëri të madhe, që do të ketë zgjedhje të rregullta në kuptimin që duhet të jenë të pranueshme nga vetë shqiptarët. Mendoj se kjo është më e rëndësishmja”. “Sigurisht është e rëndësishme që OSBE dhe vëzhguesit ndërkombëtarë, Shtetet e Bashkuara dhe Evropa të arrijnë në përfundimin që zgjedhjet janë të lira dhe të ndershme, por më e rëndësishmja është që pas zgjedhjeve njerëzit të kenë bindjen se mund të kenë një qeveri, e cila pavarësisht se nuk është e votuar nga të gjithë gëzon legjitimitetin që mund të vijë vetëm nga zgjedhjet demokratike”, theksoi Stivens.

Islami: BE, paketë të qartë integrimi për Ballkanin

Ministri i Punëve të Jashtme, Kastriot Islami, gjatë një takimi me ministrat e Punëve të Jashtme të vendeve anëtare të Programit për Bashkëpunim mes vendeve të Evropës Juglindore në Bukuresht kërkoi që Bashkimi Evropian të konceptojë qartësisht një paketë integrimi për vendet e këtij rajoni, duke rritur shpejt sasinë dhe cilësinë e këtij procesi. Sipas njoftimit të zyrës së shtypit të ministrisë, në fjalën e tij ministri Islami u ndal në rëndësinë që paraqet SEECP-i, si zëri i rajonit dhe partner i rëndësishëm në marrëdhëniet me organizmat dhe nismat e tjera ndërkombëtare si dhe si një forum i rëndësishëm politik për shkëmbimin e mendimeve në të gjitha fushat dhe nivelet. Ai theksoi se: “Procesi i negociatave për statusin përfundimtar të Kosovës, duhet të fillojë menjëherë pas vlerësimit pozitiv të standardeve, që do të bëhet në mes të këtij viti, duke pasur parasysh arritjet progresive që janë evidentuar atje”.